1-2 Taa, ero yinhîrî on wara tak kekn̂e Kporin komo Moises ya, On wara apoyino komo n̂ehcowpe repra ken̂arînho. Ero yipu yetowche tak tîmsom pokono yaka naacowpe îîken̂arînhîrî.

3-4 Ero yinhîrî tak tompe tîmsom pokono awetarî komo yai. Iito tak noro n̂enpe, Yaaro, cecihso tak nai ham, kachome. Cecihso een̂ataw tak torowo n̂ekpope tîmsom pokono asakî, waihkan ha ka. Yusmumnî mak n̂ekpope. Weewe marha n̂ekpope setru yepu. Mawîrka marha n̂ekpope yucurexapu. Iisopu marha n̂ekpope. Repra ken̂arînhîrî yakir̂wamacho mîn n̂ekpope.

5 Ero yipu komo yekîche anarî torowo tak waihkapope takrono komo ya tahrem yaka, er̂mo kahxapu yaka. Tuuna yepoi waihkapope tîhtosom yepoi.

6 Ero yinhîrî anarînhîrî nahsîpe hara torowo. Waihkara n̂expe noro reha, nukpape mak anarî pen kamxukutho kwaka. Setru yepu yakro rma nukpape, mawîrka yakro marha yucurexapu yakro, iisopu yakro marha. Ero wa nukpape tuuna yepoi tîhtosom yepoi. Waihkaxapunhîrî kamxukutho kwaka nukpape.

7 Ero yinhîrî repra ken̂arînhîrî tak caramape kamxuku ke 7 ro. Kir̂wan̂he tak nasî moso, kape tak caramache. Ero wa nakir̂wamape repra ken̂arînhîrî. Ero wa exiche torowo tak nahsîpînkape woskara pore totohme.

8 Ero yinhîrî on wara n̂expe takir̂wamaxmu, tponon korokape, n̂ehpokatîkape marha, n̂eyehpe marha. Taa, ero wa exiche tak kir̂wan̂he nasî. Awetarî komo yaka tak mokope hara. Tîmînî ro yaka tko ka mokuhra n̂expe. 7 kaamo ka n̂enmape anato tîmîn yawhra.

9 Ero yinhîrî 7-nhîrî po n̂etîhpokatîkape xa hara. Pahtîkape tîhpocithîrî, tîhtîpîrî pokono, cetpocithîrî marha, cepixironthîrî marha, ahnoro mak pahpe. Tponon korokape marha, n̂eyehpe marha. Ero wa exiche tak kir̂wan̂he xa tak nasî.

10 Ero yinhîrî 8-nhîrî kaamo po tak kahn̂eru xîkrî tak n̂ekpe noro kîîrî asakî, woosî cewn̂e, ero wara. Cewn̂e cimn̂ipu ewrutoponhîrî exihnî ka n̂ekpe, tupunporem mak ha. Puruma marha n̂ekpe aposokaxapu 6,5 riituru wicak ha. Katî yakro esmaxapu mîn n̂ekpe. Katî marha n̂ekpe eenî ro yaw, 0,3 riituru wicak ha.

11 Tîmsom pokono yaka tak nîmpe, Kir̂wan̂he tak mai ham, kan̂enho ya. Ero yipu yahsîche tak ohyaka tak n̂ekpe repra ken̂arînho Kesentacho komo potaka. Owya tîmsom komo marha n̂ekpe iina.

12 Iina ekîche oper̂a xîkrî tak nanîmhe tîmsom pokono, kîîrî. Kahsî nanîmpe. Kicicme wîxakn̂e okwe, kacho me tîmsom me nanîmhe. Katî marha nanîmpe. Ero yipu nanîmpe kahsî powpow me owya tîmtopo me.

13 Ero yinhîrî tak oper̂a xîkîtho pen waihkape oyeken po. Kicicme ehtoponhîrî komo yahrutopo me cehsom waihkacho ro to waihkape, takn̂itîkaxmu waihkacho ro to ha. Tootî me tak nahsîpe yupunthîrî. Kicicme ehtoponhîrî yahrutopo me waihkaxapu nahsîyasî, ero wa xa marha nahsîpe. Kicicme wîxakn̂e kica, kacho me tîmsom hara. Owya tîmxapu xa mîn yînmîthîrî.

14 Oper̂a xikîtho waihkache tak kamxukuthîrî n̂irpe takir̂wamaxmu panarî poturu pona kaari n̂ixan pona. Amorî yîmhetho pona marha kaari n̂ixan pona, yîhrorî yîmhetho pona marha kaari n̂ixan pona. Ero wa n̂irpe oper̂a xîkîtho kamxukutho takir̂wamaxmu pona.

15-16 Ero yinhîrî on wara n̂irpe hara tîmsom pokono, katî nukmampe tamorî yaka mak, poowa n̂ixan yaka. Ero kwaka tak nukpape tamorî hara kaari n̂ixan, ekantopo ha. Ero ke roowo tak caramape 7 ro, Kesentacho potawno ha.

17 On wara marha n̂irpe katî, tamorî yawno ha, takir̂wamaxmu panarî poturu pona n̂irpe, kaari n̂ixan pona. Amorî yîmhetho pona marha n̂irpe, kaari n̂ixan pona. Yîhtarî yîmhetho pona marha n̂irpe, kaari n̂ixan pona. Kamxuku n̂iirî ero pona xa marha katî n̂irpe hara.

18 Ero yinhîrî katî yakwenho tak n̂irpe takir̂wamaxmu tîpîrî pona hara. Ero wa n̂irpe tîmsom pokono kicicme ehtoponhîrî yahrutopo, enîn̂e mera tak ehtome Aporin komo.

19-20 Ero yimaw tak anarînhîrî pen waihkape hara oper̂a xîkîtho kicicme ehtoponhîrî yahrutopo me tîmtome hara. Ero yipu tîmîche tak takn̂itîkaxmu waihkape hara oper̂a xîkîtho ha. Waihkache yupunthîrî takî nakn̂ipe tîmsom yakn̂itopo pona. Puruma marha nakn̂ipe owya tîmsom me. Ero wa kicicme noro yehtoponho nahruyasî repra ken̂arînho yehtoponho ha. Kir̂wan̂he tak nasî.

21 Anarimaw tko iyokumra na nai eper̂a ken̂arînho yupurantamra cexirî ke. Ero wa cexitaw cewn̂e mak n̂ekpe oper̂a xîkrî kîîrî. Kicicme weexi kica, kacho me tîmsom n̂ekpe, kahsî tanîmsom ha. Puruma marha n̂ekpe aposokaxapu, 2 ritru wicak ha. Katî yakro esmaxapu mîn n̂ekpe owya tîmsom me. Katî marha n̂ekpe 0,3 ritru wicakî xa.

22 Potwo warai marha n̂ekpe asak. Anarimaw potkuku warai xa na n̂ekya asakî tupurantan yecenarîno cik mak. Ero wa tarin̂em n̂ekpe asak ha. Anarî nîmpe owya kicicme cehtoponhîrî yahrutopo me. Anarînhîrî tak nîmpe takn̂itîkaxmu me hara.

23 8-nhîrî kaamo po tak n̂ekpe tîmsom pokono yaka Kesentacho potaka. Ero wa n̂ekpe oper̂a xîkrî cewn̂e, tarin̂em asakî, puruma, katî, ero wa n̂ekpe takîrwamachome. Ohyaka n̂ekpe, Aporin komo yaka.

24 Ekîche oper̂a xîkrî tak nahsîpe tîmsom pokono. Kahsî nanîmpe powpow me owya tîmtopo me, Aporin komo ya ha.

25 Ero yinhîrî oper̂a xîkîtho pen waihkape yîn̂ekîthîrî, Kicicme weexi kica, kacho me tîmsom ha. Kamxukuthîrî tak n̂irpe repra ken̂arînho panapoturu pona, kaari n̂ixan pona. Amorî yîmhetho pona marha n̂irpe, kaari n̂ixan pona. Yîhtarî yîmhetho pona marha n̂irpe, kaari n̂ixan pona. Ero wa n̂irpe.

26-27 Ero yinhîrî katî nukmampe tîmsom pokono tamorî yaka poowa n̂ixan yaka. Ero kwaka takî nukpape tamorî hara kaari n̂ixan, ekantopo ha. Roowo tak caramape 7 ro, omîn potawno ha.

28 Ero yinhîrî on wara tak katî n̂irpe hara tamorî yawno, oper̂a xîkîtho kamxukutho n̂iir̂a iina xa marha n̂irpe kat hara. Eper̂a ken̂arînho panapoturu pona n̂irpe, kaari n̂ixan pona. Amorî yîmhetho pona marha n̂irpe, kaari n̂ixan pona. Yîhtarî yîmhetho pona marha n̂irpe, kaari n̂ixan pona.

29 Katî yakwenho tak n̂irpe kanahtaka. Ero wa katî n̂irpe kicicme ehtoponhîrî yahrutome tak Aporin komo ya.

30-31 Ero yinhîrî potwo warai tak waihkape hara. Potkuku warai ha na yupurantan yecenarîno me ehxapu ha. Anarî pun tak nakn̂ipe kicicme ehtoponhîrî yahrutopo me. Anarînhîrî pun tak nakn̂itîkape hara. Puruma yakro rma nakn̂ipe. Ero wa nakn̂ipe repra ken̂arînho yehtoponho yahrutome tak Aporin komo ya.

32 Ero wa nasî apanatanmetopo komo yupurantamnî komo pokono, repra ken̂arînho komo pokono ha. Ero warai komo cik mak n̂ehcowpe owya tîmsom, porin yekn̂e pîn komo thakwa. Ero wa kekn̂e Kporin komo Moises ya.

33-34 On wara marha kekn̂e Kporin komo Moises ya, Araw komo ya, Amn̂e pahxaro Kanan pona tak mepatakexe, aweken komo me wîmyas ero pona. Anarimaw na repra wiir̂a mîîmo yawno me, iitono yawno me.

35 Ero wa een̂ataw mîîmo yosom ya, tompe tak tîmsom pokono komo yaka ekatîmso. Omîn wacan poko nasî repra warai kica, kape yîwya.

36 Ero yentache mîîmo yawno komo narpope tîmsom pokono anana. Yarîhra ro mak tak n̂irpope mîîmo repra yenso tîtotome tak. Ero wa mîîmo yawno komo narpope repra ken̂ehra rma ehtome.

37-38 Ero yinhîrî tak repra yenso tompe. Anarimaw tuxkukuyure na n̂een̂a eper̂a, cucure ha na anarimaw. Takawai so na n̂een̂a ero yipu. Ero wa een̂ataw n̂epatakape hara. Mîîmo nahrupe ewomra tak ehtome tooto ero yaka. 7 kaamo tahruso n̂expe. Ero wa n̂irpe tîmsom pokono.

39 Ero yinhîrî takî 7-nhîrî kaamo po tak tompe xa hara tîmsom pokono mîîmo yenso. Ero yimaw cesenmamso na n̂een̂a repra waaca pokono.

40 Ero wa exitaw on wara tak kape, Repra ken̂arî komo tak mohkacoko toopu komo, waaca me ciixapunhîrî. Miya tak ar̂macoko peen cheka, kape.

41 Mîîmo wacan tak yuhwacoko ahnoro. Kawau tak ar̂macoko peen cheka waaca pokononho, kape.

42 Anarî tak n̂ehcowpe hara toopu komo. Mohkaxapu yekenho na n̂iicowpe. Kawau marha n̂ehcowpe amkaxan mîîmo wacan yîmkarinomacho. Ero wa n̂iicowpe.

43-45 Ero yinhîrî repra na n̂esenpe xa hara okwe ero poko akir̂wamaxapunhîrî poko. Repra ken̂arîtho rma re mohkekn̂e osom, toopu ha. Anarî tak n̂iir̂akn̂e hara ekenhîrî na. Mîîmo marha re nuhwekn̂e ahnoro. Amkaxan ke marha nîmkarinomekn̂e hara kawau ke. Ero wa akir̂wamaxapu poko rma n̂esenpe xa hara na kica. Ero wa esenpoche tîmsom pokono tompe xa hara enso. Cesenmamso tak een̂ataw eper̂a, mîîmo wacan pokono, kicicme xa tak nîhtînope. Kicicitho me nas ero yipu mîîmo. Ero ke n̂ixkacowpe kr̂a mak, toopu mko, mapata mko, makwananî mko, yîmkarinomachonhîrî marha. Ero wa n̂ixkatîkacowpe ahnoro. Mooxe tak naacowpe. Peen cheka kr̂a nar̂macowpe. Ero wa n̂iicowpe mîîmo pen repra ken̂arînhîrî ha.

46-47 On wara na nai tooto anarimaw ero yaka rma na n̂ewomya mîîmo yaka yixkara ka exitaw. Ahruxapu yaka rma na n̂ewomya. Ero wa ewomche kicicme tak men nasî noro kokmamso ro. Anarimaw na nîwînîkya tooto ero yaw. N̂eseresme na iito. Ero wa exiche tponon tak korokape.

48 Taa, anarimaw tîmsom pokono n̂ewomya ahruxapu yaka yaxan ke yîmkarinomaxapu yaka ha. Repra yesenmamrî yenso n̂ewomya. Esenmamra tak na n̂een̂a ero yimaw. Ero wa een̂ataw, Kir̂wanhe tak nas on mîîmo, kape tak. Ero wa kape cecihso exirî ke mîîmo.

49 Taa, ero wa exitaw tak mîîmo, on wara tak n̂expe tîmsom pokono, mîîmo yakir̂wamacho tak nahsîpe torowo asakî. Setru yepu marha nahsîpe, mawîrka marha yucurexapu, iisopu marha. Ero yipu nahsîpe.

50 Anarî tak waihkape torowo tahrem yaka er̂mo kahxapu yaka. Tuuna yepoi waihkape tîhtosom yepoi.

51 Ero yinhîrî setru tak nukpape torowo pen kamxukutho kwaka. Iisopu marha nukpape ero kwaka, mawîrka marha, torowo marha waipîn ha. Ero yipu nukpape kamxukuthîrî kwaka, tuuna kwaka marha tîhtosom kwaka. Ero yipu ke tak mîîmo caramape 7 ro.

52 Ero wa mîîmo nakir̂wamape torowo pen kamxukutho ke, tuuna ke marha tîhtosom ke, torowo ke waipîn ke, setru yepu ke, iisopu ke, mawîrka ke yucurexapu ke. Ero warai ke mîîmo nakîr̂wamesî.

53 Ero yinhîrî waipîn tak nahsîpînkape torowo. Ewto pohra nahsîpînkape miya totohme woskara pore. Ero wa mîîmo yehtoponho nîhcamnope kicicme ehtoponhîrî ha. Ero wa ciriche kir̂wan̂he tak nas hara mîîmo.

54-57 Ero wa nasî apanatanmetopo komo repra poko, akîrîsîrî komo poko marha. Apun komo poko exitaw ero wa ehcoko, aponon komo poko exitaw marha, amîn komo poko exitaw marha, ero wa ehcoko. Ero wa marha nasî apanatanmetopo komo ereh ken̂e awehtopo komo poko, tîkrîspe awehtopo komo poko marha, kparakparape awehtopo komo poko marha. Ero wa nasî apanatanmetopo komo apun komo matacho komo yîhtînotome tak awya so, Kicicme kiin̂e mîn repra xa, kachome awya so, Kicicitho pînî reha mîn anarî hara repra warai mak, kachome marha awya so anarî poko hara. Ero wa nasî apanatanmetopo komo repra poko, kekn̂e. Ero wa kekn̂e Kporin komo Moises komo ya.