Taa, ero yinhîrî takî tî cetken̂e xa hara Ixaw Yana komo Sin pore, axawa imo pore. Yaake kaamo tî cetken̂e Kporin komo yanme rma. Amn̂e tak Hepitin pona tak n̂etakriyatken̂e hara. Iito tî tuuna exihra xakn̂e okwe wokru komo.

2 Ero ke Moises pen n̂eiyatken̂e xa hara Ixaw Yana komo. On wara ketken̂e yîwya, Tuuna n̂he enpoko kwokru kom okwe, ketken̂e tî yîwya. On wara mak tî n̂eyukyakn̂e Moises yîmtaka so, Ahce kacho ow meiyatu okwe? Ahce kacho Kporin komo mukukmetu yîrwonmecho poko? kekn̂e. Ero wa tî kekn̂e Moises yîwya so.

3 Ero wa tî xatken̂e Ixaw Yana komo iito, twokru komo xe ro makî tî xatken̂e cerewre ro mak. Ero poyero Moises pen nîwîrîyaketken̂e kica. On wara tî ketken̂e yîwya, Ahce kacho amna mekyakn̂e kica Exitu poi? Amna waihkachome mak amna mekyakn̂e xiya. Amna xîkîtho pen marha mîwaikes okwe, amna yokutho pen marha. Awanme mak amna pen waihyas okwe tuuna exihtorî ke, amna wokru, ketken̂e tî Ixaw Yana komo Moises pen ya.

4 Ero yinhîrî takî tî Kporin komo yakro nîmtapowakn̂e Moises. On wara kekn̂e yîwya, Apa, ahce wa moxam wiir̂a okwe? Owaika xe ro mak naxe toh ke oko, kekn̂e yîwya.

5 On wara tî n̂eyukyakn̂e Kporin komo, On wara wîîkes awya Moises, Ixaw Yana komo yetarî yai ka etoko. N̂examro poritomon komo arko awakro. Awamoyin arko, tuuna yepu metapekn̂e iike ero rma arko. Ero wa etoko.

6 Iito men was Ow toopu mîtwo Orebe mîtwo. Aywapu kîwces iina. Iito awexitaw tak toopu etapakî. Etapache awya tuuna tak mokyasî atumnai Ixaw Yana komo wokru me, kekn̂e tî Kporin komo. Ero ke tî iina cekn̂e Moises. Toopu takî tî n̂etapekn̂e Ixaw Yana poritomon komo wero ro rma.

7 Ero ke iitono takî tî nosohcekn̂e Moises Masa me. Meriba me marha nosohcekn̂e. Ero wa toopu nosohcekn̂e ceirî ke Ixaw Yana komo ya. Kporin komo marha nukukmetken̂e yîrwonmecho poko kica. Apohana, kîchew so na nai Kporin komo anarimaw mak ha tko, ketken̂e. Ero wara kacho ke Noro nukukmetken̂e kica.

8 Taa, ero yinhîrî takî tî Amarekita komo mokyatken̂e Ixawa Yana komo waparî me okwe. Hepitin po exitaw so Ixaw Yana komo iina mokyatken̂e.

9 Ero ke tî on wara kekn̂e Moises Xoswe ya, Kîrkomo men̂ekakî awakrono me. Pahxaxa n̂examro arko Amarekita komo yakro etar̂maxi. Owî reha kîwcesî îîpî meretkoso. Iito tak kecececesî Kaan yamoyin ke cemyarke, kekn̂e tî Moises Xoswe ya.

10 Ero ke Moises mtapotacho yaw roro rma tî kîrkomo n̂ekaimekn̂e Xoswe. Enmapuche tak n̂examro cetken̂e etar̂maxi. Moises reha cekn̂e îîpî meretkoso. Araw marha cekn̂e Moises yakro, Uru marha.

11 Îh po exitaw so kahsî tî napockanwakn̂e Moises ececoka. Ero wara exitaw, tapockaw, Ixaw Yana komo xatken̂e kar̂pe Amarekita komo yopono me. Taporore exitaw hara Amarekita komo tak xatken̂e Ixaw Yana komo yopono me hara okwe.

12 Napowaiyakn̂e tko tî Moises. Ero ke toopu n̂ekyatken̂e Araw komo, porin ha. Ero pona Moises n̂eremekn̂e. Moises yaporî tak n̂ecehcetken̂e Araw komo. Kaari panaw xakn̂e Araw ecehton̂e me. Eeco po xakn̂e Uru hara ecehton̂e me hara. Ero ke tapockaw rma tî xakn̂e Moises pahkî kokmamso ro.

13 Ero ke takî tî Amarekita komo nar̂metken̂e Xoswe komo kacipara imo ke.

14 Ero yinhîrî on wara tî kekn̂e Kporin komo Moises ya, Amarekita pen komo yar̂machonho tak mewreko karita yaka awepamthîrî komo n̂enîrî. Xoswe n̂entarî me marha yîmtapotareko anmewrethîrî. On wara wasî Amarekita komo poko, n̂examro wîhcamnoyasî ro mak exihra cehso ro. N̂examro pen yehtoponho yentara ro mak tak naxe amn̂e kah yakwerî makatawno komo ahnoro, kekn̂e tî yîwya.

15 Ero yinhîrî takî tî toopu n̂enmekyakn̂e Moises Kaan ya tîmsom yakn̂itopo me. On wara nosohcekn̂e enmexapu, toopu, Kporin Komo Xa Nasî Okayaritomon Banteiran wara, kacho me nosohcekn̂e.

16 On wara tî kekn̂e Moises, Amarekita komo yakro n̂etar̂mesî roro Kporin komo miya roro ehretawnomaxapu komo yakro meero, kekn̂e tî. Yaaro xa kesî ero wara towîhnî me ro mak. Ero wa tî nai Noro Amarekita pen komo poko, kekn̂e. Ero wa tî kekn̂e Moises.