1-2 Taa, ero yinhîrî on wara kekn̂e hara Kporin komo Moises ya, On wara marha kasko Ixaw Yana komo ya, Oripa ehcoko kir̂wan, apikmoxapu. Ero yipu ehcoko ramha katî me. Iike ramha wokpacowpe roro omîn yawno yeseikara ro mak ehtome ramha, kasko yîwya so.

3 Ero wa wokpape Araw Kesentacho yawno mko, oyamtakpon yahruru mkai ha. Enîn̂e me xa n̂expe noro, Kporin komo ramhan yenîn̂e me. Kokmamche roro ponaro n̂expe cenmakaxi ro. Ero wa kacho ponaro ehcoko miya roro awepamthîrî komo meero yîtîhkan me ro mak.

4 Ramha komo yenîn̂e me roro n̂expe Araw. Ecepu pono komo mîn ramha komo, ooru ciixapu pono kom ha. Aporin komo ramhan yenîn̂e me n̂expe noro.

5 Taa, on wara marha kasko Araw komo ya, puruma aicoko aposokaxapu. 12 aicoko cuure warai, 4,5 ritru wicakî so aicoko.

6 Aiche cuure yapon pona ciicoko, Aporin komo yamtakpon yawno pona, ooru ciixapu pona ha. Asakî yatî panahtocoko, xehxa 6, ero yantaw 6 xa hara. Ero wa panahtocoko.

7-8 Ero yinhîrî kotoporem merurkacoko cuure warai pona xehxan pona, mehxan pona marha. Ero yipu merurkacoko takn̂isom Aporin komo ponaro awehtome so. Sabatu po roro ero wa ciicoko, Aporin komo yamtakpon yawno pono. Miya roro ero wa ciicoko Aporin komo mtapotacho ponaro ro awehtome so etowînî ro mak, kasko Araw ya.

9 Ero yinhîrî Araw komo yuru me tak nasî ero cenposomînhîrî, yumumuru komo yuru me marha. Omîn potaw mak nohcwope. Owya tîmxapu poyinonho rma mîn iyuru komo, yînakn̂irî komo poyinonho ha. Ero ke omîn potaw n̂ohcowpe, kasko yîwya so. Ero wa kacho ponaro ro mak n̂ehcowpe etowîn me ro makî, kekn̂e. Ero wa kekn̂e Kporin komo Moises ya.

10 Taa, ero yinhîrî iito xakn̂e yîchewno komo, kîîrî. Ixaw Yana wosînî rma xakn̂e yîson. Exipsiu xakn̂e yîîm hara. Noro yipu n̂etar̂mekn̂e Ixaw Yana ro yakro. Ixaw Yana komo yetarî po rma n̂etar̂metken̂e.

11 Etar̂metaw so Ixaw Yana wosînî mrerî tî nîmtapowakn̂e kicicitho me Kporin komo poko. Awîrîma xe kr̂a wasî Kporin komo ya, kekn̂e marha tî. Yîmtapotarî tî n̂encetken̂e iitono komo. Ero ke noro tak naar̂atken̂e Moises yaka. Noro yon yosotî xakn̂e Seromice. Cibri yemsîrî tî mîk xakn̂e. Taan yepamtho mîkyam xatken̂e.

12 Taa, Moises yaka arîche nahrupetken̂e ka Kporin komo mtapotarî yentachome noro poko.

13-14 Ero yimaw on wara kekn̂e Kporin komo Moises ya, Kicicitho me yîmtapotaxapu arpoko awetarî komo yai. Iina arîche yîmtapotacho yentan̂e komo nahsîcowpe yîhtîpîrî poko. Ero yinhîrî noro pen tak waihkacowpe Ixaw Yana komo ahnoro toh ke, kekn̂e. Ero wa kekn̂e Kporin komo Moises ya kicicitho me yîmtapotaxapu poko.

15-16 On wara marha kasko Ixaw Yana komo ya, kekn̂e Kporin komo Moises ya, Ero wara roro men ciicoko kicicitho me yîmtapotaxapu komo Tporin komo Kaan poko. Toh ke waihkacoko roro. Noro pen waihkacho nar̂macowpe Ixaw Yana komo ahnoro. Ero wa ciicoko achewno komo, Ixaw Yana me ewruxapu komo marha. Oyosotî poko yîmtapowataw kicicitho me waihkacoko ha.

17 Ero wa xa marha ciicoko tooto wapatho hara, waihkacoko ha.

18 Anarimaw na tpoyino yokutho na waihke apoyino komo. Ero wa exiche tookuthîrî rma nîmpe osomunhîrî ya hara waihkaxapu pen warai xa marha.

19-20 Anarimaw on wara na nai apoyino komo, tpoyino na napoxwe, nîhrexwe ha na. N̂ewke na anarimaw, nîyoke na anarimaw. Ero wa exiche ero wa xa marha ciicoko noro pen hara, tpoyino pen n̂iirî ero wa xa marha.

21 Anarimaw okno pen na waihke apoyino komo. Ero wa exiche tak tookuthîrî rma nîmpe osomunhîrî ya waihkaxa pen warai xa marha. Ero wa n̂expe tpoyino yokutho waihkan̂enho. Tooto waihkan̂enho reha waihkacowpe poyino komo.

22 Etîme re panatanmekno ciicoko ahnoro, achewno komo, Ixaw Yana me ewruxapu komo marha. Aporin komo Ow ha ponaro awehtopo komo xa, kasko yîwya so. Ero wa kasko Ixaw Yana komo ya, kekn̂e Kporin komo Moises ya.

23 Ero yînhîrî tak Kaanî mtapotacho n̂ekatîmyakn̂e Moises Ixaw Yana komo ya. Ero ke tak kicicme yîmtapotaxapu pen naar̂atken̂e cetarî komo yai. Iina takî tî waihketken̂e toh ke. Kporin komo kekn̂e Moises ya ero yaw roro rma tî waihketken̂e. Ero wa waihketken̂e okwe.