1-2 Taa, ero yinhîrî on wara kekn̂e hara Kporin komo Moises ya, On wara marha kasko Ixaw Yana komo ya, On wara kesî Kporin komo awya so, Aporin komo xa Ow ha, ponaro awehtopo kom ha.

3 Ero ke Exitu pono komo warahra ehcoko, yîchew so awehtoponhîrî komo warahra. Kanan pono komo warahra marha ehcoko, yîcheka so kaar̂axe so n̂examro warahra. N̂examro yepanatanmetopo yewetîra marha ehcoko.

4 Owya apanatanmetopo komo xa ewetîcoko. Omtapotarî ponaro men ehcoko, Ero wara men ehcoko, kacho ha. Aporin kom Ow ha ponaro xa awehtopo komo.

5 Omtapotarî ewetîcoko apanatanmetopo kom ha. Ero yipu yewehcataw awya so pahkî waipîn me awin̂e komo me nasî. Aporin komo Ow ha.

6 Ayananî ro komo yaka tohra ro mak ehcoko yikicicin pononkaxi. Aporin komo Ow ha.

7 Aamo komo kicicin ahrunkara ehcoko, anocwan komo kicicin marha. Anocwan xa mîk. Ero ke yikicicin ahrunkara ro mak ehcoko.

8 Aamo pici kicicin sayankara marha ehcoko. Aamo komo kicicinî rma mîn anocwan kicicin.

9 Awepeka kicicin sayankara marha ehcoko. Ero wa ehcoko aamo komo yemsîrî poko, anocwan yemsîrî poko marha. Ero wa ehcoko, amîn komo yaw ewruxapu komo poko, anarî mîn yaw ewruxapu komo poko marha. Yikicicin sayankara ehcoko.

10 Amumuru yemsîrî kicicin sayankara marha ehcoko. Awemsîrî yemsîrî kicicin sayankara marha ehcoko. Akicicinî rma mîn yikicicin komo.

11 Aamo pici yemsîrî kicicin sayankara marha ehcoko, aamo yemsîrî kicicin ha. Awepeka rma mîk noro yipu. Ero ke yikicicin sayankara ehcoko.

12 Aamo yepeka kicicin sayankara marha ehcoko. Aamo yananî ro mîkî.

13 Anocwan yakno kicicin sayankara marha ehcoko. Anocwan yananî ro mîk hara.

14 Aamo yakno kicicin sayankara marha ehcoko. Yipici yenaka tohra ehcoko. Anoci mîk okwe.

15 Amumuru pici kicicin sayankara marha ehcoko. Amumuru pici mîk. Ero ke yikicicin sayankara ehcoko.

16 Awakno pici kicicin sayankara marha ehcoko. Awakno kicicinî rma mîn yipici kicicin.

17 Wooxam kicicin sayankara ehcoko, noro yemsîrî sayankan̂e me awexitaw hara. Yîmrerî yemsîrî sayankara ehcoko, noro yemsîrî sayankara marha ehcoko. Noro yipu komo sayankara ehcoko. Apici yananî ro komo noro yipu komo. Ero ke kicicitho me mak nasî noro yipu komo sayankacho.

18 Apici yakno kicicin sayankara marha ehcoko. Akno thakwa mîrwonmekyaxe ero wa ahsîyataw. Ero ke apici waipîra ka exitaw akno sayankara ehcoko.

19 Roopo exitaw ro wooxam, yikicicin sayankaxi tohra ehcoko.

20 Apoyino pici yenaka tohra ehcoko. Akiciciretopo komo rma mîn noro yipu poko awehtopo.

21 Amxîkrî komo cirihra ro mak men ehcoko wehto cheka Moreke ya tîmsom me. Oyosotî mîwîrîyakamexpetu kica yîwya tîmyataw. Aporin komo xa Ow ha.

22 Kîîrî yukukmara ro mak men ehcoko woxam mukukmexe ero wa. Kicicitho me ro mak nasî kica ero wa yukukmacho.

23 Okno yukukmara ro mak marha ehcoko kica. Akiciciretopo komo rma mîn noro yipu yukukmacho. Wooxam komo marha, etkukmapora ro mak men ehcoko okno ya. Akiciciretopo komo xa mîn ero wa awetkukmapotopo komo.

24 Ero warai komo poko ekicicirera ro mak men ehcoko. Ero wara komo n̂ekicicirexe kica meyeno komo, war̂mapes awya so amn̂e n̂examro ha.

25 Yîrowon komo meero nasî kicicme kica. Ero ke roowo meero kicicme wiir̂asî kicicme ehtoponhîrî yepantopo me. Iitono komo yarîrkan̂e wa mak nasî iitono roowo.

26 Ero ke omtapotarî xa ewetîcoko amyamro reha. Ero pokohra ehcoko, kacho, Kicicme maxe okwe ero yipu poko awexitaw so rma, kacho marha. Ero wa kacho ewetîcoko. Kicicitho me ro mak awehtopo komo wekatmo awya so, ero yipu pokohra ro mak ehcoko amyamro, ero yipu pokohra marha n̂ehcowpe achewno komo marha.

27 Ero wa xatken̂e Kanan pono komo amokunaw so ha kapu. N̂examro yanme rma n̂ekicicirekn̂e yîrowon komo.

28 Ero ke roowo yikiciciren̂e me awexitaw so amyamro pen hara okwe awarîrkan̂e komo wara xa marha men nas okwe roowo iitononhîrî pen komo narîrkekn̂e ero wara rma.

29 Kicicitho me awehtopo komo poko kîtwermacow so. Ero yipu poko rma exitaw apoyino komo noro waihkacoko, tpoyino komo chewno pîn me tak ehtome.

30 Ero ke owya apanatanmetopo komo men ewetîcoko. Iitononhîrî komo warahra ro mak ehcoko. Kicicitho me ro mak n̂examro yehtoponho poko eekicicirera ro mak men ehcoko. Aporin komo Ow ha, ponaro xa awehtopo kom ha, kasko. Ero wa kasko Ixaw Yana komo ya, kekn̂e. Ero wa kekn̂e Kporin komo Moises ya.