1-2 Taa, ero yinhîrî on wara tak kekn̂e hara Kporin komo Moises ya, On wara marha kasko Ixaw Yana komo ya ahnoro, On wara kesî Kporin komo awya so, kasko. Aporin komo Ow ha, ponaro awehtopo komo xa. Kir̂wanî ro xa Ow. Ero ke amyamro marha kir̂wan̂he xa ehcoko, kesî, kasko yîwya so.

3 On wara ehcoko, ayopono me encoko aamo komo, anocwan komo marha. Awepokaretopo komo ponaro marha ehcoko onkuknomatho ponaro. Ero po roro epokarecoko. Aporin komo Ow ha, ponaro xa awehtopo komo.

4 Ciixaputho pona etowra ro mak ehcoko. Ponaro awehtopo komo cirihra ro mak ehcoko kuripara yukuixapu ha. Aporin komo Ow ha, ponaro xa awehtopo ro komo.

5 Awoh komo na mîmyat owya, Aaxe xa wasî, kacho me mîmyatu. Ero wara tîmyataw awanme ro mak tîmcoko.

6 Ero wa anmîthîrî komo pun nasî tonopore ero kaamo po rma waihkachonhîrî po rma. Anarimaw enmapuche xa mon̂exe. Mîk ha mehxan po akwenhîrî exitaw rma takn̂ipore mak tak nasî.

7 Mîk ha mehxan po ton̂etaw awya so kicicme men maxe. Tawake exihra was apoko so ero po ton̂etaw.

8 Ero po tonon̂enho kicicme men nasî. Aporin komo ya tîmxapu rma n̂ikiciciresî kica. Ero ke twaihkapore men nasî noro yipu tpoyino komo chewno pîn me tak ehtome.

9 Taa, puruma yeperîrî yîhkocetaw awya so amararîn komo pono, panawno xa yîhkotora ehcoko. Enmekyataw hara awya so n̂emarake na wahra mak. Ero yipu amekîra ehcoko.

10 Uupa yeperîrî pohcataw awya so asakî ro potuhra ehcoko ahnoro xa potutîkaxî ro. Emarakaxapu marha amekîra ehcoko. Iito mak n̂expe ero yipu yînapumra cehsom komo nahrî me mak, achewno komo nahrî me marha. Ero wa men ehcoko. Aporin komo Ow ha, ponaro xa awehtopo komo.

11 Emyawnonano poko en̂epamra men ehcoko. Apoyino komo emîknopîra marha ehcoko. Cemarontara marha ehcoko apoyino komo n̂entarî me.

12 On wara nîmtapowaxe anarî komo, Yaaro xa tan wîîkes awya, Kporin komo n̂entarî me xa tan wîîkes awya, kexe tohnaw ro mak. Ero wa kahra ehcoko. Oyosotî yîwîrîyakamexpora ro mak ehcoko. Aporin komo Ow ha, ponaro xa awehtopo komo.

13 Kir̂wan̂he epemacoko apoyino komo. Noro yemyawno poko en̂epamra marha ehcoko. Anapickarî komo epemacoko epematopo me exitaw. Ahyaka so rma cirihra ehcoko noro yepetho, Amn̂e mak kepemesî pahxaxa, kahra.

14 Kaan ya awî xe kr̂a wasî, kahra ehcoko kica panahnî komo ya. Ewuhnî yesamaka yîhrokacho cirihra marha ehcoko kica. Oponaro xa men ehcoko. Aporin komo ow ha, ponaro awehtopo ro komo, kesî Kaan awya so, kasko yîwya so.

15 On wara ehcoko en̂ekano riyataw awya so, Yaaro mak en̂ekano ciicoko. Kicicme exitaw yupurantamnî, Awen̂ekara wasî yupurantamnî me awexiri ke, kahra ehcoko yîwya. Kicicme exitaw cemyawnoyemî reha Kir̂wan̂he mai ham, kahra ehcoko yîwya. Takîhso mak en̂ekacoko apoyino komo.

16 Kicicme apoyino yehtoponho yakpan̂e me exihra ehcoko. Twaihkapore nasî moso omîtwono, kahra marha ehcoko. Aporin komo xa Ow ha.

17 On wara ehcoko awakno komo poko, yiixatî pîn me exihra ehcoko aropotaw so ha. On wara marha ehcoko apoyino komo poko hara, kicicme exitaw so weronomacoko. Weronomara awexitaw so noro yehtoponho tak nas awehtoponhîrî me hara kica.

18 Awîche so apoyino komo ya esepanpîra ehcoko. Awîchonhîrî komo yerewton̂e pîn me mak ehcoko. Apoyino komo xe mak ehcoko. Aaxe so rma maxe ero wa xa marha yiixe so ehcoko. Aporin komo Ow ha.

19 Owya apanatanmetopo komo men ewetîcoko. On wara cirihra ehcoko awoh komo paaka, kîîrî cirihra ehcoko paaka pîn yakro woosî yakro. Ero wa xa marha ehcoko anatîrî komo poko. Anarmerpan cirihra ehcoko iina re. Ero wa xa marha aponon komo poko ehcoko, anarmerpan ke kahxapu amrura ehcoko. Nai poon riin̂u kahxapu, oper̂a poci ke ceskem. Ero yipu ke kahxapu amrura ehcoko. Ero wa ehcoko anarmerpan poko.

20 On wara na nai apoyino komo anarimaw kîîrî, wooxam yenaka na cee, antonano me ahsîxapu yenaka ha. Pinano me cehsom mîk wooxam mooxeno mak. Noro yipu poko na nai iin̂o pîn. Ero wa exitaw so asakno roro rma panarecoko kicicme exirî komo poyero. Waihkara tko ehcoko antonano me mak exirî ke wooxam, ahsîpînkan me.

21 On wara tak n̂expe kîîrî noro yipu poko ehxapunhîrî, kahn̂eru n̂ekpe Kesentacho potaka owya tîmsom me. Kicicme wîxakn̂e kica, kacho me tîmsom mîn n̂ekpe.

22 Yîn̂ekîthîrî tak waihkape tîmsom pokono. Aporin komo ya tîmsom me tak nakn̂ipe, Kicicme wehxe kica, kacho me. Ero wa exiche n̂ehcamnoyasî tak kicicme ehtoponhîrî. Ero wa ehcoko.

23 Taa, on wara marha wîîkes awya so, Kaanan pona awtoche so tak anatîrî komo na miir̂atu weewe, cepetaxmu, anarmerpan ha. Ero yipu ciriche eperîrî ka apupra ehcoko. Kicicitho me ka encoko. Ero wa ka encoko 3 cimn̂ipu. Apupra ro makî ka ehcoko ero wicakî pahkînon.

24 4-nhîrî cimn̂ipu po tak eperîrî potucoko. Owya tîmsom me makî tko ka potucoko, Kir̂wan̂he xa mai ham okre, kacho me tîmsom me ha.

25 5-nhîrî cimn̂ipu po tak ahcoko awanme ro so. Ero wa ka n̂expe anatîrî komo yeperîrî. Ero wa cîîr̂ataw awya so mer̂pora tak n̂eperwasî anatîrî komo. Aporin komo Ow ha, ponaro awehtopo komo xa.

26 On wara marha ehcoko, kamxukrem tonohra ehcoko awotî komo. Erem pokohra ro mak ehcoko. Yaskomo mtapotarî entara ro mak ehcoko, Ero wa mas amn̂e, kacho entara ro mak ehcoko Kaanî mtapotarî pîn.

27 Anarme awotora ehcoko ahpoci komo, mehxa xehxa wara awotora. Awetpoci komo yen̂etî marha awotora ehcoko anarme.

28 Apun komo ecaikara ehcoko ayanan pen komo pînîn yaw awexirî ke so. Apun komo mewrera marha ehcoko etowîn me. Aporin komo Ow ha.

29 On wara kahra ro mak ehcoko awemsîrî komo ya, Mîkî hak pohkan̂e me esko okopur̂wa, kîîrî pohkan̂e me, kahra ehcoko. Ero wa awemsîrî komo panatanmekyataw mîwîrîmes okwe. Mîk hak pokono me tak men n̂ehtîkexe ahnoro arowon pono komo. Kicicme ro mak tak mehtîkexe ahnoro okwe. Ero wa mehtîkexe kica.

30 On wara marha ehcoko, Oyepokaretopo po roro epokarecoko mak. Twerî marha ehcoko omîn poko. Aporin komo xa Ow ha.

31 Yaskomo yaka tohra ehcoko kica. Worokyam yakro tîmtapotaxmu komo yaka marha tohra ehcoko. Noro yipu komo yaka awcetaw so kicicme men awir̂axe so kica. Aporin komo Ow ha, ponaro awehtopo komo xa.

32 On wara na matu anarimaw ceremaxi na matu. Ero yimaw poritomo na mokya kanahmutwem, nor̂wa na mokya anarimaw ero warai ha. Noro yipu komo mokyataw ahyaka so, amîtkoso ha na, awomcoko tak noro ponaro xa awehtome so. Achew so exitaw poritomo ayopono me noro encoko. Oponaro xa men ehcoko. Aporin komo xa Ow ha.

33-34 Anarimaw acheka so n̂esekenmetu anarî rowon pono komo. Ero wa exitaw so emetanmekîra ehcoko. Takîhso miir̂atu Ixaw Yana me ewruxapu komo, ero wa xa marha n̂examro ciicoko acheka so mohxapu kom hara. Yiixe so ehcoko etîxe rma maxe ero wa xa marha. Pahxa anarî rowon pono komo chewno me mîxatken̂e amyamro rma, Exitu pono komo chewno me ha. Ero ke achewno komo xe ehcoko. Aporin komo Ow ha, ponaro awehtopo komo xa.

35 Kicicme ehxapu yen̂eketaw awya so yaaro mak en̂ekacoko, yaaro mak panarecoko. Tukuknomaxmu poko awarawanwataw so, yaaro mak yukuknomacoko. Ero wa yukuknomacoko ahce na yakenon, ahce na porin me ehtopo, ahce na ehyatkawnon marha, ahce na yawsîn marha. Yaaro mak yukuknomacoko ahnoro.

36 Ahce na yawsîn yukuknometaw awya so yaarono poko mak ehcoko awsîn yukuknomacho poko. Epa wicakno me tukuknomaxmu poko awarawanwataw so yaaro mak yukuknomacoko. Iin wicakno tukuknomaxmu poko awarawanwataw so marha yaaro xa marha yukuknomacoko hara. Ero wa ehcoko. Aporin komo Ow ha, ponaro awehtopo komo xa. Exitu poi awekn̂enhîrî komo Ow ha.

37 Ero wa wîîkes awya so. Owya apanatanmetopo komo ewetîtîkacoko ahnoro, Ero wa ehcoko, kacho ha. Ero yaw roro xa ehcoko. Aporin komo xa Ow ha. Ero wa kesî Kporin komo awya so, kasko Ixaw Yana komo ya, kekn̂e Kporin komo Moises ya. Ero wa kekn̂e.