1-2 Taa, ero yinhîrî tak on wara kekn̂e hara Kporin komo Moises ya, On wara kasko Ixaw Yana komo ya, On wara nasî ewruxan yon komo panatanmetopo, kîîrî me etahsîche, ewruche marha kicicme ka nasî yîson 7 kaamo mak. Roopo exitawno wara rma nasî kicicme.

3 Ero yinhîrî 8-nhîrî kaamo exitaw ewrutoponhîrî ero po tak tanpikapore nasî rikomo ciki.

4 Ero yinhîrî 33 kaamo xa hara tukuknomapore nasî yîson yetakir̂wamacho, kamxutachonhîrî poyero etakir̂wamacho ha. Ero wicakî pahkînon ka tohra n̂expe omîn roron pona. Kaan yîwyanî ro xa tan, kacho yapehra marha n̂expe. Ero wa n̂expe cetakir̂wamatîkacho pona roro.

5 Woosî me ewruche reha 14 kaamo kicicme nasî roopo exitawno wara xa marha. Ero yinhîrî 66 kaamo xa hara n̂expe cetakir̂wamatîkacho poko kamxutaxmunhîrî.

6 Cetakir̂wamacho yenatîche tak oyakro awesentacho komo potaka tompe. Oper̂a xîkrî narpe iina tîmsom me, takn̂itîkaxmu me ha. 1 cimn̂ipu ewrutoponhîrî exihnî ka narpe ha. Potwo warai marha narpe, potkuku warai anarimaw. Noro yipu nîmpe takn̂isom me ha. Kicicme cehtoponhîrî yahrutopo me nîmpe ha.

7 Noro yipu tak nîmpe tîmsom pokono owya hara kicicme yîson yehtoponho yahrutopo me. Ero wa tîmîche kir̂wan̂he tak nasî yîson kamxutaxmunhîrî. Ero wa nasî ewruxan yon komo panatanmetopo, kîîrî yon panatametopo, woosî yon panatanmetopo marha.

8 Oper̂a xîkrî yekrî yarohra thakwa na nai yîson anarimaw. Ero wa exitaw asak n̂ekpe potwo warai. Potwo exihra exitaw potkuku warai xa n̂ekpe asakî. Anarînhîrî nîmpe owya tîmsom me, takn̂itîkaxmu me ha. Anarînhîrî nîmpe kicicme cehtopo yahrutopo me hara. Tîmsom pokono ya nîmpe. Noro tak nakn̂iyasî yupunthîrî kicicme yîson yehtoponho yahrutopo me. Ero yinhîrî kir̂wan̂he tak nasî yîson, kekn̂e. Ero wa kekn̂e Kporin komo Moises ya.