On wara marha kekn̂e Kporin komo Moises ya, Kicicme weexi kica, kacho me tîmsom poko tak kîmtapowas hara. Owya tîmsom xa mîn ero.

2 Ero ke on wara n̂expe, Kicicme weexi kica, kan̂e, tokuthîrî tak n̂ekpe waihkachome. Takn̂itîkaxmu me tokuthîrî komo waihkexe iina xa marha waihkape hara. Ero yinhîrî waihkaxapu pen kamxukutho ke caramape tîmsom yakn̂itopo. Mehxarpa caramape tîmsom pokono.

3 Owya nîmpe katîthîrî ahnoro. Ehyatîthîrî porerono, wexkiririn yahrutoponhîrî marha, ahnoro nîmpe owya.

4 Par̂kakanthîrî marha nîmpe owya asakno rorono rma, katîthîrî marha, par̂kakan pokono maxirî yecen̂an ha. Erethîrî pokono marha towpore nasî par̂kakanthîrî yepoyino. Ahnoro katîthîrî towpore nasî.

5 Ero yipu nakn̂ipe tîmsom pokono akn̂itopo pona. Aporin komo ya tîmtopo rma mîn akn̂itopo, kicicme weexi kica, kacho me tîmsom ha.

6 Ero yipu yakn̂ipuche yupunthîrî tak nonocowpe tîmsom pokono, iyanan komo marha, kîrkomo mak. Ohroron po nonocowpe. Ero wa nonocowpe, Kicicme weexi kica, kacho me tîmxapu.

7 Ero wa nonocowpe kicicme weexi kica, kacho me tîmxapu. Kicicme Ixaw Yana komo yehtoponho yahrutopo me tîmxapu nonocowpe, wîîka, ero wa xa marha wîîkesî, Kicicme weexi kica, kacho me tîmxapu poko hara. Tîmsom pokono yotî me re nasî, katîthîrî yakn̂in̂e yotî me re.

8 On wara marha n̂expe tîmsom pokono, takn̂itîkaxmu yakn̂in̂enho, akn̂ixapu pichotho nahsîpe tîwyanî ro me.

9 Puruma marha nahsîpe tîmsom me ehxapu. Yupuxapu yakwenho nahsîya, katî kwaka tîyoxapu marha, aixapu na anarimaw. Ero yipu poyinonho yakn̂ipuche tîmsom pokono ya tuuru me tak nahsîpe akwenhîrî.

10 Ero yipu nahsîcowpe puruma, turpem ha na, katî yakro esmaxapu ha na anarimaw. Araw mumuru komo yuru me nasî. Etîme re xa nahsîcowpe, kekn̂e. Ero wa kekn̂e Kporin komo Moises ya.

11 On wara marha kekn̂e Kporin komo yîwya, Aaxe xa wasî, kacho me tîmsom poko tan kîmtapowas hara, Aporin komo ya tîmsom poko ha.

12 Ow makronomai ham okre, kacho me tîmn̂e exitaw on warai nîmpe, tokuthîrî pun yakro rma nîmpe puruma hara, aixapu, katî yakro esmaxapu ha. Wahrututpamnî mak nîmpe, panahno ciki, katî ke tawarexapu ha. Yahcono me so aixapu na nîmpe on wara ciixapu hara, aposokaxapu, katî yakro esmaxapu marha.

13 Ero yipu yakro rma wahrututpamnoxapu nîmpe yupuxapu ha. Ero yipu n̂împe, Ow makronomai ham okre, kacho me tîmsom yakro rma, Aaxe xa wasî, kacho me tîmsom yakro ha.

14 Ero yipu tak kahsî nanîmpe tîmsom pokono. Cewn̂e so makî ka nanîmpe Aporin komo ya tîmsom me. Akwenhîrî tak n̂expe tîmsom pokono yuru me, okno kamxukutho caraman̂enho yuru me ha. Ero wa n̂irpe puruma, Aaxe xa wasî, kacho me ha.

15 Taa, on wara wîîkesî tîmxapu pun poko hara, Aaxe xa wasî, kacho me tîmxapu poko ha, ero kaamo po rma nonotîkacowpe tîmsom pokono komo. Iito rma n̂enmape akwenhîrî, kahra ro mak n̂ehcowpe. Ero wa cirpore nasî, Aaxe xa wasî, kacho me tîmxapu.

16 On wara kacho me na nîmyatu tookuthîrî komo anarimaw, Ero wa xa men was amn̂e, kacho me na nîmyatu, yaaro xa tan wîîkesî, kacho me ha. Anarimaw xa na tookuthîrî nîmyatu owya tîmsom me, tîmî xe cexirî ke so mak. Ero warai me so exitaw yupunthîrî nonocowpe ero po rma waihkacho po rma. Etîmcetaw rma tko enmapuche nonocowpe hara yiixe cexitaw so.

17 Enmayataw xa hara tonohra tak n̂ehcowpe, nakn̂icowpe mak tak ha.

18 3-înhîrî po etîmtoxapu ton̂etaw yîwya so, Kir̂wan̂he masî, kahra wasî tonon̂enhîrî poko. Oyanme moono okre, kahra ro mak wasî ero po tonon̂enhîrî ya. Kicicitho amoro, kacho me nasî noro yipu. Akpîn me mas okwe, wîîkesî mak yîwya, kekn̂e. Ero wa kekn̂e Kporin komo Moises ya.

19 On wara marha kekn̂e Kporin komo Moises ya, Anarimaw kicicme ehxapu na napeya awotî komo. Ero yipu yapeche tonohra ro mak cexpore nasî. Takn̂ipore kr̂a mak nasî. Ero yipu yapehra exitaw reha tonopore nasî awanme ro so, kicicme ehxapu mera awexitaw so mak.

20 Anarimaw kicicme ehxapu me na nai tîmsom pokono. Noro yipu rma na non̂e owya tîmxapu wooto, Aaxe xa wasî, kacho ha. Ero wa ton̂etaw twaihkapore nasî tpoyino komo chewno pîn me tak ehtome.

21 Anarimaw kicicme ehxapu yapen̂enho na noon̂e, Aaxe xa wasî, kacho me tîmxapu. Tooto smuntho na napeya, comota pono na napeya kicicitho. Ahce na napeya kicicitho. Ero yipu yapen̂enho non̂etu rma na apoyino komo ero wa tîmxapu, Kaan ya tîmxapu ha. Ero wa tonon̂enhîrî twaihkapore nasî tpoyino komo chewno pîn me tak ehtome, kekn̂e. Ero wa kekn̂e Kporin komo Moises ya.

22-23 On wara marha kekn̂e Kporin komo Moises ya, On wara marha kesî Kporin komo, kasko Ixaw Yana komo ya, Awoh komo katîtho emehra ro mak men ehcoko, paaka katîtho, kahn̂eru katîtho, kabra katîtho, noro yipu katîtho emehra ro mak ehcoko.

24 Anarimaw awokuthîrî na waihya tanme ro mak. Anarimaw comota pono komo na n̂eske twaihkaxi ro. Noro yipu katîtho na miir̂atu ahce na kapetopo me yiixe awexitaw so. Emehra ro makî tko ehcoko.

25 Aporin komo ya tîmsom ro mak mîn okno katîtho. Takn̂ipore mak nasî yîwya tîmsom me. Ero yipu yemen̂e exitaw na twaihkapore men nasî tpoyino komo chewno pîn me tak ehtome.

26-27 Kamxuku ken̂arî marha tonohra ro mak ehcoko ahto so na awexitaw so. Tarin̂em komo, rooporeno, noro yipu komo tonohra ro mak ehcoko kamxuku ken̂e rma exitaw. Ero yipu yonon̂e rma exitaw na twaihkapore men nasî tpoyino komo chewno mera tak ehtome. Ero wa twaihkapore nasî, kekn̂e. Ero wa kekn̂e Kporin komo Moises ya.

28-29 On wara marha kekn̂e Kporin komo yîwya, On wara marha kesî Kporin komo awya so, kacoko Ixaw Yana komo ya, Aaxe xa wasî, kacho, tîmî xe awexitaw so Aporin komo ya, on wara cexpore nasî ero yipu tîmn̂e, noro rma takn̂isom n̂ekpe tîmsom pokono yaka.

30 Cemyaw rma n̂ekpe akn̂ipotome tak tîmsom pokono ya. Katîthîrî n̂ekpe, ewanthîrî yakro rma. Ewanthîrî tak nanîmpe kahsî powpow me. Owya tîmtopo xa mîn ero wa anîmtopo.

31 Noro yipu katîtho nakn̂ipe tîmsom pokono akn̂itopo pona. Ewanthîrî reha nahsîcowpe Araw komo, tumumuru komo yakro. Tootî komo me nahsîcowpe.

32-34 Ero wa tîmxapu petîtho nîmpe Kaan ya tîmsom pokono ya iyotî me, kaari n̂ixan ha. Araw mumuru ya nîmpe kamxukuthîrî caraman̂enho ya, katîthîrî yakn̂in̂enho ya ha. Ero warai nîmpe iyotî. Owî rma wahsîyasî anmîthîrî komo yewantho, kahsî anîmxapu ha, petîthîrî marha wahsîyasî. Ero wa wahsîyasî, Aaxe xa wasî, kacho me Ixaw Yana komo nîmîtho. Araw komo yotî me tîmtome wahsîyasî. Ero wara roro awotî me nasî n̂examro nîmîtho, awepamthîrî komo yotî meero nas amn̂e. Owî rma wahsîyasî yîwya so tîmsom me, kekn̂e. Ero wa kekn̂e Kporin komo Moises ya.

35-36 Ero wa kekn̂e Kporin komo Ixaw Yana komo ya Araw komo yotî tîmtopo poko, yumumuru komo yotî tîmtopo poko ha. Ixaw Yana komo nîmrî raconho nahsîcowpe, kekn̂e yîwya so. Ero wa kekn̂e Kporin komo ya tîmsom pokono me ciitopo po. Yîhkapetopo komo po rma kekn̂e Kporin komo Ixaw Yana komo ya. Ero ke ero warai men tîmcoko iyotî komo miya roro, awepamthîrî komo meero, kekn̂e Moises.

37 Ero wa xa nasî Ixaw Yana komo panatanmetopo Kporin komo ya tîmsom pokono, takn̂itîkaxmu pokono, puruma tîmtopo pokono marha, kicicme ehtopo komo yahrutopo pokono marha, Kicicme weexi kica, kacho me tîmsom pokono marha, Kaan ya tîmsom pokono komo ciitopo pokono marha, Aaxe xa wasî, kacho me tîmsom pokono marha.

38 Ero wara kekn̂e Kporin komo Moises ya Sinai Yîpîn po ka exitaw Moises. Ero warai ehcoko Aporin komo ya tîmsom, kesî Kporin komo, kasko Ixaw Yana komo ya, kekn̂e. Ero wa kekn̂e Moises ya yîn̂ekatîmrî hara.