Taa, ero yinhîrî Kporin komo tak nîmtapowakn̂e xa hara Moises yakro. Araw mumuru komo waipuche nîmtapowakn̂e. Kporin komo yamtakponî ro mîtkoso kotoporem nakn̂iyatken̂e anatono ke wehto ke. Ero yanme tak n̂examro pen waihyatken̂e okwe. Ero wa exiche so nîmtapowakn̂e tak Noro Moises yakro.

2 On wara kekn̂e Moises ya, On wara kesî Kaan, kasko awakno ya Araw ya, Awanme ro mak mokuhra esko oona oyamtakponî ro yaka. Tanî nasî oyamatan yahruru, Amna pînîn yaw cma re masî, kacho ha. Poono ke twacaye nasî. Ero ke awanme ro mak ewomra esko on yaka waipîra awehtome. Tan kesenpesî kaweresî chew oyamatan yahruru yepoyino chew, kesî, kasko yîwya.

3 On wara mak n̂ewompe noro oona oyamtakponî ro yaka, bui ka n̂ekpe kar̂pamxan warai, owya tîmsom. Kicicme cehtopo yahrutopo me n̂ekpe. Kahn̂eru marha n̂ekpe owya tîmsom. Takn̂itîkaxmu me noro n̂ekpe hara.

4 Omîn yaka cewomtopo ro tak namrupe tponon. Kawno ka namrupe riin̂u kahxapu. Amtarino marha namrupe riin̂u kahxapu xa marha. Ero yipu yamruche aan̂apotu warai tak n̂imipe. Ero yinhîrî tîxapikan marha namrupe riin̂u xa marha. Omîn yaka ewomtopo ro mîn poono. Ero ke ka n̂eyehpe cokorî amrutome tak. Ero wa namrupe.

5 Ero yinhîrî boce nahsîpe asakî, Ixaw Yana komo yokutho. Kicicme cehtoponhîrî yahrutopo me rma nahsîpe. Kahn̂eru marha nahsîpe Ixaw Yana komo yokutho, takn̂itîkaxmu me hara.

6 Ero yinhîrî bui tak nîmpe owya. Kicicme cehtoponhîrî yahrutopo me nîmpe, yipici yehtoponho yahrutopo me marha, yumumuru komo yehtoponho yahrutopo me marha, ero wa ehtoponhîrî komo yahrutopo me nîmpe.

7 Ero yimaw marha boce n̂ekpe asakno roro rma. Kesentacho potaka n̂ekpe ohyaka ha.

8 Ekîche men̂ekacho ka nar̂mape. Ero wa anarî boce men̂ekape owya tîmsom. Anarînhîrî reha nasî miya cen̂epesom me hara.

9 Owya tîmsom me men̂ekaxapu tak waihkape. Kicicme Ixaw Yana komo yehtoponho yahrutopo me waihkape ha.

10 Ero yinhîrî anarînhîrî tak n̂ekpe ohyaka, cen̂epesom me men̂ekaxapu hara. Kar̂pe rma n̂ekpe. Kicicme ehtoponhîrî komo yaan̂e me nasî noro miya axawa imo pona.

11 Taa, ero yinhîrî tak paaka n̂ekpe hara Araw kicicme cehtopo yahrutopo me, tîhyawno komo yehtopo yahrutopo me marha. Noro pen tak waihkape cehtoponhîrî komo yahrutopo me.

12 Ero yinhîrî kotoporem yakn̂itopo tak narîhtope wehto roron ke. Tîmsom yakn̂itopo pono ke mak narîhtope, ohroron pono ke ha. Kotoporem marha nanîmpe aposokaxapu. Cemyaw rma nanîmpe. Ero yipu tak narpe oyamtakponî ro yaka, poono ke ahruxapu yaka.

13 Iito tak kotoporem merurkape yîroron pona yîsînîmtome. Yîsîn tak nahruyasî oyamatan yahruru, Amna pînîn yaw cma re masî, kacho ha. Apanatanmetopo komo yen yahruru mîn nahruyasî. Waipîra Araw yehtome nahruyasî. Ero wa nasî kotoporem yîsîn.

14 Bui kamxukutho marha narpe iina. Oyamatan yahruru caramape tak tamorî ke, Amna pînîn yaw cma re masî, kacho ha. Mapitaw mak caramape resce n̂ixan mak. Ero yinhîrî roowo caramape hara, oyamatan yahruru mîtwono ha. 7 ro caramape.

15 Ero yinhîrî tak boce pen waihkape hara, kicicme exino ritopo yahruru me tîmsom ha. Noro pen kamxukutho marha tak narpe oyamtakponî ro yaka hara, poono ke ahruxapu yaka. Oyamatan yahruru caramape xa hara iike, paaka kamxukutho ke carama ero wa xa marha caramape boce kamxukutho hara. Ero wa oyamatan yahruru caramape. Roowo marha caramape yîmîtwono ha.

16 Ero wa oyamtakponî ro nakir̂wamape. Ixaw Yana komo yehtoponho yanme takir̂wamapore nasî. Oyanwekn̂e me naxe kica, miya ro mak nasî kicicme ehtoponhîrî komo. Ero ke wa takir̂wamapore nasî. Ero wa xa marha Kesentacho nakir̂wamape hara. Kicicme cehsom chew exirî ke ero wa nakir̂wamape.

17 Ero yimaw anarî komo exihra ro mak n̂ehcowpe Kesentacho yaw. Araw mak mokyasî Kesentacho yaka, oyamtakponî ro yaka mokyataw kicicme exino ritoponho yahruso. Cehtoponhîrî, tîhyawno komo yehtoponho, Ixaw Yana komo yehtoponho, noro yipu komo yehtoponho yahruso mokyasî. Ero wa mokyataw noro mak n̂expe Kesentacho yaw, anarî komo exihra ro mak n̂ehcowpe iito.

18-19 Ero yinhîrî n̂epatakape hara Araw tîmsom yakn̂itopo yakir̂wamaxi hara, omîn potawno yakir̂wamax ha. Meretîrî ka tawarepe paaka kamxukutho ke, boce kamxukutho ke marha. Ero yinhîrî tak tamorî ke caramape hara 7 ro mehxarpa. Ero wa tîmsom yakn̂itopo nakir̂wamape.

20 Ero wa oyamtakponî ro nakir̂wamape Araw, Kesentacho marha, tîmsom yakn̂itopo marha. Ero yinhîrî tak anarînhîrî n̂ekpe hara boce, waihkan ha.

21 Yîhtîpîrî poko tak nahsîpe Araw ececoka rma. Kicicme Ixaw Yana komo yehtoponho n̂ekatîmtîkape ahnoro ro mak, oyanwechonho yîwya so. Ero wa ekatîmrî ke ehtoponhîrî komo n̂iir̂asî boce tîpîrî pona. Ekatîmtîkache tak miya arpocoko boce pen. Aan̂e ro ya arpocoko miya axawa imo pona.

22 Ero wa Ixaw Yana komo yehtoponho tak naar̂asî boce pen. Miya naar̂asî pohnîntaka ro mak. Iito exiche pohnîntaw yimici tak nîmhokape aan̂enhîrî. N̂en̂epepe tak tanme ro mak totohme. Ero wa Ixaw Yana komo yehtoponho naar̂asî.

23 Ero yinhîrî Kesentacho yaka n̂ewompe xa hara Araw. Iito tak mohkape tponon riin̂u kahxapu, oyamtakponî ro yaka cewomtoponhîrî ha. Iina mak nînomhe Kesentacho yaw rma.

24-25 Ero yinhîrî n̂eyehpe tak noro omîn yaw rma. Ceyepuche tpononî ro tak namrupe hara. Ero wa cexiche omîn yai n̂epatakape hara. Bui pun tak nakn̂itîkape owya tîmsom me. Ero wa kicicme cehtoponhîrî nahruya hara, Ixaw Yana komo yehtoponho marha. Bui katîtho nakn̂ipe tîmsom yakn̂itopo pona kicicme ehtoponhîrî komo yahrutopo me.

26 Taa, on wara n̂expe boce yaan̂enho, Tponon marha korokape, n̂eyehpe marha. Ero yinhîrî awetarî komo yaka tak mokope hara.

27 On wara tak n̂irpe bui pun, kicicme cehtoponhîrî yahrutopo me takn̂isom, boce pun marha, kicicme Ixaw Yana yehtoponho yahrutopo pun. Ero yipu narpe awetarî komo yai. Oyamtapokponî ro yaka ka Araw naarî kamxukuthîrî akir̂wamatopo me noro pun narpe awetarî komo yai. Iito tak nakn̂ipe yupunthîrî ahnoro, yîhcîpîthîrî marha, wethîrî marha.

28 Akn̂in̂enhîrî tak n̂eyehpe, tponon korokape marha. Ero wa cexiche tak mokope hara awetarî komo yaka hara.

29 Ero wara ehcoko miya roro 7-nhîrî nuun̂i po, 10-înhîrî kaamo po. Tîtken̂e mak ehcoko ero po awemyawno ro komo pokohra. Yiixe awehtopo komo pokohra marha ehcoko. Ero wa ehcoko amyamro Ixaw Yana komo. Ero wa xa marha n̂ehcowpe achewno kom hara.

30 Ero wa ehcoko ero po roro kicicme awehtoponhîrî komo yahrutopo me exirî ke, awakir̂wamacho komo me exirî ke ha. Ero wa ciriche Araw ya kir̂wan̂he tak maxe kicicme ehxapunhîrî. Kir̂wan me tak keen̂axe so.

31 Ero ke ero po roro epokarecoko, yiixe awehtopo komo pokohra ehcoko. Ero wa roro ehcoko miya roro ero po so yîtîhkan me ro mak. Ero wa awehtoponhîrî komo nahrupe Araw.

32-33 Araw pen waipuche tak ero wa xa marha kicicme exino ritoponho yahrun̂e me n̂expe yumumuru hara, ohyaka cewomsom me yîhkapexapu ha, tîîm retawno me ciixapu. Noro makîrha tak namrupe hara poono, riin̂u kahxapu, omîn yaka tmohtopo ro. Oyamtakponî ro yaka n̂ewomhe akir̂wamachome, Kesentacho marha nakîrwamape, tîmsom yakn̂itopo marha. Tîmsom pokono komo yehtoponho marha nahrupe, Ixaw Yana komo yehtoponho marha ahnoro. Ero wa awehtoponhîrî komo nahrupe noro hara.

34 Ero wa nasî apanatanmetopo komo. Towîhnî ro mak mîn miya rorono ha. Cewn̂e ro mak ero wa cexpore nasî yicimn̂ipuntaxera. Ero wa Ixaw Yana komo yehtoponho tahrupore roro nasî, kekn̂e. Ero wa kekn̂e Kporin komo Moises ya. Ero ke ero wa kacho yaw roro rma xakn̂e.