1-2 Taa, ero yinhîrî on wara kekn̂e hara Kporin komo Moises ya, Owyanî ro me ciicoko poturme ewruxapu komo kîrkomo. Ero wa ciicoko ahnoro awosîn komo yemasîn yakan me ewruxapu komo kîrkomo. Ero wa xa marha ciicoko awoh komo xîkrî hara, poturme ewruxapu komo. Owyan me naxe noro yipu komo, kekn̂e Kporin komo Moises ya.

3-4 Ero yinhîrî on wara tak kekn̂e Moises Ixaw Yana komo ya, Ai, oyakno komo, On ponaro men ehcoko kaamo ponaro. Exitu poi amohtoponhîrî komo on, ayopo so awantoman̂enhîrî komo yai awetowtoponhîrî komo on. Ero ke ponaro ehcoko. Kar̂pe xa cehtopo n̂enpekn̂e Kporin komo Exipsiu komo yîwîrîmacho ke. Ero ke tak on ponaro ehcoko. On yimaw roro wahrututpamnoxapu tokuhra ro mak ehcoko awru kom ha. On kaamo po mîmokyatken̂e Exitu poi. On nuun̂i po mîmokyatken̂e Abibe po ha.

5 Amn̂e tak Kananew komo yekenho pona awar̂atu so Kporin komo. Etew komo yekenho marha mîn, Amohew komo yekenho marha, Epew komo yekenho marha, Xebusew komo yekenho marha. Noro yipu komo yekenho pona awar̂atu so Kporin komo tîmtapotachonhîrî yaw roro rma. Aporin pen komo ya kekn̂e ero yaw roro rma awar̂atu so. Paaka mown pen nasî iito mer̂pora ro makî, wen pen marha. Iito awexitaw so on yukukmacho me meseresmexe yicimn̂ipuntaxera.

6 Wahrututpamnî mak tohcoko iito yaake kaamo, 7. 7-nhîrî po tak eseresmacoko Kporin komo poko awahwotacho komo me.

7 Wahrututpamnî mak tohcoko 7 kaamo. Ahyaw so exihra ro mak n̂expe wahrututpamnoxapu awru komo ero yimaw, Wahrututpamnî Tohtopo yimaw. Wahrututpamnotopo meero exihra ro mak n̂expe amîn komo yaw ero yimaw.

8 Ero yimaw on wara kacoko amumuru komo ya, On wara ceseresmexe oyowtoponho ponaro kehtome so. Kar̂pe xa cehtopo n̂enpekn̂e Kporin komo Exitu poi oyekyataw, kacoko tak yîwya so.

9 Karita mimiyaxe awemeknu komo poko anarimaw ahce na ponaro awehtome so. Anarimaw karita mimiyaxe apewo so marha ahce na ponaro awehtome so. Ero wa xa marha wahrututpamnon tohcoko Kporin komo ya apanatanmetopo komo poko amtapotachome. Exitu poi awekyatken̂e so Kporin komo. Kar̂pe xa cehtopo n̂enpekn̂e iitono komo yemetanmekrî ke.

10 Ero ke ero wara roro eseresmacoko yicimn̂ipuntaxera. Yukukmacho me enmapuche yukukmacoko roro, kekn̂e Moises yîwya so.

11-12 Taa, on wara tak maxe amn̂e, Kananew komo yekenho pona tak awar̂axe so Kporin komo. Ero nîmyas awya so tîmtapotachonhîrî yaw roro rma. On wara kekn̂e awya so, aporin pen komo ya marha, Yaaro xa tan wîîkesî towîhnî me ro mak, iitono tak wîmyas awya so amn̂e, kacho. Ero wa kachonho yaw roro tak nîmyasî. Ero ke iito awexiche so tak Kporin komo yanton me ciicoko amxîkrî komo poturme ewruxapu komo. Kaan yok me marha ciicoko awoh komo poturme ewruxapu ahnoro. Kîîrî me ewruche ero wa ciicoko.

13 On wara ciicoko awoh komo buhu poturme ewruxapu, kîîrî me ewruche noro tak epemacoko kahn̂eru ke. Kahn̂eru xîkîtho waihkacoko noro yepetho me ciki. Epema xera awexitaw so tko buhu xîkîtho pen yîpîmîxwocoko waihkachome. Amumuru komo xa epemacoko poturme ewruxapu komo.

14 Taa, on wara na ketu amn̂e amumuru komo awya so, Apa, ahce kacho buhu xîkrî mepeme ha? ket awya so. Ero wa ketaw on wara eyuhcoko, Okopuci, pahxa Exitu po xakn̂e amna. Iitono komo yanton me amna xakn̂e etowîn me ro mak okwe. En̂exa tko amna n̂ekyakn̂e Kporin komo. Kar̂pe xa cehtopo n̂enpekn̂e amna towtopo poko.

15 Amna yahsîpînka xera ro makî ka xakn̂e Paraw pen okwe. Ero ke Exitu pono mumutho pen komo tak waihkekn̂e Kporin komo, poturme ewruxapu pen komo ahnoro. Tooto mumutho pen waihkekn̂e, okno xîkîtho pen marha. Ero ke okno xîkîtho pen ow waihkesî Kporin komo ya tîmsom me. Poturme ewruxapu wîmyasî yîwya kîîrî me ewruche. Ero warahra reha wiir̂as omumuru, poturme ewruxapu. Noro yipu wepemesî waihkara oyehtome, kacoko yîwya so, kekn̂e Kporin komo Moises ya.

16 Ero wa tasî Kporin komo ponaro xa kehtopo me. Karitî me ro mak n̂esenpekn̂e Exitu poi amna yekyataw. Ero wa amna yehtopo poko yîtwen̂ekarîntara ro mak kehtopo mîn ha. Kemeknutawno wara nasî ero wa kacho, kpewo so yimixapu wara marha. Ero ponaro kehtome so Kporin komo ya tîmyaxe poturme ewruxapu komo, kekn̂e. Ero wa kekn̂e Moises Ixaw Yana komo ya.

17 Taa, on wara xatken̂e Ixaw Yana komo Paraw ya tahsîpînkache so, esama yaw tak Kaan naar̂akn̂e. Piristew komo yesamarî yaw arîhra xakn̂e. Mooxeno pîn mîn esama, wara rma ero yaw n̂examro yarîhra xakn̂e. On wara tî kekn̂e Kaan, Waapa komo n̂een̂axe ero yaw tîcetaw so. Noro yipu komo yenîche yîwya so anarme men nîhtînoyaxe hara Ixaw Yana komo. Exitu pona n̂etîramexe hara kica, kekn̂e.

18 Wow kacho yaw makî tko n̂examro naar̂akn̂e, pohnîntari okyo. Tuuna wece makî tî aano n̂iir̂akn̂e Cucurem wece ha. Tuwuhreke cetken̂e Ixaw Yana komo Exitu poi. Ero wa cetken̂e Ixaw Yana komo.

19 Cetaw so Xose pen yocho narpekn̂e Moises Ixaw Yana komo ya. On wara tî kekn̂e Xose pen pahxa Ixaw Yana komo ya, Pahxaro tak awar̂axe so Kaan Exitu poi. Awcetaw so oyocho men aacoko, kekn̂e tî yîwya so. Taa, ayochîrî naar̂asî amna, kacoko owya yaaro xa cemaro pîn me ro mak, kekn̂e tî yîwya so. Ero ke ero wara rma tî ketken̂e Xose ya. Ero ke cetaw so tak noro pen yocho narpekn̂e Moises yîwya so.

20 Taa, Sukoci poi tak cetken̂e Ixaw Yana komo. Amn̂e tak n̂etakriyatken̂e Etan pona hara axawa imo yemyatwono pona.

21 Kporin komo rma cekn̂e Ixaw Yana komo poturme. Katpape cetaw so kaweresî chew tî cekn̂e Noro, patawno chew. Esamarî komo yenpon̂e me tî cekn̂e. Kosope Kaan xakn̂e wehto chew hara. Wehto tak xakn̂e hara patawno rma. Weipono rin̂e me xakn̂e kosope. Ero wa xakn̂e Ixaw Yana komo yaan̂e me katpanaw cetaw so, kosope marha.

22 Kaweresî towîhra xakn̂e Kaan patawno. Katpanaw roro iito xakn̂e. Wehto marha towîhra xakn̂e patawno. Kosope roro iito xakn̂e. Ero wa aano n̂iir̂akn̂e Kaan. Ero wa xakn̂e.