Taa, iito rma xatken̂e Araw komo, tumumuru komo yakro rma. 7 kaamo xatken̂e iito. Ero yinhîrî 8-nhîrî po tak n̂examro nan̂ikyakn̂e xa hara Moises, Ixaw Yana poritomon komo marha nan̂ikyakn̂e.

2 Mokuche so on wara kekn̂e Moises Araw ya, bui ehcoko kar̂pamxan, kahn̂eru marha. Tupunporem mak ehcoko. Bui reha nasî kicicme awehtopo yahrutopo me tîmsom me. Kahn̂eru reha nasî takn̂itîkaxmu me. Kporin komo ya tîmsom me akn̂icoko ha, kekn̂e. Ero wa kekn̂e Moises yîwya.

3 On wara marha kekn̂e Moises Araw ya, On wara kasko Ixaw Yana komo ya, Oyakno komo, kabra xîkrî ehcoko, paaka xîkrî marha ehcoko, oper̂a xîkrî marha. Tupunporem mak ehcoko, cewn̂e cimn̂ipu ehxapu mak ha. Kabra xîkrî reha akn̂icoko kicicme kehtopo komo yahrutopo me. Paaka xîkrî tîmcoko takn̂itîkaxmu me tak, kahn̂eru xîkrî yakro rma tîmcoko.

4 Bui marha ehcoko etîtîkaxapu tak. Kahn̂eru marha ehcoko etîtîkaxapu. Puruma marha ehcoko katî yakro ceskem. Ero yipu tak amna nakn̂iyasî Kaan ya tîmsom me, Aaxe xa wasî Apa, kachome ha. Kporin komo xa n̂esenpes awya so oroto. Ero ke ero yipu ehcoko yîwya tîmsom me, kasko yîwya so, kekn̂e. Ero wa kekn̂e Moises Araw ya.

5 Ero ke ero yipu n̂ekyatken̂e Ixaw Yana komo Moises mtapotarî yaw roro rma. Kporin komo yakro Kesentacho potaka n̂ekyatken̂e. Mohtîketken̂e tak Ixaw Yana komo ahnoro iina. Iito tak n̂ecececetken̂e Kporin komo yeepatai.

6 Ero yinhîrî tak on wara kekn̂e Moises yîwya so, On wara men ehcoko oweyuru yenpotome tak awya so oroto, kekn̂e Kporin komo owya.

7 Ero yinhîrî tak on wara kekn̂e Moises Araw ya hara, Amok ha xiya tîmsom yakn̂itopo yaka. Iina tak Kporin komo ya anîmrî akn̂iko. Kicicme awehtopo yahrutopo me tîmsom akn̂iko, takn̂itîkaxmu marha akn̂iko. Ero wa kicicme awehtopo ahruko, kicicme Ixaw Yana komo yehtopo marha ahruko. Kporin komo kekn̂e kîwya so ero yaw roro rma ahruko.

8 Ero ke tîmsom yakn̂itopo yaka tak cekn̂e Araw. Paaka xîkrî waihkekn̂e kicicme cehtopo yahrutopo me tîmsom.

9 Kamxukuthîrî tak nîmyatken̂e yumumuru komo yîwya. Tamorî tak nukpekn̂e Araw ero kwaka. Teme, kekn̂e tîmsom yakn̂itopo meretîrî pona. Kamxuku yakwenho tak nukmamyakn̂e tîmsom yakn̂itopo mîtkoso.

10 Ero yinhîrî tak paaka xîkrî katîtho nakn̂iyakn̂e Araw, par̂kakanthîrî marha nakn̂iyakn̂e, erethîrî pokono marha katîthîrî. Ero tak nakn̂iyakn̂e tîmsom yakn̂itopo pona kicicme cehtopo yahrutopo me rma. Kporin komo kekn̂e Moises ya ero yaw roro rma n̂iir̂akn̂e.

11 Ero yinhîrî yîhcîpîthîrî tak naar̂akn̂e cetarî komo mkai yupunthîrî yakro rma. Iina tak nakn̂iyakn̂e.

12 Ero yinhîrî tak takn̂itîkaxmu waihkekn̂e hara Araw. Kamxukuthîrî nîmyatken̂e yumumuru komo yîwya. Ero ke rma tak tîmsom yakn̂itopo caramekn̂e mehxarpa.

13 Ero yinhîrî yupunthîrî tak nîmyatken̂e hara yîwya akpotuxapu. Yîhtîpîthîrî marha nîmyatken̂e. Ero tak nakn̂iyakn̂e Araw tîmsom yakn̂itopo pona.

14 Wethîrî tak korokekn̂e Araw yîhreputhirî yakro rma. Korokache tak iina xa marha nakn̂iyakn̂e hara tîmsom yakn̂itopo pona.

15 Ero yinhîrî tak Ixaw Yana komo yehtopo yahrutopo me tîmsom nahsîyakn̂e hara, kabra xîkrî tak. Noro tak waihkekn̂e. Nakn̂iyakn̂e marha, anarînhîrî nakn̂iyakn̂e, ero wa xa marha nakn̂iyakn̂e. Ero wa nakn̂iyakn̂e kicicme Ixaw Yana komo yehtopo yahrutopo me tîmsom.

16 Ero yinhîrî tak takn̂itîkaxmu n̂ahsîyakn̂e hara. Nakn̂iyakn̂e tak Kporin komo ya tîmsom me. Ero wa akn̂icoko, kacho yaw roro rma nakn̂iyakn̂e.

17 Puruma marha nahsîyakn̂e Kporin komo ya tîmsom. Ero poyinonho namekyakn̂e tamorî ke mak. Ero yipu tak nakn̂iyakn̂e tîmsom yakn̂itopo pona. Pahxaxaro takn̂itîkaxmu me roro cehsom marha nakn̂iyakn̂e ero yakro rma. Ero wa nakn̂iyakn̂e Araw.

18 Ero yinhîrî bui tak waihkekn̂e hara Araw. Kahn̂eru marha waihkekn̂e, Ixaw Yana komo nîmîtho, Aaxe xa nas amna, kacho me tîmxapu. Ero yinhîrî kamxukuthîrî nîmyatken̂e yumumuru komo yîwya. Ero ke tak tîmsom yakn̂itopo caramekn̂e mehxarpa,

19 Bui katîtho tak nowyatken̂e, kahn̂eru katîtho marha, wexkiririnthîrî yahrutopo, ehyatî porerono ha, par̂kakanthîrî marha asakno roro rma, erethîrî pokono marha katîthîrî ha. Ero wa nowyatken̂e.

20 Towuche tak ewanthîrî pona ka n̂iir̂atken̂e yohno mak. Ero yinhîrî nakn̂iyatken̂e tak tîmsom yakn̂itopo pona.

21 Ero yinhîrî tak ewanthîrî nanîmyakn̂e kahsî Araw, petîthîrî marha nanîmyakn̂e kaari n̂ixan, powpow me nanîmyakn̂e. Kporin komo ya tîmtopo rma mîn xakn̂e ero wa anîmtopo. Moises mtapotacho yaw roro rma nanîmyakn̂e.

22 Ero wa Araw n̂iir̂akn̂e Kporin komo ya tîmsom, Kicicme ehtopo komo yahrutopo me tîmsom nakn̂iyakn̂e. Takn̂itîkaxmu marha nakn̂iyakn̂e, Aaxe xa nas amna, kacho me tîmsom marha nakn̂iyakn̂e. Ero yipu yakn̂ipuche napockanwakn̂e tak. Tapockantaxi tak nîmtapowakn̂e Kaan yakro. On wara kekn̂e, Apa kah yawno, n̂examro cma re makronomesî ayanan kom ha, kekn̂e. Ero wa kache tîmsom yakn̂itopo poi tak nîhcekn̂e.

23 Ero yinhîrî Moises komo tak n̂ewomyatken̂e Kesentacho yaka Araw yakro. Amn̂e n̂epataketken̂e hara. Cepatakache so nîmtapowatken̂e xa hara Kporin komo yakro. N̂examro cma re makronomesî, ketken̂e. Ero wa kache yîwya so Kporin komo weyuru tak n̂esenpekn̂e oco Ixaw Yana komo ya.

24 Ero yimaw marha wehto n̂epatakekn̂e oco Kporin komo nahsîmexpotho rma. Tîmsom yakn̂itopo pono nakn̂iyakn̂e oco, bui pun. Takn̂itîkaxmu nakn̂iyakn̂e, katîthîrî marha. Wehto yeen̂ataw tak n̂emtaraketken̂e Ixaw Yana komo ahnoro, n̂esewnapetken̂e marha. Ero wa xatken̂e.