1-2 Taa, ero yinhîrî on wara kekn̂e hara Kporin komo Moises ya, On wara kasko Ixaw Yana komo ya, Kporin komo yaka ehcoko awemyawno komo, ero poi mak. Yîwya tîmsom ehcoko yiixe awexitaw so mak, kasko yîwya so.

3 On warai komo mak ehcoko, ooru, prata, bronse. Ero warai ehcoko, kasko yîwya so.

4-5 Mawîrka marha ehcoko yîswarexapu, yucurexapu, camnarexapu. Riin̂u yatî marha ehcoko kir̂wan, kabra pocitho kahxapu, kahn̂eru picho yucurexapu, wiir̂a warai picho, aakaxa yepu sahsamaxapu.

6-7 Aseci marha ehcoko ramha katî me, kotoporem marha ehcoko weewe yeperîrî ha, katî kotopetopo me cehsom. Omîn yenîn̂e komo yîhkapetopo mîn, takn̂isom marha ehcoko omîn kotopetopo. Toopuci marha ehcoko cepethîkem, oon̂ixi ha. Anarmerpan ehcoko toopuci enporixapu komo, eepoci pokono me ciisom ha. Kaan yaka tîtosom yewantawno pokono me ciisom marha mîn ehcoko toopuci. Ero wa ehcoko awemyawno komo poi, kasko yîwya so.

8 Ero ke tak omîn n̂iicowpe Ixaw Yana komo chewno komo ro me tak oyehtome.

9 Omîn ciir̂ataw awya so omtapotarî yaw roro rma men ciicoko, Ero wa xa ciicoko omîn, kacho yaw roro ciicoko ha.

10 Taa, yamata tak nakîhtocowpe aakaxa yepu sahsamaxapu. 1,1 metru ehyatkawnonke nakîhtocowpe. 0,7 metru akwerî nakîhtocowpe, 0,7 metru kawnonke nakîhtocowpe. Ero wicakî nakîhtocowpe yamata.

11 Akîhtoche yîmkarinomacoko ooru ke esman ke. Yîmkarî yîmkarinomacoko, yai marha yîratawnomacoko. Yamata yakîhtoche aroko warai ciicoko ero poko tapomritîkaxi ro. Ooru re mak mîn ciicoko, aroko.

12 Emekna warai marha ciicoko porin, ooru ciixapu rma, 4 ciicoko. Asîsîknocoko yamata poko eknutaw so. Xehxa 2 ciicoko, mehxa marha 2 ciicoko.

13-14 Aakaxa yepu xîkrî marha enporecoko kwahsî mayo warai me. Ero marha yîmkarinomacoko ooru ke. Yamata yakîhtotîkache awya so kwahsî mayo warai tak yumuncoko amoyekna warai yaro, yamata yawxawno yaro. Yamata yaatopo mîn katawkure warai.

15 Eroromero yumuncoko aatopo emekna warai yaro, mohkan me ro mak.

16 Yamata yakîhtoche ero yaka enkacoko apanatanmetopo komo owya. Wîmyas awya amn̂e ero enkacoko.

17 Yamata yahruru marha ciicoko ooru re mak, esmanî ro ooru. 1,1 metru ehyatkawnon ke akîhtocoko. 0,7 metru akîhtocoko akwerî hara. Amna pînîn yaw cma re mas Apa, kacho mîn yamata yahruru.

18 Kerubin warai marha ciicoko ooru rma hara. Etapacho ke mak ciicoko ooru ero me ha. Yamata yahruru mapitaw so rma ciicoko kerubin warai.

19 Mehxa anarî ciicoko ahruru mapitaw, xehxa hara anarî ciicoko eeco po hara. Ero wa kerubin komo ciicoko. Cewararîno rma ooru ciicoko ahruru me, kerubin me marha.

20 On wara ciicoko kerubin, tapoke ciicoko yaimo yaporî warai ke. Tapockaw ciicoko aporî yamata yepoi. Yamata yahruru yahrun̂e xa hara mîn kerubin yaporî. Etwece ceepatai so ciicoko kerubin yamata yahruru yenîn̂e wara xa ha.

21 Ero yinhîrî tak owya apanatanmetopo komo tak enkacoko yamata yaka. Ero yinhîrî tak yamata ahrucoko ahruru ke.

22 Iina tak keseporpesî awakro so. En̂exa marha kpanatanmekyaxe so amyamro, Ixaw Yana kom ha. Yamata yahruru yepoi rma nasî oyentacho awya so kerubin komo yotaw rma apanatanmetopo komo yen yepoi ha, kekn̂e. Ero wa kekn̂e Kporin komo Moises ya.

23 On wara marha kekn̂e Kporin komo Moises ya, Cuure yapon marha akîhtocoko aakaxa yepu sahsamaxapu. 0,9 metru ehyatkawnonke akîhtocoko. 0,5 metru akwerî akîhtocoko. 0,7 metru kawnonke akîhtocoko. Ero wicakî akîhtocoko cuure yapon.

24 Akîhtoche yîmkarinomacoko hara ooru ke esman ke. Aapo yarokorî warai marha ciicoko aroko warai tapomritîkaxi ro.

25 Aapo yawrutari marha ciicoko aan̂apotu warai hara. Takweke ciicoko awamorî komo yakwerî wicak ha. Ero poko marha aroko warai ciicoko hara ooru ha.

26 Emekna warai marha ciicoko ooru rma hara, 4 ciicoko. Ero komo asîsîknocoko aapo yeknutaw, yîhrepu poko ha.

27 Yîhrepu pahnoke asîsîknocoko amoyekna warai. Kwahsî mayo warai yumuntopo mîn emekna warai. Aapo yaatopo mîn katawkure.

28 Aakaxa yepu enporecoko kwahsî mayo me. Enporiche yîmkarinomacoko ooru ke. Ero ke rma cuure yapon aacoko awcetaw so.

29 Paayu marha ciicoko aapo pono me. Kaxara yanîmtopo marha ciicoko, weer̂a warai marha, tutum marha. Yaake ero yipu ciicoko. Owya tîmsom yen mîn miir̂axe weer̂a warai, tutum kom ha, tarkaxmu yen me ha. Ooru ciicoko ero yipu me esmanî ro ha.

30 Aapo pona tak ciicoko cuure warai, ohyawno pona ha, Iime roro ciicoko iina, kekn̂e. Ero wa kekn̂e Kporin komo Moises ya.

31 On wara marha kekn̂e Kporin komo Moises ya, Ramha yecepu marha ciicoko ooru rma esman ha. Cewararîno rma etapacoko ero me ciitome. Ero tak enporicoko yîhtarî me, yîhrepu me marha, parakwece warai me marha, weewe yeperîrî warai me marha, epemrutun warai me marha. Ero warai komo enporicoko cewararîno rma.

32 Tperemke ciicoko mîn, ramha. 6 peremru ciicoko ecepu pokono. 3 peremru ciicoko mehxa, 3 marha ciicoko xehxa hara.

33 3 parakweci warai ciicoko anarî poko peremru poko. Amentowa yepemrutun warai me, yar̂kwetkuru warai me, ero warai me ciicoko parakweci yakro. 3 xa parakweci marha ciicoko anarî peremru poko hara. Ero wa so ciicoko 6 peremru poko hakî.

34 Ecepu poko reha ciicoko 4 parakweci warai. Amentowa yepemrutun warai me rma ciicoko parakweci komo. Epemrutun warai, yar̂kwetkuru warai, ero warai ciicoko parakweci yakro.

35 Yuturun ciicoko peremru yetahsîtopo yapomyaw, asakno yetahsîtopo yapomyaw ha. Anarî hara ciicoko anarî komo yapomyaw hara. Ero wa ciicoko miya roro 6 peremru cirihtîkaxi ro.

36 Ooru etapacoko parakweci warai me, peremru warai me marha. Cewararîno rma ciicoko ero yipu komo me ooru ha.

37 7 tak akîhtocoko ramha xa tak ha, ecepu pona ciisom, peremru pona ciisom marha. Iina so tak ciicoko omîn weipotome miya miya wara.

38 Ramha tutumuru marha ciicoko, ramha poturu yawototopo marha yaake. Ooru rma ciicoko ero me esman ha,

39 34 kiru wicakî amnonocoko ooru ramha me ciisom, pokono me ciisom marha. Ero wicakî mak etapacoko ero yipu komo me.

40 Ramha kuknon wenpesî awya tan îh po ero yaw roro rma men ciicoko ahnoro, kekn̂e. Ero wa kekn̂e Kporin komo Moises ya.