Ero yinhîrî tak on wara kekn̂e hara Kporin komo Moises ya, Taa, etocoko tak xehxa. Ixaw Yana komo yakro etocoko, Exitu poi an̂ekîthîrî komo yakro. Meyeno pona etocoko roowo pona, Wîmyas awya, wîîkekn̂e pahxa Abraaw pen ya, Isake pen ya marha, Xako pen ya marha. Yaaro xa tan wîîkesî towîhnî me ro mak, On roowo wîmyas amn̂e awepamthîrî komo ya, wîîkekn̂e yîwya so. Ero ke ero pona tak etocoko.

2 Ancu wen̂epes aywapu so. Noro tak nar̂mapes awya so Kananew pen komo, Amohew pen komo, Etew pen komo, Peresew pen komo, Epew pen komo, Xebusew pen komo. Ero warai pen komo nar̂mapes awya so.

3 Kir̂wanî ro mîn roowo. Paaka mown pen nasî iito mer̂pora ro makî, wen pen marha. Owî reha tohra was awakro so. Kanwekn̂e ro komo mak amyamro. Tîpîmîyewaxkem wara mak maxe. Awakro so mokuhra wasî awaikara so oyehtome okwe esama yaw rma, kekn̂e. Ero wa kekn̂e Kporin komo.

4 Ero yipu yentache Ixaw Yana komo ya ahwora ro mak takî n̂ehtîketken̂e. Okwe, okwe, okwe, ketken̂e. Tporokru komo yawhra tak xatken̂e.

5 On wara kekn̂e Kporin komo Moises ya, On wara kasko Ixaw Yana komo ya, kanwekn̂e ro mak amyamro tîpîmîyewaxkem warai kica. Awakro so owcetaw ketaw ha re kwaihketu so ha na yohno ro mak okwe. Ero ke mohkacoko ka aporokru komo apoko so oyesehtînotome, Ahce wa na n̂examro wiir̂a, kachome owya, kekn̂e.

6 Ero ke tporokru komo mohketken̂e Ixaw Yana komo Orebe Yîpîn yamrinaw rma. Ero wa xatken̂e.

7 On wara xakn̂e Moises ero yimaw, roona naar̂akn̂e eeta yai. Mooxe n̂he tak ero n̂iir̂akn̂e mîîmo me. Kaan Yakro Kesentacho on, kekn̂e ero poko. Ero ke Kaanî mtapotarî yenta xe cexitaw so Ixaw Yana komo, Kaan Yakro Kesentacho komo yaka cetken̂e eeta yai cewyarono yaka ha.

8 Moises marha cekn̂e roro iina Esentacho komo yaka. Noro cetaw iina ahnoro Ixaw Yana komo cetken̂e tîmîn komo potaka. Iina n̂ecececetken̂e. Moises torî ka n̂een̂atken̂e ero yaka cewomso ro.

9 Ewomyataw Moises, kaweresî takî nîhcekn̂e patawno ha. Iina tak n̂ecececekn̂e Kesentacho komo potaka. Iito ka xakn̂e Kporin komo Moises yakro cesentarî poko.

10 Ero wa roro xatken̂e Ixaw Yana komo. Kaweresî yenîche Kesentacho potaw tîmîn komo potaka so tak mokyatken̂e. Iito tak n̂ecececetken̂e ahnoro. Oporin Amoro, ketken̂e Kaan ya iito cexitaw so.

11 Kporin komo nîmtapowakn̂e Moises yakro eepatai xa, kakrono komo yakro tîmtapowaxe ero wara rma. Kporin komo yakro cesentatîkache tak eeta yaka cekn̂e hara Moises. Iito rma tko n̂etînomyakn̂e Moises yakrononho Xoswe ha, Kesentacho yaw rma.

12 Iito rma ka cexitaw Moises on wara kekn̂e Kporin komo ya, Apa, on wara mîîkes owya, Ixaw Yana komo arko, mîîkesî. Wara rma oyakro tîtosom yetacira rma masî. Noro xa wen̂epesî awakro so, kahra rma mas owya. On wara rma re mîîkes owya, Moises amoro, Tawake was apoko, mîîkesî marha re owya.

13 Ero ke tawake awexitaw opoko owî n̂he cma re mîhcamhokesî awehtopo poko, Ero wa xa nai ham Kporin komo, kachome tak owya. Tawake awexi xe roro was opoko. Ero ke awehtopo poko n̂he cma re ow mîhcamhokesî. On wara marha cma re masî, Oyanan mîkyam Ixaw Yana komo, kan̂e me cma re masî, kekn̂e Moises.

14 On wara n̂eyukyakn̂e Kporin komo, Oyekatî rma ces awakro so. Cepokaresom me marha kiir̂axe so, kekn̂e.

15 On wara n̂eyukyakn̂e Moises, Awekatî tohra exitaw amna yakro amna yen̂epera ro makî cma re masî xehxa.

16 Tawake nai ham Kporin komo Moises poko, Ixaw Yana komo poko marha, kahra thakwa natu anarî yana komo mokuhra awexitaw amna yakro. Amna yakro amokyataw mak amna n̂esenpesî anarî yana komo warai pîn me, roowo poko hakno komo warai pîn me ha, kekn̂e tî.

17 Taa, kekn̂e Kporin komo Moises ya, amtapotacho yaw roro rma wasî tawake oyexirî ke mak apoko, awosotî ponaro oyexirî ke marha, kekn̂e.

18 On wara xa hara kekn̂e Moises yîwya, Apa, kir̂wanî ro me awehtopo cma re menpes owya, kekn̂e.

19 Taa, kekn̂e Kporin komo. Kir̂wanî ro me xa oyehtopo ahnoro wenpesî awya ahyari owcetaw. Oyosotî marha wekatîmyas awya, Aporin komo, kacho ha. On wara xa wasî, onwakrerî komo wîhtînoyasî oyanme ro mak. Yîpînîn yaw oyehtopo komo wîhtînoyasî marha oyanme ro mak.

20 Oyepatarî tko enîhra ro mak masî. Oyepatarî yeen̂ataw tooto ya waihyasî thakwa okwe, kekn̂e tî.

21 On wara marha kekn̂e Kporin komo Moises ya, Tanî nasî oyamrinaw toopu. Ero po ececetotamko.

22 Kir̂wan̂he oyehtopo cesî tak ahyari. Ero wa cetaw ka ewtarî yaka kiir̂asî. Iito nasî ewtarî toopu yexenaw. Iina awiriche kahruyasî tak oyamorî ke ahyari xa owcetaw.

23 Owtoche n̂he kahrunkes hara omkarî yentome tak awya. Oyepatarî xa enpora ro mak wasî, kekn̂e. Ero wa kekn̂e Kporin komo Moises ya.