1-2 Taa, ero yinhîrî nîmtapowakn̂e xa hara Kporin komo Moises yakro, Araw komo yakro, Ai, on wara wîîkes hara awya so, kekn̂e. On wara kesî Kporin komo awya so, kacoko Ixaw Yana komo ya, anarmerpa so nasî wooto komo. Anarî komo makî tko yîhtînocoko awotî komo me, kekn̂e.

3 On warai komo xa yîhtînocoko awotî komo me, tîhtacarayem komo, twethîrî yaino yamcikan̂e kom ha, noro yipu komo mak nasî awotî komo me.

4 Anarî komo reha namcikesî twethîrî yaino rma re ero wa mak nasî. Yîhtacaramra nas okwe. Anarî komo xa hara nasî tîhtacarai rma re, ero wa mak nasî. Twethîrî yaino yamcîkara nasî. Noro yipu komo tonohra ehcoko. Ero wa nasî kameru, twethîrî yaino rma re namcikesî, yîhtacaramra tko nasî. Ero ke kicicme nasî. Awotî komo mera n̂expe.

5 Ero wa xa marha nasî koer̂u warai hara, twethîrî yaino rma re namcikesî. Yîhtacaramra tko nasî. Ero ke noro marha nasî kicicme, awotî komo mera.

6 Ero wa xa marha nasî rebre hara, twethîrî yaino rma re namcikesî. Yîhtacaramra nasî. Ero ke noro marha nasî kicicme, awotî komo mera.

7 Kuuxi marha kicicme nasî, tîhtacarai rma re nasi. Twethîrî yaino yamcikara nasî. Ero ke noro marha nasî kicicme, awotî komo mera.

8 Ero wa nasî kicicitho komo. Noro yipu komo pun tonohra ro mak ehcoko. Okoputhîrî marha apehra ehcoko. Kicicme me awin̂e komo me nas okwe, kekn̂e. Ero wa kekn̂e Kporin komo yîwya so.

9-10 On wara marha kekn̂e Kporin komo Moises komo ya, Yukwawno komo tak wetahcas hara awotî komo me cehsom komo. Yatîhnî kwawno komo wetahcasî, eepu kwawno komo marha, aporî kwawno komo marha. Mer̂pora ro mak nasî yukwawno komo. Katîhpoxe tko nas anarî komo, tîpîpîtîkye marha. Noro yipu komo ahnoro nasî awotî komo me. Anarî komo reha nasî katîhpora, yîpîpîtîra marha. Kicicme ro mak nasî noro yipu komo. Awotî komo mera ro mak n̂expe.

11-12 Anwîrîyakarî me mak n̂expe noro yipu komo awotî komo mera ro mak ha. Kica, kacoko mak okoputhîrî yenîche awya so. Ero wa wîîkesî yukwawno komo poko. Katîhpoci ken̂arî pîn komo yîwîrîyakacoko, yîpîpîthîrî ken̂arî pîn komo marha, kekn̂e Kporin komo Moises komo ya.

13-19 On wara marha kekn̂e yîwya so, Ero wa xa marha nasî tarin̂em kom hara, anarî komo n̂expe awotî komo mera. Anwîrîyakarî komo me mak n̂expe. Yaimo, kwacinama, kurum, maxweren̂e, wikoko komo, pupuri, maraki, paawa, r̂awr̂a, onowa, rere, noro yipu komo xa n̂expe awotî komo mera. Anwîrîyakarî komo me mak n̂expe.

20 Werewere warai komo marha wetahcasî tarin̂em kom ha. Anwîr̂îyakarî komo tan wetahcasî. Tîhtarî po tîtosom me mak nas anarî komo. Noro yipu komo n̂expe anwîrîyakarî komo me, awotî komo mera ro mak.

21 Anarî komo tko nas awotî komo me rma. Tarin̂em me rma re nasî, tîhtarî po tîtosom me marha. Tosokmuke tko nasî yîhrepu tahronîmsom me ha. Noro yipu komo nas awotî komo me rma.

22 Wetahcasî tak awotî komo me cehsom, taritari warai komo, rewrew warai komo, yîrîsî komo, makaka warai komo, noro yipu komo xa nasî awotî komo me.

23 Anarî komo reha n̂expe tarin̂em komo, 4 ke mak tîhtakem komo, anwîrîyakarî komo me mak n̂expe. Ero wa mak n̂expe noro yipu komo.

24 Kicicme men maxe noro yipu komo yokoputho yaperî ke awya so. Kokmamso ro ero wa maxe.

25 Noro yipu komo yokoputho na maar̂atu anarimaw. Ero wa aar̂ataw awya so aponon komo korokacoko. Korokan̂enhîrî kicicme rma maxe kokmamso ro. Ero wa maxe awotî pîn komo yapeche.

26 Anarî komo tîhtarî po tîtosom komo nasî tîhroxoxoi rma. Tîhtacarai tko exihra nasî yîhroxoxon. Anarî kom hara amcikara nasî twethîrî yaino. Noro yipu komo yokoputho nasî kicicme. Kicicme awin̂e komo me nasî kica apeyataw.

27 On wara marha nas anarî komo 4 ke tîhtakem komo, tîhroxoxon pohra tîtosom kom ha. Kicicme marha nasî. Noro yipu komo yokoputho yapeche awya so kicicme maxe kokmamso ro.

28 Noro yipu komo yokoputho na maar̂atu anarimaw. Ero warai yarîche awya so aponon komo tak korokacoko. Kicicme rma tko maxe kokmamso ro. Ero wa awin̂e komo me nasî kica noro yipu yaatopo.

29-31 On warai komo marha naxe kicicme awin̂e komo me, roowo pore xa tîtosom komo, waaxi, cawa, atkara, xukurwa, xokoko, pooto, kwana. Noro yipu komo nasî kicicme awin̂e komo me. Ero ke okoputhîrî komo yapeche awya so kicicme maxe kokmamso ro.

32 On wara na nai noro yipu komo twaihyataw, n̂epîrke na ahce na pona. Ero wa epîrkache, pona epîrkachonhîrî nasî kicicme. Ero wa nas ahnoro mak. Weewe nasî kicicme, poono marha, paaka picho marha, kooso picho marha, ahnoro noro yipu picho, kumixi marha. Ero yipu pona epîrkache kicicme ehxapu ciicoko tuuna kwaka. Kicicme rma tko nasî ero yipu kokmamso ro. Kokmamche kir̂wan̂he tak nas hara.

33 Noro yipu yokoputho na n̂epîrke anarimaw tahrem pona er̂mo kahxapu pona. Ero warai pona epîrkache tahrem yawno tak nasî kicicme. Tahrem marha nasî kicicme. Ero ke ahkacoko kr̂a.

34 Anarimaw ero yipu yawno tuuna tak marketu anahrî komo cheka, kicicme ehxapu yawno ha. Ero wa arketaw kicicme marha nas anahrî kom hara. Wooku marha nasî kicicme ero yipu yawno, yikicicirexapu yawno ha. Noro yipu komo naxe kicicme awin̂e komo.

35 Ahce na pona n̂epîrke noro yipu komo yokoputho. Ero pona epîrkache kicicme tak nasî kica. Puruma yuputopo pona na n̂epîrke, tahrem pona ha na, ero yipu pona epîrkache tahkapore kr̂a nasî. Kicicme tak nasî kica.

36 Ero warahra reha nasî tuuna pîtho, mawyukutho marha mer̂pono pîn, een yawno ha. Kir̂wan̂he rma nasî tuuna ero yipu kwaka epîrkache kicicitho. Kicicitho yokoputho yapeche tko ahce na, kicicme tak nasî.

37 Anarimaw na noro yipu yokoputho n̂epîrke naatî yatho pona, ciisom pona ha. Kir̂wan̂he rma nasî yathîrî ero wa exiche.

38 Anarimaw na matanîhxapu pona reha n̂epîrke naatî yatho pona ha. Ero yipu pona epîrkache kicicme tak nasî naatî yatho okwe, kekn̂e. Ero wa kekn̂e Kporin komo Moises komo ya.

39 On wara marha kekn̂e Kporin komo yîwya so, Anarimaw na waihya tanme ro mak awotî komo me cehsom hara. Noro yipu yokoputho yapeche marha awya so kicicme maxe kokmamso ro.

40 Noro yipu yokoputho na mon̂etu anarimaw so. Ero wa awexiche so aponon komo korokacoko. Korokache kicicme rma maxe kokmamso ro. Ero wa xa marha nasî noro yipu komo yokoputho yaan̂enho. Aan̂enhîrî tak tponon korokape. Korokan̂enhîrî kicicme rma nasî kokmamso ro. Ero wa maxe tanme ro waixapu pokononho.

41 Taa, kicicme marha nasî sehrere me tîtosom komo ahnoro. Awotî komo mera n̂expe.

42 Ahnoro noro yipu komo, sehrere me tîtosom komo, tîhtarî po tîtosom kom hara, 4 po tîtosom komo, mer̂pono pîn po tîtosom komo marha, ahnoro mak noro yipu komo nasî kicicme ro mak. Awotî komo mera n̂expe.

43 Noro yipu komo ke kicicme ecirira ehcoko. Pokohra ro mak ehcoko kica.

44 Aporin komo Ow ha, ponaro xa awehtopo kom ha. Ero ke kir̂wan̂he mak ehcoko kir̂wan̂he ro mak oyexirî ke. Ekicicmara ro mak ehcoko sehrere me tîtosom komo poko.

45 Aporin komo xa Ow ha. Exitu poi kekyatken̂e so ponaro xa awehtopo komo me oyehtome. Ero ke kir̂wanî ro me ehcoko, kir̂wanî ro me oyexirî ke.

46 Ero wa nasî apanatanmetopo komo mîk hak poko, comota pono komo poko, tarin̂em komo poko marha, yukwari tîtosom komo poko marha, sehrere me tîtosom komo poko marha.

47 Anarme yîhtînocoko kicicitho komo, kir̂wan komo warahra. Anarme marha yîhtînocoko awotî komo mera cehsom komo, awotî komo me cehsom komo warahra. Ero wa xa yîhtînocoko, kekn̂e. Ero wa kekn̂e Kporin komo Moises komo ya.