Taa, nîmtapowakn̂e rma Kporin komo Moises yakro. On wara kekn̂e hara yîwya, On wara marha Ixaw Yana komo panatanmeko, tapota na mencetu tohnawno mak okwe. Ero wa kacho akpara ro mak men ehcoko. Anarimaw on wara na nîîke awya so kicicme ehxapu, Ow akronomakî. Kir̂wan mîkro, owerono mîkro. Yaarono mîn yîmtapotarî, kasko oyen̂ekan̂e komo ya, nîîke na awya so tohnaw ro mak okwe. Ero wa ketaw awya so ewetîra ro mak ehcoko. Ero wa kan̂e akronomara ro mak ehcoko.

2 Anarimaw apoyino komo cetu cow wara mer̂pono pîn komo. Emetanmekno riso wa cetu, waihkano riso anarimaw. Noro yipu komo yakro tohra ro mak men ehcoko. Anarimaw hara na apoyino komo n̂eseseyukyatu. Tohnaw ekatîmn̂e komo na natu mer̂pono pîn. Ero wa exitaw so tohnaw ekatîmn̂e komo akronomara ehcoko, Kir̂wan mîkro, yaarono mîn yîmtapotarî, kahra ehcoko kicicme ehxapu poko kica.

3 Anarimaw tpoyino yemetanmekî xe na nai yupurantamnî. Noro yipu akronomara ehcoko emetanmekno ritopo poko yupurantamra exirî ke makî.

4 Anarimaw on wara na mat hara, aaxera so na nai apoyino komo. Ahna na awcetaw anarimaw noro yoku meen̂atu waaca yai epatakaxapu tanme ro. Mooxe na cee tacirî yaro okwe. Noro yipu yenîche awya so ehcoko hara osom yaka hara aaxatî pîn yaka rma.

5 Anarimaw on wara na meen̂at hara aaxatî pîn, iyoku buhu na meen̂atu ceremaxi. Awomra na nai okwe buhu pen tîmkawnoi cexirî ke, tawsîn̂em ke tîmkawnoi okwe. Ero wa aaxatî pîn yok yeen̂ataw awya so watohra ehcoko. Akronomacoko rma iyoku yanîmrî poko.

6 Anarimaw yupurantamra na nai apoyino. Noro yipu rma na n̂emetanmekya anarî hara yupurantamra exirî ke mak okwe. Ero wa exitaw, Kir̂wanî rma mîkro, kahra ehcoko emetanmekn̂e poko.

7 Anarimaw na cemarontaxmu n̂en̂eke tpoyino tohnaw ro mak. Ero wa en̂ekano rin̂e yai mooxe ehcoko. Kicicme exihnî waihkara ro mak ehcoko, kir̂wan komo waihkara ehcoko. Kir̂wan̂he maxe, kahra ro mak men was Ow kicicme ehxapu.

8 Anarimaw puranta tîmî xe na nai awya so yaaro esen̂ekapora cehtamci. Yînîmrî tko ahsîra ro mak ehcoko. Noro yipu nîmrî yahsîyataw awya so ewuhnî wara awin̂e me nasî, akpîn me awin̂e me okwe. Ero ke ero yipu ahsîra ro mak ehcoko.

9 Anarimaw iito na natu apoyino pîn komo achew so. Noro yipu komo emetanmekîra ro mak ehcoko. Ahwora thakwa nai ham okwe, kapore xa nasî. Ero wa xa marha mîxatken̂e Exitu po awexitaw so. Apoyino pîn komo chew mîxatken̂e amyamro rma okwe, kekn̂e Kaan.

10-11 On wara marha kekn̂e Kaan, On wara marha ehcoko, 6 cimn̂ipu mak ciicoko anatîrî komo. Ero wicakî xa marha anatîrî komo yeperîrî enmecoko anahrî komo me. 7-nhîrî po tak anatîrî komo cirihra ehcoko. Pohra mak n̂expe amararîn komo ero po. Ero wa n̂expe amararîn komo mararîmnî komo nahrî me hara. Tanme ro atîhtaxapu yeperîrî nahcowpe. Akwenhîrî tak n̂expe kooso komo nahrî me hara, akri komo nahrî me marha, ero warai komo nahrî me n̂expe. Ero wa xa marha ehcoko anatîrî komo poko hara uupa yepu poko, oripera poko marha. Eperîrî enmekîra ehcoko 7-nhîrî cimn̂ipu po.

12 6 kaamo marha etapickacoko. Ero wicakî mak nasî awemyawno komo ciitopo. 7-nhîrî po tak epokarecoko. Awoh komo marha n̂epokarepe paaka, buhu komo. Ero wa xa marha n̂epokarecowpe awanton komo mrerî wooxam mrerî, apoyino pîn komo marha. Ero po n̂epokarecowpe tahwore ehtome so hara.

13 Takîhso men entacoko ahnoro omtapotacho apanatanmetopo kom ha. Ponaro anarî komo yehtopo etacira ro mak ehcoko. Noro yipu yosotî yen̂epera ro mak ehcoko amtai so.

14 On wara marha ehcoko cimn̂ipu po roro, osorwaw ro eseresmacoko opoko awahwotacho komo me.

15 Wahrututpamnî Tohtopo me eseresmacoko, 7 kaamo wahrututpamnî mak tohcoko. Ero wa wîîkekn̂e awya so pahxa. Abibe po nuun̂i po eseresmacoko wahrututpamnî tohtopo me, wîîkekn̂e. Ero po mîmokyatken̂e Exitu poi. Ero ke eseresmacoko ero po Abibe po ha. Ero wa eseresmaxi amokyataw so ohyaka, emyarîra mokuhra ehcoko.

16 Anatîrî komo Yeperîrî Yenmetopo yimaw marha eseresmacoko awahwotachome so. Yihcirî me enmekîche anatîrî yeperîrî ero wa eseresmacoko. Ero yinhîrî Anatîrî komo Yenmetopo Yîtîhkacho me xa hara eseresmacoko cimn̂ipu yenatîtopo yimaw tak, anatîrî komo yeperîrî yenmetîkache mîîmo yaka.

17 Ero yimaw so amohcoko ohyaka Aporin komo Kaan yaka osorwaw ro cimn̂ipu po roro. Ahnoro kîrkomo amohcoko.

18 Awokuthîrî komo kamxukutho men̂epetu amn̂e xa so owya tîmsom tîmyataw. Puruma marha na mîmyatu ero yakro ro. Wahrututpamnoxapu tîmîhra ro makî tko ehcoko ero yakro. Wahrututpamnon mak akn̂icoko puruma ero yakro tîmsom me. Awokuthîrî komo pun yakpocataw owya tîmsom me katîthîrî towcoko. Ero tak akn̂icoko ero yimaw rma enmanohkara rma.

19 Yihcithîrî xa anatîrî komo yeperîrî yenmekyataw awya so kir̂wanî ro mak men̂ekacoko. Ero tak ehcoko omîn yaka, Aporin komo Kaan mîn yaka owya tîmsom me. On wara marha wîîkes awya so anarî poko hara, kabra xîkîtho pun tîyohra ehcoko yîson mownu kwaka rma, kekn̂e. Ero wa Ixaw Yana komo panatanmetopo n̂ekatîmyakn̂e Kporin komo Moises ya. Ero wa kekn̂e.

20 Taa, on wara marha kekn̂e Kporin komo Moises ya Ixaw Yana komo panatanmetopo, Esama yaw awcetaw so ancu wen̂epesî aywapu so. Noro akurunpexe so miya roro aweken komo pona roro. Aweken komo me wakir̂wamekn̂e ero pona awar̂axe so.

21 Twerî men ehcoko noro poko ancu poko. Yîmtapotarî marha ewetîcoko. Yîrwonmekîra ehcoko. Kicicme awexitaw so etîrwoxinkara men nas apoko so. Ero wa nasî oyosoken me cexirî ke.

22 Noro mtapotarî men ewetîcoko. Omtapotarî rma mîn mewehcaxe ewehcataw. Ero wa yîmtapotarî yewetîtîketaw awya so noro tak nasî awar̂ma xatî komo yar̂man̂e me. Awemetanmekî xatî komo yemetanmekn̂e me marha nasî.

23 Ero wa cesî oyanton aywapu so ancu ha. Amohew komo cheka awar̂axe so, Etew komo cheka, Peresew komo cheka, Kananew komo cheka, Epew komo cheka, Xebusew komo cheka, ero warai komo cheka awar̂axe so. N̂examro pen tak war̂metîkesî.

24 Ponaro n̂examro yehtopo mamakan me yutupentara ro mak ehcoko. Noro yipu poko ahwotara marha ehcoko. N̂examro yehtopo yukukmara marha ehcoko. Ponaro n̂examro yehtopo kuknonî kr̂a ar̂macoko. Akn̂icoko anarimaw. Toopu nai piirino, ponaro n̂examro yehtopo. Ero yipu akuhr̂apocoko exihra cehso ro.

25 Aporin komo poko xa mak ahwotacoko ponaro awehtopo komo poko ha. Noro poko awahwowataw so awakronomexe so tak. Tuuna wekmexpesî roro amararîn komo yatîkrecho. Anatîrî komo watîkresî puruma tînahke xa tak awehtome so okre. Aweper̂anthîrî komo marha wen̂epesî achei so.

26 Tarke exitaw apici komo emarakara ro mak naxe amxîkrî komo. Etahsînî ro exihra marha nasî wooxam achewno komo. Ero wa maxe ahnoro arowon pono komo. Aporitomontache so mak mîwaiyaxe, nocwakomo exitaw so marha wooxam komo waihyaxe hara.

27 Yukurumîkno me awehtopo komo wen̂epesî aywapu so. Ero ke n̂eraswaxe xa tak apoko so. Tooto cheka awtoche so n̂examro pen wiir̂asî cesewkukmaxmu me. Ahyai so tak n̂emahciyaxe aaxatî pîn komo.

28 Okomo marha wen̂epesî aywapu so. Noro rma tak n̂en̂epesî kr̂a Epew pen komo ekenhîrî komo poi. Kananew pen komo n̂en̂epesî, Etew pen komo marha. Noro yipu komo n̂en̂epesî.

29 Yohno rma tko en̂epera wasî, cewn̂e cimn̂ipu po rma en̂epetîkara wasî. Yohno rma en̂epetaw so owya kamara men n̂epamya, okoyi marha oko. Noro yipu komo yepamrî pona yohno tooto komo yen̂epera wasî.

30 Yamoro mak n̂examro wen̂epesî ekenhîrî komo poi. Amn̂e awepamtîkache so tak wen̂epetîkesî. Ero yimaw ekenhîrî komo tak mahsîtîkexe.

31 On wicakî wukuknomesî arowon komo ero yimaw, Cucurem yecihtarî nasî yîhtîpîrî me. Piristew komo tunarî nasî awxari hara. Axawa imo marha nasî eeco yawxari hara. Eepu nasî mapirî me hara. Ero wicakî nas amn̂e arowon komo. Iitono pen komo war̂mapes awya so. Ero ke n̂examro pen men̂epetîkesî.

32 Iitono komo yakro yîmtapotara ro mak ehcoko awetkurunpetopo komo poko. Ponaro n̂examro yehtopo komo yakro yîmtapotara marha ehcoko akurunpetopo komo poko.

33 Arowon komo po rma exihra ro mak men n̂ehcowpe iitononhîrî komo. Arowon komo po rma exitaw so akiciciren̂e komo me men naxe kica opoko. Ponaro n̂examro yehtopo komo poko awahwowataw so awîrîman̂e komo me men naxe okwe, kekn̂e. Ero wa kekn̂e Kporin komo Moises ya Ixaw Yana komo panatanmetopo.