Ero yinhîrî on wara tî kekn̂e hara Kporin komo Moises ya, Toopu enporiko hara asakî xa hara, kokon̂oro menporiy ero warai xa marha. Ero poko tak mewresî xa hara apanatanmetopo komo. Yihcirî me mewreye ero xa marha mewres hara, anahkathîrî pokononho wara xa marha.

2 Pahxaxa men amok ha Sinai Yîpîn pona pahxaxaro rma. Îîpî meretkoso amoko esenposo owya.

3 Akronomra ro mak tak amok ha. Anarî exihra ro mak n̂expe ero yimaw îh po mapirî po meero. Toh komo marha n̂en̂epecowpe îh yamrinai. Iito eseresmara ro mak n̂expe iyoh komo, kekn̂e. Ero wa tî kekn̂e Kporin komo Moises ya.

4 Ero ke toopu tî n̂enpor̂akn̂e xa hara Moises asak ha, yihcithîrî pen warai xa marha. Enmapuche tak tî pahxaxaro rma Sinai Yîpîn nawnukyakn̂e hara Kporin komo mtapotachonho yaw roro rma. Toopu naar̂akn̂e cemyaw îh pona, enporixapu.

5 Ero yimaw tak tî Kporin komo nîhcekn̂e Moises potpona. Kaweresî chew rma nîhcekn̂e. Iina tak n̂ecececekn̂e Moises yakro. Iito cexitaw, Kporin komo yosotî ponarono xa Ow ha, kekn̂e tî yîwya.

6 Kporin komo rma takî tî cekn̂e Moises yeepatari. On wara kekn̂e yîwya tîcetaw, Aporin komo xa Ow ha. Aporin komo xa Ow ponaro xa awehtopo komo. Tooto pînîn yawno Ow ha, wakreno rin̂e marha Ow, yamoro cetîrwonmesom marha. Kir̂wanî ro xa Ow, yaarono me tîmtapotaxmu mak. Noro yipu Ow ha.

7 Mer̂pono pîn miw komo pînîn yawno Ow ha. Noro yipu komo yehtoponho yîhcamnon̂e Ow, kicicme ehtoponhîrî komo yîhcamnon̂e, oyanwetoponho yîhcamnon̂e marha. Kir̂wan̂he maxe, kan̂e pînî ro makî tko Ow kicicme ehxapu komo poko. Kicicme exitaw so yîîm komo ero wa ehtoponhîrî komo rma wiir̂asî yîmxîkrî komo pona meero. Osorwaw ro na n̂ehretawnometu, 4 ro ha na. Ero wicakno komo pona wiir̂asî kicicme porin pen komo yehtoponho, kekn̂e. Ero wa tî kekn̂e Kporin komo Moises ya.

8-9 Ero yentache tak tî Moises nutupenwakn̂e yohno ro mak cesewnaposo ro. Oporin Amoro, kekn̂e tî yîwya. On wara marha kekn̂e yîwya, Apa, tawake awexitaw opoko amna yakro cma re mîmokyasî. Awanwekn̂e ro rma re amna tîpîmîyewaxkem wara mak okwe. Wara rma akpîra amna yehtoponho cma re mîhcamnoyasî, kicicme amna yehtoponho ha. Ayanan me xa cma re amna mahsîyasî, kekn̂e. Ero wa tî kekn̂e Moises Kporin komo ya.

10 Taa, kekn̂e tî Kporin komo yîwya, ero wa was apoko so. On wara marha wîîkes awya, awakronomacho komo tak wekatîmyas awya. Apoyino komo wero ro kar̂pe xa oyehtopo wenpesî eserepokachome so. Ero wa kar̂pe oyehtopo yenpora ro mak wîxakn̂e anarî pono komo ya, roowo poko hakno komo ya. Pîra ro mak. Kakronomexe so amyamro xa. Cirihnî mko wiir̂asî emapona awero ro so. Ero wa awakronomacho komo tak n̂een̂axe yîchew so awehtopo komo. Aweserepokacho komo xa mîn cirihnî ciitopo komo owya, awakronomacho komo owya ha.

11 Ero ke omtapotarî men ewetîcoko, awya so wîîkes oroto ero rma. Amohew pen komo war̂mapes awya so, Kananew pen komo, Etew pen komo, Peresew pen komo, Epew pen komo, Xebusew pen komo. Ero warai pen komo war̂mapes awya so.

12 Iitono komo yakro men yîmtapotara ehcoko awetkurunpetopo komo poko, iina mîîcexe iitono komo yakro ha. Ero wa amtapotache so akro so awîrîman̂e komo me men naxe okwe.

13 Ponaro n̂examro yehtopo ya tîmsom yakn̂itopo yixkacoko. Toopu nasî iito piirino, anarî yakro yîmtapotacho komo ha. Ero yipu akuhr̂apocoko. Mîk hak warai me ciixapu marha meen̂axe iito weewe ha. Ero yipu amacoko kr̂a.

14 Oporin amoro, kahra ro mak ehcoko anarî ya, ponaro anarî yana komo yehtopo ya ha. On warai xa Ow Aporin kom ha, Ewyomano Rin̂e, kacho Ow. Ero wa nasî oyosot ha. Kaan Ow ha, awewyoman̂e komo xa Ow ha.

15 Iitono komo yukurunpetopo poko amtapotache so awîrîmexe so men okwe. Ponaro iitono komo yehtopo ya tîmsom na mîmyatu okwe, cipici yai cetowsom wara. On wara na nîîke iitono awya so, Mokuhra mat amna yakro ahwotaxi ponaro amna yehtopo poko, nîîke awya so. Ero ke mîîcetu noro yakro eseresmaxi anarî ya tîmsom yakn̂iyataw.

16 Iito awexitaw so n̂examro yemsîrî komo maponukyatu amumuru komo pici me. Ero yinhîrî emsîrî komo yahsîche, ponaro cehtopo komo poko naxe ciin̂o pîn pokono wara kica. Ero ke cipici poyero tak amumuru komo marha nahwowatu ponaro n̂examro yehtopo poko hara, cipici pîn pokono wara rma kica. Ero wa men nat okwe.

17 Ponaro awehtopo komo me akîhtora ro mak ehcoko kuripara, ooru, prata kom ha. Ero warai yukuira ro mak ehcoko ponaro awehtopo komo yakîhtotome.

18 On wara marha wîîkes awya so, wahrututpamnî yohtopo ponaro men ehcoko. 7 kaamo pahkînon wahrututpamnî re mak tohcoko. Pahxa wîîkekn̂e awya so ero yaw roro men ehcoko. On kaamo po ero wa ehcoko Abibe po roro, wîîkekn̂e. Ero po mîmokyatken̂e Exitu poi Abibi po. Ero ke ero po xa marha wahrututpamnî tohcoko.

19 On wara marha wîîkes awya so, Owyan me nasî poturme ewruxapu ahnoro kîîrî ciki. Ero wa nasî awoh komo xîkrî, paaka xîkrî, oper̂a xîkrî marha.

20 Anarimaw awoh komo n̂ewruya buhu. Poturme na n̂ewruya kîîrî me ha. Noro yepetho me tak oper̂a xîkrî waihkacoko owya tîmsom me. Epema xera awexitaw so tko buhu xîkîtho pen men yîpîmîxwocoko waihkachome. Amumuru komo reha poturme ewruxapu komo epemacoko ahnoro. On wara marha wîîkes awya so, ohyaka amokyataw so emyarîra mokuhra ro mak ehcoko.

21 On wara marha wîîkesî awya so, 6 kaamo mak nasî awetapickatopo komo. 7-nhîrî po tak epokarecoko. Mararî pomotopo yimaw rma epokarecoko ero po so, anatîrî komo yeperîrî yenmetopo yimaw marha.

22 On warai ponaro marha ehcoko aweseresmacho komo ponaro, 7-nhîrî Tominku Yimawno, kacho po men eseresmacoko awahwotachome so. Puruma Yeperîrî Yenmetopo po marha ero wara xa marha eseresmacoko yihcirî yenmekrî yimaw. Anatîrî komo Yeperîrî Yenmetîkache marha eseresmacoko awahwotachome so.

23 Ero yimaw so kîrkomo mohcowpe ahnoro ohyaka. Aporin komo Ow ha Kaan ha. Ponaro Ixaw Yana komo yehtopo ro Ow. Ero ke ero wa mohcowpe ohyaka 3 ro yicimn̂ipuntaxera.

24 Ero wa amokyataw roro so anarî yana pen komo war̂mapesî awya so rma. Arowon komo wenmamnoyasî porin me cehso ro. Arowon komo poko pohnîmra ro mak naxe anarî komo. Ero wa kiir̂axe so okre osorwaw roro amokyataw so ohyaka. Aporin Ow ha, ponaro awehtopo komo ro. Noro yipu Ow ero wa awîn̂e kom ha.

25 Awokukthirî komo pun yakn̂iyataw owya tîmsom me puruma marha na makn̂iyatu. Wahrututpamnon makî tko akn̂icoko owya tîmsom me. Awatotoponhîrî komo me aweseresmetaw so oper̂a xîkrî pun yîmtora ro mak ehcoko cenmakaxi ro.

26 Yihcirî me xa anatîrî komo yeperîrî yenmekyataw amîn yaka so kir̂wan komo mak men̂ekacoko ero poyino ha. Ero tak ehcoko Kaan mîn yaka, Aporin komo mîn yaka ha. On wara marha wîîkes awya so, awoh komo xîkrî pun tîyo xe awexitaw so kabra xîkrî pun, yîson mownu kwaw rma tîyohra ehcoko, kekn̂e. Ero wa tî kekn̂e Kporin komo Moises ya.

27 On wara marha tî kekn̂e Kporin komo Moises ya, Ero wa nasî omtapotacho apanatanmetopo komo owya. Ero ke ero wa kacho tak mewreko ahnoro an̂enîrî komo me. Pahxa rma on wara wîîkai awya so, Yaaro xa tan wîîkesi, owya apanatametopo yewehcataw awya so kakronomexe so, wîîkai Ixaw Yana komo ya. Ero ke ero wa kacho yaw roro men kakronomexe so, kekn̂e. Ero wa tî kekn̂e Kporin komo Moises ya.

28 Taa, pahkî tî xakn̂e Moises îh po Kporin komo yakro. 40 ro n̂enmayakn̂e iito, 40 ro marha kokmamyakn̂e iito. Eseresmara ro makî tî xakn̂e iito. Tuuna yerîhra marha xakn̂e. Ero yimaw tîmtapotacho mewrekn̂e xa hara Kporin komo toh poko, enporixapu poko. On wara ehcoko awakronomachome so owya, kacho mîn mewrekn̂e. 10 mewrekn̂e panatanmetopo kom ha. Ero wa tî mewrekn̂e.

29 Ero yinhîrî takî tî Sinai Yîpîn tak n̂enîhcekn̂e hara Moises. Cemyaw tak n̂ekyakn̂e toopu, asakî, Kaanî mtapotarî mewrexapu ha. Cewroromutwe tak xakn̂e Moises yeepatarî, tîroromutwe xa oco. Ero wa xakn̂e Kporin komo yakro yîmtapotarî ke. Ceepatarî yenîhra cexirî ke, Tîroromutwe nasî oyepatarî, kahra tî xakn̂e Moises.

30 Ixaw Yana komo yaka mokuche noro yeepatarî takî tî n̂een̂atken̂e tîroromutwe ro mak oco. Ero wa xa marha n̂een̂akn̂e Araw. Ero ke Moises pona n̂eraswatken̂e. Yîhyaka tîtoxera so tî xatken̂e.

31 Amohcoko rma, kekn̂e tko tî Moises yîwya so. Ero ke yîhyaka tak cetken̂e Araw, Ixaw Yana yenîn̂e komo marha. Mokuche so n̂examro yakro nîmtapowakn̂e Moises.

32 Ero yinhîrî takî tî Ixaw Yana komo ahnoro tak mokyatken̂e Moises yaka. Moises takî tî n̂ekatîmyakn̂e Kporin komo mtapotarî, n̂examro panatanmetopo ha. Kporin komo kekn̂e Moises ya Sinai Yîpîn po ero wa kacho tî n̂ekatîmtîkekn̂e yîwya so.

33 N̂examro yakro tîmtapotache tak tî n̂esewoponyakn̂e Moises poono ke.

34 Kporin komo yaka cewomyataw hara Noro yakro tîmtapotachome n̂esewoponkekn̂e. Tîmtapotache tak Kporin komo yakro yîmîn yai tî n̂epatakekn̂e hara, n̂esewoponyakn̂e xa hara. Cepatakache Kporin komo ya kpanatanmetopo komo tî n̂ekatîmyakn̂e hara Ixaw Yana komo ya.

35 Takro so yîmtapowataw Moises yeepatarî tî n̂een̂atken̂e hara Ixaw Yana komo cewroromutwe exirî. Ero ke n̂esewoponyakn̂e xa hara Moises. Kporin komo yakro yîmtapotaxi tîcetaw hara tî n̂esewoponkekn̂e hara. Ero wa tî xakn̂e Moises.