Taa, ero yimaw meye tî xakn̂e Xetîro Moises woxin. Micianita tî mîk xakn̂e, tîmsom pokono. Noro takî tî n̂encekn̂e Moises komo yakronomachonho Kaan ya, Ixaw Yana komo yakronomachonho ha. Ahnoro tî n̂encekn̂e. Tîyanan komo tak tî n̂ekyakn̂e Kporin komo Exitu poi, kacho tî n̂encekn̂e.

2 Pahxa n̂he cipici n̂en̂epekn̂e Moises, yîîm yaka hara Xetîro yaka. Ero ke noro yaw takî tî xakn̂e Sipora, Moises pic ha.

3 Yipici mrerî marha n̂en̂epekn̂e Xetîro yaka asakno roro rma. On wara xakn̂e noro mrerî yosotî, anarî yosotî xakn̂e Xehson me. On wara kacho mîn xakn̂e, Anarî yana komo chewno me wasî, kacho. Ero ke ero wa nosohcekn̂e tumumuru.

4 Anarî yosotî xakn̂e Eriese hara. On wara kekn̂e hara Moises, Ponaro apapa yehtopo xakn̂e oyakrono me. Noro rma okurunpekn̂e. Ero ke owaikara xakn̂e Paraw kacipara imo ke, kekn̂e. Ero ke ero wa nosohcekn̂e noro hara tumumuru hara.

5 N̂examro tak mokyatken̂e Moises yenso. Xetîro, Moises woxin, Moises mumuru komo, Moises pici, ero wa mokyatken̂e Moises yaka. Axawa imo po exitaw mak Moises, enso mokyatken̂e, Kaan yesenpotopo yamrinaw exitaw, îîpî yamrinaw ha.

6 Mooxe rma ka cexitaw tmaywen n̂en̂epekn̂e Xetîro Moises yaka. On wara kacho yekatîmn̂e mîk n̂en̂epekn̂e, Xetîro ow ha awoxin. Yarî men kmokyas awenso so. Apici marha wekyasî, amumuru komo marha, kacho yekatîmn̂e mîk n̂en̂epekn̂e tîywapu.

7 Ero ke ero yentache esama yaw cekn̂e Moises twoxin potpona. Noro yenîche nutupenwakn̂e Moises noro mamakan wara. N̂ewcokekn̂e marha. Ahce wara matu? kacho poko ka n̂esencetken̂e. Ero yinhîrî tîmîn yaka takî naar̂akn̂e Moises roona yaka.

8 Iito tak Ixaw Yana komo yakronomachonho n̂ekatîmtîkekn̂e Moises twoxin ya. On wara kekn̂e yîwya, Paraw pen komo n̂emetanmekyakn̂e Kporin komo Ixaw Yana komo yowtome tak. Exipsiu komo n̂emetanmekyakn̂e ahnoro. Amna mokyataw esama yaw amna marha n̂esemetanmekyakn̂e okwe. Kporin komo rma tko amna nakronomekn̂e, kekn̂e yîwya. Ero yipu n̂ekatîmtîkekn̂e yîwya.

9 Nahwowakn̂e Xetîro ero yipu yentache. On wara kekn̂e, Ixaw Yana komo nukurunpei ham Kporin komo okre. Nahsîpînkapoi Exipsiu komo ya okre, kekn̂e tî.

10 On wara kekn̂e Xetîro, Kir̂wan̂he xa Kporin komo nai ham okre. Awahsîpînkapoce so tak ham Paraw ya. Exipsiu komo ya marha awahsîpînkapoce so, awemetanmekn̂enhîrî komo ya.

11 Yaaro xa wîîkesî tak, anarî komo yopo xa nasî Kporin komo, ponaro anarî komo yehtopo yopo, wîîkesî. Enko xe, cehcoyoponkaxmu pen komo yopono me n̂esenpekn̂e, kekn̂e. Ero wa kekn̂e Xetîro Moises ya.

12 Ero yinhîrî tak on wara xakn̂e Xetîro, Moises woxin, Kaan ya tîmsom nakn̂iyakn̂e tokuthîrî pun, Ahce na komo marha nîmyakn̂e Kaan ya. Ero yinhîrî tak Araw mokyakn̂e Moises yaka. Ixaw Yana poritomon komo marha mokyatken̂e yaake Moises yaka. N̂eseresmetken̂e tak Kaan yeepatayino me. Moises woxin yakro rma n̂eseresmetken̂e. Ero wa xatken̂e.

13 Taa, enmapuche hara aapo pona tak n̂eremekn̂e Moises cesen̂ekaxmu komo yentachome. Yaake mokyatken̂e cesen̂ekaxmu komo Moises pen twamtoso ro. Pahxaxaro rma mokyatken̂e. Iito rma n̂ecececetken̂e kokon̂i cehso ro okwe.

14 Ero ke Moises poko tak n̂eserepokekn̂e noro woxin cemyarke xa enîrî ke. Pahkî cesen̂ekaxmu komo yentacho poko n̂eserepokekn̂e. Ero ke on wara kekn̂e yîwya, Ahce kacho en̂ekano rirî poko mai pahkî okwe? Ahce kacho amoro mak mai cewn̂e cesen̂ekaxmu komo yentan̂e me. Awamcexe mak awenta xatî komo pahkî cececetoso. Pahxaxaro mohcow, tanî rma n̂ehcow kokon̂i cehso ro okwe, kekn̂e Moises ya.

15 On wara n̂eyukyakn̂e Moises, Ohyaka mokyaxe Kaanî mtapotarî yenta xatî komo. Ahce wa noro cirpore nai Kaan ya? kaxi mokyaxe.

16 Etpokono me exitaw so ohyaka mokyaxe esen̂ekaposo. On wara xa cexpore nasî, wîîkesî tak yîwya so ehtopo komo yentache. On wara kesî Kaan kpanatanmetopo komo me, wîîkesî marha yîwya so, kekn̂e Moises.

17 Anarme tko n̂eyukyakn̂e Moises woxin. Ero warahra n̂he cexpore nasî, kekn̂e.

18 Ero wara roro awexitaw mekar̂ketîkesî thakwa okwe. Ahyaka mohxapu komo marha poketîkexe. Ayopo xa thakwa nasî ero poko awehtopo. Cewn̂e awexirî ke ayopo nasî.

19 Ero ke omtapotarî ka entakî. Kakîhresî ka awakronomachome n̂he Kaan ya. Apoyino komo mtapotarî yekatîmn̂e me rma esko amoro Kaan ya. Anarme n̂examro yehtoponho ekatîmko amoro yîwya.

20 Kaan ya kpanatanmetopo komo marha ekatîmko yîwya so hara. On wara xa ehcoko takîhso awehtome so, kasko rma yîwya so. On poko marha ehcoko Kaan yanme n̂he awehtome so, kasko marha yîwya so.

21 On wara marha cexpore nasî, takîhsom komo yîhtînoko kîrkomo, mîk hak yepamrî kom ha. N̂examro tak cirko tpoyino komo yenîn̂e me. Kaan ponarono komo xa yîhtînoko, esemîknon komo, puranta poko kepohkacho xatî pînî ro komo, noro yipu komo men̂ekakî. Anarî komo cirko 1000 komo yenîn̂e me, anarî komo 100 komo yenîn̂e me, anarî komo 50 komo yenîn̂e me, anarî komo 10 komo yenîn̂e me mak. Ero wa enîno rin̂e komo cirko.

22 N̂examro tak n̂ehcowpe cesen̂ekaxmu komo yentan̂e me roro. Camkîno pîn poko n̂he esen̂eketaw so n̂examro rma panatanmecowpe cesen̂ekaxmu komo. Camkîno poko xa esen̂eketaw so reha ahyaka tak n̂ehcowpe cesen̂ekaxmu komo ero warai komo yentachome awya reha. Ero wa awexitaw, takronoi tak, ekar̂kara n̂he tak masî.

23 Ero wa na ciino miir̂a, ero wa xa marha na nîîke Kaan awya. Ero wa exitaw kir̂wan̂he masî, ekar̂katîkara n̂he tak masî. Cerepore marha naxe apoyino komo ahyai cetaw so hara. Ero wa naxe, kekn̂e. Ero wa kekn̂e Xetîro Moises ya.

24 Ero ke twoxin ya tpanatanmetopo tak n̂ewehcakn̂e Moises. Yîmtapotarî yaw roro rma ciino n̂iir̂akn̂e.

25 Takîhsom komo tak nîhtînoyakn̂e Ixaw Yana komo, mîk hak poyino kom ha. Takîhsom komo mak men̂ekekn̂e. N̂examro takî n̂iir̂akn̂e tpoyino komo yenîn̂e me rma. Anarî komo n̂iir̂akn̂e 1000 komo yenîn̂e me, anarî komo 100 komo yenîn̂e me, anarî komo 50 komo yenîn̂e me, anarî komo 10 komo yenîn̂e me mak.

26 N̂examro takî xatken̂e cesen̂ekaxmu komo yentan̂e me roro. Ero wa xa cexpore nasî, kan̂e me xatken̂e. Camkî exitaw so anarî komo yehtoponho poko noro yipu komo naar̂atken̂e Moises ya entachome. Camkîno pîn me reha exitaw esen̂ekacho komo, en̂ekano n̂iir̂atken̂e n̂examro rma. Ero wa xatken̂e.

27 Ero yinhîrî Moises woxin takî cekn̂e hara. Taa, etok hara yiixe awexitaw, kekn̂e Moises yîwya. Ero ke cekn̂e hara ceken pona hara. Ero wa cekn̂e.