1-3 Taa, ero yinhîrî on wara tak kekn̂e hara Kporin komo Moises ya, On warai poko marha Ixaw Yana komo panatanmeko, Anarimaw on wara na matu, aweper̂an komo na nîkmorwa. Kicicme awin̂e komo me nasî kica ero yipu. Yîkmorwataw rma ero wa nasî. Ceipamche marha ero wa nasî. Kicicme me awin̂e komo mak mîn okwe.

4 Kuywa pona na n̂etakriya ero yipu ken̂arî. Ero wa etakriche kicicme tak nasî kuywa hara. Aapo marha nasî kicicme ero pona eremache.

5 Ero yipu ken̂arî kuywan yapeche na awya so aponon komo korokacoko, eyehcoko marha. Ero wa awexiche so kicicme rma ka maxe kokmamso ro.

6 Anarimaw ero yipu ken̂arî yaponho pona na meremetu. Ero wa aweremache so aponon komo tak korokacoko, eyehcoko marha. Ero wa awexiche so rma kicicme ka maxe kokmamso ro.

7 Anarimaw ero yipu ken̂arî na mapeyatu. Ero wa awexiche so aponon komo tak korokacoko, eyehcoko marha. Ero wa awexiche so kicicme rma maxe kokmamso ro.

8 Anarimaw on wara na matu kir̂wanî rma, kucpi kee ha na apore so ero yipu ken̂arî rma kica. Ero wa kucpi kache apore so aponon komo tak korokacoko, eyehcoko marha. Ero wa awexiche so kicicme rma ka maxe kokmamso ro.

9-10 Anarimaw kawaru mkaw na cee tîkmotaxmu aapo po ceremaxi. Ero wa toche kicicme nasî aponhîrî. Anarimaw noro yaponho mapeyatu amyamro hara. Ero wa apeche awya so kicicme marha maxe kokmamso ro. Noro yipu yaponho yaar̂ataw awya so aponon komo korokacoko, eyehcoko marha. Ero yinhîrî kicicme rma maxe kokmamso ro.

11 Anarimaw tîkmotaxmu na awapeyatu so esemokara rma cexitaw. Ero wa awapeche so aponon komo korokacoko, eyehcoko marha. Ero wa awexiche so kicicme rma ka maxe kokmamso ro.

12 Anarimaw tahrem na napeya noro yipu. Ero wa apeche tahremtho kr̂a ahkacoko. Weewe na napeya anarimaw, ahce me ciixapu na napeya. Ero wa exiche apexapu tak korokacoko tuuna ke. Ero wa cirpore nasî ekicicirexapu.

13 Taa, on wara tak cexpore nas hara noro yipu, ecpuche tak erekî yîkmotaxapunhîrî, 7 kaamo tak nukuknomape kir̂wan̂he tak cehtome hara. Ero yinhîrî tak tponon korokape, n̂eyehpe marha tîhtosom kwaw ha. Ero wa exiche kir̂wan̂he tak nas hara.

14 8-nhîrî kaamo po tak potwo warai nahsîpe asakî, potkuku warai na nahsîya anarimaw asakî kar̂pamxan menî n̂he. Noro yipu n̂ekpe ohyaka. Kesentacho potaka n̂ekpe. Tîmsom pokono ya tak nîmpe iito.

15 Ero yinhîrî omîn yenîn̂e tak waihkape yîn̂ekîthîrî. Anarî ka waihkape kicicme ehtoponhîrî yahrutopo me, anarînhîrî waihkape takn̂itîkaxmu me hara. Ero wa n̂irpe tîkmotaxmu ken̂arînho yehtoponho yahrutome tak owya, kekn̂e. Ero wa kekn̂e Kporin komo Moises komo ya.

16 On wara marha kekn̂e yîwya so, Anarimaw on wara na nai apoyino komo kîîrî, n̂ekuke anarimaw. Ero wa exiche n̂eyehpe tak. Eyepuche kicicme rma ka nasî kokmamso ro.

17 Anarimaw aponon komo na nai akuru komo ken̂e. Paaka picho ciixapu na nai ero wa anarimaw. Ero wa exitaw korokacoko tuuna ke. Korokache kicicme rma nasî kokmamso ro.

18 On wara marha nasî kîîrî wooxam yukukmache, yukuru toche ha, n̂eyehcowpe asakno roro rma. Eyepuche so kicicme rma naxe kokmamso ro.

19 On wara marha naxe wooxam komo roopo cexitaw so, ero yanme kicicme naxe 7 kaamo. Anarimaw ero wa ehxapu na mapeyatu wooxam. Ero wa apeyataw awya so kicicme maxe amyamro hara kokmamso ro.

20 On wara nasî wooxam roopo exitaw, noro kuywan meero nasî kicicme aponhîrî marha, ahce na pona eremachonhîrî ha.

21 Noro yipu kuywan na mapeyatu anarimaw. Ero yipu yapeche awya so korokacoko aponon komo, eyehcoko marha. Ero wa awexiche so kicicme rma maxe komo kokmamso ro.

22 Anarimaw noro yipu wooxam yaponho na mapeyatu. Ero wa awexiche so korokacoko aponon komo, eyehcoko marha. Kicicme rma ka maxe kokmamso ro.

23 Ero wa kicicme maxe noro yipu kuywan yapeche, aponhîrî yapeche marha, kicicme maxe kokmamso ro.

24 Anarimaw wooxam na nukukme kîîrî roopo exitaw rma. Ero ke kîîrî napeya wooxam kamxukru. Ero wa exitaw kicicme tak nasî kîîrî 7 kaamo. Anarî komo kuywan pona etakriche kîîrî ero meero tak nasî kicicme.

25 Anarimaw wooxam na kamxukwa roopo cehtopo pîn me rma. Pahkî na kamxukwa. Ero wa exitaw kicicme nasî. Anarimaw roopo cehtopo me rma kamxukwa pahkî ro mak. Ero wa exitaw marha kicicme nasî.

26 On wara nasî noro yipu wooxam, ahtono pona na etakriche ero men nasî kicicme. Etakritoponhîrî nasî kicicme roopo exitawno wara rma. Noro yipu yeremachonho marha nasî kicicme roopo exitawno wara rma.

27 Anarimaw ero yipu mapeyatu, etakritoponhîrî ha na, eremachonhîrî ha na. Ero yipu yapeche awya so aponon komo korokacoko, eyehcoko marha. Kicicme rma maxe kokmamso ro.

28 Taa, on wara tak cexpore nasî wooxam, kamxutachonhîrî yîtîtmamche, 7 kaamo ka nukuknomape kir̂wan̂he tak ehtome hara.

29 8-nhîrî kaamo po tak potwo warai nahsîpe noro, wooxam, asakî nahsîpe. Potkuku warai na nahsîya anarimaw asakî, kar̂pamxan warai. Ahsîche tîmsom pokono yaka tak n̂ekpe Kesentacho potaka.

30 Noro yipu yahsîche anarî waihkape tîmsom pokono kicicme wooxam yehtoponho yahrutopo me. Anarînhîrî tak waihkape hara takn̂itîkaxmu me. Ero wa n̂irpe kicicme wooxam yehtoponho yahrutome tak owya kamxutaxmunhîrî me ehtoponhîrî ha.

31 Ero wa xa tpanatanmekpore nasî Ixaw Yana komo kicicitho komo pokohra ehtome so. Kicicitho komo poko rma cexitaw so waihyaxe men okwe omîn yikicicirerî ke, tîchewno komo yikicicirerî ke ha okwe.

32 Ero wa nasî kîîrî komo panatanmetopo. Ero wa n̂ehcowpe kicicme ehxapu, yîkmotacho ken̂arî, ekukaxapu komo marha.

33 Ero wa nasî wooxam komo panatanmetopo hara kicicme ehxapu roopo cexirî ke. Anarimaw kîîrî nasî kicicme cekukarî ke, wooxam ha na anarimaw tkamxutarî ke. Anarimaw kicicme nasî kîîrî wooxam kukmarî ke kicicme exitawno kukmarî ke ha. Ero wa nas apanatanmetopo komo noro yipu komo pokono.