1-2 Taa, ero yinhîrî on wara kekn̂e hara Kporin komo Moises ya, On wara marha kasko Ixaw Yana komo ya, On wara nasî Aporin komo poko awahwotacho komo, On yimaw roro so ahwotacoko opoko. Ero yimaw roro so esenmecoko oponarono me mak ha, kasko yîwya so.

3 6 kaamo mak etapickacoko awemyawno komo poko. 7-nhîrî reha nasî awepokaretopo komo me hara. Ero po esenmecoko oponarono me makî. Aporin komo yanme xa epokarecoko ero po ahto so na awexitaw so.

4 Taa, wukuknomesî tak awahwotacho komo Aporin komo poko, oponarono me mak awesenmetopo kom ha. On yimaw roro so an̂ikno ciicoko yukuknomaxapu po awesenmechome so.

5 14-nhîrî kaamo po yukukmacoko Aporin komo ya Awatotoponhîrî komo. Kokmamche tak ero wara awehtoponhîrî komo yukukmacoko roro.

6 Ero yinhîrî 15-nhîrî kaamo po tak Wahrututpamnî Tohtopo me tak nas hara. 7 kaamo wahrututpamnî mak tohcoko awru komo. Ero warai tohcoko Aporin komo ponaro awehtome so.

7 Ero wa awahwotacho komo yihcitopo kaamo po esenmecoko oponarono me mak, Aporin komo ponarono me ha. Ero po awemyawno komo pokohra ehcoko.

8 On wara marha ehcoko 7 kaamo po roro, awoh komo tîmcoko enmar̂atîxera Aporin komo ya. Yupunthîrî akn̂icoko roro owya tîmsom me. 7-nhîrî kaamo po tak esenmecoko xa hara Aporin komo yakan me. Ero po xa hara awemyawno komo poko etapickara ehcoko, kasko yîwya so, kekn̂e.

9-10 On wara marha kekn̂e Kporin komo Moises ya, On wara marha kasko Ixaw Yana komo ya, Amn̂e arowon komo pona tak mepatakexe, awya so onîmrî pona ha. Ero po awexitaw so tak anatîrî komo yeperîrî mîhkocexe puruma, mawrutamiyaxe marha. Ero yimaw tîmsom pokono yaka ehcoko yihcirî me yîhkotoxapu poyino.

11 Ero wa ehxapu tak nahsîpe tîmsom pokono. Kahsî tak nanîmpe powpow me Aporin komo yepatai. Ero wa nanîmpe tawake oyehtome anmîthîrî poko. Ero wa nanîmpe awepokaretopo komo ponan po rma.

12 On wara marha ehcoko ero kaamo po rma, anatîrî komo yeperîrî manîmyaxe ero po rma, oper̂a xîkrî waihkacoko kîîrî owya tîmsom me. Cewn̂e cimn̂ipu ewrutoponhîrî ehxapu mak waihkacoko, tupunporem mak. Yupun tak nakn̂ipe tîmsom pokono owya tîmsom me, ahnoro nakn̂itîkape.

13 Puruma marha tîmcoko owya aposokaxapu, katî yakro esmaxapu ha. 4,5 ritru wicakî tîmcoko. Ero marha nakn̂ipe tîmsom pokono Kporin komo ya tîmsom me. Ero yipu yakn̂iyataw kotoporem me nasî yîsin̂ Kporin komo ya. Ero yakro rma uupa yukun tîmcoko hara owya 1 ritru wicak ha.

14 Puruma yeperîrî ka tokuhra ehcoko epetaxan, owya tîmîhra ka awexitaw so tokuhra. Ahce wa na ciixapu ka tokuhra ehcoko, yupuxapu, ecorîn marha, awru me ciixapu marha. Yihcirî me yîhkotoxapu tîmîche mak Aporin komo ya ero yimaw mak tak epetaxan mokyaxe awanme ro so. Ero wa apanatanmetopo komo ponaro ehcoko miya roro etowîn me ro mak. Ahto so na awexitaw so ero ponaro rma ehcoko, kasko yîwya so.

15 On wara marha kasko yîwya so, puruma mîmyaxe Kporin komo ya powpow me tîmsom ha. Awepokaretopo po mîmyaxe. Ero ponan po sabatu komo tak yukuknomacho yihcicoko. 7 sabatu komo yukuknomacoko.

16 50 kaamo xa yukuknomacoko 7-nhîrî sabatu pona roro. Ero po tak puruma tîmcoko xa hara Aporin komo ya. Yaxan me yîhkotoxapu mak tîmcoko.

17 Amîn komo yawno rma 2 ehcoko puruma, yupuxapu. On wara yupucoko, 4,5 ritru wicakî mak yupucoko aposokaxapu, wahrututpamnotopo ken̂e rma. Yihcirî me yîhkotoxapu poyinonho rma yupucoko ha. Ero yipu tak ehcoko tîmsom pokono yaka powpow me tanîmsom me, Aporin komo ya tîmsom me ha.

18 Ero wa puruma ehcoko yupuxapu. Ero yipu yakro rma oper̂a xîkrî komo ehcoko 7 ha, 1 cimn̂ipu ewrutoponhîrî ehxapu re ha, tupunporem makî. Bui marha ehcoko cewn̂e mak. Kahn̂eru marha ehcoko asakî. Noro yipu komo pun nakn̂itîkacowpe Aporin komo ya tîmsom me. Puruma yakro rma nakn̂icowpe, uupa yukun yakro marha, an̂ekîthîrî komo yakro rma. Ero yipu nakn̂icowpe Aporin komo ya tîmsom me. Ero wa nakn̂icowpe kotoporem me ehtome yîsîn Aporin komo ya.

19 Ero yinhîrî tak anarî xa hara ehcoko boce cewn̂e mak. Owya tîmsom me ehcoko. Kicicme awehtopo komo yahrutopo me waihkape tîmsom pokono. Kahn̂eru marha ehcoko asakî, cewn̂e cimn̂ipu ewrutoponhîrî ehxapu. Noro yipu marha waihkape, Aaxe xa wasî, kacho me hara.

20 Waihkache yupunthîrî tak nahsîpe. Kahsî tak nanîmpe powpow me, owya tîmsom me, Aporin komo Ow ha. Ero wa xa marha puruma nanîmpe yihcirî me yîhkotoxapu yeperîrî ha. Ero wa nanîmpe owya tîmsom me, Aporin komo ya tîmsom me ha. Tîmsom pokono nahrî me tak nasî anîmxapunhîrî.

21 Ero po rma, 50-nhîrî kaamo po an̂ikno ciicoko Kaan ponarono me mak awesenmetome so. Ero po awemyawno ro komo pokohra ehcoko. Yicimn̂ipuntaxera ero wa esenmecoko. Ero wa xa marha n̂ehcowpe awepamthîrî komo miya roro etowîn me ro mak. Ahto so na awexitaw so ero yimaw awesenmetopo komo ponaro ehcoko.

22 On wara marha wîîkes awya so, anatîrî komo yeperîrî yîhkocetaw mararî panawno xa yîhkotora ehcoko. Emarakaxapu cik marha amekîra ehcoko. Ero yipu n̂expe yînapumnî komo nahrî me, achewno komo nahrî me marha. Aporin komo Kaan Ow ha, kekn̂e. Ero wa kekn̂e Kporin komo Moises ya.

23-24 On wara marha kekn̂e Kporin komo Moises ya, On wara marha kasko Ixaw Yana komo ya, On wara tak ehcoko hara 7-nhîrî nuun̂i po, 1-înhîrî kaamo po, epokarecoko mak ero po. Oponarono me mak esenmecoko. Tuu kacowpe marha tîmsom pokono komo pahkî n̂he ero ponaro tak awehtome so.

25 Ero po awemyawno komo pokohra ehcoko. Aporin komo ya tîmsom marha ehcoko, takn̂isom ha. Ero wa ehcoko 7-nhîrî nuun̂i po, 1-înhîrî kaamo po, kekn̂e. Ero wa kekn̂e Kporin komo Moises ya.

26-27 On wara marha kekn̂e Kporin komo Moises ya, On wara marha ehcoko 7-nhîrî nuun̂i po rma, 10-înhîrî kaamo po tak esenmecoko xa hara oponarono me mak. Yiixe awehtopo komo pokohra ro mak ehcoko ero po. Tîmsom marha ehcoko takn̂isom ha, Aporin komo ya tîmsom ha. Kicicme Awehtoponhîrî Komo Yahrutopo mîn ha kaamo. Ero ke ero wa ehcoko.

28 Awemyawno komo pokohra marha ehcoko ero po Kicicme Awehtoponhîrî Komo Yahrutopo me exirî ke. Ero po xa Awehtoponhîrî Komo Yahrutopo me nasî, kicicme awehtoponhîrî komo yahrutome Aporin komo ya.

29 Yiixe cehtopo poko rma exitaw apoyino komo ero po twaihkapore men nasî tpoyino komo chewno pîn me tak ehtome.

30 Anarimaw cemyawno ro poko na nai apoyino komo ero kaamo po. Ero warai exitaw noro pen tak waihkes Owî rma. Tpoyino komo chew exihra tak nas okwe.

31 Awemyawno komo pokohra ro mak ehcoko ero po. Ero wa kacho ponaro men ehcoko miya roro, amyamro, awepamthîrî komo meero marha. Ahto so na awexitaw so ero ponaro ehcoko.

32 Awepokaretopo me nasî. Ero ke ero po, 9-nhîrî kaamo po, yiixe awehtopo komo pokohra men ehcoko. Kokmamyataw ero yipu pokohra tak ehcoko. Enmapuche hara ero yipu pokohra marha ekcoko kokmamso ro hara. Ero wa ehcoko awepokaretopo me exirî ke, kekn̂e. Ero wa kekn̂e Kporin komo Moises ya.

33-34 On wara marha kekn̂e Kporin komo Moises ya, On wara tak ehcoko 7-nhîrî nuun̂i po, 15-nhîrî kaamo ha, Kuum Yarî Yaw tak enmacoko. 7 kaamo enmacoko ero yipu yaw.

35 Yihcirî kaamo po esenmecoko Kaan ponarono me mak. Ero po awemyawno komo pokohra ehcoko.

36 7 kaamo po roro ehcoko awoh komo takn̂isom me, Aporin komo ya tîmsom me ha. 8-nhîrî po tak esenmecoko xa hara opokono me. Ero po marha ehcoko awoh komo xa hara takn̂isom me, Aporin komo ya tîmsom me ha. Oponaro awehtopo komo xa mîn awesenmetopo komo. Ero ke awemyawno komo pokohra ehcoko.

37 Ero wa nasî awahwotacho komo, Kaan ponarono me mak awesenmetopo kom ha. Takn̂isom tîmtopo marha mîn awesenmetopo komo. Takn̂itîkaxmu me tîmsom, ahce na takn̂isom me tîmsom, puruma, wooku marha. Ero warai komo tîmtopo mîn ha. Ero po so men tîmcoko, kacho yaw roro rma tîmcoko awahwotacho komo me yukuknomaxapu po so ha.

38 Aporin komo yanme awepokaretopo komo po tîmsom marha, Ahce na tîmsomu rma, awanme ro so tîmsom, towhnî me ro mak amtapotachonhîrî kuknon me tîmsom, ero yipu tîmtopo pokono mîn wîîka awya so.

39 Taa, Kuum Yarî Yaw Awenmacho Komo wekatîmtîkes awya so. Anatîrî komo yeperîrî yenmetîkache awya so 15-nhîrî kaamo po, 7-nhîrî nuun̂i po xa Aporin komo poko awahwotacho komo me tak nasî. 7 kaamo ero wara nasî. Yihcirî kaamo po ka epokarecoko. 8-nhîrî kaamo po xa hara epokarecoko.

40 Yihcirî kaamo po ka weewe peremru yîhkotocoko. Kir̂wan yîhkotocoko. Kuum yarî yîhkotocoko, ahnoro taakem me cehsom, sawkeru peremru marha aporî yecihtawno peremru kom ha. Ahce warai na peremru marha yîhkotocoko. Ero yipu tak ciicoko amîn komo me. Ero yaw tak ahwotacoko Aporin komo Kaan poko ha. 7 kaamo ahwotacoko.

41 Ero wa ahwotacoko yicimn̂ipuntaxera. 7 kaamo ahwotacoko 7-nhîrî nuun̂i po. Ero wa ehcoko miya roro awepamthîrî komo meero.

42 Ero yimaw comota yarî yaw mak enmacoko, weewe peremru yaw so. 7 kaamo ero yaw ehcoko. Ixaw Yana me ewruxapu komo ahnoro amyamro enmacoko ero yipu yaw.

43 Ero yipu yaw enmacoko aporin pen komo yehtoponho ponaro ehtome awepamthîrî komo amn̂e. On wara kekn̂e Kporin komo kporin pen komo ya, Kuum yarî yaw mak enmacoko ha ka, kekn̂e yîwya so. Exitu poi ekyataw so ero wa kekn̂e yîwya so. Ero ke ero wa kacho ponaro ehtome so ero yipu yaw enmacoko. Aporin komo Ow ha, ponaro awehtopo komo xa, kekn̂e. Ero wa kekn̂e Kporin komo Moises ya.

44 Ero ke yîmtapotarî tak n̂ekatîmyakn̂e Moises Ixaw Yana komo ya, Ero wa so nai awahwotacho komo Kporin komo poko, kekn̂e yîwya so. Ero wa kekn̂e Moises yîwya so.