1-2 Taa, on wara marha kasko Ixaw Yana komo ya, kekn̂e xa hara Kporin komo Moises ya, Anarimaw on wara na nai apoyino komo, kicicme na nai, omtapotacho yewetîra na nai kica. Tîmîtwono na n̂emîknoya. On wara na nîîke yîmîtwono, Miya ka kîwcesî. Ero ke oyemyawno cma re ka meen̂asî owtorî poko, nîîke ha na yîmîtwono yîwya. Taa, ohyaw ka n̂expe, nîîke yîwya. Mokuche hara cemaronwa tak na ero poko, Exihra tak nai okwe ohyaw, nîîke tohnaw mak. Anarimaw anarî komo yemyawno poko na n̂en̂epana. Anarimaw wahra mak na n̂epeme cepethîkem xa ahsîyataw.

3 Anarimaw tpoyino yemyawno na n̂een̂a etar̂maxapu. Ero poko na cemaronwa, Enîhra weexi okwe, nîîke. Anarimaw on wara nîîke, Yaaro tan wîîkes awya, Kaan n̂entarî me xa tan wîîkesî, nîîke tohnaw ro mak. Ero wara na nai, kicicme nai kica.

4 Ero wa ehxapu tak nasî kicicme okwe. Ero ke on wara cexpore nasî, En̂epanmexapunhîrî tîmpore nas hara osom ya, cemîknosom me ahsîxapu marha nasî tîmpore nas hara. Emyaka tîmxapu marha nasî tîramanpore hara. Yîn̂enîthîrî marha nasî tîmpore hara osom ya, Enîhra ro mak weexi okwe, kachonho ha.

5 Tohnaw yîmtapotachonhîrî cepemapore tak nasî, Kaan n̂entarî me xa tan wîîkesî, kachonho yîwya ha. Ecenarî epemache, kinta wicakî xa hara tîmpore nasî yîhremacho hara. Tookuthîrî waihketaw kicicme cehtoponhîrî yahrutopo me, ero kaamo po rma n̂epemape.

6 Ero yinhîrî tak kahn̂eru n̂ekpe tîmsom pokono yaka owya tîmsom. Tupunporem mak n̂ekpe, epethîrî pona tîmyataw ketaw ha re awya, on wicakî nai epethîrî, kacho mak n̂ekpe.

7 Noro yipu tak nîmpe tîmsom pokono kicicme ehxapu yehtoponho yahrutopo, on̂enîrî mera tak ehtome. Wîhcamnoyasî tak kicicme ehtoponhîrî, kekn̂e. Ero wa kekn̂e Kporin komo Moises ya.

8-9 On wara marha kekn̂e Kporin komo Moises ya, On wara Araw panatanmeko owya tîmsom poko, takn̂itîkaxmu poko ha. Yumumuru komo marha panatanmeko ero poko. Tîmsom n̂ecahtîkape cenmakaxi ro. Eseikara men ciicoko wehto akn̂itopo pono.

10 Enmapuche on wara tak n̂irpe tîmsom pokono, tponon tak namrupe riin̂u kahxapu. Amtarino marha namrupe riin̂u rma. Amruche akn̂ixapu wemronho tak namekpe. Ero tak pahpe tîmsom yakn̂itopo mîtkoso.

11 Ero yinhîrî tponon tak mohkape hara riin̂u ha. Anarî tak namrupe hara. Ero yipu yamruche wemronho tak narpe awetarî komo yai pahtome aiwaxapu pona.

12 Eseikara ro mak n̂iicowpe wehto, tîmsom yakn̂itopo pono. Tîmsom pokono komo kamehtocowpe enmar̂atîxera, pahxaxaro rma ka. Ero pona tak nakn̂icowpe okno pun. Katîthîrî marha nakn̂icowpe, Aaxe xa wasî, kacho me tîmxapu ha. Ero wara roro n̂iicowpe.

13 Miya roro eseikara n̂expe iitono wehto. Kamehtocowpe miya roro, kekn̂e. Ero wa kekn̂e Kporin komo Moises ya.

14 On wara tak kekn̂e puruma poko tîmsom me ehxapu poko. Ero yipu oyepatai nakn̂icowpe Araw mumuru komo tîmsom yakn̂itopo pona, omîn mîtwono pona ha.

15 Ero poyino ka namekpe tîmsom pokono tamorî yaw mak, katî ken̂arî, kotoporem ken̂arî ha. Owya tîmsom tan ahnoro, kacho cik mak namekpe. Tînamekîthîrî tak nakn̂ipe akn̂itopo pona. Ero wa akn̂iyataw kotoporem me nasî yîsîn okre Aporin komo ya.

16 Ero yakwenho tak nohcowpe Araw, yumumuru komo marha. Wahrututpamnî yakro rma nohcowpe. Oyamtakponî ro mîtwo rma tak nohcowpe Kesentacho roron po ha.

17 Ero warai mak men nohcowpe wahrututpamnon me aixapu mak ha. Iyuru komo me wîmyasî owya tîmxapu yakwenho, takn̂isom yakwenho ha. Owyanî ro rma mîn puruma Araw komo ya tîmxapu. Kicicme awehtoponhîrî komo yahrutopo me awoh komo pun mîmyaxe owya, ero yipu nasî owyanî ro me. Ero wa xa marha nasî mîn hara puruma, owyanî ro me hara.

18 Araw yepamtho komo yuru me nasî, kîrkomo yuru me mak ha tko. Miya rorono komo yuru me rma nasî epamthîrî komo yuru me. Ero yipu wîmyasî Araw yepamtho komo ya, owya tîmxapu, takn̂isom yakwenho ha. Ero wa kacho mewreko miya rorono komo panatanmecho rma, kekn̂e. Ero wa kekn̂e Kporin komo Moises ya.

19-20 On wara marha kekn̂e Kporin komo Moises ya, Araw mîhkape ero kaamo po rma tak owya tîmsom n̂ekpe noro rma, tumumuru komo yakro n̂ehcowpe. Puruma n̂ehcowpe aposokaxapu, 2 ritru wicakî mak. Ixaw Yana komo n̂ekyaxe enmar̂atîxera puruma ero wicakî xa marha n̂ehcowpe Araw komo. Yîraconhîrî mak n̂ehcowpe pahxaxaro ha ka. Kokon̂i tak n̂ehtîkacowpe.

21 Katî yakro ka n̂esmacowpe tahrem yaw, er̂po pona tak naicowpe. Wahra so poikaxapu tak nakn̂icowpe owya tîmsom me. Ero wa akn̂iyataw kotoporem me nasî yîsîn okre Aporin komo ya.

22 Ero ke ero wa nakn̂icowpe. Araw mumuru xa nakn̂ipe, Moso xa nas amn̂e Kporin komo yaka tîtosom me tîhkapesom, Apapa retawno me nasî, kacho nakn̂ipe. Nakn̂itîkape noro ahnoro. Ero wa kacho mewreko miya rorono komo panatanmetopo me rma.

23 Ero yipu tokuhra ro mak n̂ehcowpe. Tîmsom pokono komo nîmîtho puruma tokuhra ro mak n̂ehcowpe ha. Nakn̂itîkacowpe ahnoro rma, kekn̂e. Ero wa kekn̂e Kporin komo Moises ya.

24-25 On wara marha kekn̂e Kporin komo yîwya, Kîmtapowasî xa hara tan kicicme Ixaw Yana komo yehtopo yahrutopo poko, kasko Araw komo ya, yumumuru komo ya. Tokuthîrî komo waihkexe takn̂itîkaxmu me tîmsom, iina xa marha kicicme ehtopo komo yahrutopo me tîmsom waihkacowpe hara. Aporin komo ya tîmsom xa mîn ero.

26 Tîmn̂enhîrî rma tak nonope, tîmsom pokono ha. Oyekenî mîtwo nonope kesentacho roron po rma.

27 Tîmsom pokono me ciixapu komo mak naxe owya tîmsom pokono. Anarimaw tîmsom kamxukutho na n̂ecarame anarî komo ponon pona. Ero wa ecaramache ponon komo korokacoko omîn roron po.

28 Anarimaw ero yipu nîîyetu tahrem yaw, er̂mo kahxapu yaw ha. Ero yipu yaw tîyoche enhîrî tak ahkacoko. Kuripara yaw reha tîyetaw awya so korokacoko mak axawa ke. Ero yinhîrî korokacoko xa hara tuuna ke mak tak. Ero wa korokacoko.

29 Tîmsom pokono yanan komo mak nonocowpe owya tîmxapu, kîrkomo mak. Owya tîmxapu xa mîn. Ero ke noro yipu komo mak nonocowpe.

30 Anarimaw kicicme awehtoponhîrî komo yahrutopo me tîmsom na mekyatu. Ero yipu kamxukutho tak naar̂a tîmsom pokono, Kesentacho yaka, oyamtakpon yaka, mehxan pona. Ero warai me tîmxapu pun tonohra ro mak ehcoko, akn̂itîkacoko mak, kasko. Ero wa kasko Araw komo ya, kekn̂e Kporin komo Moises ya.