1-2 Taa, cetken̂e xa hara tî Ixaw Yana komo esama yaw. Hepitin poi cetken̂e Sinai Yîpîn yamrinaka tak. Iito xakn̂e axawa imo hara, Sinai Yaxawan ha. Osorwaw nuun̂i takî tî xakn̂e Exitu poi mohtoponhîrî komo ero yimaw. Ero po mokyatken̂e iina.

3 Ero yinhîrî takî tî îîpî nawnukyakn̂e Moises Kaan yaka tak. Iito exitaw Kporin komo tak nîmtapowakn̂e noro yakro îîpî meretwo rma. On wara tî kekn̂e, Ai Moises, on wara men kasko Xako yepamtho komo ya, Ixaw Yana komo ya ha.

4 Amyamro rma meen̂atken̂e Exipsiu komo yîwîrîmachonho owya. Akurunpechonhîrî komo marha meen̂atken̂e owya. Kir̂wan̂he kukurunpetken̂e so. Yaimo wa mak wîxakn̂e kaikokoro awan̂e komo wara. Ero wa kekyatken̂e ohyaka tak.

5 Ero ke omtapotarî ponaro men ehcoko. Oyewetîn̂e me awexitaw so kakronomexe so tak, kacho ponaro. Ero wa awexitaw so tîpîn̂e xa keen̂axe so anarî yana komo yopo rma, roowo poko hakno komo yopo. Owyan me wa nasî roowo ahnoro.

6 Ow wasî akayaritomon komo me. Amyamro maxe omaywen me, oyakro tîmtapotaxmu me miyan komo poko rma. Yîpînîn yaw so cma re masî, kan̂e ro me maxe mîk hak poko. Oyananî ro me xa tak maxe, kasko yîwya so. Ero wa kasko Ixaw Yana komo ya, kekn̂e Moises ya. Ero wa tî kekn̂e Kporin komo Moises ya.

7 Ero yinhîrî tak tî îîpî n̂enîhcekn̂e hara Moises. Ewto pona cepatakache tak Ixaw Yana poritomon komo nan̂ikyakn̂e. Kporin komo mtapotacho takî tî n̂ekatîmyakn̂e yîwya so, Ero wa kasko yîwya so, kacho ha.

8 Ero yentache on wara tî ketken̂e Moises ya, Kporin komo mtapotacho amna n̂ewehcasî watohnî me ro mak, ketken̂e. Ero wa ketken̂e Ixaw Yana komo poritomon komo. Ero ke Kporin komo yaka cekn̂e hara Moises. Amtapotarî tî n̂ewehcatu ahnoro, kekn̂e hara yîwya, Kporin komo ya.

9 Ero ke on wara tî kekn̂e hara Kporin komo Moises ya, Ahyaka so men kmokyas amn̂e. Tuuna yewru chew rma kmokyasî cicwiyem chew. Awakro omtapowataw Ixaw Yana komo marha n̂encexe omtapotarî. Ero yentarî ke yîwya so amtapotarî tak n̂ewehcaxe miya roro yîtîhkan me, kekn̂e yîwya. Ero yimaw xa Ixaw Yana komo mtapotacho tî n̂ekatîmyakn̂e Moises Kporin komo ya.

10 Ero yinhîrî on wara tî kekn̂e hara Kporin komo Moises ya, Ixaw Yana komo yaka etoko xa hara. On wara kasko yîwya so, Awemyawno komo pokohra ro mak ehcoko oroto, pahxaxa marha. Kporin komo ponaro mak xa ehcoko. Aponon komo marha korokacoko kir̂wan̂he xa awehtome so.

11 Mîk ha mehxan po kir̂wan̂he xa tak ehcoko. Ero po xa Kporin komo nîhcesî Sinai Yîpîn pona awero ro so rma.

12 Îîpî wokpamakî tapomritîkaxi ro. Wahkotono ritopo cirko wokpa. On wara kasko yîwya so, Twerî men tî ehcoko. On îîpî tî awnukura ro mak ehcoko. Matîwîn meero apehra tî ehcoko îh yamrinawno. Apeche yîwya so apen̂enhîrî waihkacoko.

13 Apen̂enhîrî yapehra marha tî ehcoko. Toh ke mak etapacoko, waiwî ke na mîwetu anarimaw. Ero wa tî tooto waihkacoko, okno marha apen̂enhîrî ha. Ero po tak tuu kacho tî mencetu. Pahkî xa kesî. Ero yentache takî tî îîpî pahnoke amohcoko, kasko yîwya so, kekn̂e. Ero wa tî kekn̂e Kporin komo Moises ya.

14 Yîmtapotarî yentache tak îîpî n̂enîhcekn̂e hara Moises. Ixaw Yana komo yaka cekn̂e hara. On wara kekn̂e yîwya so, Kporin komo ponaro makî ka ehcoko, kekn̂e yîwya so. Ero ke tponon komo koroketken̂e.

15 On wara marha kekn̂e yîwya so, Kporin komo ponaro xa tak ehcoko mîk ha mehxan po. Apici komo pokohra marha ka ehcoko, kekn̂e. Ero wa kekn̂e Moises Ixaw Yana komo ya.

16 Taa, osorwaw ro enmapuche tak pahxaxaro tuuna yewru ken̂e xa takî tî xakn̂e îîpî, cicwiyem ken̂e xa. Pepe kekn̂e marha, knerere knerere kekn̂e marha tarai. Tuu kacho marha n̂esencekn̂e. Kar̂pe xa kekn̂e. Ero ke n̂eraswatken̂e takî tî Ixaw yana komo, eeta yawno komo rma. Tatanatken̂e ro mak.

17 Ero yinhîrî tak tî Ixaw Yana komo naar̂akn̂e Moises Kaan yakro ceseposo ro. Îh yamrinaw tak n̂ecececetken̂e.

18 Nîsînakn̂e ro mak tak tî Sinai Yîpîn Kporin komo yîhtorî ke ero pona. Wehto chew nîhtoye. Kah yaka roro nawomye yîsîn mararî yecakyatawno wa. Sîkîsîkî kekn̂e xa tî îîpî ahnoro.

19 Tuu kacho n̂esencekn̂e rma pahkî. N̂ekaritotîkai xa tak tuu kacho. Ero yimaw takî tî Moises nîmtapowakn̂e Kaan yakro. Kaan tak tî n̂eyukyakn̂e hara tooto mtapotake rma.

20 Ero yimaw tak nîhcekn̂e Kaan Sinai Yîpîn pona. En̂exa takî tî Moises nan̂ikyakn̂e îh pona. Oona amok hara îîpî meretkoso, kekn̂e yîwya. Ero ke îîpî takî tî nawnukyakn̂e hara Moises.

21 Ero yinhîrî takî tî on wara kekn̂e hara Kporin komo yîwya, Îîpî enîhtoko xa hara Ixaw Yana komo yaka. On wara kasko yîwya so, Wokpa watohra ro mak men ehcoko. Kporin komo yenso men mokuhra ehcoko meyehra. Ero wa amokuche so mîwaiyaxe mer̂pono pînî rma okwe, kasko yîwya so.

22 Owya tîmsom tîmn̂e komo marha yîtwermakî. Tporin komo mîtkoso tmohsomî rma re mîkyam meyehra. Kaan ponaro xa mak ehcoko awemyawno komo ponarora ka ehcoko, kasko yîwya so. Awemyawno ro ponaro mak awexitaw so awaihketu so Kporin komo, kasko, kekn̂e tî.

23 On wara tko tî n̂eyukyakn̂e Moises, Mokuhra thakwa wa naxe Sinai Yîpîn pona. Amoro rma mîîkekn̂e amna ya, Îîpî wokpamacoko. Oyekenî ro me mak ciicoko, mîîkekn̂e. Ero ke wa mokuhra naxe, kekn̂e tî Moises yîwya.

24 On wara tko tî n̂eyukyakn̂e Kporin komo, Etoko rma. Yohno xa marha amok hara. Araw tak eeko awakro. Mokuhra ro mak n̂ehcowpe anarî komo. Owya tîmsom tîmn̂e komo meero mokuhra n̂ehcowpe, Ahnoro apoyino komo mokuhra n̂ehcowpe. Wokpa watohra ro mak n̂ehcowpe. Kporin komo yaka rma kîwcesî, ketaw yîwya so rma Ow xa matko kîwcesî n̂examro waihkaxi okwe, kekn̂e yîwya. Ero wa kekn̂e Kporin komo Moises ya.

25 Ero ke takî tî îîpî n̂enîhcekn̂e xa hara Moises eeta yawno komo yaka. Kporin komo mtapotachonho n̂ekatîmyakn̂e yîwya so. Ero wa tî kekn̂e yîwya so.