1-2 Taa, ero yinhîrî on wara kekn̂e Kporin komo Moises ya, On wara kasko Ixaw Yana komo ya, Wow kacoko tak ha. Miya kaikatko Pi-Airoci panaka tak ha. Mikitoro mehxa awetarî komo ciicoko. Tuuna imo xehxa ciicoko ha. Emtaco po nasî Baaw Sepon hara. Iina kaikatko etakriso tuuna yecihtaka rma.

3 On wara kesî Paraw amn̂e, Ixaw Yana komo n̂esewkukmexe mak cesamarî komo poko. Cewahkotoso tak naxe axawa imo ke, kesî.

4 Paraw ropotarî tak wiir̂asî ceipuru wara xa hara. Ero ke Ixaw Yana komo yahsîso hara mokyasî. Ero yimaw Paraw yopono me ro mak oyehtopo wenpesî, noro sowtatun komo yopono me oyehtopo marha. Ero warai me kesenpesî tîyopono me tak ohtînotome Exipsiu komo ya, Kporin komo xa Mîk ham, ponaro Ixaw Yana komo yehtopo, kachome yîwya so, kekn̂e Kaan Moises ya. Taa, ero ke tak wow ketken̂e tak Ixaw Yana komo. Ero wa cetken̂e.

5 Taa, ero yimaw totopo komo takî tî n̂encekn̂e Exipsiu komo kayaritomon, Ixaw Yana komo n̂emahciyaxe okwe, kacho tî n̂encekn̂e. Ero yentache anarme takî tî n̂esehtînoyakn̂e Paraw, maywen komo marha. Ixaw Yana komo yahsî xe xa hara tî xatken̂e kica. On wara tî ketken̂e, Ahce kacho Ixaw Yana komo tahsîpînkace hara okwe? Kantonînhîrî komo cma re mîkyam xatken̂e okwe, ketken̂e tî.

6 Ero ke tîtararan potkoso takî tî tooku n̂imipekn̂e Paraw kawaru anton komo ya totohme Ixaw Yana komo yahsîso hara. Tmaywen komo tî naar̂akn̂e sowtatu kom ha.

7 Mer̂pora naar̂atken̂e tarara 600 yakenon ha tî. Kir̂wanî komo mîn xakn̂e tarara. Ahnoro makî tî naar̂atken̂e Exitu pono tarara. Sowtatu yantoman̂e komo tî xatken̂e tarara yaw so aan̂e me.

8 Ero wa xa hara tî Paraw ropotarî n̂iir̂akn̂e Kporin komo, ceipuru wara xa hara. Ero ke Ixaw Yana komo yahsîso tî cekn̂e. Taa, on wara ka cetken̂e Ixaw Yana komo, erasîra ro makî ka cetken̂e Exitu poi.

9 Exipsiu komo tko mokyatken̂e ahsîso hara okwe. Paraw tararan yaw mokyatken̂e ahnoro, kawaru marha tî n̂ekyatken̂e ahnoro noro yoku. Sowtatu marha xatken̂e Paraw yakro. Anarî komo xakn̂e kawaru mkaw so. Anarî komo mokyakn̂e tîhtarî po so mak. Ero wa mokyatken̂e Ixaw Yana komo yahsîso hara. Cetarî komo yaw exitaw so Ixaw Yana komo, mokyatken̂e tak Paraw komo. Pi-Airoci panaw xatken̂e, Baaw Sepon yemtacho po ha. Tuuna imo yecihtaw rma xatken̂e. Iito exitaw so mokyatken̂e.

10 Ero yinhîrî tak Paraw komo mokyatken̂e meyehra n̂he. Ero yimaw tak n̂examro n̂een̂atken̂e Ixaw Yana komo twece so mokrî komo kopi. Ero ke n̂eraswatken̂e ro mak. Kporin komo yakro nîmtapowatken̂e cerewre ro mak.

11 On wara marha xatken̂e Ixaw Yana komo kica, Moises pen tak n̂eiyatken̂e okwe. On wara ketken̂e yîwya, Ahce kacho amna mekye xiya axawa imo pona kica? Exihra katî xakn̂e amna yokoputho yahrutopo mînto Exitu po? Ero ke na amna mekye xiya amna waihtome tak axawa pona mak kica. Ahce kacho amna mekye Exitu poi okwe?

12 Ero wara rma amna kekn̂e awya Exitu po rma kexitaw so. Amna arîhra ro mak esko. Exipsiu komo yanton me rma wa nas amna, kekn̂e amna awya. Kir̂wan̂he rma amna xakn̂e Exipsiu komo yanton me. Kicicme xa nas amna waihtopo tan axawa imo po kica, ketken̂e. Ero wa tî ketken̂e Moises ya okwe.

13-14 On wara tko tî n̂examro n̂eyukyakn̂e Moises, Oyakno komo, erasîra ehcoko. Ececetocoko mak, ahna na tohra. Kporin komo ya akurunpetopo komo tak meen̂axe oroto. Kar̂pe xa cehtopo n̂enpes awya so. Oroto mak meen̂axe Exipsiu komo. Amn̂e n̂examro yenîhra ro mak tak maxe, pîra ro mak. Kporin komo xa nar̂mesî. Ero kek tîtken̂e mak ehcoko, kekn̂e tî.

15 Ero yinhîrî on wara tî kekn̂e Kporin komo Moises ya, Ahce kacho Okwe okwe, mîîke owya? On wara mak kasko Ixaw Yana komo ya, Etocoko tak pataw roro rma, kasko yîwya so, kekn̂e tî.

16 Ero wa kache yîwya so awamoyin ke cemyarke etamoyankakî tak tuuna imo yepoi. Ero wa kasko tuuna yîraconkachome. Ero yinhîrî tak Ixaw Yana komo cexe tuuna yotari rma. Yarinho pore cexe, turpem pore.

17 Ceipuru wara tko wiir̂asî Exipsiu komo ropotarî. Ero ke Ixaw Yana komo wenari mokyaxe. Ero wa Paraw yopono me kesenpesî, sowtatun komo yopono me marha, tararan komo yopono me marha, kawaru mkawno komo yopono me marha. Ero wa kesenpesî n̂examro yar̂marî ke.

18 N̂examro pen yar̂mache tak owya Exipsiu komo naxe oponaro. Kporin komo xa Mîk ham, kexe tak opoko. Ero wa kexe Paraw yopono me oyesenporî ke, noro tararan yopono me oyesenporî ke marha, kawaru mkawno komo yopono me oyesenporî ke, kekn̂e. Ero wa kekn̂e Kporin komo.

19 Taa, iito xakn̂e Kaan yancun. Ixaw Yana komo poturme tîtosom ro mîk xakn̂e. Ero yimaw tko cekn̂e mapitaka so hara. Iina marha cekn̂e kaweresî patawno ha. Ixaw Yana komo mkai tak n̂ecececekn̂e.

20 Xehxa xatken̂e Ixaw Yana komo. Kaweresî xakn̂e Ixaw Yana komo weyuru me. Mehxa xatken̂e Exipsiu kom hara. N̂examro yawarparen̂e me xakn̂e hara ero rma. Iyotaw so xakn̂e kaweresî akpano rin̂e me. Ero yanme cesamarî komo yenîhra tî xatken̂e Exipsiu komo. Ero yanme mokuhra ro mak xatken̂e Ixaw Yana komo yahsîso. N̂ewahkocetken̂e mak kaweresî ke cenmakaxi ro. Ero wa tî xatken̂e.

21 Ero yimaw tak napockanwakn̂e Moises tuuna imo yepoi. Ero ke tak ocowo n̂ekpekn̂e Kaan resce n̂ixa. Karitî ro mak mîn n̂ekpekn̂e. Cenmakaxi ro mokyakn̂e. Ero yanme tak tuuna n̂etîraconkekn̂e. Turpe tak axawa n̂iir̂akn̂e Kaan, yarinho me mak.

22 Ero ke tuuna yotari cetken̂e Ixaw Yana komo. Turpem pore cetken̂e axawa pore. Waaca wa mak xakn̂e tuuna kaari n̂ixa, poowa n̂ixa marha. Ero wa xakn̂e okyo.

23 Taa, Ixaw Yana komo toche Exipsiu komo tak mokyatken̂e wenari so. Tuuna imo yotari xa marha mokyatken̂e Ixaw Yana komo yahsîso cma tî re. Ahnoro rma mokyatken̂e Paraw yoh komo kawaru, tararan marha, sowtatun komo marha kawaru mkawno kom ha. Ero wa mokyatken̂e.

24 Taa, mokyatkn̂e ha ka pahkî n̂he ha re. Ero yinhîrî enmaporo Kporin komo takî tî n̂een̂akn̂e kaweresî chew rma, wehto chew marha. En̂exa tak tî Exipsiu komo n̂een̂akn̂e, sowtatun komo. Ero yimaw takî tî n̂examro pen n̂emetanmekyakn̂e.

25 Yitararan komo tatho tak mohkekn̂e. Yîhtara mak cetken̂e, n̂ihxikyatken̂e mak tak yamoro okwe. Ero ke on wara tî ketken̂e Exipsiu komo, Ixaw Yana komo yai cemahcicerî. N̂examro nakronome ham kopi Kporin komo. Kîwyam reha kar̂mexe so okwe Exipsiu pen komo. Ero ke cemahcicerî hara, ketken̂e tî.

26 Ero yimaw takî on wara kekn̂e Kporin komo Moises ya, Apockantakî xa hara tuuna imo yepoi. Ero wa kasko tuuna yetamtawnutome hara Exipsiu komo yenorinokan̂e, yitararan komo yenorinokan̂e marha, kawaru mkawno komo yenorinokan̂e marha, kekn̂e yîwya.

27 Ero ke takî tî napockanwakn̂e Moises tuuna imo yepoi. Ero wa kache tuuna imo tak n̂etamtawnukyakn̂e hara enmarî yakro ro rma. Ero ke thakwa re n̂emahciyatken̂e Exipsiiu komo tuuna imo wece rma. N̂enor̂atken̂e tak tuuna imo rakataw rma. Kporin komo rma n̂examro pen n̂enorinokekn̂e.

28 Ero wa n̂etamtawnukyakn̂e tuuna imo. Yitararan pen komo nahruyakn̂e, kawaru mkawno pen komo marha. Paraw sowtatun komo pen ahnoro xatken̂e cenoriso thakwa weyuntaw. Ero wa xatken̂e sowtatu komo. Cewn̂e n̂hema etîmtora xakn̂e okwe.

29 Ixaw Yana komo reha cetken̂e turpem pore okre axawa pore. Tuuna yotari cetken̂e. Waaca wa mak xakn̂e tuuna kaari n̂ixa, poowa n̂ixa marha.

30 Ero wa tî Ixaw Yana komo yahsîpora xakn̂e Kporin komo Exipsiu komo ya. N̂examro pen yokoputho tak n̂een̂atken̂e Ixaw Yana komo ecihtaw rma.

31 Ero wa kar̂pe xa Kporin komo yehtopo n̂een̂atken̂e Ixaw Yana komo Exipsiu pen komo waihkarî ke. Ero ke Ixaw Yana komo tak xatken̂e Kporin komo ponaro xa. Yîmtapotarî marha tak n̂ewehcatken̂e. Moises mtapotarî marha n̂ewehcatken̂e. Ero wara xatken̂e Ixaw Yana komo ero yimaw.