1-2 Taa, ero yinhîrî on wara kekn̂e hara Kporin komo Moises ya, On wara marha kasko Ixaw Yana komo ya, On wara kesî Kporin komo, anarimaw apoyino komo na nîmyatu tîmxîkrî Moreke ya. Ero wa marha na nai anarimaw acheka so mohxapu hara. Ero wa exitaw twaihkapore men nasî. Awewton pono komo rma noro pen waihkacowpe toh ke. Ero wa twaihkapore nasî tîmxîkrî tîmn̂enho Moreke ya.

3 Noro yipu komo pînîn yawra cehsom wara ro mak wasî. Waihkesî Owî rma tpoyino komo chewno pîn me tak ehtome. Ero wa wiir̂asî tîmxîkrî tîmn̂enho Moreke ya omîn yikicicirerî ke yîwya. Oyosotî yîwîrîyakaporî ke marha ero wa wiir̂asî. Kir̂wanî ro xa oyosot ha.

4-5 Anarimaw noro yipu waihkara rma na natu arowon pono komo. Moreke ya cepamrî tîmn̂enho komo yenîn̂e pîn wara rma na nat okwe. Ero warai komo pînîn yawra cehsom wara ro mak wasî. Waihkesî tpoyino chewno pîn me tak ehtome. Ero wa wiir̂asî noro yipu yakrononho komo ahnoro, Moreke ya cetîmsom komo.

6 Anarimaw on wara na natu anarî kom hara, yaskomo ponaro na nat okwe, worokyam yakro tîmtapotaxmu komo ponaro marha. Noro yipu komo pona n̂etowyaxe kica cipici yai cehsom wara. Noro yipu komo pînîn yawra cehsom wara ro mak wasî. Ero ke waihkesî tpoyino komo chewno pîn me tak ehtome.

7 Ero ke oponarono me xa mak ehcoko. Kir̂wanî ro me mak ehcoko. Ow mak Aporin komo, ponaro awehtopo komo xa. Ero ke ero wa ehcoko.

8 Owya apanatanmetopo komo ewetîcoko. Ero yaw roro xa ehcoko. Aporin komo xa Ow ha, owyanî ro me awin̂e kom ha.

9 On wara na nai apoyino komo anarimaw hara, tîîmî rma na n̂eremke okwe, tînocwan ha na anarimaw. Ero wa exitaw twaihkapore men nasî. Tîîmî rma n̂eremka ham okwe, tînocwan ha na anarimaw. Yaaro rma twaihkaxmu me nasî.

10 Anarimaw cipici yai ro na nai apoyino komo, pinano poko rma ha na. Ero wa exitaw asakno roro rma twaihkapore nasî, kîîrî pen, wooxam pen marha.

11 Anarimaw tîîm pici yenaka na cee apoyino. Ero wa cetaw kicicme nasî, tîîm kicicin yenpon̂e me nasî. Ero ke asakno roro rma twaihkapore nasî, kîîrî, wooxam, ero wara. Yaaro rma twaihkaxmu me nasî.

12 Anarimaw kîîrî na cee tumumuru pici yenaka. Ero wa exitaw asakno roro rma twaihkapore nasî. Anarme ro mak n̂ecir̂axe kica. Yaaro rma twaihkaxmu me nasî.

13 Anarimaw kîîrî na nai kîîrî poko xa marha. Wooxam poko nasî kîîrî ero wara xa marha na natu kica etpoko. Ero wa exitaw so kicicitho me ro mak naxe kica. Ero ke twaihkapore nasî asakno roro rma. Yaaro rma twaihkaxmu me nasî.

14 Anarimaw wooxam na nahsîya kîîrî cipici me. Yîson meero marha na nahsîya cipici me hara. Ero wa exitaw so kicicme men naxe. Ero ke takn̂ipore nasî osorwaw rma. Ero wa akn̂icoko kicicitho ke tîchewnoi exihra awehtome so.

15 Anarimaw okno nukukmesî kîîrî wooxam kukman̂e wara rma kica. Ero wa exitaw twaihkapore nasî. Okno marha twaihkapore nasî poko ehtoponhîrî.

16 Anarimaw wooxam na n̂etkukmape okno ya kica. Ero wa exitaw wooxam twaihkapore nasî. Okno marha twaihkapore nasî axin̂enhîrî ha. Kicicme ro mak naxe. Yaaro rma twaihkaxmu me naxe.

17 Anarimaw cepeka rma na nahsîya apoyino komo. Tîîm yemsîrî na nahsîya, tînocwan yemsîrî ha na anarimaw. Yikicicin na n̂een̂a. Kîîrî kicicin marha na n̂een̂a wooxam hara. Kicicme nasî ero wa ehtopo komo. Ero ke asakno roro rma men twaihkapore naxe iyanan komo wero ro rma. Ero wa cirpore nasî cepeka yikicicirerî ke.

18 On wara na nai kîîrî anarimaw wooxam yenaka na cee roopo exitaw. Yikicicin na pononke. Wooxam kamxukru yenpon̂e me nasî kica. Tkamxutacho yenpon̂e me marha nasî wooxam hara. Kicicme nasî kica ero wa ehtopo komo. Twaihkapore nasî asakno roro rma tpoyino komo pîn me tak ehtome so.

19 Anocwan yakno kicicin sayankara ro mak ehcoko. Aamo yepeka kicicin sayankara marha ehcoko. Kicicme nasî ayananî ro komo kicicin pononkacho awya so. Kicicitho mîkyam, kacho me naxe ero wa ehxapu komo.

20 On wara na nai apoyino komo anarimaw tîîm yakno pici yenaka na cee. Ero wa exitaw tîîm yakno kicicin yenpon̂e me rma nasî kica. Kicicme men naxe ero wa ehxapu komo. Ero ke yîmxîkîn me ro mak men naxe.

21 Anarimaw on wara na nai anarî hara, takno pici yenaka na nîîce. Kicicme ro mak nasî ero wa ahsîtopo kica. Takno kicicin yenpon̂e me rma nasî kica. Ero ke n̂examro pen marha naxe yîmxîkîn me ro mak.

22 Omtapotarî men ewetîtîkacoko owya apanatanmetopo kom ha. Yaw roro men ehcoko. Ewetîra awexitaw so aweken komo rma nas amn̂e awarîrkan̂e komo wara okwe. Pona kaar̂axe so ero rma nasî awarîrkan̂e komo wara.

23 Iitono komo yehtopo poko pohnîmra ehcoko. Kanan pono komo war̂mapes awya so. Kîtwermacow so mîn hak poko kicicitho poko ero poko rma naxe n̂examro kica. Ero ke n̂examro xera ro mak wasî.

24 Ero wa exirî komo poyero wîîkekn̂e awya so, N̂examro yekenho tak ahsîcoko aweken komo me, wîîkekn̂e. Eroromerono me wa ekenhîrî komo wîmyasî aweken komo me. Kir̂wan mîn wîmyas awya so. Iito nasî paaka mown pen mer̂pora ro makî, ween pen marha okre, wîîkekn̂e awya so. Ow mak Aporin komo, ponaro awehtopo komo xa. Ow xa kiir̂axe so iitono komo warahra.

25 Ero ke etîme re enîhra encoko awoh komo, comota pono marha. Kotî me cehsom mîk, kacoko anarî komo poko, Kotî pîn me cehsom mîk hara kica, kacoko anarî komo poko hara. Ero wa xa marha kacoko tarin̂em komo poko hara. Kotî me cehsom mîk, kacoko anarî komo poko. Kotî pîn me cehsom mîk hara, kacoko anarî komo poko hara. Ero wa kicicme ecirira ehcoko awotî komo ke, comota pono komo ke, tarin̂em komo ke marha, sehrere me tîtosom komo ke marha. Ero yipu komo ke kicicme ecirira ehcoko. Kicicitho mîk ero yipu komo, wîîka awya so. Ero ke ero wara ehcoko.

26 Aporin komo Ow ha kir̂wanî ro xa. Ero ke kir̂wan me mak ehcoko amyamro hara oyananî ro me xa. Ero warai me kiice so anarî yana komo warahra.

27 Ekatînho yakro tîmtapotaxmu exitaw amn̂e noro men waihkacoko. Worokyam ke tîropotawnoyem exitaw noro pen marha waihkacoko. Ero wa waihkacoko kîîrî, wooxam marha. Toh ke waihkacoko. Yaaro rma noro yipu twaikapore nasî kicicme xa exirî ke so, kasko yîwya so. Ero wa so kasko Ixaw Yana komo ya, kekn̂e Kporin komo Moises ya.