Taa, ero yinhîrî waano naar̂atken̂e Ixaw Yana komo Moises yakro. Kporin komo n̂entarî me naar̂atken̂e. On wara ketken̂e waano me, Kewanomesî Kporin komo n̂entarî me. Tîîxatî pîn komo yopono me n̂eexi kir̂wan̂he ro mak. Kawaru pen komo nar̂mekn̂e tuuna imo kwaka, yîmkawnonhîrî pen komo marha.

2 Okariton̂e Mîk Kporin komo. Noro poko tan kewanomesî. Noro rma tak nasî okurunpen̂e me. Ponaro oyehtopo xa Mîk ha. Ero ke kir̂wan̂he xa Noro yehtopo poko kîmtapowasî. Ponaro oporin pen yehtopo marha Mîkî. Ero ke kyopono me Noro yehtopo wekatîmyasî mîk hak ya.

3-5 Sowtatu xa Mîk Kporin komo. Kporin komo Mîk Noro yosotî. Paraw pen tararantho nar̂ma tuuna imo kwaka. Noro maywen pen komo marha nar̂ma sowtatu pen komo. Noro maywen yantoman̂e pen komo meero nar̂ma, antomano rin̂e me Paraw nmen̂ekatho pen kom ha. Weyuntaka ro mak n̂enoricow n̂examro pen. Toopu wara ro mak n̂enoricow yuhnaka ro mak.

6 Kir̂wan̂he xa awamorî menpo Apa kaari n̂ixan. Karitî me xa menpo. Awamorî ke aaxatî pîn komo makuhr̂apo kaari n̂ixan ke.

7 Kir̂wanî ro me awexirî ke aaxatî pîn komo mar̂ma tooto komo yopo ro mak awexirî ke ha. Mîrwonakn̂e ro mak n̂examro poko. N̂examro yakn̂in̂e wara ro mak mîxakn̂e oco. Puruma yeputho n̂ecakyasî yohno ero wara rma n̂examro pen mar̂ma.

8 Awapepen ke rma tuuna menmekî awewnarî yarino ke rma. Iina re rma menmekî yukmacho wara ro mak. Waaca wara mak n̂ececeto piirino wara. Weyunthîrî rma ceipam tuuna imo rakatawno rma.

9 On wara tî kace aaxatî pîn komo, Ixaw Yana komo wenari kr̂a tîhcesî ahsîso. Emyawnonhîrî komo tak cekamyasî cemyawno komo me hara. Cerepore tak was amn̂e mer̂pono pîn yahsîrî ke owya. Kîkaciparan ke so kr̂a n̂examro pen tamexe exihra cehso ro, kace kica.

10 Puu mîîka ha tko Apa awapepen ke. Ero yanme n̂examro pen nahru tuuna imo. Xumbu wara ro mak n̂enor̂icow weyunthîrî yaka ro mak,

11 Yaake rma re naxe ponaro anarî komo yehtopo. Onoke ma re nai awarai Apa? Kir̂wan̂he ro mak masî kicicitho ken̂ehra ro mak. Kopi, kexe awehtopo yentan̂e komo. Cirihnî ciin̂e ro mak Amoro.

12 Metapoyanka kaari me. Ero ke rma n̂examro pen tak n̂ermom roowo, towsuru.

13 Akronomano rin̂e me awexirî ke ayanan komo maar̂asî awewtonî ro pona. An̂epemathîrî komo rma mîkyam maar̂asî kar̂pe awexirî ke. Kar̂pe awexirî ke n̂examro maare amînî ro yaka.

14 Kar̂pe xa awehtopo tak n̂encexe amn̂e anarî yana komo. N̂eraswaxe xa tak Piristew komo ero yipu yentache.

15 Eton pono kayaritomon komo marha n̂eraswaxe, Moabita yantoman̂e komo marha. N̂eraswaxe ro mak tatanîmso ro. Asak mak tak n̂ehtîkexe Kanan pono komo. Ero wa tak naxe kar̂pe xa awehtopo yentache Apa.

16 N̂eraswaxe ro mak tak. Kar̂pe awaporî yehtopo yentache nîtîtmamyaxe mak. Tîî kexe tak toopu wara ro mak ayanan komo cetaw tîhyari so. Ayanan komo cexe yîhyari so, an̂epemathîrî kom ha. Tocowpe rma, kexe mak.

17 Ayanan komo mekyasî awewton pona îh pono pona. Iina miir̂akn̂e aweken. Iina marha miir̂akn̂e anarî hara mîîmo apa apoko ahwotacho ro komo. Iina tak ayanan komo miir̂asî naatî ciir̂atawno wara. Ero wa miir̂asî.

18 Kayaritomo me xa nasî Kporin komo miya roro towîhnî me ro mak, ketken̂e. Ero wa kacho tî naar̂atken̂e Ixaw Yana komo waano ha.

19 Taa, ero wa tî xatken̂e Paraw komo. Noro yoh komo cetken̂e tuuna imo yarinho yaka, tarara yawno komo marha, kawaru mkawno komo marha. Yarinho yaw exitaw so tî tuuna ke tak ahruno n̂iir̂akn̂e Kporin komo. Ero warahra reha xatken̂e Ixaw Yana komo. Tuuna imo yarinho yaw tî cetken̂e n̂examro kir̂wan̂he. Ero wa tî cetken̂e.

20 Ero yinhîrî on wara tî xakn̂e Mirian, Araw yepeka ha. Weronomano rin̂e mîk xakn̂e. Ero yimaw tak maraka warai tî nahsîyakn̂e. Ero wa xa marha noro wenari cetken̂e wooxam komo ahnoro. Maraka ke cemyarke so manatken̂e.

21 On wara tî takrono komo n̂eyukyakn̂e Mirian, waano me kekn̂e, Kporin komo poko ewanomacoko. Tîîxatî pîn komo nar̂ma ro mak okre. Kawaru pen nar̂ma tuuna imo kwaka, yîmkawnonhîrî pen komo marha nar̂ma. Ero wa ar̂mano n̂iirî Kporin komo, kekn̂e takrono komo ya. Ero wa tî takrono komo n̂eyukyakn̂e.

22 Taa, ero yinhîrî Ixaw Yana komo naar̂akn̂e Moises Cucurem Yewku yecihtai. Miya naar̂akn̂e axawa imo pona. Suu tî mîn xakn̂e axawa imo yosotî. Osorwaw kaamo cetken̂e axawa imo pore. Tuuna yenîhra ro mak tko xatken̂e okwe.

23 Ero yinhîrî Mara pona tak cetken̂e. Xakn̂e rma re tuuna iito. Erîhnî me makî tko xakn̂e kica cîmîkî. Cîmîkî exirî ke Mara me xakn̂e ero yosot ha.

24 Ero ke Moises poko tak nîmtapowatken̂e Ixaw Yana komo kicicme so. Ahce thakwa re ceer̂at okwe? ketken̂e.

25 Ero ke Kporin komo yakro tak nîmtapowakn̂e Moises cerewre ero poko. Ero ke tak weewe n̂enpekn̂e Kporin komo yîwya. Ero tak namekn̂e Moises tuuna kwaka ar̂machome. Ar̂mache tîkpore tak xakn̂e tuuna okre. Iito rma ka exitaw so Ixaw Yana komo panatanmekyakn̂e Kporin komo. Iito marha n̂examro nukukmekn̂e, Oyewecatu xa na, kachome.

26 On wara kekn̂e yîwya so, Kaan Ow ha Aporin kom ha. Ero ke on wara awexi xe so wasî, omtapotarî ponaro xa awexi xe so wasî takîhsom me awentome so owya. Owya apanatanmetopo komo ponaro xa awexi xe so wasî. Ero mak ewetî xe was awya so. Ero wa awexitaw so eper̂a nahsîrî pîn me kiir̂axe so. Oyanme Exipsiu pen komo nahsîyakn̂e eper̂a anarmerpan okwe. Ero yipu nahsîrî pîn me kiir̂axe so. Aporin komo Ow ha. Akariton̂e komo Ow eper̂a yaw awexitaw so, kekn̂e. Ero wa kekn̂e Kporin komo yîwya so.

27 Ero yinhîrî Erin pona cetken̂e hara Ixaw Yana komo. Iito xakn̂e tuuna pîtho yaake, 12. Iito marha xakn̂e you yepu warai hara, 70 ha. Iina tak n̂etakriyatken̂e Ixaw Yana komo tuuna mîtkoso. Ero wa xatken̂e.