1-2 Taa, ero yinhîrî on wara kekn̂e hara Kporin komo Moises ya, Araw komo ya, Anarimaw on wara na nai apoyino komo, yîhcîpîrî nupurukwa, erek me na nai anarimaw, tîkmorkem na nai anarimaw. Repra wara na nai. Ero ke noro yipu tarpore nasî ohyaka cewomsom yaka, Araw yaka ha. Anarimaw yumumuru yaka naacowpe tîmsom pokono yaka ha.

3 Noro yipu tak n̂enpe erekî yîhcîpîrî pokono. Tumutwe na n̂een̂a yîhpoci erek yeretawno. Takawai marha na n̂een̂a erekî. Ero wa een̂ataw repra me xa tîhtînopore nas okwe. Kicicme nasî moso okwe, kesî tak tîmsom pokono.

4 Anarimaw tko na tumutwe rma n̂een̂a erekî, akawamra ha tko, yumutuntara marha na n̂een̂a yîhpoci. Ero wa een̂ataw cewyaro tak iiken̂arî n̂irpe 7 kaamo.

5 7-nhîrî po tak ereh ken̂arî tak n̂enpe xa hara tîmsom pokono. Iito rma na n̂een̂a erekî esenmamra, akawamra marha n̂een̂a. Ero wa een̂ataw cewyaro n̂irpe 7 kaamo xa hara.

6 Ero yinhîrî 7-nhîrî po xa hara ereh ken̂arî n̂enpe xa hara tîmsom pokono. Esenmamra rma na n̂een̂a erekî, xahwope mak na n̂een̂a. Ero wa een̂ataw, Kir̂wan̂he nasî moso, kesî tak noro poko. Tponon tak korokape ereh ken̂arînhîrî. Ero wa korokache kir̂wan̂he tak nasî.

7 Anarimaw pahkî n̂he exiche n̂esenmamya hara na erekî, Kir̂wan̂he nai, kachonho tîmsom pokono ya. Ero wa exitaw ereh ken̂arî tompe xa hara omîn yenîn̂e yaka esenposo xa hara.

8 Ero ke noro yipu tak n̂enpe tîmsom pokono. Porin me n̂he tak een̂ataw erekî, Kicicme nasî moso okwe, kape tak noro poko. Repra xa mîn okwe, ero ke ero wa kape, kekn̂e. Ero wa kekn̂e Kporin komo Moises ya.

9 On wara marha kekn̂e Kporin komo Moises komo ya, Ereh ken̂e exitaw apoyino komo, noro men aacoko tîmsom pokono yaka.

10 Arîche tak n̂enpe tîmsom pokono. Tupurukye na n̂een̂a yîhcîpîrî. Tumutwe marha na n̂een̂a. Tumutwe marha na n̂een̂a yîhpoci erek yeretawno. Tmataxi marha na n̂een̂a yupun iitono.

11 Ero wa een̂ataw kicicitho xa mîn erekî. Ero ke, Kicicme nasî moso okwe, kape tak tîmsom pokono noro yipu poko. Cewyaro cirihra rma cirpore nasî noro yipu. Kicicme exirî rma n̂esenpesî.

12 Anarimaw ereh ken̂e na n̂ehtîke yupun ahnoro mak. Ero wa exitaw yupun n̂enpe tîmsom yenîn̂e. Ahnoro mak n̂enpe ereh ken̂arî yîhtîpîrî meero miya roro yîhtarî pona roro.

13 Ero wa yupun n̂entîkape tîmsom pokono. Yupun poko cesenmamso tak na erekî n̂een̂a miya ro mak. Ero wa een̂ataw kir̂wan̂he rma nasî moso, kesî tak noro yipu poko. Tumutuntatîkaxi exirî ke tak ereh komo kir̂wan̂he nasî noro yipu.

14 Tmataxi exitaw tko yîhcîpîrî kicicme tak nas okwe.

15 Ero yipu yenîche, Kicicme nasî moso, kape tak tîmsom pokono noro poko. Repra ken̂e tak nasî noro yipu okwe. Ero ke ero wa kape.

16 Anarimaw repra na numutunwa hara. Ero wa een̂ataw tîmsom pokono yaka tompe hara ereh ken̂arî.

17 Noro yipu tak n̂enpe xa hara tîmsom pokono. Tumutuntaxi tak een̂ataw erekrî mko, Kir̂wan̂he tak nasî moso, kape tak, kekn̂e.

18-19 On wara marha kekn̂e Kporin komo, Anarimaw on wara na nai apoyino komo, ereh ken̂e na nai. Ero yinhîrî n̂icihya hara. Ero yinhîrî tko yîhcîpîrî nupurukwa xa hara erekî yehtoponho to rma. Tumutwe na nai yupurutaxapu. Anarimaw tumutwe na nai, cucure cik re na nai anarimaw xamape rma. Ero wa exitaw noro men tompe tîmsom pokono yaka esenposo.

20 Erekrî tak n̂enpe tîmsom pokono. Takawai ciki na n̂een̂a. Tumutwe marha na n̂een̂a yîhpoci erek yeretawno. Ero wa een̂ataw, Kicicme nai ham okwe moso, kape tak tîmsom pokono. Repra mîn, cetahsîso tak nas okwe erekîthîrî yehtoponho na. Ero ke ero wa kape.

21 Anarimaw yumutuntara rma na n̂een̂a yîhpoci erek yeretawno ha. Akawamra marha na n̂een̂a. Cucure exihra marha na n̂een̂a xahwope mak ha. Ero wa een̂ataw tîmsom pokono cewyaro tak n̂enmape ereh ken̂arî 7 kaamo.

22 Ero yinhîrî 7 ro enmapuche tak n̂enpe hara. Porin me tak na n̂een̂a ero yimaw. Ero wa een̂ataw, Kicicme nai ham okwe moso. Repra mîn ha, kape tak tîmsom pokono.

23 Esenmamra tko na n̂een̂a anarimaw. Iito rma na n̂een̂a. Ero wa een̂ataw, Kir̂wan̂he nai ham moso, kape noro yipu poko reha. Erekîthîrî yotho mak mîn n̂esenpesî erekî wara rma. Ero ke ero wa kape.

24 Anarimaw on wara na nai apoyino komo, n̂ecakya ha na oco. Ecpîra rma na nai ecahtoponhîrî, tumutwe tak na nai, cucure nhe na nai anarimaw, tumutwe n̂he ha na. Ero wa n̂esenpe yupun yecahtopo yeretawno.

25 Ero yipu tak n̂enpe tîmsom pokono, ecahtoponhîrî n̂enpe. Tumutwe tak na n̂een̂a yîhpoci ecahtoponhîrî yeretawno, takawai marha na n̂een̂a. Ero wa een̂ataw repra mîn okwe ecahtoponhîrî to. Kicicme nai ham okwe moso, kape tak tîmsom pokono noro yipu poko. Repra xa mîn okwe.

26 Anarimaw ero warahra na n̂een̂a ecahtoponhîrî, tumutwe exihra na n̂een̂a yîhpoci, akawamra marha na n̂een̂a. Xahwope tak na n̂een̂a. Ero wa een̂ataw tîmsom pokono ya ecahxapu n̂irpe cewyaro 7 kaamo.

27 Ero yinhîrî 7 ro enmapuche tak ecahxapu n̂enpe xa hara tîmsom pokono. Ero yimaw porin me tak na n̂een̂a erekî. Ero wa een̂ataw, Kicicme nai ham okwe moso, kape takî noro yipu poko. Repra mîn okwe.

28 Iito rma tko na n̂een̂a anarimaw erekî enmamra. Xahwope mak tak na n̂een̂a. Ero wa een̂ataw ero pîntho mak mîn erekî. Ecahtoponhîrî mak nupurukwa. Kir̂wan̂he rma nai ham moso, kape tak noro poko. Ecahtoponhîrî yotho mak mîn ha.

29 Anarimaw on wara na nai apoyino komo, kîîrî na, wooxam ha na anarimaw, erekî na nai yîhtîpîrî poko, iyohyarî poko xa ha na anarimaw.

30 Ero ke ero wa exitaw n̂enpe tak tîmsom pokono. Takawai cik na n̂een̂a erekî. Pin̂ipici me na n̂een̂a yîhpoci, erek yeretawno, tîxeweke marha na. Ero wa een̂ataw, Kicicme nai ham okwe moso, kape tak tîmsom pokono. Kicicitho mîn erekî repra xa okwe, yîhtîpîrî pokono, iyohyarî pokono ha na anarimaw.

31 Akawamra tko na n̂een̂a anarimaw tîmsom pokono. Cicwiye exihra na n̂een̂a yîhpoci erek yeretawno. Ero wa een̂ataw noro yipu n̂irpe cewyaro 7 kaamo.

32-33 Ero yinhîrî 7 ro enmapuche tak erekî n̂enpe xa hara tîmsom pokono. Esenmamra na n̂een̂a erekî. Tîxeweke exihra marha na n̂een̂a yîhpoci, erek yeretawno. Akawamra marha na n̂een̂a. Ero wa een̂ataw ereh ken̂arî poci pahpe ahnoro. Erek yeretawno mak papupra. Papuche ereh ken̂arî n̂irpe cewyaro 7 kaamo xa hara.

34 Ero yinhîrî 7 ro enmapuche tak erekî n̂enpe xa hara tîmsom pokono. Esenmamra na n̂een̂a ero yimaw, akawamra marha. Ero wa een̂ataw, Kir̂wan̂he nai ham moso, kape tak noro yipu poko. Ero ke tponon tak korokape ereh ken̂arînhîrî kir̂wan̂he cehtome.

35-36 Ero yinhîrî ero rma tak na n̂esenmamya hara okwe, Kir̂wan̂he nasî, kachonho rma. Ero wa esenmamyataw n̂enpe xa hara tîmsom pokono. Yaaro, porin me tak nai ham okwe, nîîke na enîche. Ero wa een̂ataw, Nai ha na tîxewekem yîhpoci, kacho ponarora mak n̂expe. Kicicme exirî rma n̂esehtînomexpesî esenmamrî ke mak.

37 Esenmamra rma tko na nai anarimaw. Iito rma na n̂een̂a tîmsom pokono. Cicwiye tak na n̂een̂a yîhpoci erek yeretawno ciki. Ero wa een̂ataw cecihso tak nas erekîtho. Kir̂wan̂he tak nai ham, kape tak tîmsom pokono noro yipu poko.

38-39 Anarimaw on wara na nai hara apoyino komo, kîîrî na, wooxam ha na anarimaw, kparakparape na nai yîhcîpîrî. Ero wa exitaw noro yipu n̂enpe tîmsom pokono. Cihxiroke n̂he een̂ataw kparakparape ehtopo ero pîntho mak mîn. Kir̂wan̂he rma nasî ero yipu ken̂arî.

40 Anarimaw on wara na nai anarî hara apoyino komo, kîîrî, yîhpocithîrî na n̂emaraketîke okwe. Yîhpora ro mak nai okwe. Ero wa exitaw kir̂wan̂he rma nasî.

41 Anarimaw tpesmai mak na nai. Ero wa exitaw kir̂wan̂he rma nasî.

42 Anarimaw pemtunthîrî poko na n̂epatake erekî, perî poko rma na anarimaw. Tumutwe na nai erekî, cucure cik ha na. Ero wa exitaw, repra mîn n̂epatakesî perî poko, pemtunthîrî poko anarimaw.

43-44 Ero wa cehsom tak n̂enpe tîmsom pokono erekî n̂enpe yupurutaxapu. Pemtunthîrî pokono mîn n̂enpe, perî pokono anarimaw. Tumutwe na n̂een̂a, cucure n̂he cik ha na. Repra warai me rma na n̂een̂a. Ero wa een̂ataw repra ken̂e nai ham, kape. Kicicme nasî moso, kape tak tîmsom pokono noro yipu poko. Erekî poyero ero wa kape yîhtîpîrî pokono poyero.

45 On wara n̂expe repra ken̂arî, etahyaxkaxaputho yaw mak n̂expe poono yaw, etukrara marha n̂expe. Cetpoci marha nahrupe poono ke. Kicicme wasî, kicicme wasî, kape roro.

46 Cerekye cexitaw ro kicicme nasî. Ero ke cewyaro mak n̂enmape awetarî komo yai mooxe. Ero wa men n̂ehcowpe repra ken̂arî komo, kekn̂e. Ero wa kekn̂e Kporin komo Moises komo ya.

47-49 On wara marha kekn̂e Kporin komo yîwya so, Anarimaw on wara na meen̂atu aponon kom hara, repra ken̂arî wara na meen̂atu. Ero wa na meen̂atu aponon komo, kahn̂eru poci kahxapu ha na, riin̂u kahxapu ha na. Anarimaw atponî rma na meen̂atu ero wa, poono me kahxapu. Paaka picho na meen̂atu anarimaw ero wara. Ero yipu poko na meen̂atu repra warai. Tuxkukure na meen̂atu, cucure anarimaw. Ero wa een̂ataw, repra tan ha na, kapore nasî. Cenpopore men nas tîmsom pokono ya.

50 Ero yipu yenîche tak omîn yenîn̂e ya ero nahrupe cewyaro 7 kaamo.

51 Ero yinhîrî 7 ro enmapuche tak n̂enpe xa hara tîmsom pokono. Cesenmamso tak na n̂een̂a repra warai poono me kahxapu pokono, paaka picho pokono na, ahce warai pokono ha na. Ero wa een̂ataw, Repra mîn ero yipu. Ero ke iiken̂arî nasî kicicme kica.

52 Ero yipu tak nakn̂ipe kr̂a tîmsom pokono. Ero wa nakn̂ipe poonotho, kahn̂eru poci kahxaputho, riin̂u kahxaputho, paaka picho tho, ahce ha na repra ken̂arî takn̂ipore nasî. Kicicitho ro mak mîn eper̂a. Ero ke iiken̂arînhîrî takn̂ipore kr̂a nasî.

53-54 Anarimaw esenmamra na n̂een̂a tîmsom pokono, poono pokono, paaka picho pokono ha na. Ero wa een̂ataw korokapope mak tmaywen komo ya. Korokache cewyaro nahrupe 7 kaamo xa hara.

55 Ero yinhîrî korokaxapu tak n̂enpe xa hara tîmsom pokono. Esenmamra na n̂een̂a, iito rma na n̂een̂a. Ero wa een̂ataw kicicme rma nasî ero yipu. Ero ke kr̂a nakn̂ipe. Yîmkai mak na nai eper̂a ken̂e. Yai mak na nai anarimaw. Wara rma ahnoro rma kr̂a akn̂icoko. Ero wa takn̂ipore nasî iito rma exitaw repra.

56 Anarimaw xamape n̂he tak na n̂een̂a korokarî ke. Ero wa een̂ataw repra ken̂arî mak nawotope. Ero wicakî mak nawotope towtome. Ero wa nawotope poono ha na, paaka picho ha na.

57 Ero wa awotoche repra n̂esenpe xa hara na anarimaw. Ero wa esenpetaw cesenmamsom me men nas okwe. Ero ke akn̂icoko kr̂a iiken̂arînhîrî. Ero wa akn̂icoko poono, paaka picho marha.

58 Esenpora tko na nai repranhîrî anarimaw. Iiken̂ehra tak n̂esenpe. Ero wa esenpetaw korokapore xa hara nasî. Ero wa korokache kir̂wan̂he tak nasî ero yipu.

59 Ero wa cirpore nasî poono, riin̂u kahxapu, kahn̂eru poci kahxapu marha, paaka picho marha. Repra ken̂e exitaw ero wa men ciicoko kir̂wan̂he exirî yîhtînotome awya so, kicicme exirî yîhtînotome anarimaw. Ero wa nasî apanatanmetopo komo ero yipu poko, kekn̂e. Ero wa kekn̂e Kporin komo Moises komo ya.