On wara marha kekn̂e Kporin komo Moises ya, On wara xa Araw komo cirko ohyaka tmohsom me tak ehtome so, bui ahsîko cewn̂e, kahn̂eru marha ahsîko asakî. Tupunporem mak ahsîko.

2 Puruma marha ahsîko wahrututpamnî, yupuxapu. Panahno marha ahsîko puruma aixapu, wahrututpamnî marha. Katî yakro ceskem mîn ahsîko. Tamnon̂em ciki marha ahsîko puruma kapexapu. Pin̂ipici me aposokaxapu ke ciixapu ahsîko.

3 Ero komo cirko een yaka kahxapu yaka omîn yaka ehtome. Bui yakro rma eeko, kahn̂eru yakro marha.

4 Araw komo marha eeko iina omîn potaka, Kesentacho potaka ha. Yumumuru komo yakro rma eeko. Iito exitaw so n̂examro tîhko.

5 Tîpîche Araw ponon tak amrupoko yîwya amtarino, ahnorono marha, eepoci yakrono ha, eepoci xa tak, ewantawno marha. Ero mko yamrupoche yîwya aan̂apotu marha amrupoko yîwya tmewrem ha.

6 Ero yinhîrî xapika tak amrupoko hara yîwya. Ero pona xa hara aroko tak cirko hara.

7 Ero yinhîrî katî marha anîmko omîn yenîn̂e me ciino ritopo ro ha. Ero tak yukmamko Araw tîpîrî pore. Ero wa noro cirko.

8 Ero yinhîrî Araw mumuru komo tak ehcoko iina xa marha. Ekîche so n̂examro ponon marha amrupoko yîwya so.

9 Ponon komo yamrupoche yîwya so aan̂apotu marha amrupoko yîwya so. Yixapikan komo marha amrupoko yîwya so. Ero wa amrupoko ponon komo yîwya so. Ero wa cirko Araw, yumumuru komo marha owya tmohsom pokono me. Eroromero mak ero poko n̂ehcowpe, epamthîrî komo marha, kekn̂e. Ero wa kekn̂e Kporin komo Moises ya.

10 On wara marha kekn̂e Kporin komo Moises ya, Taa, poono yamrupoche yîwya so bui tak ekpoko omîn potaka. Yîhtîpîrî tak nahsîcowpe Araw, yumumuru komo marha.

11 Ero yinhîrî bui tak waihkacoko iina rma kesentacho komo potaw rma Aporin komo ya tîmsom me.

12 Noro kamxukutho tak cirko paaka meretîrî warai pore awamoyaran ke, owya tîmsom yakn̂itopo pokono pore. Ero wa cirko bui kamxukutho. Ero wa ciriche een yawnonho tak yukmamko roowo pona akn̂itopo mîtkoso rma.

13 Ero yinhîrî bui katîtho nowcowpe wexkiririnthîrî pokononho, erethîrî pokononho marha, par̂kakanthîrî marha asakno roro rma, ero pokononho marha katî. Ero yipu nakn̂icowpe owya tîmsom yakn̂itopo pona.

14 Paaka punu reha nakn̂icowpe mooxe n̂he awetarî komo yai. Yîhcîpîthîrî marha iina nakn̂icowpe, wethîrî marha. Kicicme awehtoponhîrî komo yahrutopo mîn ha. Ero ke mooxe nakn̂icowpe eeta yawhra.

15 Ero yinhîrî anarînhîrî makî ka ehcoko kahn̂eru. Noro tîpîrî tak nahsîcowpe Araw, yumumuru komo marha.

16 Ero yinhîrî tak kahn̂eru waihkacowpe. Noro kamxukutho marha momohcowpe. Ero ke tak owya tîmsom yaknîtopo caramakî, mehxarpa caramakî.

17 Ero yinhîrî kahn̂eru yokoputho tak akpotucoko. Akpotuche korokacowpe petîthîrî, apothîrî marha, wexkiririnthîrî marha. Korokache iina re n̂iicowpe ahnoro yupunthîrî, yîhtîpîrî meero.

18 Ahnoro yupunthîrî nakn̂icowpe akn̂itopo pona. Owya tîmtopo rma mîn akn̂itopo. Kotoporem me nasî ero wa ciitopo owya Aporin komo ya.

19 Ero yinhîrî anarînhîrî tak ehcoko hara kahn̂eru. Noro tîpîrî marha nahsîcowpe Araw, tumumuru komo yakro.

20 Ero yinhîrî kahn̂eru waihkacowpe. Noro kamxukutho marha momohcowpe. Ero tak cirko Araw panarî poturu pona, yumumuru komo panarî poturu pona marha. Kaari n̂ixan pona cirko. N̂examro yamorî yîmhetho pona marha cirko kaari n̂ixan pona. Yîhtarî komo yîmhetho pona marha cirko kaari n̂ixan pona ha. Ero wa ciriche tak tîmsom yakn̂itopo caramakî xa hara. Mehxa xehxa wara caramakî.

21 Ero yinhîrî oper̂a kamxukutho yakwenho tak anîmko, akn̂itopo caramachonho yakwenho rma. Katî marha anîmko yîhtîpîrî pona tukmamsom. Ero tak esmakî kamxukutho yakro. Ero yipu ke Araw caramakî, noro ponon marha, yumumuru komo marha, n̂examro ponon marha. Ero wa caramarî ke tak ohyaka tmohsom me miir̂asî Araw komo, yumumuru komo. N̂examro ponon marha miir̂asî kir̂wan̂he ohyaka mohtopo komo me tak.

22 Kahn̂eru katîtho marha towpoko, matkîthîrî pokono, yîropotawno marha, erethîrî pokononho marha, par̂kakanthîrî marha, ero mko pono marha katîthîrî, petîthîrî marha kaari n̂ixan. Ero mko towpoko ohyaka tmohsom me ciitopo me exirî ke kahn̂eru pen.

23 Puruma marha anîmko cewn̂e mak yupuxapu, panahno marha anîmko puruma kapexapu, tamnon̂em ciki marha anîmko cewn̂e. Iito nasî an̂ekîthîrî puruma, wahrututpamnî, Aporin komo yamtakpon yaw. Ero poyinonho rma anîmko.

24 Ero komo tak cirko Araw yamorî yaka, yumumuru komo yamorî yaka marha. N̂examro tak nanîmcowpe powpow me Aporin komo ya tîmtopo ha.

25 Ero yinhîrî tak puruma amehko hara n̂examro yemyai hara. Eronhîrî tak nakn̂icowpe akn̂itopo pona owya tîmtopo. Kotoporem me nas owya ero wa akn̂iyataw.

26 Ero yinhîrî kahn̂eru yewantho xa hara anîmko. Ohyaka tmohsom me Araw ciitopo mîn anîmko. Ero anîmko powpow me owya tîmtopo. Ero wa anmîche tak awya ero rma ahsîko hara awotî me, kekn̂e Kporin komo Moises ya.

27 Ero wa tîmko owya kahn̂eru pun yakwenho, Araw ciitopo omîn yenîn̂e me, yumumuru komo ciitopo marha mîn ero warai me. Owya tîmxapu rma mîn powpow kaxapu ewanthîrî, petîthîrî marha. Ero wa kache Araw yotî me nasî, yumumuru komo yot me marha.

28 Miya roro ero yipu nîmcowpe Ixaw Yana komo Araw ya, yumumuru komo ya marha. Kaan ya tîmsom yekyataw yîwya so, Aaxe xa wasî, kacho me tîmsom, ero yipu nîmcowpe roro Araw komo ya.

29 Taa, on wara ciicoko Araw ponontho amn̂e noro pen waipuche, yumumuthîrî komo ponon me ciicoko hara ero yimaw. Ero yaw xa n̂ehcowpe amn̂e ehkapetaw so, tîmsom pokono me.

30 Araw waipuche yumumuthîrî tak cirko ohyaka cewomsom me hara Araw pen yemtaka hara. Ero wa ciir̂ataw Araw pen ponontho yaw tak n̂expe 7 kaamo pahkînon. Ero yinhîrî tak mokope omîn yaka iitono poko cehtome tak.

31 Taa, on wara marha kahn̂eru pun cirpoko yîwya so, Araw komo ya tak tîmko. Ohyaka tmohsom me ciino rin̂e me cehsom pun tîmko yîwya so. Ero nîyocowpe omîn yaw.

32 Tîyoche tak ero nonocowpe Araw, yumumuru komo marha. Tuuru komo marha nohcowpe kahxapu yawno ha. Omîn potaw rma ero wara n̂eseresmacowpe.

33 Ero poko nonocowpe cehtoponhîrî komo yahrutopo me. Ohyaka tmohsom me ciitopo komo mîn ero poko rma n̂eseresmacowpe. Anarî komo reha ero yipu poko eseresmara ro mak n̂ehcowpe. Owya tîmxapu xa mîn erewsî. Ero ke anarî komo eseresmara n̂ehcowpe ero poko.

34 Anarimaw kahn̂eru pun tonotîkara natu. Ohyaka tmohsom ciitoponho na n̂etîmce rma, puruma marha na n̂etîmce. Ero yipu yetîmcetaw cenmakaxi ro nakn̂icowpe mak tak. Enmapuche tonohra ro mak tak n̂ehcowpe, tokuhra marha n̂ehcowpe puruma etîmtoxapu. Owya tîmxapu mîn. Ero ke akn̂icoko.

35 Ero wa Araw cirko, yumumuru komo marha. Omtapotachonho yaw roro rma cirko watohnî me ro mak. 7 kaamo enatkakî ohyaka tmohsom me ciitopo komo poko.

36 Ero wa ciir̂ataw so rma owya tîmsom nakn̂icowpe enmar̂atîxera. Bui nakn̂icowpe 7 kaamo po roro nakn̂icowpe kicicme awehtopo komo yahrutopo me. Ero wa owya tîmsom yakn̂itopo akir̂wamapoko yîwya so aapo ha. Ero wa kicicme awehtopo komo yahruche tak katî tak yukmamko akn̂itopo pore. Ero wa kapecoko owya tîmsom yakn̂itopo me mak tak ehtome.

37 7 kaamo po roro bui nakn̂icowpe owya tîmsom yakn̂itopo yakir̂wamachome. Ero wa n̂iicowpe owya tîmsom yakn̂itopo me mak ciitopo. Ero yinhîrî owyan me xa tak nas ero. Ahce na epîrkache ero pona, teme kache mak na ero poko, ero rma tak nas owyanî ro me hara.

38-39 Taa, on warai marha nakn̂icowpe hara owya tîmsom yakn̂itopo pona, oper̂a xîkrî nakn̂icowpe asakî. Ero wa nakn̂icowpe kaamo po roro miya roro rma yîtîhkan me ro mak. Cewn̂e cimn̂ipu ewrutoponhîrî exihnî rma ka nakn̂icowpe. Anarî nakn̂icowpe pahxaxaro ha ka, ero yinhîrî tak anarînhîrî nakn̂icowpe kokon̂i tak.

40 Pahxaxarono yakn̂iyataw oper̂a xîkîtho, puruma marha nakn̂icowpe aposokaxapu 2 ritru wicak ha. Katî yakro ka n̂esmacowpe 1 ritru wicakno yakro. Asece mîn n̂esmacowpe apikmoxapu ke ha. Uupa yukun marha yukmamcoko akn̂itopo pore 1 ritru wicakî owya tîmtopo me rma.

41 Kokon̂i xa tak oper̂a xîkîtho pun yakn̂iyataw hara ero warai xa marha nakn̂icowpe owya tîmsom me xa marha. Puruma nakn̂icowpe marha, uupa yukun marha nukmamcowpe ero pore pahxaxarono wara rma. Aporin komo ya tîmtopo rma mîn ero yipu yakn̂itopo. Kotopore nas owya ero yipu.

42 Ero warai nakn̂icowpe miya rorono komo awepamthîrî komo meero. Omîn potaw rma nakn̂icowpe owya tîmsom me, Aporin komo ya. Owî rma kesepor̂asî iito awakro so. Iito kîmtapowasî awakro so.

43 Iito xa kîmtapowasî Ixaw Yana komo yakro. Kporin komo mînî ro xa mîn, mîîkexe tak oweyuru exirî ke iito.

44 Omînî ro me xa wahsîyasî ero mîîmo. Owya tîmsom yakn̂itopo marha wahsîyasî. Omîn yaka tmohsom me xa wiir̂asî Araw komo, yumumuru komo marha.

45 Ero yimaw Ixaw Yana komo chewno ro me tak wasî. Ponaro cehtopo ro me xa oyen̂axe n̂examro hara.

46 Kporin komo xa Mîk ha ponaro kehtopo kom ha, kexe tak opoko. Noro rma kekyatken̂e so Exitu poi kîchew so cehtome tak, kexe. N̂examro porin Ow ha, ponaro ehtopo komo xa, kekn̂e. Ero wa kekn̂e Kporin komo Moises ya.