1-2 Taa, Kaan takî tî nîmtapowakn̂e yîn̂entarî komo me. On wara kekn̂e, Aporin komo Ow ha, ponaro awehtopo kom ha. Exitu poi awekn̂enhîrî komo Ow. Antonano me makî ka mîxatken̂e iito etowîn me ro mak. Ow xa kowyatken̂e so ero warai mera awehtome so.

3 On wara men ehcoko, anarî cirihra ro mak ehcoko ponaro xa awehtopo komo me oyopono me.

4 Mîk hak warai cirihra ro mak ehcoko ponaro awehtopo komo me. Kah yawno warai me cirihra ehcoko, roowo pono warai me, yukwawno warai me, noro yipu warai me cirihra ro mak ehcoko.

5 Ero yipu mamaka yutupentara ro mak ehcoko. Pokono me exihra marha ehcoko. Aporin komo xa Ow ha, ponaro xa awehtopo kom ha. Awewyoman̂e komo Ow ha. Kicicme exitaw yîîm, ero wa ehtoponhîrî wiir̂asî yîmxîkrî komo pona meero. Osorwaw ro na n̂ehretawnometu, 4-ro xa ha na. Ero wicakno komo pona wiir̂asî kicicme porin pen komo yehtoponho, ooxatî pîn pen komo yehtoponho ha. Ero wa ciino rin̂e Ow ha.

6 Ooxatî komo pînîn yawno reha Ow, omtapotacho yewetîn̂e komo pînîn yawno ha. Mer̂pora ro mak naxe yîpînîn yaw oyehtopo komo, 1.000 me naxe, 1.000 me naxe hara, 1.000 me naxe hara miya rorono komo pînîn yawno Ow ha.

7 Aporin komo Ow ha, ponaro xa awehtopo komo. Ero ke Ow men etacira ehcoko wara kyam mak. Kicicme awehtoponhîrî komo men yîhcamnopîra wasî ero wa oyetaciche awya so.

8 Awepokaretopo komo ponaro men ehcoko. Oponaro xa awehtopo komo mîn ha.

9-10 6 kaamo mak nas awetapickacho komo, awemyawno poko awehtopo kom ha. 7-nhîrî reha nasî awepokaretopo komo me, Aporin komo Kaan ponaro awehtopo komo me. Ero po etapickara ro mak ehcoko. Amoro, amumuru komo, awemsîrî komo, awanton komo kîîrî, awanton komo wooxam, awoh komo, anarî yana komo achewno kom ha. Ero warai komo etapickara ro mak n̂ehcowpe ero po.

11 6 kaamo wîxakn̂e Ow Aporin komo kaapu komo yakîhtorî poko, roowo yakîhtorî poko, tuuna imo yakîhtorî poko, kah yawno komo yakîhtorî poko, roowo pono komo yakîhtorî poko, yukwawno komo yakîhtorî poko. 6 kaamo mak wîxakn̂e ero yipu yakîhtorî poko. 7-nhîrî po tak kepokarekn̂e hara. Ero ke kir̂wan me tak ero wiir̂akn̂e Ow Aporin komo, oponaro xa awehtopo komo me. Ero wa wiir̂e 7-nhîrî kaamo.

12 Ayopono me encoko aamo komo, anocwan komo marha. Ero wa awexitaw so pahkî maxe waipîra arowon komo po, Aporin komo Kaan nîmyas awya so ero po.

13 Waihkano cirihra ehcoko.

14 Apici komo yai ro exihra ro mak ehcoko, aan̂o komo yai ro marha exihra ehcoko amyamro wooxam kom hara.

15 Emyawnano poko en̂epamra ehcoko.

16 Amîtwono komo poko cemarontara ehcoko.

17 Amîtwono komo mîn poko epohkara ehcoko. Yipici poko marha, anton komo poko marha kîîrî poko, anton poko marha wooxam poko. Iyok poko marha epohkara ehcoko, paaka poko, buhu poko, ero wa. Epohkara ro mak ehcoko amîtwono yawno komo poko, kekn̂e. Ero wa kekn̂e Kporin komo yîwya so.

18 Ero yimaw pepe kacho n̂een̂atken̂e Ixaw Yana komo, knerere kacho marha n̂encetken̂e. Tuu kacho marha n̂encetken̂e. Îîpî yîsînîmtopo marha n̂een̂atken̂e. Ero ke n̂eraswatken̂e xa tak. Tatanîmso ro mak n̂eraswatken̂e. Ero ke mooxe mak n̂ecececetken̂e.

19 On wara ketken̂e Moises ya, Amoro mak amtapotakî amna yakro. Amtapotarî n̂ences amna. Yîmtapotara tak n̂expe Kaan amna yakro. Amna men waihyas okwe amna yakro yîmtapowataw xa hara.

20 On wara n̂eyukyakn̂e Moises, Erasîra ehcoko. Ero warai me Kaan n̂esenpesî akukmachome so mak. Tponaro xa tak awehtome so marha ero wa n̂esenpesî, kicicme exihra awehtome so ha, kekn̂e yîwya so.

21 Mooxe rma tko n̂ecececetken̂e Ixaw Yana komo. Moises mak cekn̂e awarpan mîtkoso cicwiyem mîtkoso, yîchew xakn̂e Kaan ero mîtkoso ha.

22 Ero yinhîrî Moises yakro tak nîmtapowakn̂e Kporin komo. On wara kekn̂e yîwya, On wara kasko Ixaw Yana komo ya, Kah yaw rma kîmtapota an̂entarî komo me. Ero wa omtapotarî mentacow oroto.

23 Ero ke on wara marha wîîkes awya so, ahce na cirihra ro mak ehcoko ponaro xa awehtopo komo me. Prata cirihra ehcoko, ooru marha cirihra ehcoko ero yipu me. Ero warai cirihra ro mak ehcoko ponaro awehtopo komo me oyakrono wara.

24 Owya tîmsom yakn̂itopo ciri xe awexitaw so roowo enmecoko ero yapon me. Ero pona tak akn̂icoko awokuthîrî komo pun, oper̂a pun anarimaw, paaka pun anarimaw. Ero pona xa takn̂itîkaxmu akn̂icoko, Aaxe xa wasî, kacho me tîmsom marha. Ahtono na wîîr̂a amn̂e oyosotî yeken me iina akn̂icoko awoh komo pun. Ero yimaw iina xa marha kmokyas Ow hara awakronomaxi so.

25 Toopu tko na menmekyatu anarimaw owya tîmsom yakn̂itopo me hara. Ero yipu ciir̂ataw awya so enporixapu cirihra ehcoko toopu. Tîwîrîmaxi nas owya toopu yenporitopo ke enpor̂ataw awya so. Ero ke ero warai ke enporira ehcoko owya tîmsom yakn̂itopo me ciisom.

26 Kawno cirihra marha ehcoko owya tîmsom yakn̂itopo. Ero yipu ciir̂ataw ehyu pore mîkainatu, ero pona tîmsom ciitome awya so. Ehyu pore akainataw so akicicin komo na n̂esenpe kica. Ero ke kawno cirihra ehcoko, kekn̂e awya so, kesî. Ero wa kes awya so Kporin komo, kasko yîwya so, kekn̂e tî Kporin komo Moises ya. Ero wa kekn̂e.