Taa, ero yinhîrî en̂exa takî tî cetken̂e hara Ixaw Yana komo Erin poi. Axawa imo pona xa hara cetken̂e anarî pona. Sin Yaxawan mîn xakn̂e ero yosot hara, axawa imo yosotî. Xehxa nasî Erin. Mehxa nasî Sinai hara. Iyotaw nasî Sin, axawa imo ha. Ero pona takî tî cetken̂e 15-nhîrî kaamo po, 2-inhîrî nuun̂i po ha. Ero wicakî ka xatken̂e esama yaw Exitu poi mohxapunhîrî. Ero po xa tî cetken̂e axawa imo pona hara.

2 Iito exitaw so axawa imo po Moises komo tî n̂eiyatken̂e xa hara kica Ixaw Yana komo.

3 On wara tî ketken̂e yîwya so, Kir̂wan̂he n̂exirî ha re Exitu po rma kr̂a kwaihyataw. Kporin komo rma kwaihkacerî ha re iito rma. Iito kexitaw so cma kir̂wan̂he ceseresmetken̂e. Tukwarke cma xakn̂e kîkaxaran komo okre. Turke marha tîxatken̂e okre iito. Tmaxmitaxi ro ceseresmetken̂e okre. Ero warainhîrî kîw mekyatken̂e xiya kwaihkachome rooma ke okwe. Amna mîwaikexe ahnoro axawa imo po rma, ketken̂e tî kica Moises komo ya.

4 Ero yinhîrî on wara tî kekn̂e Kporin komo Moises ya, On wara wîîkes awya, kah yai tak wekmexpesî awru komo. Ero yipu yenmeso tocowpe Ixaw Yana komo. Tukuknoi so mak n̂enmecowpe kaamo po roro. Ero warai wekmexpesî ehtopo komo yukukmachome, Owya tpanatanametopo komo na n̂ewehcatu, ewetîra katî natu, kachome owya.

5 On wara n̂ehcowpe sexta kaamo po so, mer̂pora n̂he n̂enmecowpe turu komo, asakî kaamo yecenarîno wicak ha. Ero wicakî n̂iicowpe turu komo me, kekn̂e tî Moises komo ya.

6 Ero ke on wara tî ketken̂e Moises komo Ixaw Yana komo ya, Kokon̂i tak kar̂pe Kporin komo yehtopo meen̂axe. Noro xa kekyatken̂e so ham Exitu poi, mîîkexe tak ero yimaw.

7 Enmapuche hara kir̂wan̂he xa Kporin komo yehtopo meen̂axe hara. Noro rma wa n̂encesî tîwîrîyakacho awya so kica. Ahce kacho amna mîwîrîyaket ha? Ahce warai me amna meen̂at ha? ketken̂e. Ero wa tî ketken̂e Moises komo Ixaw Yana komo ya.

8 Ero yinhîrî on wara tî kekn̂e hara Moises yîwya so, On wara Kporin komo yehtopo mîhtînoyaxe amn̂e kokon̂i. Awotmacho komo tak meen̂axe yîwya. Enmapuche tak awurmacho komo meen̂axe hara yîwya. Awecenarî rma nîmyasî awru komo awya so. N̂encesî Noro amtapotarî komo tpoko. Onok warai me katî amna meen̂atu? Amna pîn mîwîrîyakexe. Kporin komo xa mîwîrîyakexe kica, kekn̂e. Ero wa tî kekn̂e Moises yîwya so.

9 Ero yinhîrî on wara tî kekn̂e Moises Araw ya, Ixaw Yana komo an̂ihko ahnoro. On wara kasko yîwya so, xiya nhe amohcoko Kporin komo yeepataka xa. Noro rma wa n̂encekn̂e tîwîrîyakacho awya so, kasko, kekn̂e tî Moises yîwya.

10 Ero ke ero wa tî kekn̂e Araw Ixaw Yana komo ya. Ero wa ketaw rma yîwya axawa imo wece takî tî n̂een̂atken̂e n̂examro. Iito tak Kporin komo weyuru n̂esenpekn̂e oco kaweresî chew.

11-12 Ero wa cesenpoche on wara tî kekn̂e Kporin komo Moises ya, Ixaw Yana komo ya kîwîrîyakacho rma wa wenta. Ero ke on wara kasko yîwya so, Oyakno komo, kokon̂i tak awotî komo mon̂exe. Enmapuche tak awru komo mokyaxe hara awecenarî so. Ero yimaw takî, Kporin komo xa Mîk ham ponaro kehtopo kom ham, mîîkexe tak opoko, kekn̂e. Ero wa kekn̂e Kporin komo yîwya so.

13 Ero ke kokon̂i tak turukwarî warai pen mokyakn̂e mer̂pono pînî ro mak. Ixaw Yana komo yetarî nahruyakn̂e ro mak mer̂pora cexirî ke so okyo. Enmapuche hara cicah ken̂e tak xakn̂e etarî komo.

14 Cicakî yuturpamche tak axawa pore xakn̂e tamnon̂em ciki, pin̂ipici me so xakn̂e. Cicakî wara rma xakn̂e ceipamxapu wara.

15 Ero yenîche on wara ketken̂e Ixaw Yana komo, Ahce mîn hara, ketken̂e. Ero wa ketken̂e tîn̂entorî me so exirî ke. On wara kekn̂e Moises yîwya so, Awru komo mîn ha, Kporin komo nîmîtho awya so, kekn̂e.

16 On wara marha kekn̂e Moises, On wara nîîka Kporin komo, Awru komo amehcoko awecenarî so. 1 ome wicakî so amehcoko cewn̂an tooto nahrî me, anarî ome amehcoko anarî nahrî me hara. Ero wicakî so amehcoko amyamro ahnoro tukuknoi mak. Amîn yawno komo yukuknomacoko ero wicakî so amehtome awya so, kekn̂e. Ero wa kekn̂e Moises yîwya so.

17 Ero ke ero wa so namekyatken̂e Ixaw Yana komo. Mer̂pora n̂he namekyatken̂e anarî komo, wahra so namekyatken̂e anarî kom hara. Ero wa so namekyatken̂e.

18 1 ome wicakî so xa amekyataw tîmîn yawno komo poko hakî, ecenarî so xakn̂e. Mer̂pora n̂he amekn̂enhîrî komo nohtîketken̂e. Wahra mak amekn̂enhîrî komo reha cecenarîno me rma nokyatken̂e. Ero wa so namekyatken̂e tukuknoi.

19 On wara marha kekn̂e Moises yîwya so, Tohtîkara awexitaw so akwenhîrî yîmtora ehcoko amîn komo yaw so enmachome, kekn̂e.

20 Moises mtapotarî ponarora rma tko xatken̂e anarî kom okwe. Turu komo yakwenho nîmcetken̂e rma okwe tîmîn komo yaw rma. Enmapuche kicicme tak xakn̂e kica, takye. Kotowakn̂e marha kica. Ero ke noro yipu komo poko nîrwonakn̂e Moises. Ero wa xakn̂e.

21 Ero ke enmar̂atîxera n̂amekyatken̂e cecenarî so mak. Ero yinhîrî ocoro ehtîkache tak kaamo, cetîkekn̂e tî tamehsomînhîrî. Exihra tak xakn̂e roowo pore.

22 Sexta po tak 2 ome wicakî so tak namekyatken̂e cewn̂an nahrî me so. Amekrî komo tî n̂een̂atken̂e Ixaw Yana yenîn̂e komo. Ero ke n̂ekatîmyatken̂e Moises ya. Ero wicakî so namekyaxe, ketken̂e yîwya. Ero wa xatken̂e sexta kaamo po.

23 Ero ke on wara kekn̂e Moises yîwya so, On wara kesî Kporin komo awya so, Pahxaxa nasî kepokaretopo komo. Ero po tak cepokarexe Kporin komo yanme. Ero ke on po rma ka awru komo ciicoko. Tîyocoko yiixe awexitaw so. Akwenhîrî yîmtocoko tak amîn komo yaw so rma kepokaretopo po tohsom me, kesî kîwya so, kekn̂e tî Moises yîwya so.

24 Ero ke takî tî ero kokmamrî po rma Moises mtapotarî yaw roro rma tî nîmcetken̂e enmapuche tohsom. Enmapuche kir̂wan̂he rma xakn̂e okre kotohra. Ahtara marha xakn̂e.

25 Ero ke on wara tî kekn̂e Moises yîwya so, Ero tak tohcoko oroto kepokaretopo komo me exirî ke on kaamo. Kporin komo yanme mepokarexe oroto. Awru komo yenîhra maxe oroto woskara po.

26 6 kaamo po roro mamekyaxe maana. 7-nhîrî po exihra tak nasî, sabatu po ha, kekn̂e tî Moises.

27 Cetken̂e rma tko tî anarî komo amehso 7-nhîrî po. Enîhra tko tî xatken̂e okwe.

28 Ero ke on wara tî kekn̂e Kporin komo Moises ya, On wara kasko Ixaw Yana komo ya, Ahcemaw xa owya apanatanmetopo komo mewehcatu, owya atwermacho kom ha?

29 Awepokaretopo komo xa mîn sabatu. Ero warai me n̂iir̂akn̂e Kporin komo. Ero ke sexta peira po nîmyasî mer̂pora n̂he awru komo, asakî kaamo yecenarî ha. Ero ke aweken poi so tohra ehcoko 7-nhîrî po, kekn̂e Moises yîwya so.

30 Ero ke n̂epokaretken̂e makî tî Ixaw Yana komo 7-nhîrî po. Ero wa xatken̂e.

31 Ero yimaw tak turu komo tî nosohcetken̂e Ixaw Yana komo maana me. Tumutwe xakn̂e, kowentu yatho wara so cik xakn̂e. Tîkpore tko xakn̂e weenu yakro esmaxapu wara. Ero wa xakn̂e maana.

32 On wara marha tî kekn̂e Moises, On wara ehcoko, kesî Kporin komo, Maana yîmtocoko awepamthîrî komo n̂enîrî me, kesî. Wahra mak yîmtocoko cewn̂e ome mak. Pahxaro on wara kexe awepamthîrî komo ero yenîche, On yipu ke tî kporin pen komo nurmekn̂e Kporin komo. Exitu poi n̂examro yekîche axawa imo pore makî tî cetken̂e. Ero yimaw on yipu ke nurmekn̂e, kesî, kekn̂e. Ero wa tî kekn̂e Moises.

33 Ero yinhîrî takî tî on wara kekn̂e Moises Araw ya, Ai oyakno, tahrem yaka tak maana enkakî cewn̂e ome wicak mak. Ero tak ermonoko Kporin komo yamtakponî ro yaka xa. Iito tak n̂expe miya roro awepamthîrî komo n̂enîrî me, kekn̂e Moises.

34 Ero wa kekn̂e Kporin komo Moises ya. Ero ke ero wa kacho yaw roro rma maana n̂ermonoyakn̂e Araw. Kaanî mtapotacho yen mîtkoso n̂ermonoyakn̂e eroromerono me.

35 Ero yipu mak xakn̂e iyuru komo 40 cimn̂ipu pahkînon. Pohnîntaw exitaw so nokyatken̂e ewto ken̂arî pona totopo komo pona roro, Kanan yemyatkoso mohtopo komo pona roro ha.

36 Taa, on wicakno mîn ome, 10 ome exitaw 1 epa yecenarî rma nasî. Ero wicakno rma mîn ome. Ero wa nasî.