Kaan Ya Tîmsom Yakn̂itopo Yukuknomacho
27
On wara marha kekn̂e Kporin komo Moises ya, Aakaxa yepu sahsamacoko hara. Ero tak akîhtocoko owya tîmsom yakn̂itopo me. On wara nasî yukuknomacho, 2,3 metru ehyatkawnon ciicoko. Ero wicakî xa marha ciicoko akwerî hara. 1,3 metru wicakî mak ciicoko kawnon.2 Paaka meretîrî warai me marha enporicoko aakaxa yepu hara. Aapo yeknu pona so ciicoko 4 pona ha. Ero ciriche ahnoro tak yîmkarinomacoko bronse ke.
3 Wemronho yen marha akîhtocoko yaake, wemronho yamehtopo marha, wehto yen marha, kamxuku yen marha parakwe, parata marha okno pun yanîmtopo. Ero yipu akîhtocoko bronse re mak.
4-5 Mîîye marha ciicoko bronse ha wehto yapon me ha. Ero yeknutaw so marha ciicoko amoyekna hara 4 yakenon bronse marha. Ero komo tak asîsîknocoko aapo yatumnaka rakataw xa mîîye yahsîn̂e me.
6-7 Kwahsî mayo marha enporicoko hara Kaan ya tîmsom yakn̂itopo yaatopo. Aakaxa yepu enporicoko ero me. Enporiche bronse ke yîmkarinomacoko. Yîmkarinomache emekna yaro tak yumuncoko. Iitono me tak nasî kwahsî mayo warai tumunso aapo yawxarî po so aatopo me.
8 Tpotokoi ero ciicoko Kaan ya tîmsom yakn̂itopo. Yukuknon wenpesî awya tan îh po ero wara rma men ciicoko, kekn̂e. Ero wa kekn̂e Kporin komo Moises ya.
Kaan Mîn Roron Yukuknomacho
9 On wara marha kekn̂e Kporin komo Moises ya, Omîn roron wacan marha ciicoko. Suu n̂ixan ka ciicoko. 46 metru ehyatkawnon ciicoko iitono ha. Poono rma atpocoko waaca me riin̂u yatî kahxapu, kir̂wan̂he ekposîxapu ha. Ero yipu kahcoko waaca me.
10 20 mapatan ciicoko iinan, suu n̂ixan ha. 20 marha ciicoko mapatan yapon kobre ha. Kiiwi warai marha ciicoko poono yahsîtopo. Aroko warai komo marha ciicoko prata.
11 Ero wa xa marha ciicoko waaca hara nohce n̂ixan hara. 46 metru ehyatkawnon ciicoko iitono hara. Ero wicakî ciicoko poono takrisom. 20 marha ciicoko waaca mapatan iitono kom hara. 20 marha ciicoko mapatan yapon komo bronse hara. Poono yahsîtopo ciicoko, aroko warai komo marha ciicoko prata re.
12 Ehyatkawra n̂he tak ciicoko waaca, oesce n̂ixan ha. 23 metru ehyatkawnon mak iitono ciicoko. Poono rma ciicoko ero wacan me hara. 10 mak enporicoko waaca mapatan me iina ciisom ha. 10 marha ciicoko mapatan yapon hara.
13 Ero wicakî xa marha ciicoko waaca resce n̂ixan hara. 23 metru wicakî ehyatkawnon xa marha ciicoko.
14 Waaca potarî xehxa ciicoko waaca rma poono rma. 6,9 metru wicakî ehyatkawnon ciicoko ero waaca ha. 3 mak enporicoko waaca mapatan iinan ha. 3 xa marha ciicoko mapatan yapon iitono hara.
15 Potarî mehxan hara ciicoko ero wicakî xa marha 6,9 metru wicakî ehyatkawnon hara. Poono marha mîn waaca iitono hara. 3 marha enporicoko mapatan ha, 3 marha ciicoko mapatan yapon hara. Ero wa ciicoko ha.
16 Roro potarî yahruru marha kahpocoko kahn̂e ro ya. Yîswarexapu yatî kahpe, camnarexapu yatî marha, yucurexapu yatî marha. Riin̂u yatî mîn kahpe, kir̂wan̂he ekposîxapu ha. Ero warai kahpe potarî yahruru me. Kapuche yîratarî n̂enpor̂pe mewru ke hara. Ero warai kahpocoko poono, potarî yahruru ha. Mapatan marha ciicoko 4 ha. Mapatan yapon marha ciicoko 4 xa marha.
17 Etîme re ciicoko waaca mapatan roro mamhokono ahnoro. Tarokoi so ciicoko prata ke. Kiiwi warai marha ciicoko meretîrî pahnoke so poono yahsîn̂e. Prata ciicoko ero me.
18 On wicakî xa roro wacan atpocoko, 46 metru ehyatkanon, 23 metru atpocoko akwerî hara. Etîme re xa atpocoko mapirî, poturu marha, yîrakatarî marha. Kaw atpocoko waaca tooto yopo. 2,3 metru ciicoko kawnon ha. Ero wicakî atpocoko poono, riin̂u, kir̂wan ha. Poono mapatan yapon marha ciicoko bronse ha.
19 Bronse xa marha ciicoko ahce na komo ahnoro. Tutum komo, tahrem komo, ahce na yamehtopo komo, roowo cheka tpasahtosom komo ciki, ahnoro mak ero yipu komo ciicoko bronse ha.
Oweyuru Yenîn̂e Me N̂ehcowpe Araw Komo, Kesî Kaan
20 On wara marha kekn̂e Kporin komo Moises ya, On wara kasko Ixaw Yana komo ya, Oyakno komo, oripa yeperîrî apikmocoko ewkukachome. Ero katîtho tak ehcoko Kporin komo mîn yaka ramha katî me eseikan me ro mak ehtome weeyu, kasko yîwya so.
21 Kesentacho yaw nasî ramha, amtakpo yahrutopo xehxa. Mehxa reha nasî Kaanî mtapotacho yen, ahrutopo mkai. Xehxa reha tak nasî ramha. Ero yenîn̂e me n̂ehcowpe Araw komo tumumuru komo yakro. Kokmamrî me mak potuhtocowpe weipotome cenmakaxi ro. Ero wa Kporin komo ramhan n̂iicowpe. Ero wa kacho nasî ponaro Ixaw Yana komo yehtopo miya roro, kekn̂e. Ero wa kekn̂e Kporin komo Moises ya.