Taa, ero yinhîrî on wara takî tî xatken̂e Araw mumuru komo, Natabe, Abiu kom ha, kotoporem yakn̂irî poko tî xatken̂e. Kotoporem yen tî narîhcetken̂e wehto roron ke, kotoporem marha tî merurketken̂e yîroron pona Kporin komo ya tîmsom me akn̂itome. Anatono ke tko kotoporem yen narîhcetken̂e wehto roron ke, Takn̂isom yapon pono ke xa kotoporem akn̂icoko, kacho pîn ke nakn̂iyatken̂e kica.

2 Ero yanme tak wehto n̂epatakekn̂e oco Kporin komo yamtakponî ro yai. N̂examro pen tak nakn̂iyakn̂e oco twaihkaxi ro. Ero wa Kporin komo rma waihkekn̂e n̂examro pen okwe.

3 Ero yinhîrî tak on wara kekn̂e Moises Araw ya, On yipu poko rma wa kekn̂e Kporin komo pahxa, Kir̂wanî ro me oyenîn̂e me xa n̂ehcowpe ohyaka cewomsom kom ha. Kir̂wanî ro me oyehtopo marha cenpopore nasî Ixaw Yana komo ya ahnoro, kekn̂e. Ero wa kekn̂e Kporin komo kîwya so, kekn̂e Moises Araw ya. Ero yentache nîtîtmamyakn̂e mak Araw.

4 Ero yinhîrî Misaew komo tak nan̂ikyakn̂e Moises, Ewsapan kom ha. Araw tamru mumuru komo mîkyam xatken̂e, Usiew mumuru kom ha. On wara kekn̂e Moises yîwya so, Amohcoko xiya, awakno komo yokoputho aacoko miya eeta yai mooxe. Kporin komo yamtakpon mîtwo xa naxe. Ero ke aacoko, kekn̂e.

5 Ero ke iina tak n̂ewomyatken̂e. Okoputhîrî komo tak naar̂atken̂e eeta yai mooxe. Pononthîrî komo yaw so rma naar̂atken̂e. Ero wa naar̂atken̂e Moises mtapotarî yaw roro rma.

6 Ero yinhîrî on wara kekn̂e Moises Araw komo ya. Yumumuru komo ya marha kekn̂e Ereasa ya, Itama komo ya ha, Ahtîpîrî komo womhokara ehcoko yîpînîn yaw awexitaw so. Aponon komo marha ahxaikara ehcoko. Ero wara ehcoko waipîra awehtome so, ahnoro kpoyino komo poko yîrwomra ehtome Kporin komo. Ayanan komo makî reha nîwratacowpe Ixaw Yana komo ahnoro. Kporin komo nakn̂iputho pen komo pînîn yaw nîwratacowpe, kekn̂e.

7 On wara marha kekn̂e yîwya so, Tan mak ehcoko Kaan yakro Kesentacho potaw. Tohra ro mak ehcoko. Kporin komo nîhkapetho amyamro. Ero ke anana awcetaw so mîwaiyaxe okwe, kekn̂e Moises yîwya so. Ero ke Moises mtapotarî yaw roro rma xatken̂e.

8-9 Ero yinhîrî on wara kekn̂e Kporin komo Araw ya, On wara exihra ro mak men ehcoko amyamro, amumuru kom ha, On yaka amokyataw so Kesentacho yaka uupa yukun yerîhra ehcoko, kawaxiyem marha erîhra ehcoko. Ero yipu yeen̂enho amokuche so mîwayaxe men okwe. Ero wa kpanatanmekyaxe so. Awepamthîrî komo panatanmetopo me marha nasî ero wa kacho, mîya rorono komo panatametopo me rma.

10 Ero yipu erîhra ro mak ehcoko takîhso cesehtînosom me awehtome so awemyawno komo poko, Kaan yanmen on ha, Kaan yanmen pîn mîn hara, kan̂e me awehtome so. Kir̂wan on ha, kicicitho mîn hara, kan̂e me awehtome so marha ero wa ehcoko. Ero wa kan̂e me awehtome so wenîmra ro mak ehcoko.

11 Ixaw Yana komo panatanmekn̂e me awehtome so marha ero wa ehcoko, On wara ehcoko, kekn̂e Kporin komo Moises ya, kan̂e me ha. Ero ke ero wara awehtome so kawaxiyem erîhra ro mak ehcoko, kekn̂e. Ero wa kekn̂e Kporin komo Araw ya.

12 Ero yinhîrî on wara kekn̂e hara Moises Araw komo ya, Eriasa komo ya, Itama komo ya. N̂examro rma xatken̂e Araw mumuru komo waipîn komo rma. On wara kekn̂e yîwya so, Puruma tohcoko rma amyamro Kporin komo ya tîmxapu yakwenho. Poyinonhîrî makn̂icow ero yakwenho tohcoko. Wahrututpamnon me mak aicoko tohtome tak awya so. Tanî rma tohcoko tîmsom yakn̂itopo mîtwo rma. Ero wa tohcoko Kporin komo ya tîmxapu me exirî ke.

13 Tan mak tohcoko Kporin komo roron po yîwya tîmxapu me exirî ke, takn̂isom raconho me exirî ke ha. Awru mîn ha, amumuru komo yuru marha. Ero wa wîîkes awya so Kporin komo yanme.

14 Paaka yewantho marha tonocoko, petîthîrî marha, kahsî anîmxapunhîrî ha. Ero yipu tonocoko amoro, amumuru komo marha, awemsîrî komo marha. Aiwaxapu po mak tonocoko. Ixaw Yana komo nîmîtho mîn Kporin komo ya, Aaxe xa nas amna, kacho ha. Ero yipu nasî awotî komo me.

15 Ero yipu nîmcowpe awakrono komo awya so. Bui petîtho nîmcowpe kahsî anîmxapu, ewanthîrî marha kahsî anîmxapu. Katîthîrî marha nîmcowpe awya so takn̂isom yakwenho. Ero yipu kahsî anîmcoko xa hara powpow me Kporin komo ya tîmtopo me. Ero yinhîrî ero rma ahsîcoko awotî komo me, amxîkrî komo yotî me marha. Aporin komo mtapotacho yanme rma ahsîcoko, kekn̂e. Ero wa kekn̂e Moises Araw komo ya.

16 Ero yinhîrî tak Moises nîmtapowakn̂e Ereasa komo yakro, Itama komo yakro. Araw mumuru komo mîkyam xatken̂e, waipîn kom ha. On wara kekn̂e yîwya so, Kabra pun monocow ha kicicme exino ritopo yahrutopo ha? kekn̂e yîwya so. Pîra, ketken̂e yîwya, tonohra rma amna n̂eexi. Amna mak nakn̂itîka, ketken̂e yîwya. Ero yentache tak nîrwonakn̂e Moises poko so.

17 Ahce kacho tonohra mehcow hara okwe, kekn̂e yîwya so. Kporin komo roron po tonohra mehcow okwe? kekn̂e tî. Kporin komo nîmîtho mîn awya so kicicme Ixaw Yana komo yehtopo yahrutopo me yîwya.

18 Kamxukuthîrî yarîhra marha mehcow okwe Kporin komo yamtakpon yaka. Yupunthîrî marha tonopore n̂eexi Kporin komo roron po. Ero wara rma wîîkai awya so, kekn̂e tî Moises.

19 On wara tko kekn̂e Araw hara yîwya, Kicicme exino ritopo yahrutopo rma re nîmcow omumuru komo Kporin komo ya. Takn̂itîkaxmu marha re nîmcow. Ahwora ro mak weexi oroto okwe omumuru pen komo pînîn yaw. Tawake ma re nai Kporin komo opoko ero yipu ton̂etaw owya oroto? kekn̂e tî.

20 Ero yentache Moises ya, Ai ha, yaaro mîîkesî, kekn̂e mak. Ero wa kekn̂e.