1-2 Taa, ero yinhîrî on wara kekn̂e hara Kporin komo Moises ya, On poko Araw panatanmeko xa hara, yumumuru komo marha, Ixaw Yana komo marha ahnoro. On wara kesî Kporin komo awya so, kasko yîwya so.

3-4 Anarimaw on wara na nai apoyino komo, Ixaw Yana komo poyino ha, bui na waihke tîmsom me. Oper̂a xîkrî na, kabra na, noro yipu na waihke. Kesentacho potaka tko na ekîhra nai owya tîmtome, Aporin komo mîn potaka ekîhra. Ero wa exitaw kicicme men nas okwe. Tooto wapatho wara rma nasî noro yipu okwe. Kamxuku yen̂epen̂e me nas okwe. Ero ke twaihkapore men nasî noro yipu tpoyino komo chewno pîn me tak ehtome.

5 Ero wa wîîkes takîhso Ixaw Yana komo ehtome, owya tîmsom poko, ohyaka mak ero yipu yehtome. Woskara po so mak tînîmrî komo nakn̂iyaxe anarî komo kica. Kesentacho potaka xa matko cekpore nasî, tîmsom pokono yaka. Oona mak takn̂ipore nasî owya tîmsom kom ha, Aaxe xa wasî, kacho komo marha. Ero wa xa tîmpore nasî.

6 Waihkache tak kamxukuthîrî ke tîmsom yakn̂itopo caramape ohyaka cewomsom. Kesentacho potaw nasî ero caramape. Katîthîrî marha nakn̂ipe kotoporem me ehtome yîsîn owya.

7 Pahxa worokyam ya tîmsom me makn̂iyatkekn̂e kica awokuthîrî komo. Noro yipu komo pokono me mîxatken̂e cipici yaino wara okwe. Ero wa exihra ro mak tak ehcoko. Ero wa kacho mewrecoko miya roro ehretawnomaxapu komo n̂enîrî meero.

8-9 Ero ke kasko yîwya so, On wara na natu anarî komo, Ixaw Yana komo, achewno komo marha na, tîmsom na nakn̂iyatu anana. Ekîhra na natu Kesentacho potaka owya tîmtome. Ero wa na n̂iir̂atu owya tîmsom ha. Ero wa exitaw so twaihkapore nasî tpoyino komo mera tak ehtome so.

10 On wara marha kasko yîwya so, anarimaw on wara na natu anarî komo Ixaw Yana komo, achewno komo marha na, kamxuku ken̂arî na non̂etu kica. Ero wa exitaw so kicicme xa naxe okwe. Yîpînîn yawra cehsom wara ro mak wasî. Owî rma tak waihkesî tpoyino komo chewno pîn me tak ehtome.

11 Karitî me kehtopo mîn kamxuku. Ero yanme mak karitî me naxe tuhn̂em komo ahnoro. Kicicme awehtoponhîrî komo yahrutopo me onîmîtho rma mîn kamxuku. Awokuthîrî komo mîwaikexe tîmtome owya. Noro yipu kamxukutho nasî kicicme awehtoponhîrî komo yahrutopo me. Kamxuku mak nasî kicicme awehtopo komo yahrutopo me.

12 Ero ke wîîkes awya so Ixaw Yana komo ya, kamxuku ken̂arî tonohra ro mak ehcoko amyamro, achewno komo marha, wîîkesî.

13 Ero ke on wara ehcoko wooto woche awya so. Amyamro na mesetaketu Ixaw Yana komo, achewno komo anarimaw. Ero wa awexitaw so awotî na mîwetu onoke warai ha na, roowo pore tîtosom na, tarin̂em na anarimaw. Noro yipu woche awya so kamxukuthîrî en̂epecoko roowo pona. En̂epeche awya so kamxuku ahrucoko roowo ke.

14 Ero wa kamxukuthîrî en̂epecoko karitî me wooto yehtopo me exirî ke. Ero wa nasî kamxuku ahnoro. Ero ke wa wîîkes awya so Ixaw Yana komo ya, onok na exitaw awotî komo kamxuku ken̂e rma tonohra ro mak ehcoko. Karitî me ehtopo xa mîn kamxukru. Ero ke ero yipu yonon̂e men twaihkapore nasî tpoyino chewno pîn me tak ehtome.

15 On wara marha wîîkes awya so Ixaw Yana me ewruxapu komo ya, achewno komo ya marha, onoke na yokoputho na meen̂atu tanme ro waixapu, kamara n̂eskatho na anarimaw. Noro yipu pun na mon̂etu anarimaw. Ero wa awexitaw so eyehcoko tak, aponon komo marha korokacoko. Ero wa aweyepuche so, aponon komo korokache marha kicicme rma maxe kokmamso ro. Kokmamche tak kir̂wan̂he tak maxe hara.

16 Eyepîra awexitaw so noro yipu pun tonon̂enho, aponon komo korokara marha awexitaw so kicicme men maxe okwe, kasko. Ero wa kasko Araw komo ya, Ixaw Yana komo ya ahnoro, kekn̂e. Ero wa kekn̂e Kporin komo Moises ya.