Taa, ero yinhîrî on wara kekn̂e hara Kporin komo Moises ya, Amohcoko ohyaka Aporin komo yaka. Yaake amohcoko, Araw, Natabe, Abiu, Ixaw Yana yenîn̂e komo 70 kom ha, ero wa amohcoko. Opoko ahwotacoko mooxe n̂he rma.

2 En̂exa rma tak Moises mak mokope ohyaka xa tak Aporin komo yaka. Anarî komo reha mokuhra n̂ehcowpe meyehra Moises yakro.

3 Ero yinhîrî tak Moises n̂etîramekn̂e hara Kporin komo mtapotarî yentan̂enho. Ixaw Yana komo yaka xa hara cekn̂e. N̂examro ya tak n̂ekatîmyakn̂e Kporin komo mtapotacho ahnoro, Ixaw Yana komo panatanmetopo ha. Yîmtapotarî yentache on wara ketken̂e Ixaw Yana komo, Taa, Kporin komo mtapotarî amna n̂ewehcasî ahnoro, ketken̂e.

4 Ero yinhîrî tak Kporin komo mtapotacho mewrekn̂e Moises karita yaka. Enmapuche hara enmarî yakro ro rma pakekn̂e Moises. Kaan ya tîmsom yakn̂itopo tak nakîhcekn̂e îîpî yamrinaw. Toopu mko marha n̂iir̂akn̂e piiri, ehyatkawno, mapata warai. 12 mak n̂iir̂akn̂e toopu. Ixaw Yana tribun komo yecenarîno mîn n̂iir̂akn̂e toopu komo. Ero wa n̂iir̂akn̂e.

5 Ero yipu ciriche kar̂pamxan komo tak nantomekn̂e Moises paaka pun yakn̂itopo poko. Ero ke Kporin komo ya tîmsom nakn̂iyatken̂e. Takn̂itîkaxmu nakn̂iyatken̂e, Aaxe xa nasî amna, kacho marha. Paaka pun mîn nakn̂iyataken̂e Kporin komo ya tîmsom me.

6 Ero yimaw marha okno kamxukutho nanîmyakn̂e Moises. Ero poi narkekn̂e tutum komo yaka. Akwenhîrî ke tak Kaan ya tîmsom yakn̂itopo caramekn̂e.

7 Ero yinhîrî Kaan Karitan nahsîyakn̂e Moises. Omtapotacho ewetîtîkacoko awakronomachome so owya, kacho mîn ero nahsîyakn̂e. Nîmtapotarekn̂e tak Ixaw Yana komo n̂entarî me. Ero yinhîrî tak on wara ketken̂e n̂examro Moises ya, Taa, Kporin komo mtapotachonho yaw roro rma nas amna. Amna n̂ewetîtîkesî, ketken̂e.

8 Ero wa kache tak yîwya so paaka kamxukutho tak nanîmyakn̂e Moises. Iike tak Ixaw Yana komo caramekn̂e. On wara kekn̂e carametaw, On men kamxuku, Omtapotacho ewetîtîkacoko awakronomachome so owya, kacho ciitopo xa on kîwya so, towîhnî me ciitopo ha, kekn̂e. Ero wa kekn̂e Moises Ixaw Yana komo ya.

9 Ero yinhîrî tak Moises cekn̂e îh pona. Araw komo marha cetken̂e, Natabe, Abiu kom ha, Ixaw Yana komo yenîn̂e komo marha cetken̂e 70 kom ha. Ero wa cetken̂e Moises yakro.

10-11 Îh po cexitaw so tak Kaan n̂een̂atken̂e, ponaro Ixaw Yana komo yehtopo ha. Noro tarî yapon xakn̂e toopu yenporixapu, sapira wara. Kaapu wara xakn̂e yusmumnî wara. Ero wa Kaan n̂een̂atken̂e Ixaw Yana yenîn̂e komo. N̂examro yetapara rma tko xakn̂e Noro. Kaanî rma n̂een̂atken̂e n̂examro. Ero yimaw n̂eseresmetken̂e, wooku marha n̂eer̂atken̂e. Ero wa xatken̂e.

12 Ero yinhîrî on wara kekn̂e Kporin komo Moises ya, Amoko tak amoro ohyaka. Îh pona xa tak amok ha. Tan ka esko pahkî n̂he. Tan awexitaw toopu wîmyas awya asakî, enporixapu. Ero poko nasî tmewreso apanatanmetopo komo. Onmewretho rma mîn wîmyas awya. Ero poko tak Ixaw Yana komo mîpanatanmekyas amn̂e, kekn̂e. Ero wa kekn̂e Kporin komo Moises ya.

13 Ero ke Moises tak cekn̂e îh pona xa tak Kaan yeken pona. Xoswe marha cekn̂e Moises yakronoman̂e me.

14 On wara kekn̂e Moises Ixaw Yana yenîn̂e komo ya tîtorî me, Tan ehcoko amyamro reha. Amna mokyas hara amn̂e ahyaka so. Tan naxe Araw, Uru komo. Ahce na poko camkî awexitaw so n̂examro entacoko, kekn̂e.

15 Ero yinhîrî tak îh pona cekn̂e Moises. Kaweresî ke tahruso xakn̂e îîpî.

16 Ero yimaw marha Kaan weyuru xakn̂e îîpî meretwo, Sinai meretwo ha. 6 kaamo xakn̂e îîpî tahruso kaweresî ke. 7-nhîrî po tak Moises yakro nîmtapowakn̂e Kporin komo. Kaweresî chew rma nîmtapowakn̂e.

17 On wara n̂esenpekn̂e Kporin komo Ixaw Yana komo ya, wehto wa n̂esenpekn̂e, rerehrere kan̂e wa. Ero wa n̂esenpekn̂e îîpî meretwo.

18 Kaweresî cheka rma cekn̂e Moises. Miya roro cekn̂e îh meretkoso n̂he. Iito n̂enmayakn̂e 40 ro, 40 ro kokmamyakn̂e marha. Ero wa xakn̂e Moises.