1-2 On wara marha kekn̂e Kporin komo Moises ya, On̂etacitho mîk Besarew, Uri mumuru ha. Uru parî mîk ha, Xuta yepamtho ha. Noro xa wetahce omîn ciin̂e me.

3-4 Kaan Yekatî ken̂e xa tak noro wiire. Ero ke yaana me tak nasî mîn hak ciitopo poko. Ooru ciin̂e ro me nasî, prata ciin̂e ro me marha, bronse ciin̂e ro me marha. Kir̂wan̂he ciin̂e mîk ha.

5 Yaana marha mîk toopuci yenporitopo poko, ahsîtopo yaka ciitopo poko marha, weewe yenporitopo poko marha. Mîn hakî ciitopo poko nasî yaana me.

6 Aoriabe marha wetahce Besarew yakrono me. Aisamake mumuru mîk Aoriabe, Tan yepamtho ha. Yaake naxe ooru pokono komo, prata pokono komo, bronse pokono komo, weewe yenporin̂e komo marha. Yaana mîkyam ero yipu ciitopo poko. N̂examro marha Ow wakîhrew kir̂wan̂he xa tak ciitome so. Ero ke omtapotacho yaw roro rma n̂iir̂axe.

7 On warai yakîhtorî poko kantometken̂e so, omîn poko, omtapotachonho yen poko, yamata poko ha, yamata yahruru poko, mîn hak poko mak omîn yawno poko kantometken̂e so.

8-11 On warai poko marha kantometken̂e so omîn yawno poko hara, cuure yapon, ero payun, ramha cecehkem, ero pokono komo, kotoporem yakn̂itopo, owya tîmsom yakn̂itopo, ero pokono komo, Araw komo yesemokarî, yîhrepu, poono kahxapu, Araw ponon, ohyaka ewomtopo ha, yumumuru komo ponon omîn yaw ehtopo kom ha, yîhkapetopo komo, kotoporem takn̂isom. Ero warai ciitopo poko kantometken̂e so. Ero ke ero yipu komo n̂iicowpe omtapotacho yaw roro rma, kekn̂e. Ero wa kekn̂e Kporin komo Moises ya.

12-13 On wara marha kekn̂e Kporin komo Moises ya, On wara marha kasko Ixaw Yana komo ya, Kporin komo yepokaretopo po roro men epokarecoko. Kporin komo mak Mîk kakir̂waman̂e komo, kacho ponaro awexi xe so wasî. Ero yîhtînotome awya so oyepokaretopo ponaro xa ehcoko. Ero ke miya roro ero ponaro ehcoko awepamthîrî komo meero, kasko yîwya so.

14 Ero ke epokarecoko kepokaretopo po roro. Anarî kaamo warahra nasî ero reha awya so, Kaan ponaro awehtopo komo xa mîn ero ha. Anarî kaamo wara rma na n̂iir̂a apoyino komo anarimaw. Ero wa ciir̂ataw noro pen waihkacoko ero wa ciin̂enho. Anarimaw anarî xa hara na apoyino komo n̂etapicke. Ahce na poko na n̂etapicke ero po rma. Ero wa etapicketaw waihkacoko iyanan komo chewra tak ehtome.

15 6 kaamo mak nai awetapickacho komo. 7-nhîrî reha nas awepokaretopo komo. Kporin komo ponaro xa awehtopo komo mîn. Ero ke ero po etapicketaw apoyino komo noro men waihkacoko.

16 Ero ke ero ponaro n̂ehcowpe Ixaw Yana komo, kepokaretopo ponaro. Etapickara ro mak n̂ehcowpe ero po. Ero wa roro n̂ehcowpe epamthîrî komo meero miya rorono komo.

17 Oponaro xa n̂examro yehtopo kuknon me nasî Ixaw Yana komo ya miya roro oponaro ehtome so etowîn me ro mak. 6 kaamo mak wîxakn̂e Aporin komo kaapu yakîhtorî poko, roowo yakîhtorî poko marha. 7-nhîrî po tak kepokarekn̂e hara, kekn̂e. Ero wa kekn̂e Kporin komo Moises ya.

18 Ero wa kekn̂e Kporin komo Moises ya Sinai Yîpîn po. Ero wa katîkache tak toopu nîmyakn̂e Moises ya asakî, enporixapu. Mewrexapu mîn xakn̂e toopu, kpanatanmetopo komo me mewrexapu mîn xakn̂e mewru. Tamorî ke mak Kaan mewrekn̂e tîmtapotacho ero poko toopu enporixapu poko. Ero nîmyakn̂e yîwya. Ero wa xakn̂e.