1-3 Taa, ero yinhîrî on wara kekn̂e hara Kporin komo Moises ya, Taa, Araw komo eeko oona oyakro awesentacho komo yaka, yumumuru komo yakro rma eeko. Tmokyataw so on warai komo n̂ehcowpe, tponon komo n̂ehcowpe, katî marha n̂ehcowpe tîhkapetopo komo, bui marha n̂ehcowpe kicicme ehtopo komo yahrutopo me tîmsom, kahn̂eru marha asakî. Puruma marha n̂ehcowpe kahxapu yaw wahrututpamnî mak ha. Ero warai men n̂ehcowpe tmokyataw so. Ixaw Yana komo marha an̂ihcoko ahnoro. Iina xa marha mohcowpe Kesentacho komo potaka, kekn̂e Kporin komo.

4 Ero ke ero wa enmekno n̂iir̂akn̂e Moises Kporin komo mtapotacho yaw roro rma. Kesentacho komo potaka n̂enmekyakn̂e.

5 Ero yinhîrî tak on wara kekn̂e Moises yîwya so, Oyakno komo, on wara wîîkes awya so, Araw komo cirko tîmsom pokono me, nîîka Kporin komo owya. Ero ke yîmtapotachonhîrî yaw roro rma n̂examro wiir̂asî oroto, kekn̂e.

6 Ero yinhîrî Kesentacho potaka tak Araw komo naar̂akn̂e Moises, Kaan mîn potaka n̂aar̂akn̂e. Iito tak nîhyakn̂e tuuna ke.

7 Tîpîche tak poono namrupekn̂e Araw ya, ahnorono, kawno pînî n̂hema. Ero yinhîrî tak naan̂apotuncekn̂e hara. Ero yinhîrî kawno xa tak namrupekn̂e hara poono yîwya. Ero mkari xa hara namrupekn̂e eepoci hara. Naan̂apotuncekn̂e xa hara anarî ke xa hara. Kir̂wan mîn xakn̂e aan̂apotun, cenporem xa okre. Ero wa Araw pononmekn̂e.

8 Ero yinhîrî tak ewantawno tak namrupekn̂e yîwya. Urin n̂iir̂akn̂e ero pona, Tumin marha.

9 Yîxapikan marha namrupekn̂e yîwya. Ero poko tak n̂imiyakn̂e ooru, tpapakyem ha. Kaan yanmen xa moso, kacho mewrexapu mîn n̂imiyakn̂e. Ero wa Araw n̂iir̂akn̂e Moises Kporin komo mtapotacho yaw roro rma.

10 Ero yinhîrî tak katî nanîmyakn̂e hara yîhkapetopo komo. Kporin komo mîn kapekn̂e iike. Ero yawno komo marha kapekn̂e. Kaan yîwyan xa tan ha, kachome ero wa kapekn̂e.

11 Tîmsom yakn̂itopo marha caramekn̂e iike 7 ro. Ero wa tîmsom yakn̂itopo kapekn̂e, pokono komo marha kapekn̂e. Araw komo yesemokacho yen marha kapekn̂e, ecepu yakro rma. Kaan yanme mak on poko naxe tîmsom pokono komo, kacho me kapekn̂e.

12 Ero yinhîrî Araw makîrha tak nîhkapekn̂e. Xoo kekn̂e, yîhtîpîrî pore nukmamyakn̂e. Kaanî yaka cewomsom me ciitopo rma mîn xakn̂e yîhkapetopo.

13 Ero yinhîrî yumumuru komo makîrha nan̂ikyakn̂e hara Moises. N̂examro ponon marha namrupekn̂e yîwya so kawno pînî n̂hema. Aan̂apotun komo marha namrupekn̂e yîwya so ponon komo yahsîtopo. Yîxapikan komo marha namrupekn̂e yîwya so. Ero wa n̂examro n̂iir̂akn̂e Moises Kporin komo mtapotacho yaw roro rma.

14 Ero yinhîrî bui tak n̂ekyakn̂e Moises. Kicicme ehtopo komo yahrutopo me twaihkaxmu mîk n̂ekyakn̂e. Ekîche tak yîhtîpîrî poko nahsîyatken̂e Araw komo, yumumuru komo yakro.

15 Ero yinhîrî tak bui waihkekn̂e Moises. Kamxukuthîrî tak n̂iir̂akn̂e tîmsom yakn̂itopo pona, meretîrî pona mak. Tamoyaran ke rma n̂iir̂akn̂e. Ero wa tîmsom yakn̂itopo nakir̂wamekn̂e. Ero yinhîrî kamxuku yakwenho tak nukmamyakn̂e tîmsom yakn̂itopo mîtkoso. Ero wa tîmsom yakn̂itopo n̂iir̂akn̂e Moises Kporin komo ya tîmsom yakn̂itopo ro me tak ehtome ha, kicicme ero yehtopo yahrutome marha.

16 Ero yinhîrî bui katîtho nowyakn̂e Moises wexkiririnthîrî pokono ha, erethîrî pokono marha. Par̂kakanthîrî marha nowyakn̂e, katîthîrî yakro rma. Ero yipu tak nakn̂iyakn̂e tîmsom yakn̂itopo pona.

17 Bui pun xa tak naar̂akn̂e mooxe etarî komo yai akn̂itome. Yîhcîpîthîrî marha naar̂akn̂e iina, wethîrî marha. Iina tak nakn̂iyakn̂e. Ero wa bui pun n̂iir̂akn̂e Moises Kporin komo mtapotacho yaw roro rma.

18 Ero yinhîrî kahn̂eru tak n̂ekyakn̂e hara Moises takn̂itîkaxmu. Noro yekîche yîhtîpîrî poko tak nahsîyatken̂e hara Araw komo, tumumuru komo yakro rma.

19 Ero yinhîrî tak kahn̂eru waihkekn̂e Moises. Kamxukuthîrî ke tak tîmsom yakn̂itopo caramekn̂e mehxarpa.

20 Ero yinhîrî tak kahn̂eru nakpocakn̂e. Yupunthîrî nakn̂iyakn̂e ahnoro, yîhtîpîrî meero, katîthîrî meero marha.

21 Ero yinhîrî tak yîropotawnonhîrî korokekn̂e tuuna ke, yîhreputhîrî marha. Korokache tak nakn̂iyakn̂e yupunthîrî ahnoro. Tîmsom yakn̂itopo pona nakn̂iyakn̂e Kporin komo ya tîmsom me. Ero wa n̂akn̂iyakn̂e kotoporem me ehtome yîsîn okre Kporin komo ya. Ero wa kahn̂eru n̂iir̂akn̂e Moises Kporin komo mtapotacho yaw roro rma.

22 Ero yinhîrî anarînhîrî tak n̂ekyakn̂e hara kahn̂eru, Kaan ya tîmsom pokono me ciitopo kom ha. Ekîche yîhtîpîrî poko tak nahsîyatken̂e Araw komo, tumumuru komo yakro.

23 Ero yinhîrî kahn̂eru pen tak waihkekn̂e Moises. Kamxukuthîrî ke tak teme kekn̂e Araw panarî poturu poko, kaar̂i n̂ixan poko, amorî poko marha, yîmhetho poko makî, kaari n̂ixan poko. Yîhtarî mhetho poko marha n̂iir̂akn̂e, kaari n̂ixan poko. Ero wa kamxuku n̂iir̂akn̂e Araw pun poko.

24 Ero yinhîrî Araw mumuru komo tak n̂ekyakn̂e hara Moises. N̂examro panarî poturu poko marha teme kekn̂e kamxuku ke, kaari n̂ixan poko. Amorî mhetho komo poko marha kekn̂e, kaari n̂ixan poko. Yîhtarî mhetho poko marha n̂iir̂akn̂e, kaari n̂ixan poko. Ero wa ciriche tîmsom yakn̂itopo tak caramekn̂e xa hara kamxuku ke, tapomritîkaxi ro.

25 Ero yinhîrî kahn̂eru katîtho tak nowyakn̂e Moises, ehyatîthîrî pokono ha, wexkiririnthîrî pokono marha nowyakn̂e, erethîrî pokono marha. Par̂kakanthîrî marha nowyakn̂e asakno roro rma, ero pono katîtho marha. Ero wa katîthîrî nowyakn̂e ahnoro Moises. Petîthîrî marha nowyakn̂e kaari n̂ixan.

26 Puruma marha xakn̂e iito wahrututpamnî. Kahxapu yaw xakn̂e aapo po, Kporin komo yawno po ha. Ero poyino tak nanîmyakn̂e. Anarî nanîmyakn̂e yahcono me aixapu, Anarî, katî ke tawarexapu ciki, anarî, panahno cik hara. Ero warai nanîmyakn̂e. Ero komo tak n̂iir̂akn̂e kahn̂eru katîtho pona, petîthîrî pona marha.

27 Ero yinhîrî tak Araw yamorî yaka tak n̂iir̂akn̂e hara, yumumuru komo yamorî yaka marha. N̂examro tak nanîmyatken̂e powpow me. Kporin komo ya tîmtopo rma mîn xakn̂e anîmtopo ha.

28 Ero yinhîrî tak nahsîyakn̂e xa hara Moises emyai so. Tîmsom yakn̂itopo pona tak nakn̂iyakn̂e. Ero pono pona rma n̂iir̂akn̂e takn̂itîkaxmu pona. Ero wa nakn̂iyakn̂e Araw komo ciitome Kporin komo ya tîmsom pokono me. Ero wa akn̂iyataw kotopore xakn̂e yîsin okre Kporin komo ya. Yîwya tîmtopo rma mîn xakn̂e akn̂itopo.

29 Kahn̂eru yewantho reha xakn̂e Moises yotî me. Kaan nîmîtho mîn xakn̂e, tîmsom pokono me Araw komo ciitopo poinhonho ha. Ero yipu rma ka kahsî nanîmyakn̂e powpow me Kaan ya tîmtome. Ero yinhîrî tak totî me nahsîyakn̂e Kporin komo mtapotachonho yaw roro rma. Ero wa ewanthîrî n̂iir̂akn̂e Moises.

30 Ero yinhîrî tak katî ke Araw komo caramekn̂e. Kamxuku ke marha caramekn̂e akn̂itopo pono poyino ke. Tîmsom yakn̂itopo caramacho yakwenho rma mîn xakn̂e kamxuku. Araw yîhkapetopo yakwenho marha mîn xakn̂e katî. Ero yipu ke Araw caramekn̂e, ponon marha caramekn̂e, yumumuru komo marha, n̂examro ponon marha. Ero wa caramekn̂e Araw komo Kporin komo ya tîmsom pokono me ciitome. Kaan mîn yaw ehtopo komo me ciitome marha ponon komo. Ero wa n̂iir̂akn̂e Moises.

31 Ero yinhîrî on wara kekn̂e Moises Araw ya, yumumuru komo ya marha, Awotî komo tîyocoko Kesentacho komo potaw rma. Iina marha tonocoko. Awru komo marha tohcoko kahxapu yawno, tîmsom pokono me awitopo komo tan, kacho tohcoko ha. Ero wara rma wîîkai. Araw komo yotî xa tan ha, iyuru komo marha tan ha, wîîkai. Ero wa wîîkai apoko so. Ero ke tonocoko, tohcoko marha, kekn̂e.

32 Etîmtoxapu tak akn̂icoko awotîthîrî komo, awruthîrî komo marha.

33 Iito mak ehcoko Kesentacho potaw rma. Pahkî nasî Kporin komo ya tîmsom pokono me awitopo komo, 7 kaamo ha. Ero ke ero wicakî ehcoko iito.

34 Kiicow so tak Kaan ya tîmsom pokono me oroto. Kporin komo mtapotarî yanme xa kiicow so. Kicicme awehtoponhîrî komo yahrutome ero wa kiicow so.

35 Ero ke 7 kaamo xa tan enmacoko Kesentacho potaw rma. Kporin komo mtapotarî yaw roro xa cexpore nasî waipîra awehtome so. Ero wara rma kekn̂e Kporin komo owya, kekn̂e Moises yîwya so. Ero wa kekn̂e Moises.

36 Ero ke ero wa kacho yaw roro rma xatken̂e Araw komo, yumumuru kom ha. Kporin komo kekn̂e Moises ya ero wa kacho yaw roro rma xatken̂e ahce wa na kacho watohra ro mak. Ero wa xatken̂e.