Taa, nîmtapowakn̂e rma Kporin komo Moises yakro. On wara kekn̂e hara yîwya, On wara marha Ixaw Yana komo panatanmeko, kekn̂e. Anarimaw xa na okno poko n̂en̂epana apoyino paaka poko na, oper̂a poko na. En̂epanmexapu na paraxke totî me. Tooto ya na nîmya anarimaw epethîrî pona. En̂epanmekn̂enhîrî yîhtînopuche awya so aaxapu yosomînho tak n̂epemape noro. 5 paaka nîmpe paaka yepetho me. 4 oper̂a nîmpe oper̂a yepetho me hara.

2-3 Anarimaw na cen̂epan̂em n̂ewomya tpoyino mîn yaka. Ero wa ewomuche cen̂epan̂em pen n̂etape mîîmo yosom twaihkaxi ro. Noro yipu waihkan̂enho waihkara rma ehcoko. Enmapuche makî tko na cen̂epan̂em waihke anarimaw. Ero wa waihkache waihkaxapu pen epancoko. Taa, on wara ciicoko emyawnano yaan̂enho yîhtînopuche awya so, tînarîthîrî nîmpe hara osom ya. N̂epemape anarimaw en̂ekano rin̂e komo mtapotacho yaw roro. Yupurantan exihra exitaw noro rma tîmpore nasî apoyino komo ya anton me. Epethîrî pona tîmpore nai emyawno yosomînho yepemachome.

4 Anarimaw okno poko na n̂en̂epana apoyino paaka poko na, buhu poko ha na, oper̂a poko na anarimaw. Aaxapu rma na meen̂atu an̂enhîrî yaw rma. Kar̂pe rma na nai. Ero wa een̂ataw awya so asakî tak nîmpe hara osomunhîrî ya noro yipu xa marha.

5 Anarimaw xa na tooku n̂en̂emhatake osom tanme ro totohme eseresmachome. En̂emhatakaxapu tak na cee natînano chere. Ero rma nahya okwe. Ero yipu yapuche naatî yosom tak n̂epemape okno yosom. Tînatîrî yeperîrî rma nîmhe yînahkaxapu ya. Puruma yeperîrî nîmpe, uupa yeperîrî na nîmhe. Kir̂wan xa nîmhe yîwya.

6 Anarimaw na peen na makn̂iyatu. Wehto na n̂esenmamya. Anarî mararîn tak n̂etahsîya hara okwe. Anarimaw naatî pen na n̂ecakya okwe yîhkotoxapu, yîhkotonî rma na anarimaw. Ero wa ecakîche n̂epemape tak wehto yirin̂enho ha. Ecahxapu yeperîrî yecenarî n̂epemape.

7 Anarimaw tupurantan na nîmya tpoyino yemyaka entome makî. Ahce komo na nîmya noro yemyaka cemyawno ha. Onî cma re ka meen̂asî. Cemyapore cma re miir̂asî, mîîket ha na yîwya. Eronhîrî rma na naar̂a cen̂epan̂em. Ero yinhîrî cen̂epan̂em yîhtînopuche awya so osomînhîrî tak n̂epemape aaxapu yepetho yecenarî asakî ro.

8 Cen̂epan̂em yîhtînopîra rma awexitaw so emyawnano yenîn̂enho tak aacoko en̂ekano rin̂e komo yaka. Emyawnano yenîn̂enho yehtopo tak n̂entacowpe n̂examro, en̂ekano rin̂e komo. Takîhso n̂entacowpe, Moso rma tko na nahsîye tpoyino yemyawnonho, kachome. Pîra rma na, kachome ha na. Ero wa kachome n̂entacowpe ehtopo.

9 Anarimaw xa na meseseyukyat okwe. Paaka poyero na meseseyukyatu, buhu poyero na, oper̂a poyero na, poono poyero na, ero yipu poyero na meseseyukyatu okwe ehcamnoxapu poyero. Ahyawno tko wenwo oyemyawnotho wara, mîîketu na. Pîra ro makî, owyanî rma mîn, nîîke na apoyino. Ero wa aweseseyukyataw so asakno roro rma etocoko en̂ekano rin̂e komo yaka. Awehtopo komo tak n̂entacowpe n̂examro takîhso. Yîhtînopuche on wara kexe, Amoro xa apoyino memetanmekya ham okwe, kexe tînîhtînoputhîrî ya. Ero ke noro tak tpoyino n̂epemape tînarîthîrî yecenarî, asakî ro n̂epemape.

10-11 Anarimaw awoh komo na mîmyatu apoyino komo yemyaka. Oyarînaw cma re oyok meen̂asî, mîîket ha na yîwya. Ero wa mîîketu buhu poko, paaka poko, oper̂a poko, onoke na poko. Taa, yîhyaw exitaw awokuthîrî pen na waihya okwe, n̂eseper̂ance mak na anarimaw. Anarimaw naar̂a ha na cen̂epan̂em. Aatopo yenîn̂enho exihra ro mak nai okwe. Ero wa exitaw on wara kape tpoyino yokutho yenîn̂enho, Opoyino yokutho yarîhra ro mak wehxe. Kporin komo n̂entarî me rma wa tan wîîkes awya so, kape. Ero wa kache, Taa, ero wa ham, en̂epanmekîra n̂ehxe ham, kape osomunhîrî. Ero wa karî ke ehcamnoxapu yepemara rma n̂expe.

12 Anarimaw enîn̂enhîrî yaw rma tko na nai en̂epanmexapu okwe. Ero wa exitaw osomunhîrî tak n̂epemape aan̂enhîrî.

13 Anarimaw na kamara n̂eske okno enîn̂e yaw exitaw. Ero wa eskache okoputhîrî tak n̂ekpe enpotome en̂ekano rin̂e komo ya. Ero yipu yenîche en̂ekano rin̂e komo ya, Moso yokutho men epemakî, kahra n̂expe enîn̂enhîrî ya.

14 Anarimaw apoyino yoku na mahsîyatu yohnono me mak. Ahyaw so exitaw iyoku pen n̂eseper̂ance, waihya rma na anarimaw okwe. Ero wa na nai osom wen̂ekarî. Ero wa exiche yohnono me ahsîn̂enhîrî n̂epemape iyoku pen. Waixapu pen n̂epemape, eper̂antoxapu xa na waipîra exitaw.

15 Taa, iito rma na nai osom. Noro wero ro rma na waihya, noro wero ro na n̂eseper̂ance anarimaw. Ero wara exiche epemara n̂expe yohnono me ahsîn̂enhîrî. Taa, anarimaw xa na epethîrî pona na mahsîyatu apoyino komo yoku yohnono me rma. Ero wa ahsîxapu waipuche, eseper̂antoche mak na ahsîtoponhîrî yepemacho rma nasî esemetanmetopo yepetho me. Epemacho xa hara tîmîhra rma n̂expe, kekn̂e Kporin komo Moises ya.

16 Taa, on wara marha kekn̂e Kporin komo Moises ya, On wara na nai kîîrî anarimaw, wooxam na nan̂ikya pokonomanî ro. Ero yinhîrî enaka cee. Ero wa exitaw wooxam yîîm n̂epemape pokononhîrî cipici me tak ahsîtome.

17 On wara tko na nîîke yîîm cemsîrî pokononho ya, Pîra ro mak, oyemsîrî tîmîhra ro mak was awya, nîîke na. Ero wa ketaw apici komo yepetho wicakî rma nîmpe yîîm ya. Cipici me ahsîra rma n̂expe ewyomarî ke yîîm ya. Ero wa n̂expe.

18 Taa, anarimaw xa na on wara nai wooxam, yaskomo me na nai okwe. Ero wa exitaw waihkacoko kr̂a.

19 Anarimaw xa na on wara nai hara tooto, okno nukukme wooxam yukukmacho wara rma kica. Ero wa exitaw yukukman̂enhîrî men waihkacoko.

20 Anarimaw xa na on wara nai apoyino hara tokuthîrî pun nakn̂iya anarî ya tîmsom me, ponaro cehtopo ya. Kporin komo pîn ya tîmsom me na nakn̂iya. Noro yipu tîmn̂enho waihkacoko ro mak.

21 Anarimaw xa na acheka so na mokya anarî komo rowon pononho. Noro yipu yemetanmekîra ro mak ehcoko. Exitu po mîxatken̂e amyamro hara anarî ro komo chewno me, kacoko mak.

22-23 On wara marha ehcoko, ecin̂onkaxapu pen komo yemetanmekîra ro mak ehcoko wooxam komo. Rikomo marha emetanmekîra ehcoko eporinkaxapu pen kom ha, etînocwankaxapu pen komo marha. Noro yipu komo yemetanmekîche awya so oyakro na nîmtapowatu. Moxam amna n̂emetanmekyaxe okwe, ketu na owya.

24 Ero wa yîmtapotarî komo yentache owya kîrwonasî tak men apoko so. Kwaihkexe so men okwe waapa ke kacipara imo ke cemyarkem ke. Iin̂omra tak men naxe ahcinhîrî pen komo ero yimaw. Porimra marha tak naxe amxîkîthîrî pen kom hara okwe. Ero wa men kwaihkexe so.

25 Anarimaw on wara na nai achewno komo, oyanan komo poyino, yupurantamra na nai okwe. Noro yipu ya na mîmyatu apurantan komo tîramansom me hara. Ero wa tîmyataw, on wara kahra ehcoko yîwya, Ow men epemakî roro opurantan poko awehtoponhîrî yepetho, kahra ehcoko yîwya. Ero wara rma kexe puranta tîmn̂e ro komo. N̂examro warahra ehcoko amyamro reha.

26 On wara na matu anarimaw, apurantan komo mîmyatu amîtwono komo ya tîramansom me hara. Ero wa tîmrî me rma noro pononî rma na mahsîyatu, Nîramanîya xa hara opurantan amn̂e, kachome mahsîyatu. Ero yipu yahsîche awya so yohno rma tîmcoko hara yîwya kokmamra rma ka exitaw.

27 Noro ponon thakwa mîn, yupun yam thakwa okwe. Ahce yaw thakwa re nîwînîkya ahyaw so exitaw ponon ha? Oyakro na noro yipu nîmtapowa amn̂e. Noro nahsî oponon okwe, nîîke men owya. Yîmtapotarî men wencesî. Wakreno rin̂e ro Ow ha. Ero ke wencesî.

28 On wara marha ehcoko, kicicitho me yîmtapotara ro mak men ehcoko Kaan poko. Kicicme marha yîmtapotara ehcoko akayaritomon komo poko. Noro yemetanmekî xe kr̂a wasî Kaan ya, kahra ehcoko noro yipu poko.

29 Anatîrî komo yeperîrî yenmekyataw awya so owya tîmsom me men ehcoko ero raconho, puruma komo, uupa yukun kom ha. Yohno rma ehcoko, pahkî ahyaw so cirihra. Anarimaw na n̂ewruya apici komo emasîn yakan me rma. Kîîrî me cik na n̂ewruya. Ero warai me ewruche owya men tîmcoko noro cik, amumuru ha.

30 Ero wa xa marha owya tîmcoko awok xîkrî hara, kîîrî me ewruxapu, poturme ewruxapu ha. Ero wa tîmcoko paaka xîkrî, oper̂a xîkrî marha. Tîson yaw rma ka n̂expe 7 kaamo mak. 8-nhîrî po tak owya tîmcoko.

31 Oponarono me mak ehcoko. Ero ke awoh komo puntho yenîche awya so meye woskara po mak, kamara n̂eskatho na mîn meen̂atu, onoke na n̂eskatho meen̂atu, noro yipu puntho tonohra ehcoko. Xapari yotî me mak tîmcoko, kekn̂e. Ero wa Ixaw Yana komo panatanmetopo n̂ekatîmyakn̂e Kporin komo Moises ya.