1-2 Taa, on wara tak kekn̂e Kporin komo Moises ya, Poono tak atpocoko mîîmo me ciisom. 10 mak kahcoko, 12,5 metru wicakî so ehyatkawnon. 1,8 metru wicakî so kahcoko akwerî ha. Etîme re kahcoko. Ero yinhîrî riin̂u yatî tak kahcoko kir̂wan̂he ekposîxapu. Anarî yatî tîswayem, anarî yatî camnarexapu, anarî yatî yucurexapu. Ero wa kahcoko. Ero yipu kapuche kerubin komo ke tak porokutope atpon̂e ro, yaana ha.

3 5 poono atpocoko esen̂etî ponanare. Ero yinhîrî 5 poono xa marha atpocoko esen̂etî ponanare hara. Ero wa atpocoko.

4-5 Tîswayem tak ciicoko poono, aan̂apotu yumuntopo warai me ciki. Yaake atpocoko 50 ha. Ero komo atpocoko poono yen̂etî poko mapitawno yen̂etî poko ha. Ero warai xa marha atpocoko anarî poko 5 poko xa hara. Esemtaka re atpocoko aan̂apotu yumuntopo warai.

6 Ero yinhîrî poono yahsîtopo ciki tak akîhtocoko ooru ciixapu ha. Yaake akîhtocoko 50 xa marha. Ero komo ke tak poono asîsîknocoko cewn̂an me tak ehtome mîîmo yahruru.

7 Ero mkarino marha kahcoko poono hara mîîmo mkarino ha. Kabra poci kahcoko ero me. Yaake kahcoko 11 ha.

8 On wicakî so kahcoko, 13,5 metru ehyatkawnonke kahcoko. 1,8 metru wicakî so akwerî kahcoko hara. Etîme re kahcoko.

9 5 poono atpocoko esen̂etî ponanare cewn̂an me tak ehtome. Anarî komo hara 6 komo atpocoko hara esen̂etî ponanare xa hara cewn̂an me xa marha ehtome. 6-nhîrî tak nasî mîîmo yopono me. Ero ke ero mapirî aramacoko mîîmo potarî pore.

10 Ero yinhîrî 5 komo yen̂etî pona so atpocoko aan̂apotu yumuntopo warai hara. Yaake atpocoko 50 xa marha. Anarî komo yen̂etî ponan me marha atpocoko aan̂apotu yumuntopo warai hara. Ero wicakî so xa marha atpocoko.

11 Ero yinhîrî poono yahsîtopo warai cik akîhtocoko bronse ciixapu. Akîhtoche yumuncoko aan̂apotu yumuntopo warai yaro. Ero wa yumuncoko cewn̂an me tak ehtome, mîîmo yahruru me ha.

12-13 Poono mapirî cik nasî mîîmo mahruru me mak. Ero yen̂etî reha nasî mîîmo yawxarî yahrutopo me hara. 0,5 metru mak nasî peyahruru me xehxa. Ero wicakî xa marha nasî peyahruru me mehxa hara.

14 Taa, anarî marha atpocoko mîîmo yahruru xa hara. Kahn̂eru picho yucurecoko cucure xa cehso ro. Ero komo xa hara atpocoko cewn̂an me mîîmo yahruru me. Ero yinhîrî tak ero mkarino xa hara atpocoko wiir̂a warai picho ha. Ero tak nasî mîîmo mkarino me xa tak, kekn̂e. Ero wa kekn̂e Kporin komo Moises ya.

15 Taa, ero yinhîrî sahsamaxapu tak akîhtocoko takwekem me cehso ro hara. Aakaxa yepu mîn akîhtocoko. Akîhtoche awya so piiri anîmcoko.

16 4,5 metru ehyatkawnon ero akîhtocoko. 0,7 metru wicakî so akîhtocoko akwerî. Ero wicakî so sahsamaxapu akîhtocoko.

17-18 Yaake tak akîhtocoko ero komo mayahsîtopo. Asakî so ciicoko sahsamaxapu mapitaka so. Yaake akîhtocoko sahsamaxapu suu n̂ixan, 20 yakenon.

19 Sahsamaxapu yapon cik marha ciicoko prata ha. Yaake ciicoko 40. Asakî so ciicoko cewn̂an sahsamaxapu yecehton̂e. Anarî mayahsîtopo n̂etahsîyasî apon poko. Anarî mayahsîtopo n̂etahsîyasî anarî poko hara apon poko. Ero wa nasî ahnoro sahxamaxapu cirihtîkaxi ro.

20 Mehxan komo marha akîhtocoko sahsamaxapu hara 20 xa marha nohce n̂ixan komo ha.

21 Ero yaponî komo marha akîhtocoko hara prata ciixapu. 40 xa marha ciicoko. Asakî so ciicoko sahsamaxapu yapon me so. Ero wa so ciicoko.

22 Anarî marha akîhtocoko sahsamaxapu hara oesce n̂ixan hara. 6 mak akîhtocoko en̂exan ha.

23-24 Asakî so marha akîhtocoko sahsamaxapu mîîmo yeknu yahruru hara. Etpoko ero asîsîknocoko meretkoso, mapitaw so marha. Kuripara ciicoko etahsîtopo me.

25 8 akîhtocoko sahsamaxapu mîîmo yeknu yahruru komo. 16 ciicoko ero komo yapon, prata ciixapu ha. Asakî so ciicoko sahsamaxapu yapon me so.

26-27 Ero yakîhtoche tak enporicoko kwahsî mayo warai, aakaxa yepu. 5 enporicoko mîîmo wacan yaro tumunsom. Xehxan yaro tumunsom 5 enporicoko, mehxan yaro tumunsom 5 xa hara. 5 marha enporicoko mîîmo mapitawno yaro tumunsom hara, kaamo yemicitopo n̂ixan yaro tumunsom ha.

28 Kaw xa enporicoko kwahsî mayo warai rakatawno yaro tumunson. Mîîmo yeknu yai cesî miya roro mîîmo yeknu yaka roro hara. Ero wa ciicoko rakatawno kwahsî mayo warai.

29 Sahsamaxapu yakîhtoche tak yîmkarinomacoko ooru ke. Kwahsî mayo warai marha yîmkarinomacoko ooru ke. Emekna warai marha ciicoko sahsamaxapu yewan pokono me kwahsî mayo warai yumuntopo me. Ooru rma mîn ciicoko, emekna warai.

30 Ero yipu komo yakîhtotîkache omîn tak ciicoko, yukuknon wenpesî awya tan îh po ero yaw roro rma men ciicoko, kekn̂e Moises ya.

31 On wara marha kekn̂e Kporin komo yîwya, Ero yinhîrî poono xa hara kahcoko riin̂u yatî, kir̂wan̂he ekposîxapu. Tîswayem yatî kahcoko, camnarexapu yatî marha, yucurexapu yatî marha. Ero kapuche tak kerubin kuknon ke tak porokutope atpon̂e ro, yaana.

32 Ero yinhîrî tak mapata tak enporicoko aakaxa yepu. 4 enporecoko ha. Ero komo tak ciicoko mîîmo rakataka. Mapata yapon pona so ciicoko 4 pona, prata ciixapu pona. Taa, mapata ciriche ero komo pona tak akricoko poono, kawno, anarmerpan ke kahxapu. Poono yahsîtopo ke akricoko ooru ciixapu ke.

33 Poono yakriche tak apanatanmetopo komo yen tak ehcoko mîîmo yaka poono ke tamtakpoyem yaka rma. Poono mkai ciicoko, amtakpo wacan me cehsomu mkai. Xehxa nasî Kaan yekenî rma ha re, mehxa nasî Kaan yekenî ro xa tak.

34 Kaan yekenî ro yaka xa ciicoko apanatanmetopo komo yen. Iina ciriche ahrucoko ahruru ke. Apînîn yaw so oyehtopo poko kesentacho mîn ahruru ha. Ero ke rma ahrucoko.

35 Poono xehxan yaka reha cuure warai yapon ehcoko. Iina marha ehcoko ramha ceknakem. Cuure yapon ciicoko suu n̂ixa ha. Ramha reha ehcoko ero yemtacho yaka hara nohce n̂ixa hara.

36 Anarî hara poono kahcoko mîîmo potarî yahruru me hara. Riin̂u yatî kahcoko, kir̂wan̂he ekposîxapu. Yîswarexapu yatî kahcoko, camnarexapu yatî marha, yucurexapu yatî marha. Ero kapuche mewru komo atpocoko hara porokutocho. Ero warai kahcoko mîîmo potarî yahruru ha.

37 Ero yakritopo marha enporicoko mapata komo 5 ha. Enporiche ooru ke tak yîmkarinomacoko. Poono yahsîtopo marha akîhtocoko ooru rma. Mapata meretkoso ciicoko. 5 marha ciicoko mapata yapon. Ero ciicoko mapata yecehton̂e me. Ero yipu ciriche poono, kawno, akricoko mapata pona. Ero wa ciicoko mîîmo potarî yahruru ha, kekn̂e. Ero wa kekn̂e Kporin komo Moises ya.