On wara marha kekn̂e Kporin komo Moises ya, Taa, on warai marha Ixaw Yana komo panatanmetopo ekatîmko yîwya so.

2 Anarimaw awanton na mahsîyatu apoyino, Ebrew rma. Noro yipu yahsîyataw awya so awanton me nai 6 cimn̂ipu mak. 7-nhîrî po tak ahyai tomhe hara tanme ro. Esepemara rma tompe.

3 Cewn̂e mokyataw awanton komo me, cewn̂e marha tompe hara ahyai so. Cihyem na mahsîyatu anarimaw. Noro yipu cetaw hara cipici yakro rma tompe.

4 Yipihnî yahsîyataw awya so on wara na matu, amyamro rma na mipihcetu. Ero yinhîrî n̂ewruya tak na yîmxîkrî komo kîrkomo, woosî kom ha na. Amn̂e iin̂o cetaw hara ahyai noro mak tompe. Ahyaw so rma n̂expe yihcinhîrî, yîmxîkrî komo marha.

5 On wara tko na nîîke awanton, noro yin̂o ha, Oyantoman̂e pînîn yaw wasî, opici pînîn yaw marha, omxîkrî pînîn yaw marha. Ero ke oyetow xera rma wasî oyantoman̂e yai, nîîke.

6 Ero wa ketaw yîwya noro tak narpe antoman̂e en̂ekano rin̂e komo yaka. On wara marha tanton n̂irpe, mîîmo metatan yaka narpe, metata yecepu yaka mak. Iito tak tanton panarî mapirî tak natpope kuwikuwici ke. Ero wa atpoche noro yanton me tak nasî etowîn me ro mak.

7 Anarimaw yîîm na nîmya cemsîrî epethîrî pona anarî yanton me. Ero wa tîmîche tantoman̂e yai etowra ro mak n̂expe. Kîrkomo warahra nasî.

8 Anarimaw tantoman̂e n̂enîrî mexehra na nai emasî. Yiixera tak na nai antoman̂e, cipici me tînahsîthîrî xera rma okwe. Ero wa exitaw nowcowpe tak iyanan komo epethîrî pona. Iyanan komo ya mak nîmpe. Anarî ro komo ya tîmîhra ro mak n̂expe. Wooxam yemîknorî ke anarî ro komo ya tîmîhra ro mak n̂expe.

9 Anarimaw na emasî nahsîya kîîrî epethîrî pona. Tumumuru ya tîmsom me na nahsîya yipici me. Ero wa tîmîche cemsîrî wara rma noro n̂irpe yîîm.

10 Anarimaw yîîmî rma na nahsîya cipici me. Ero yinhîrî na anarî nahsîya hara cipici me. Ero wa ahsîche yihcirî me ahsîxapu nahrî rma nîmhe, ponon marha. Enaka marha n̂etakripe.

11 Ero wara roro n̂expe iin̂o noro poko. Ero wara exihra exitaw noro poko, tomhe tak wooxam yîhyai tanme ro. Esepemara rma tompe, kekn̂e. Ero wa kekn̂e Kporin komo Moises ya Ixaw Yana komo panatanmetopo.

12 On wara marha kekn̂e Kporin komo Moises ya, Anarimaw cewapatosom me na nai apoyino, tooto pen na n̂etape twaihkaxi ro okwe. Ero wa exitaw noro pen waihkacoko hara, waihkan̂enhîrî ha.

13 Anarimaw tko na tînwaikarî wapantaw eseyamra xakn̂e. Kaan mak na tooto waihkape yîwya. Ero wa exitaw ewto pona n̂emahcipe waihkan̂enhîrî, noro yipu komo yemahcitopo me on̂iritho pona.

14 Anarimaw tpoyino waihkesî tooto tanme ro rma. Emku me na nîîce yîhyaka waihkachome. Waihkan̂enhîrî na n̂emahciya owya tîmsom yakn̂itopo yaka. Ero wa exitaw en̂exa rma aacoko waihkachome.

15 On wara xa na nai anarî kom hara, tîîm komo rma na n̂etapetu okwe. Tînocwan komo na n̂etapetu anarimaw. Ero wa etapache etapan̂enhîrî men waihkacoko.

16 Anarimaw xa na tooto nahsîya tooto xa marha. Ahsîche tîhyaka na n̂iir̂a ahsîpînkan me. Anarimaw na nîmya anarî komo ya epethîrî pona. Ero wa enîche awya so aan̂enhîrî men waihkacoko.

17 Anarimaw xa na tîîm n̂eremke apoyino, tînocwan n̂eremke anarimaw. Ero wa kan̂enho men waihkacoko.

18 Anarimaw xa na kîrkomo n̂eseiyatu. Cein̂e na n̂etape anarî tamorî ke, anarimaw toh ke. Waipîra rma tko na nai etapaxapu, namotoya mak ha na.

19 Amn̂e n̂he kar̂pe na nai hara amotoxapunhîrî. Miya so na n̂etar̂a hara tamoyiye mak. Ero wa exitaw etapaxapu yepanpîra ehcoko. On wara mak kacoko etapan̂enhîrî ya, An̂etapathîrî epemakî etapickara ehtoponhîrî, kacoko mak. Etapaxapu yehcemacho yepetho marha tîmko, kacoko marha.

20 Anarimaw xa na tanton n̂etape antoman̂e amoyi ke twaihkaxi ro ha. Kîîrî pen na n̂etape, wooxam pen na anarimaw. Ero yanme waihyataw tpanarepore men nasî waihkan̂enhîrî.

21 Waipîra rma na nai anarimaw anton, etapaxapunhîrî. Cewn̂e kaamo exiche kar̂pe na nai hara, asakî kaamo exiche na. Ero wa exitaw panarera rma cexpore nasî etapan̂enhîrî. Yîn̂epemathîrî mîk anton. Ero ke yîhyokura cexpore nasî etapan̂enhîrî.

22 Anarimaw xa na kîrkomo n̂esetapetu. Wooxam meero na n̂etapetu tarkem. Etaparî ke n̂emarke tak na yîmxîkîthîrî. Anarimaw waipîra rma na nai yîmxîkrî, yohno mak na namotoya yîson. Ero wa exitaw iin̂o n̂epemape wooxam yetapan̂enho. Ero wicakî ow epemakî, kachonho iin̂o ya n̂epemape, Yaaro, ero wicakî cepemapore nasî, ketaw mak en̂ekano rin̂e komo ya, ero wicakî n̂epemape.

23 Kar̂pera rma tko na nai wooxam anarimaw, etapaxapu ha, yîmxîkrî marha na anarimaw kar̂pera. Waihya thakwa na anarimaw. Waipuche waihkan̂enhîrî makîrha tak nasî twaihkapore hara.

24 On wara epanîno cirpore nasî, ewkano rin̂enho cewkapore nas hara. Iyokano rin̂enho nasî tîyokapore hara.

25 Tpoyino pun yakn̂in̂enho nasî takn̂ipore hara. Etapano rîn̂enho nasî cetapapore hara ero wa xa marha. Yîhyokno rin̂enho nasî tîhyokpore hara. Ero wa epanîno cirpore nas hara.

26 Anarimaw xa na tanton n̂etape oko. Cewkaxi ro n̂etape okwe. Kîîrî pen na n̂ewke, wooxam pen ha na anarimaw. Ero wa ewkache ewkaxapu tak tompe tanme ro. Ewthîrî yepetho me rma thakwa nahsîpînkape antoman̂enhîrî.

27 Anarimaw na tanton yotho n̂etape cemohkaxi ro oko, kîîrî yotho na, wooxam yotho ha na. Ero wa iyokache iyokaxapu tak mahsîpînkape antoman̂e tanme ro mak totohme. Iyothîrî yepetho me rma thakwa nahsîpînkape.

28 Anarimaw xa na paaka mayana, paraxkano na n̂iir̂a tmeretîrî ke. Kîîrî pen na paraxke, wooxam pen ha na. Twaihkaxi ro na paraxke okwe. Ero wa paraxkache paaka kr̂a waihkacoko. Yupunthîrî tonohra tko ehcoko. Osomînhîrî panarera ehcoko.

29 Anarimaw na tooto paraxkan̂e ro me na nai paaka, tmayan̂em ro me. Ero wa men nasî okwe awoku paaka oko tamayan̂em ro me, ketu rma na re osom ya poyino komo. Ero yipu rma tooku wacantora na nai okwe. N̂etar̂a rma na iyoku. Noro yipu tak na kîîrî pen waihke okwe, wooxam pen ha na. Ero wa exiche paaka men waihkacoko toh ke. Osomunhîrî pen meero waihkacoko iyokuthîrî yakro rma. Ero wa waihkacoko.

30 Anarimaw paaka nwaihkatho yananînho komo na mokya waihkan̂enho yosom yaka. On wara ketu yîwya, Awaikara nas amna. On wicakî mak amna epemakî. Ero wicakî amna yepemetaw awya awaikara nas amna, ketu. Ero ke ero wicakî n̂epemape waipîra cehtome.

31 Ero wa xa marha nîîke yîîm tîmxîkrî paraxkan̂enho yosom ya, kîîrî mren na paraxke, woosî mren ha na anarimaw. Paaka nasî twaihkapore toh ke, paraxkan̂enhîrî ha. Epethîrî ha, nîîke mak na paaka yosomunho ya.

32 Anarimaw tooto yanton pen na paraxke paaka twaihkaxi ro, kîîrî pen ha na, wooxam pen ha na. Ero wa paraxkache noro pen yosomunho cepemapore nasî. Tîmpore nasî 30 sikru yîwya, prata ha. Paaka reha nasî cetapapore twaihkaxi ro toh ke.

33-34 Anarimaw xa na ewtarî nahrunke apoyino komo. Roowo na nahce yuhnaka. Ero yahrura na nai. Ero yipu yaka na n̂epîrke okno, paaka, buhu ha na. Twaihso ro na n̂epîrke. Ero wa waipuche waixapu yosomunho n̂epemape ewtarî yosom, okno yepetho yecenarî n̂epemape. Okno pen yokoputho rma tko nahsîpe, buhu yokoputho anarimaw. Ero wa nahsîpe ewtarî yosom.

35 Anarimaw paaka pen na paraxke anarî yok hara paaka xa marha. Twaihkaxi ro na paraxke. Ero wa waihkache paraxkan̂enhîrî tak nîmcowpe anarî komo ya epethîrî pona. Ececenarî re tak epethîrî nîraconkacowpe waihkan̂enho yosom, waihkaxapu yosom marha. Waihkaxapu puntho marha nîraconkacowpe ececenarî re hara. Ero wa nîraconkacowpe.

36 Anarimaw tîwyipu paraxkan̂e ro me na nai paaka. Ero wa tooku yehtopo nîhtînoya rma ha na re osom. Waaca yaka rma tko ahrura na nai okwe. Noro yipu na paraxke anarî yoku hara paaka pen twaihkaxi ro. Ero wa exiche paaka yepetho yecenarî rma waihkaxapu yosom n̂epemape waihkan̂enhîrî yosom. Epemache waihkaxapu yokoputho tak nahsîpe tîwyan me hara. Ero wa n̂ehcowpe. Ero wa Ixaw Yana komo panatanmeko, kekn̂e Kporin komo Moises ya. Ero wa kekn̂e.