Taa, ero yimaw on wara tî ketken̂e Ixaw Yana komo, Pahkî nasî Moises okwe îh po, ketken̂e. Ero ke Araw yaka takî tî cetken̂e cow wara. On wara tî ketken̂e yîwya, Ai Araw, on wara kes amna awya, ponaro kehtopo komo cma re makîhcesî amoro, kaan̂e kom ha. Ahto na nai Moises pen Exitu poi kekn̂enhîrî pen, yîhtînopîra nas amna, ketken̂e tî yîwya.

2 On wara tî n̂eyukyakn̂e Araw, Taa, wiir̂a ham. Ero ke mohkacoko apici komo panatarîntho, amumuru komo panatarîntho marha, awemsîrî komo panatarîntho marha. Ooru mîn apanatarîn komo. Ero tak ehcoko ohyaka, kekn̂e tî yîwya so.

3 Ero ke tpanatarînthîrî komo takî tî mohketken̂e Araw yaka aatome.

4 Ero ke yînmîthîrî komo takî tî nahsîyakn̂e Araw. Nukuyakn̂e takî tî. Namnonoyakn̂e marha tî. Ero yinhîrî takî tî, ooru yenporitopo ro ke n̂iir̂akn̂e paaka xîkrî warai me. Ciitîkache on wara tî ketken̂e Ixaw Yana komo yin̂irithîrî poko, paaka xîkrî warai me ciixapu poko, Ponaro Ixaw Yana komo yehtopo xa moso, Exitu poi kekn̂enhîrî kom ha, ketken̂e tî kica.

5 Tawake exirî komo yenîche tak Araw ya, paka xîkrî ya tîmsom yakn̂itopo takî tî nakîhcekn̂e marha ero mîtwo rma. On wara takî tî kekn̂e Ixaw Yana komo ya, Pahxaxa tak ceseresmacerî kporin komo poko kahwotacho me so, kekn̂e tî yîwya so kica.

6 Ero ke enmapuche tak pahxaxaro rma Ixaw Yana komo tî paketken̂e. Paaka xîkrî warai ya tîmsom tî n̂ekyatken̂e. Ero takî tî nakn̂iyatken̂e takn̂itîkaxmu me. Aaxe xa wasî, kacho marha tî n̂ekyatken̂e. Akn̂ipuche takî tî n̂eremetken̂e ceseresmachome so tak, wooku yeetome marha. Ceseresmache so takî tî nawomyatken̂e hara tahwotachome so tak. Ero wa tî xatken̂e Ixaw Yana komo okwe.

7 Ero ke on wara kekn̂e Kporin komo Moises ya, Ai Moises, etok hara, îîpî enîhtoko hara. Kicicme ro mak tak n̂ehtîkacow okwe amaywen komo, Exitu poi an̂ekîthîrî kom ha.

8 Yohno ro mak omtapotacho nahsîpînkace, Ero wa exihra ro mak ehcoko, kacho owya. Paaka xîkrî warai n̂iicow kica. Ero mamaka tak nutupenwaxe. On wara marha kexe ero poko, Ponaro kehtopo komo xa moso ham, Ponaro Ixaw Yana komo yehtopo xa. Exitu poi kekn̂enhîrî komo xa moso ham, kexe kica ero poko, kekn̂e.

9 On wara marha kekn̂e Kporin komo Moises ya, Ixaw Yana komo yehtopo ween̂asî. Kanwekn̂e ro mak mîkyam ham okwe.

10 Ero ke oyakro yîmtapotara tak esko n̂examro poko orwonîmtîkachome xa tak poko so. N̂examro waihkes ahnoro. Awepamthîrî komo tak wepamnoyas hara mer̂pora, kekn̂e. Ero wa kekn̂e Kporin komo Moises ya.

11 Nîmtapowakn̂e rma tko Moises Kporin komo yakro, ponaro cehtopo yakro. On wara kekn̂e yîwya, Apa, ahce kacho mîrwonîmtîke ayanan komo poko, Exitu poi an̂ekîthîrî komo poko ha? Kar̂pe xa awehtopo ke n̂examro mekye. Awamorî ke rma mekye karitî ro ke.

12 On wara men kexe Exipsiu komo n̂examro waipuche, Ixaw Yana komo waihkachome mak wa naar̂akn̂e kîhyai so. Îîpî chew waihkachome naar̂akn̂e ham. Roowo po exihra cehso ro mak waihkatîka xe so xakn̂e ham, kexe men okwe Exipsiu komo. Ero ke Ixaw Yana komo poko cma re metîrwoxinkesî Apa. Waihkesî men n̂examro, kahra cma re masî ayanan komo poko.

13 Abraaw pen ponaro cma re masî, Isake ponaro marha, Xako ponaro marha. Awanton komo mîkyam. On wara mîîkekn̂e yîwya so, Awepamthîrî komo tak wepamnoyasî amn̂e mer̂pora. Yukuknomarî yopo nasî xir̂ko ero wara xa marha awepamthîrî komo naxe amn̂e, mîîkekn̂e cma re yîwya so. On roowo marha wîmyasî awepamthîrî komo ya, wîîkekn̂e yîwya so, ero rma tak wîmyasî yîwya so. N̂examro tak nahsîyaxe eroromero, mîîkekn̂e marha. Ero ke Ixaw Yana komo poko cma re metîrwoxinkesî, kekn̂e. Ero wa kekn̂e Moises Kporin komo ya.

14 Ero ke tak n̂etîrwoxinkekn̂e Kporin komo. N̂examro pen waihkesî, kahra takî tî xakn̂e, Waihkesî men okwe, kan̂enho. Ero wa xakn̂e Kporin komo.

15 Ero yinhîrî tak n̂esewkor̂mekn̂e Moises. Îîpî tak n̂enîhcekn̂e hara. Toopu naar̂akn̂e asakno roro rma, enporixapu ha. Kaan ya kpanatanmetopo komo me mewrexapu mîn naar̂akn̂e. Tmewreso xakn̂e yîratai, yîmkai marha.

16 Kaan n̂enporitho rma mîn xakn̂e toopu. Kaan nmewretho marha mîn xakn̂e ero poko. Twakîknoso xakn̂e mewru. Ero wa xakn̂e tmewreso.

17 Îîpî yenîhcetaw wara hak kacho takî tî n̂encekn̂e Xoswe. Emtarakacho komo tî n̂encekn̂e. Ero ke on wara kekn̂e Moises ya, Cetar̂maxmu wara xa n̂emtarakexe eeta yawno komo kopi, kekn̂e.

18 Apohana, kekn̂e hara Moises. Ar̂mano rin̂enho warahra wences ow. Ar̂maxapu pen ratacho warahra marha wencesî. Waano wara mak wences ow, kekn̂e.

19 Ero yinhîrî Ixaw Yana komo yetarî pahnoke tmokuche tak paaka xîkrî warai tak n̂een̂akn̂e Moises. Manîmrî komo marha n̂een̂akn̂e. Ero ke nîrwonakn̂e xa tak. Toopu tak nar̂mekn̂e roowo pona. Nahken̂e ro mak îîpî yamrinaka rma.

20 Ero yinhîrî tak paaka xîkrî warai pen tak nakn̂iyakn̂e hara. Akn̂ipuche naposokekn̂e pin̂ipici me cehso ro. Ero tak pahyakn̂e yukwaka hara. Ero yipu ke tak Ixaw Yana komo wokpekn̂e.

21 Ero yinhîrî on wara kekn̂e Moises Araw ya, Ahce wa awîr̂atken̂e moxam on wara yikiciciretîkano ritome awya okwe? kekn̂e Moises.

22 Yîrwomra mak esko opoko, kekn̂e Araw Moises ya. Moxam yehtopo rma wa meen̂as Amoro. Kicicme cexi xatî komo mak moxam kica.

23 On wara ketken̂e owya, Ponaro kehtopo komo xa akîhtoko amoro, kaan̂e komo me. Ahce wa na n̂ehxe Moises pen, Exitu poi kekn̂enhîrî komo, ketken̂e owya.

24 Ero ke on wara wîîkai yîwya so, Ooru exitaw ahyaw so ero mohkacoko, ehcoko ohyaka, wîîkai yîwya so. Ero ke owya nîmyatken̂e. Yîn̂ekîthîrî komo tak war̂mai wehto ywaka. En̂exa rma tak mokye paaka xîkrî warai, kekn̂e. Ero wa kekn̂e Araw Moises ya.

25 Ero yinhîrî Ixaw Yana komo n̂een̂akn̂e Moises, wara ro mak karî komo n̂een̂akn̂e. Ero wa exihra ro mak ehcoko, kahra tî xakn̂e Araw yîwya so okwe. Ero wa ehtopo komo tî n̂encetken̂e yiixatî pîn komo. Ero ke Ixaw Yana komo takî tî n̂een̂atken̂e noro pîntho me mak kica.

26 Ero wa exirî komo yenîche on wara tak xakn̂e Moises, eeta potaka tak cekn̂e. En̂exa rma takî nîmtapowakn̂e Ixaw Yana komo yakro. On wara kekn̂e yîwya so, Onoke xa nai Kporin komo ponarono me? Noro yipu komo amohcoko xiya ohyaka, kekn̂e. Ero yentache Repi yepamtho komo tak cetken̂e Moises yaka.

27 N̂examro toche on wara kekn̂e Moises yîwya so, On wara kesî Kporin komo, ponaro xa Ixaw Yana komo yehtopo, Kacipara imo komo ahsîcoko, aweknutaka so ciicoko. Ero wa tak etocoko apoino komo mîn potaka so. Miya so etocoko ahnoro eeta pono komo yaka. Awaknonhîrî pen komo rma waihkacoko, awakrononhîrî pen komo marha, amîtwononhîrî pen komo marha, kekn̂e yîwya so.

28 Ero ke cetken̂e tak Repi yepamtho komo Moises mtapotarî yanme. Yaake takî tî waihketken̂e okwe tpoinonhîrî pen komo. 3.000 yakenon waihyatken̂e okwe ero kaamo po.

29 Ero yinhîrî on wara kekn̂e Moises n̂examro ya, Kporin komo yanton me tak ecicoko oroto. Ero wa awecir̂ataw so akronomexe so Noro. Ero wa nas apoko so amumuthîrî komo yar̂marî ke awya so, awaknonhîrî komo yar̂marî ke marha, kekn̂e. Ero wa kekn̂e Moises Repi yepamtho komo ya.

30 Enmapuche hara on wara kekn̂e Moises Ixaw Yana komo ya, Kicicme ro mak mehce kica. Kporin komo yaka tko kîwcesî xa hara. Kicicme awehtoponhîrî komo yahrutopo cma re wiir̂asî. Wukukmesî mak, kekn̂e yîwya so.

31 Ero ke Kporin komo yaka cekn̂e hara Moises. On wara kekn̂e yîwya, Apa, kicicme ro mak xatken̂e okwe opoino komo okwe. Ooru rma n̂iice ponaro cehtopo ro komo me kica.

32 Wara rma kicicme ehtoponhîrî komo poko cma re metîrwoxinkesî. Etîrwoxinkan me mak awesehtînoyataw oyosotî xa yîckakî akaritan yaw mewrexapunhîrî, kekn̂e.

33 On wara tko n̂eyukyakn̂e Kporin komo, Pîra, opoko kicicme ehxapu komo yosotî mak wickesî okaritan poko mewrexapunhîrî.

34 Wara rma etok hara. Ixaw Yana komo arko rma on̂ekatîmîtho pona roowo pona. On roowo wîmyas amn̂e aweken komo me, wîîkekn̂e porin pen komo ya ero pona rma arko. Oyancun cesî awan̂e komo me. Wara rma en̂ekano ritopo me exitaw amn̂e, kicicme n̂examro yehtoponho komo yepetho rma wîmyasî yîwya so, kekn̂e. Ero wa kekn̂e Kporin komo Moises ya.

35 Ero ke eper̂a yaw tî Ixaw Yana pen komo n̂iir̂akn̂e Kporin komo. Cerewrem xa mîn xakn̂e eper̂a. Ero wa erepeno n̂iir̂akn̂e Kaan paaka xîkrî warai pokono me tak exirî ke so, Araw n̂iritho pokono me exirî ke so ha. Ero wa n̂iir̂akn̂e.