Taa, ero yinhîrî on wara kekn̂e hara Kporin komo Moises ya, Taa, tîmsom poko komo tak panatanmeko hara, Araw mumuru kom ha. On wara kasko yîwya so, Kicicme ecirira n̂ehcowpe tîmsom pokono komo poyinonhîrî pen komo waipuche.

2-3 Ero wara rma tko na n̂ecir̂atu yiixe cexitaw so tîyananînhîrî pen komo waipuche. Yînocwanînhîrî pen na waihya, yîîmînhîrî pen ha na, yumumuthîrî pen ha na, emsîthîrî pen ha na, aknonhîrî pen ha na. Noro yipu komo waipuche na kicicme n̂ecir̂atu rma yiixe cexitaw so. Anarimaw tîmsom pokono yepekanho pen na waihya iin̂omnî. Iin̂omra cexirî ke pona thakwa n̂een̂akn̂e cecehton̂e me. Ero ke noro yipu pen waipuche na kicicme n̂ecir̂a yiixe cexitaw.

4 Anarî pen komo yokoputho ke kicicme ecirira n̂ehcowpe tîmsom pokono komo. Tpoyino komo yenîn̂e me naxe. Ero ke kicicme ecirira n̂ehcowpe.

5 On wara marha n̂ehcowpe, ekanamurinkara n̂ehcowpe tpoyino pen komo waihîrî ke. Cetpoci komo yen̂etî marha awotora n̂ehcowpe, Ecaikara marha n̂ehcowpe.

6 Ponaro cehtopo komo pokono ro me n̂ehcowpe. Oyosotî yîwîrîyakamexpora marha men n̂ehcowpe kicicme cexirî ke so. Aporin komo ya tîmsom yakn̂in̂e me naxe, ponaro cehtopo komo yuru yakn̂in̂e me ha. Ero ke kir̂wanî ro me mak n̂ehcowpe.

7 Wooxam yahsîyataw cipici komo me kîîrî pohkan̂e ro mîk hak pokono ahsîra n̂ehcowpe, mîk hak pokononho ahsîra marha n̂ehcowpe. Kicicme nasî noro yipu wooxam ha. Ciin̂o yai etowxapu marha ahsîra n̂ehcowpe. Ero wa n̂ehcowpe oyantonî ro me exirî ke so.

8 Kaan pokono ro xa mîkyam. Kaan ya tîmsom yakn̂in̂e me naxe ha ponaro awehtopo komo yuru ha. Ero ke kir̂wanî ro me xa yîhtînocoko. Aporin komo Ow ha, kir̂wanî ro xa. Kir̂wanî ro me awin̂e komo Ow ha. Ero ke kir̂wanî ro me marha n̂examro yîhtînocoko owya tîmsom pokono ro kom hara.

9 On wara marha kasko tîmsom pokono komo ya, Anarimaw on wara na nai awemsîrî komo, ciin̂o pîn pokono me na nai okwe. Ero wa exitaw tîîm yikiciciren̂e me xa nasî. Ero ke takn̂ipore nasî noro yipu pen okwe.

10 On wara n̂expe ohyaka cewomsom me kapexapu hara, takno komo warahra ciixapu me naxe. Ohyaka cewomsom pononî ro yamrun̂e me cehsom me naxe. Ero ke tîhtîpîrî womhokara n̂expe, tponon ahxaikara marha.

11 Okoputho mîtkoso tohra n̂expe. Yîîm pen waipuche meero kicicme ecirira n̂expe, yînocwan pen waipuche marha.

12 On wara marha n̂expe, omîn yai epatakara n̂expe ponaro cehtopo mîn yai ha. Omîn nîwîrîmesî ero wara epataketaw. Ohyaka cewomsom me yîhkapexapu xa mîk ha. Owî rma ero warai me wiir̂akn̂e katî ke. Ponaro noro yehtopo xa Ow. Ero ke ero wa n̂expe. Aporin komo xa Ow ha.

13-14 On wara marha n̂expe ohyaka cewomsom cipici yahsî xe cexitaw, yukukmanî ro mak nahsîpe wooxam. Iin̂o waixapu ahsîra n̂expe. Ciin̂onhîrî yai etowxapu yahsîra marha n̂expe. Ciin̂o pîn pokononho yahsîra marha n̂expe. Mîk hak pokono yahsîra marha n̂expe. Yukukmanî ro mak nahsîpe, tîyanan yemsîrî mak ha.

15 Noro yipu mak nahsîpe cipici me, Kicicme cehsom komo mîkyam kica, kahra ehtome so iyanan komo epamthîrî komo poko. Aporin komo xa Ow ha kir̂wan̂he xa awin̂e kom ha, kasko yîwya so, kekn̂e Kporin komo Moises ya.

16-17 On wara marha kekn̂e Kporin komo yîwya, On wara marha kasko Araw ya, On wara n̂ehcowpe amn̂e awepamthîrî miya rorono kom ha, yupunpon komo mokuhra n̂ehcowpe ponaro cehtopo komo yuru yakn̂iso.

18-20 Yupunpon mokuhra ro mak n̂expe ohyaka tîmsom tîmso. Ewuhnî mokuhra n̂expe, yîhrepun, kicicme eepatarî ehxapu, ehcoporono yîhrepu, ehtaxwoxapu, etamoxwoxapu, katuhkem, kawno pîn, ewpon, kîskîskîmacho komo ken̂arî, ereh ken̂arî, emuhnî, ero warai komo.

21 Ero wa so exitaw Araw yepamtho amn̂e mokuhra n̂ehcowpe Tporin ya tîmsom yakn̂iso, Yupunpora thakwa naxe okwe. Ero ke mokuhra n̂ehcowpe ponaro cehtopo yuru yakn̂iso.

22 Ponaro cehtopo yuru nohcowpe rma, owya ro xa tîmxapu poko meero. Ero wa n̂eseresmacowpe rma.

23 Oyamtakponî ro wacan yaka tko ewomra n̂ehcowpe, kotoporem yakn̂itopo yaka marha mokuhra. Ero wa ewomra n̂ehcowpe anarme cexirî ke yupun thakwa. Omîn yikiciciren̂e me naxe okwe iina ewomyataw. Aporin komo xa Ow ha, awakir̂waman̂e kom ha, kasko. Ero wa kasko Araw ya, yumumuru komo ya marha, kekn̂e. Ero wa kekn̂e Kporin komo Moises ya.

24 Ero ke ero wa kekn̂e Moises Araw ya, yumumuru komo ya marha, Ixaw Yana komo ya marha ahnoro ya. Ero wa kekn̂e.