1-2 Taa, ero yinhîrî on wara kekn̂e hara Kporin komo Moises ya, On wara kasko Araw ya, yumumuru komo ya marha, On wara marha kesî Kporin komo awya so, Owyanî ro me nasî Ixaw Yana komo n̂ekîtho ahyaka so. Ero ke takîhso men ehcoko ero yipu komo poko. Oyosotî yîwîrîyakamexpora ro mak men ehcoko anarme awehtopo ke yînmîthîrî komo poko. Aporin komo xa Ow ha.

3 On wara na natu awepamthîrî komo pahxaro, kicicme ehxapu rma na mokyatu owya tîmsom yakn̂iso. Ero wa ehxapu rma na mokyatu owya tîmsom yakn̂iso, Aporin komo ya tîmsom yakn̂iso ha. Ero wa mohxapunhîrî porohkacoko ohyaka mokuhnî me ro mak tak. Aporin komo Ow ha.

4 Anarimaw on wara na nai Araw yepamtho amn̂e, repra ken̂e na nai. Anarimaw nîkmorwa na erekî yupun pokono. Noro yipu eseresmara ro mak n̂expe owya tîmxapu poi. Kir̂wan̂he cexiche mak tak ero poi n̂eseresmape. On wara cexirî ke so kicicme natu anarimaw, okoputho yaponho na napeya, enhîrî ha na, womhîrî ha na. Anarimaw tpoyino na napeya kîîrî, ekukaxapu ha. Ero yipu komo yaperî ke kicicme ka naxe okwe.

5 Anarimaw sehrere me tîtosom yaperî ke kicicme nai. Anarimaw kicicme ehxapu na napeya, ero ke kicicme xa marha tak nasî noro hara.

6-7 Noro yipu yaperî ke kicicme nasî kokmamso ro. Aporin komo ya tîmxapu poi eseresmara ka n̂expe. Ero ke ka n̂eyehpe. Kokmamche tak kir̂wan̂he nas hara. Ero yimaw tak Aporin komo ya tîmxapu poi n̂eseresmape yiixe cexitaw. Yînahrî thakwa mîn ha.

8 Okno yokoputho na n̂een̂a anarimaw tanme ro waixapu, kamara n̂eskatho na anarimaw. Ero yipu tonohra n̂expe kicicme ecirira cehtome. Aporin komo xa Ow ha.

9 Omtapotarî xa n̂ewetîcowpe ero yipu poko. Ewetîra exitaw so kicicme men ween̂asî. Waihyaxe men okwe. Aporin komo xa Ow ha oponarono me awin̂e kom ha. Ero wa kasko Araw komo ya.

10 On wara marha kasko yîwya so, Owya tîmxapu poi eseresmara ro mak n̂ehcowpe Ixaw Yana pîn komo. Tîmsom pokono yaw cenmaxmu eseresmara n̂expe, maywen komo pîra marha. Owya tîmxapu poi eseresmara ro mak n̂ehcowpe noro yipu komo.

11 Anarimaw timsom pokono nahsîya tanton epethîrî pona. Anarimaw na yîmîn yaw rma n̂ewruya tanton. Noro yipu n̂eseresmape rma owya tîmxapu poi.

12 Anarimaw on wara na nai tîmsom pokono yemsîrî, ciin̂o na nahsîya omîn yenîn̂e pîn. Noro yipu yahsîche eseresmara tak n̂expe owya tîmxapu poi.

13 Anarimaw on wara na nai tîmsom pokono yemsîrî, iin̂o na waihya okwe, ciin̂o yai na n̂etowya anarimaw. Ero wa na nai yîmxîkîn me rma. Ero ke tîîm yaka na n̂etîrame hara. Yîhyaw tak na nai hara emasî me cehtoponhîrî wara rma. Noro yipu tak n̂eseresmape rma owya tîmxapu poi hara. Tîîm yaw n̂eseresmape rma. Ayanan pîn komo tko esresmara ro mak n̂ehcowpe owya tîmxapu poi.

14 Anarimaw on wara na nai tîmsom pokono pîn, owya tîmxapu poi na n̂eseresme twen̂ekarî mak, Kporin komo ya tîmxapu tan ha, kahra na nai. Ero wa exitaw so ero wicakî xa marha erewsî nîmpe hara tîmsom pokono ya. Iyopo tko nîmpe kinta wicakî xa hara.

15-16 Ero ke on wara n̂ehcowpe tîmsom pokono komo, ero pîntho me mak cirihra ro mak n̂ehcowpe owya tîmxapu, Ixaw Yana komo n̂ekîtho, Aporin komo ya tîmxapu me. Omtapotacho yaw roro exihra naxe okwe ero yipu poko eseresmetaw so. Ero wara rma eseresmetaw so kicicme naxe okwe, oyanwekn̂e me naxe okwe. Aporin komo xa Ow ha, n̂examro yakir̂waman̂e ha, kasko. Ero wa kasko Araw komo ya, kekn̂e Moises ya. Ero wa kekn̂e.

17-19 On wara marha kekn̂e Kporin komo Moises ya, On wara kasko hara Araw ya, yumumuru komo ya marha. Ixaw Yana komo ya marha kasko, Awoh komo tîmî xe na matu owya, Aporin komo ya. Anarimaw amtapotachonhîrî komo yaw roro mak na mîmyatu. Anarimaw awanme ro so mak mîmyatu. Ero warai na mîmyatu amyamro Ixaw Yana komo. Anarimaw achewno komo na nîmyatu tooku. Ero wa tîmyataw awya so tupunporem mak men ehcoko. Kîîrî mak ehcoko, bui ha na, kahn̂eru ha na, boce ha na. Noro yipu xa ehcoko owya tîmsom.

20 Yupunpon men ekîhra ro mak ehcoko. Noro yipu yekyataw rma awya so owya tîmsom me tawake exihra men was apoko so.

21-22 Ero ke ero warai mak ehcoko awoh komo bui ha na, kahn̂eru ha na. Aporin komo ya tîmsom me na mekyatu, Aaxe xa wasî, kacho me ha na. Anarimaw amtapotachonhîrî yaw roro rma na noro yipu mekyatu. Anarimaw awanme ro so mak na mekyatu. Ahce wa na kachome ekyataw awya so tupunporem xa ehcoko. Yupunpontho ekîhra ehcoko, ewuhnîtho, etaxikwoxaputho, yîhrepuntho, anarme atîhtaxapu ken̂arîtho, ereh ken̂arîtho, yîskiskîmacho ken̂arîtho, noro yipu komo ekîhra ro mak ehcoko yupunpontho kom ha. Noro yipu puntho akn̂ipîra ro mak ehcoko tîmsom yakn̂itopo pona Aporin komo ya tîmsom me.

23 On wara na nai awoh komo anarimaw bui ha na, kahn̂eru na, ehcoporo na nai yîhrepu. Tawake rma wasî noro yipu yekyataw awanme ro so tîmsom me mak. Towhnî ro me amtapotachonhîrî komo yaw rorono me tko ekîhra ehcoko. Noro yipu yekyataw awya so tawake exihra was apoko so.

24 Ceper̂ayem komo ekîhra ehcoko owya tîmsom me, on warai kom ha, Yîhmaxapu komo, etamaxapu komo marha, apikmoxapu komo marha, wapixapu komo marha. Ero wa ehxapu tîmîhra ehcoko owya aweken komo po tak awexitaw so amn̂e.

25 Ero wa ehxapu ahsîra marha ehcoko acheka mohxapu komo n̂ekîtho owya tîmsom ha. Tawake exihra men wasî noro yipu tîmyataw onahrî me ehtome. Yupunpora exirî ke tawake exihra wasî ero yipu poko, anarme exirî ke ha, kekn̂e.

26-27 On wara marha kekn̂e Kporin komo Moises ya, On wara ciicoko awoh komo xîkrî ewruxan ha, tîson yaw rma ka n̂expe 7 kaamo. Ero wa ciicoko bui, oper̂a xîkrî marha, kabra xîkrî marha. 8-nhîrî kaamo po tak Aporin komo ya tîmsom me nasî. Ero yinhîrî tak takn̂isom me tîmcoko owya yiixe awexitaw so.

28 On wara na matu anarimaw awoh komo xîkrî na waihka xe matu. Yîson marha na waihka xe matu. Ero wa waihka xe awexitaw so ero kaamo po rma waihkara ehcoko asakno roro rma.

29 On wara marha ehcoko Aporin komo ya tîmsom poko, Kir̂wan̂he xa mai ham, kacho me tîmsom poko ha. Awanme ro so mak tîmcoko ero warai me tîmsom.

30 Ero kaamo po rma tonopore nasî ero wa tîmxapu pun. Akwenhîrî yîmtora ro mak ehcoko cenmaxmu me. Aporin komo xa Ow ha.

31 Owya apanatanmetopo komo men ewetîcoko. Yaw roro rma ehcoko. Aporin komo xa Ow ha.

32-33 Oyosotî yîwîrîyakamexpora men ehcoko. Kir̂wanî ro xa Mîk Kporin komo, kan̂e me roro men Ixaw Yana komo yexi xe wasî. Aporin komo xa Ow ha awakir̂waman̂e kom ha. Exitu poi awekn̂enhîrî komo Ow ha. En̂exa kekyatken̂e so ponaro awehtopo komo me xa mak oyehtome. Aporin komo Ow ha, kekn̂e. Ero wa kekn̂e Kporin komo Moises ya.