On wara marha kekn̂e Kporin komo Moises ya, Taa, on wara wîîkes hara awya, aapo akîhtocoko hara kotoporem yakn̂itopo ha. Aakaxa yepu akîhtocoko ero me.

2 0,5 metru wicakî akîhtocoko akwerî. Ero wicakî xa marha akîhtocoko ehyatkawnon hara. 0,9 metru akîhtocoko kawnon hara. Ero wicakî xa akîhtocoko. Paaka meretîrî warai marha enporicoko. Aapo yaporwan yar̂pîrî rma enporicoko ero me.

3 Akîhtoche yîmkarinomacoko ooru ke esmanî ro ke. Aapo xa yîmkarinomacoko, awxarî marha, meretîrî marha, ahnoro mak yîmkarinomacoko ooru ke. Yîmkarinomache aroko tak ciicoko aapo mamhoko.

4 Aroko mahyaka rma ciicoko emekna, xehxa asakî, mehxa asak hara. Eknu to ciicoko. Ooru rma ciicoko ero me. Kwahsî mayo warai yumuntopo mîn emekna, aatopo yumuntopo ha.

5 Aakaxa yepu rma enporicoko kwahsî mayo warai me. Enporiche ero yîmkarinomacoko ooru ke rma.

6 Taa, aapo yakîhtotîkache omîn yaka ciicoko. Omîn mapitaw nasî yamata omtapotacho yen. Ero yahruru marha nasî iito. Amna pînîn yaw cma re masî, kacho mîn yamata yahruru. Ero komo yamtakpon yahruru nasî poono omîn rakatawno. Ero mîtkoso xa kotoporem yakn̂itopo ciicoko. Iito keseporasî awakro so.

7 Ahnoro kaamo po roro kotoporem nakn̂ipe Araw ero pona aapo pona. Pahxaxaro so nakn̂ipe ramha komo potuhtoche.

8 Kokon̂i so marha kotoporem nakn̂ipe hara ramha komo potuhtoche hara. Ero wa roro Aporin komo ya tîmsom kotoporem nakn̂ipe ero pona. Awepamthîrî komo meero ero wa nakn̂icowpe miya roro.

9 Omtapotacho yaw rorono pîn akn̂ipîra ro mak ehcoko ero pona kotoporem ha. Mîn hak mak men akn̂ipîra ro mak ehcoko ero pona. Awokuthîrî komo pun akn̂ipîra ehcoko ero pona, puruma marha akn̂ipîra. Ero pona marha yukmamra n̂ehcowpe wooku owya tîmsom me. Ero yipu yapon mera ro mak nasî. Kotoporem yakn̂itopo me mak nasî.

10 Kicicme awehtoponhîrî komo yahrutopo n̂irpe Araw ero meretîrî pona. Cewn̂e ro so mak n̂irpe ahnoro cimn̂ipu po roro. Awokuthîrî pun yakn̂iyataw kicicme awehtoponhîrî komo yahrutopo me noro pen kamxukutho rma n̂irpe meretîrî pona awehtoponhîrî komo yahrutopo me. Ero wa xa marha n̂iicowpe awepamthîrî komo miya roro. Oponaro awehtopo komo xa mîn kotoporem yakn̂itopo, kekn̂e. Ero wa kekn̂e Kporin komo Moises ya.

11-12 On wara marha kekn̂e Kporin komo Moises ya, Anarimaw Ixaw yana komo mukuknometu iyakenon ha. Ero wa yukuknometaw puranta nîmcowpe kîrkomo ahnoro Kporin komo ya awahsîpora so ehtome eper̂a.

13 On wicakî so nîmcowpe yukuknomaxapu komo owya Aporin komo ya, sikru raconho wicakno mak nîmcowpe. Kaan mîn yaw nasî sikru ero wicakno poko tan wîîkesî. 20 xera nasî sikru yecenarî cewn̂an yecenarî rma. Ero warai poko wîîkesî, sikru kacho.

14 Etîtîkaxapu komo mak n̂esepemacowpe yukuknomxapu kom ha. 20 cimn̂ipu ewrutoponhîrî ehxapu komo mak n̂esepemacowpe. Noro yipu komo mak nîmcowpe puranta Aporin komo ya.

15 Sikru raconho wicakno mak nîmcowpe. Tupurantayem komo ero yopo tîmîhra n̂ehcowpe. Yupurantamnî komo tîmîhra n̂ehcowpe ero xawyaka hara. Ececenarî re mak nîmcowpe. Ero wicakî so nîmcowpe Ixaw Yana komo owya Aporin komo ya. Awehtoponhîrî komo yahrutopo me tîmcoko ha.

16 On wara ciicoko yînmîthîrî komo, ehtoponhîrî komo yahrutopo ha, omîn yakîr̂wamacho yepetho me ciicoko. Ero wa tîmcoko oponaro awehtome so amyamro Ixaw Yana komo, awehtoponhîrî komo yahrutopo me ehtome marha, kekn̂e. Ero wa kekn̂e Kporin komo Moises ya.

17-18 On wara marha kekn̂e Kporin komo Moises ya, Basia marha n̂iicowpe porin ha. Tîhreke n̂iicowpe. Bronse n̂iicowpe yîhrepu me. Araw komo yesemokarî mîn, yîhtarî komo korokacho marha. Mehxa nas omîn, xehxa nas owya tîmsom yakn̂itopo. Iyotaka n̂iicowpe korokacho kom ha.

19 Ero yawno tuuna nanîmpe Araw, yumumuru komo marha cesemokarî komo me, tîhtarî komo korokacho me marha.

20 Omîn yaka cewom xe so na natu Kesentacho yaka. Owya tîmsom yakn̂itopo yaka na tmoku xe so natu anarimaw. Ero pona owya tîmsom yakn̂ipu xe na natu. Ero wa tmoku xe cexitaw so n̂esemokacowpe ka, tîhtarî komo marha korokacowpe. Ero wa n̂ekorokacowpe roro waipîra cehtome so.

21 Ero wara roro n̂esemokacowpe, tîhtarî komo marha korokacowpe waipîra cehtome so. Ero wa kacho mewreko ponaro Araw komo yehtome, ponaro marha epamthîrî komo yehtome miyan komo rma, kekn̂e. Ero wa kekn̂e Kporin komo Moises ya.

22-24 On wara marha kekn̂e Kporin komo Moises ya, Taa, kotoporem ekpoko hara cesmaxmu. On warai ekpoko, miiha, kir̂wan ha. 6 kiru wicakno mak ekpoko. Kan̂era marha ekpoko kotoporem, 3 kiru wicakî mak ekpoko. Paranci warai marha ekpoko kotoporem ha. 3 kiru wicakî marha ero ahsîko. Kasia marha ekpoko 6 kiru wicak hara. Ero warai ahsîko kotoporem ha. Nukuknomacowpe men ero wicakî so xa ehtome, omîn yaw nasî yukuknomacho ero warai ke rma nukuknomacowpe. Asece marha ekpoko 4 ritru wicakî.

25 Ero mko tak n̂esmacowpe ahnoro. Katî me rma tak nasî esmaxapu, kotoporem. Katî yesman̂e ro xa n̂esmape. Esmache ero tak nasî ahce na kapetopo me Kaan mîn yawno ro me tak ehtome, Kaan yantonî ro me tak ehtome so marha ohyaka tmohsom kom hara.

26-28 Ero ke rma tak omîn kapeko, yamata marha omtapotarî yen ha, cuure yapon marha, ero payun komo yakro rma. Ramha marha kapeko cecehkem ha. Ero pokono yakro rma kapeko. Kotoporem yakn̂itopo marha kapeko. Kaan ya tîmsom yakn̂itopo marha kapeko ero pokono komo yakro rma. Esemokacho komo marha kapeko yîhrepu yakro rma. Ero warai komo kapeko.

29 Oyemyawno me xa tak miir̂axe ero wa kaperî ke. Ahce na cei kache ero komo poko kapexapu poko oyemyawno me marha tak nas ero hara. Ero wa nas ero yipu poko cei kan̂enho.

30 Araw marha yîhkapeko, yumumuru komo marha. Ero wa oyantonî ro me tak n̂examro cirko ohyaka xa tmohsom me ha.

31 On wara kasko Ixaw Yana komo ya, Kporin komo yemyawno me ciitopo ro tan on katî, esmaxapu ha, oyanton me ciino ritopo ro marha. Ero ke ero wara ciino ritopo ro me mak n̂iicowpe. Awepamthîrî komo meero ero warai me mak n̂iicowpe miya rorono kom ha.

32 Apun komo pore yukmamra ro mak men ehcoko, kasko Ixaw Yana komo ya. Ero warai me xa marha esmara ro mak men ehcoko awyanî ro komo me mak, kasko marha yîwya so. Oyantonî ro me ciino ritopo mak mîn ero warai. Ero ke ero warai me mak xa yîhtînocoko.

33 Anarimaw apoyino komo na n̂esme ero warai xa marha. Ero wa esman̂enhîrî waihkacoko. Anarimaw ero warai me esmaxapu ke na nîhkape ohyaka tmohsom pîn. Ero wa yîhkapetaw yîhkapen̂enhîrî marha waihkacoko iyanan komo chewra tak ehtome. Ero wa men ciicoko, kekn̂e. Ero wa kekn̂e Kporin komo Moises ya.

34 On wara marha kekn̂e Kporin komo Moises ya, kotoporem marha ekpoko naatî yeperîrî. Estoraki, on̂ica, karbanu, insensu esmanî ro, ero warai ekpoko. Ececenarî re ero ekpoko.

35 Ero yipu tak n̂esmape esman̂e ro. Kotoporem me tak nas okre. Yîmîtî yakro n̂esmape. Kir̂wan̂he xa n̂esmape owya tîmsom ro me takn̂isom.

36-37 Esmache tak naposokape pin̂ipici me cehso ro. Ero poi tak nanîmcowpe omîn yaka ciitome oyamatan mîtkoso. Aporin komo Ow ha. Owyanî ro mak mîn kotoporem esmaxapu. Ero ke awyan komo me ero yipu cirihra ro mak ehcoko, kasko yîwya so.

38 Anarimaw apoyino komo na n̂iir̂a ero yipu xa marha tîmîn kotoporetopo me mak na. Ero wa ciriche waihkacoko ciin̂enhîrî iyanan komo chewra tak ehtome, kekn̂e. Ero wa kekn̂e Kporin komo Moises ya.