On wara marha kekn̂e Kporin komo Moises ya, On wara marha wîîkes awya, Moises, kekn̂e, owya tîmsom pokono komo men̂ekakî Ixaw Yana komo poyino. Awakno cirko ero warai me, Araw ha, yumumuru komo marha. Natabe, Abiu, Ereasa, Itama, ero wicakî nasî Araw mumuru komo, n̂examro marha owya tîmsom pokono me.

2 Ero ke Araw ponon atpopoko Ixaw Yana komo ya kir̂wan̂he esenpotome, noro ponaro xa ehtome so tak apoyino komo. Ohyaka mohtopo mak mîn poono, ahce na poko ehtopo pîn.

3 Yaana komo yakro amtapotakî. Ixaw Yana komo chew naxe anarî komo, Oyekatî ken̂arî komo. On̂iritho rma Mîk Oyekatî yîropotaka so akîhren̂e komo me. Noro yipu yakro amtapotakî. On wara kasko yîwya so, Araw ponon atpocoko kir̂wan̂he Kporin komo ya tîmsom pokono me ehtome, kasko yîwya so.

4 On warai natpocowpe Araw ponon, yumumuru ponon marha, ewantawno, eepoci, ahnorono kawno, ahnorono kawno pînî n̂hema, xapika, aan̂apotu. Ero warai natpocowpe Araw komo ponon owya tîmsom pokono me ehtome so.

5-6 Ero yipu kahyataw ooru yatî rma kahcowpe poono me. Ero yakro riin̂u yatî marha kahcowpe kir̂wan̂he ekposîxapu. Yîswarexapu, camnarexapu, yucurexapu, ero warai kahcowpe riin̂u yatî. Takîhso xa kahcowpe. Kapuche tak ero natpocowpe eepoci me.

7 Yîmkarino kahcowpe, yîratarino marha. Ero yipu yetahsîtopo tak n̂iicowpe asakî. Motaka n̂etahsîcowpe cewn̂an me tak ehtome.

8 Aan̂apotu marha natpocowpe poono eepoci me kahtoponho yakwenho rma. Ooru yatî, riin̂u yatî marha kahcowpe poono me. On warai kahcowpe riin̂u yatî, yîswarexapu, camnarexapu, yucurexapu, ero warai. Kir̂wan̂he ekposîxapu mak kahcowpe riin̂u. Ero yipu kahtîkache natpocowpe aan̂apotu me.

9-10 Toopuci marha n̂enporicowpe asakî oon̂ixi ha. Enporiche Ixaw pen mumutho yosotî komo mewrecowpe ero mko poko. 6 yosotî mewrecowpe anarî poko. 6 yosotî xa marha mewrecowpe anarî poko hara. Potuthîrî yosotî ka mewrecowpe yihcirî me. Ero yinhîrî ponan hara, ponan hara, ero wara mahtîkîthîrî yosotî pona roro.

11 On wara mewrecowpe, toopuci wakîknocowpe yuhnaka n̂he ha re. Cepethîkem mewren̂e ro komo wakîknoyaxe toopu ciki ero wa wakîknocowpe Ixaw pen mumutho komo yosotî. Osotî mewreche toopuci yahsîn̂e n̂iicowpe hara ooru rma.

12 Ero yipu tak n̂iicowpe eepoci pona, ero motaka. Iina n̂iicowpe Ixaw pen mumutho ponaro rma ehtome so Ixaw Yana komo. N̂examro pen yosotî yaan̂e me tak nasî Araw Kporin komo yaka tmokyataw. Tmotaw rma naar̂asî yîhcamnopîra ehtome so Ixaw Yana komo.

13-14 Ero mko yahsîn̂e xa hara n̂iicowpe asakî ooru rma xa hara esmanî ro. Yimici marha n̂iicowpe asakî ooru rma. Awci yapomitopo wara kahcowpe. Kapuche yimici poturu tak n̂imicowpe motawno yahsîn̂e poko.

15 Ero yinhîrî ewantawno marha atpocoko Kaan yakro yîmtapotacho ha. Takîhsom xa natpope. Poono natpexe eepoci me ero yipu ke xa marha ewantawno atpocoko hara. Ooru yatî kahpe, mawîrka marha yîswarexapu, camnarexapu marha, yucurexapu ke marha. Ero warai ke kahpe. Riin̂u yatî marha kahpe kir̂wan̂he ekposîxapu.

16 Kapuche natpope. Ececenarî re xa natpope akwerî, ehyatkawnon marha. 22 sencimetu n̂irpe akwerî, ehyatkawnon marha. Osopo natpope. Ero wa natpope ewantawno.

17-20 Ero poko tak nasîsîknocowpe toopu ciki hara enporixapu. Anarmerpan n̂iicowpe toopu ciki 4 yatî. On wara n̂iicowpe epoyino yatî, sahcu, toopaxu, kahmunkuru. On warai n̂iicowpe ponan yat hara, esmerawta, sapira, ciyamanci. On warai n̂iicowpe ponan yat hara, xasintu, akata, amecista. On warai n̂iicowpe ponan yat hara, beriru, oon̂ixi, xaspe. Ero warai mko nasîsîknocowpe toopu ciki yaatî ro yaw so. Ooru rma n̂iicowpe toopu yahsîtopo komo ciki.

21 12 yakenon n̂iicowpe toopuci. Tosoke kukuknon wakîknoyaxe mewren̂e ro komo ero wa so mewrecowpe toopuci, wakîknocowpe ha. Ixaw pen mumutho yosotî komo mewrecowpe toopu ciki poko, 12 pen komo yosotî. Anarî yosotî mewrecowpe anarî poko, anarî mewrecowpe anarî poko hara, ero wa so mewrecowpe osotî komo ahnoro. Ixaw Yana tribun komo yosotî marha mîn ha.

22 Yimici komo marha n̂iicowpe ooru, esmanî ro. Osorwaw yatî n̂iicowpe. Ero tak kahcowpe awci yapomitopo wara. Ero n̂iicowpe ewantawno yawyoci me.

23 Amoyekna marha n̂iicowpe ooru xa marha. Ero tak n̂imicowpe ewantawno poko eknutaw. Xehxa mehxa wa n̂iicowpe.

24 Taa, toopu mici n̂imicowpe amoyekna poko ewantawno pokono poko.

25 Yimiche mapoturu hara n̂imicowpe toopuci yahsîn̂e poko eepoci motawno poko ha.

26 Anarî xa hara n̂iicowpe amoyekna asakî xa marha, ooru rma. Ero mko tak n̂imicowpe ewantawno poko hara eknutaw, yîmkai mak ha.

27 Ero yinhîrî amoyekna xa hara ciicoko asak hara ooru xa marha. Ero komo n̂imicowpe eepoci poko aan̂apotu yepoi.

28 Taa, ero komo tak n̂imicowpe anarî poko hara. Ewantawno yeknu poko n̂imicowpe poono ke, tîswayem ke. Iina n̂imicowpe aan̂apotu yepoi saka kahra ehtome ewantawno.

29 Ero wa Araw naar̂asî Ixaw pen mumutho komo yosotî cewantawno poko, Kaan yakro yîmtapotacho poko. Tîcoro yecen̂e xa naar̂asî. Ero wa naar̂asî Ixaw Yana komo yetacin̂e roro wara Kaan n̂entarî me.

30 On warai marha n̂iicowpe Araw yewantawno poko, Urin n̂iicowpe, Tumin marha. Ero marha n̂expe Araw coro yecen̂e Kporin komo mîn yaka mokyataw. Ero wa Kaan yakro yîmtapotacho narpe Araw. Iime roro ero narpe Kporin komo mîn yaka tmokyataw, kekn̂e. Ero wa kekn̂e Kporin komo Moises ya.

31 On wara marha kekn̂e Kporin komo yîwya, Taa, ahnorono tak natpocowpe hara eepoci yantarino. Tîswayem poono natpocowpe ero me.

32 Ero rakataw xa nawkacowpe yîhtîpîrî yumuntopo. Poono marha natpocowpe ewtarî mamhoko etahyaxkara ehtome.

33 Ahnorono perî poko natpocowpe kahri warai. Mawîrka ke natpocowpe tîswayem ke, camnarexapu ke marha, yucurexapu ke marha. Yaake natpocowpe kahri warai poono perî poko tapomritîkaxi ro. Yoroyoro komo marha n̂iicowpe kahri warai yotaka so. Ooru rma n̂iicowpe yoroyoro me.

34 Ero wa nasî ahnorono perî pokono. Kahri warai n̂iicowpe, pona hara yoroyoro, pona hara kahri warai hara, pona hara yoroyoro hara miya roro ahnorono perî tapomritîkaxi ro.

35 Ero yaw mak n̂expe Araw Aporin komo yaka tmokyataw, Noro yamtakponî ro yaka. Ero yaw marha n̂epatakape hara en̂exa. Ero wa exitaw yoroyoro n̂esencesî waipîra noro yehtome, kekn̂e. Ero wa kekn̂e Kporin komo Moises ya.

36 On wara marha kekn̂e Kporin komo yîwya, Ooru papaknorecowpe hara awamoyeretarî komo wicakî cehso ro ciki. Tmemehse exiche ero pona mewrecowpe tapota. Wakîknocowpe mewren̂e ro komo wara rma. On wara kacho mewrecowpe, Kaan yanmen xa moso, kacho. Ero wa mewrecowpe.

37-38 Ero tak yimicoko Araw xapikan poko. Tîswayem ke n̂imicowpe poono ke. Araw perî poko rma n̂imicowpe. Ero ke tperî poko rma Araw naar̂asî ero wa kacho. Ero wa kacho naar̂asî orwoxinkachome roro tak Ixaw Yana komo poko. Anarimaw omtapotachonho yaw rorohra na n̂ekyatu owya tîmsom. Ero wa ekyataw yîwya so Araw perî pokono ween̂as Ow Aporin kom ha. Ero ween̂asî kir̂wan̂he yînîmrî komo yentome owya.

39 Anarî hara natpocowpe Araw ponon xa hara, yîmkarino xa hara. Riin̂u yatî kahxapu natpocowpe ero me, kir̂wan̂he ekposîxapu ha. Riin̂u yatî kahxapu xa marha natpocowpe Araw xapikan me hara. Taa, aan̂apotun natpocowpe hara poono rma, kekn̂e. Ero wa kekn̂e Kporin komo Moises ya.

40 On wara marha kekn̂e Kporin komo yîwya, Araw mumuru komo ponon marha natpocowpe, aan̂apotun komo marha, yîxapikan komo marha. Ero warai natpocowpe kir̂wan̂he esenpotome so, n̂examro ponaro marha ehtome so poyino komo.

41 Taa, ero komo yatpotîkache tak amrupoko awakno Araw ya, yumumuru komo ya marha. Ero yinhîrî n̂examro tak yîhkapeko owya tîmsom pokono me. Ero pokono me mak n̂examro cirko.

42 N̂examro kamisan marha natpocowpe riin̂u yatî kahxapu. Osokmuru komo pona rorono me natpocowpe. Ero nasî yupun komo yahrutopo.

43 Ero yipu yaw n̂expe Araw Kesentacho yaka tmokyataw, yumumuru komo marha n̂ehcowpe ero yipu yaw xa marha iina tmokyataw so. Kotoporem yakn̂itopo yaka tmokyataw so ero yipu yaw n̂ehcowpe omtapotarî yentacho ro yaw cexirî ke so. Ero yipu yawhra mokyataw so iina kicicme ehtopo komo me nasî. Ero poyero waihyaxe okwe. Ero ke ero wa kacho mewreko Araw n̂enîrî, noro yepamtho n̂enîrî marha miya rorono komo n̂enîrî. Ero yipu yaw mak etocoko Kaan mîn yaka, kacho mewreko, kekn̂e. Ero wa kekn̂e Kporin komo Moises ya.