On wara marha kekn̂e Kporin komo Moises ya, On wara marha kesî Kporin komo, kasko Ixaw Yana komo ya, Anarimaw apoyino komo mtapotarî na mencetu. Yaaro xa tan wîîkesî, Kaan n̂entarî me rma wîîkesî, kacho na mencetu tohnawno poko rma kica. Ekatîmra rma tko na matu en̂ekano rin̂e komo ya. Ero wa awexitaw so kicicme awehtopo komo rma mîn ekatîmra awehtopo kom ha.

2 Anarimaw kicicitho yokoputho na mapeyatu. Comota pono yokoputho na mapeyatu, okno yokoputho na anarimaw, sehrere me tîtosom yokoputho na anarimaw, noro yipu komo yokoputho na mapeyatu kicicitho ha. Awen̂ekarî so mak na mapeyatu. Ero wa awexitaw so kicicme rma maxe okwe.

3 Anarimaw tooto smuntho mapeyatu, ahce warai na yupunu smuntho kicime kiitopo ha. Awen̂ekarî na mapeyatu. Ero yipu yîhtînopuche tak awya so kicicme tak maxe okwe.

4 Anarimaw on wara na mîîketu ahce wa na awehtopo poko, Ero wa men was amn̂e. Yaaro tan wîîkesî cemaro pîn me ro mak. Kaan n̂entarî me wa tan kîmtapowasî yaaro xa, mîîketu. Ahce wa na awehtopo komo poko mîmtapowatu, kicicme awehtopo komo poko ha na, kir̂wan̂he awehtopo komo poko na anarimaw. Akpîn me tko na ero wa mîmtapowatu. Ero yinhîrî anarî me tak na mesehtînoyat hara. Kuu, anato wîîkai kica, mîîketu. Ero wa awesehtînopuche so kicicme tak maxe owya okwe.

5-6 Ero yipu yanme kicicme awexitaw so, cesekatîmpore men nasî. Ero wa wehxe kica, kacoko. Ero yinhîrî kicicme awehtopo komo yahrutopo tak ehcoko Kaan mînî yaka. Oper̂a xîkrî na mekyatu woosî, kabra xîkrî na anarimaw woosî rma. Tîmsom pokono tak nîmyasî an̂ekîthîrî komo. Ero wa kicicme awehtoponhîrî komo tak n̂ahrupesî owya.

7 Iyokumra awexitaw so tko na potkuku warai mak na mekyatu asakî. Potwo warai na mekyatu anarimaw asakî marha. Anarînhîrî nasî kicicme awehtoponhîrî komo yahrutopo me. Anarînhîrî xa hara nasî takn̂itîkaxmu me, owya tîmsom me ha.

8 Noro yipu tak ehcoko tîmsom pokono yaka. Yihcirî me ka anarînhîrî nîmpe yîwya kicicme awehtoponhîrî komo yahrutopo me. Nîpîmkotope tak, yîrakatîkara mak n̂expe.

9 Noro pen kamxukutho ke tak tîmsom yakn̂itopo caramape, awxarî mak. Kamxukuthîrî yakwenho tak nukmampe roowo pona tîmsom yakn̂itopo mîtkoso ha. Ero wa ka n̂irpe kicicme awehtoponhîrî komo yahrutopo me.

10 Ero yinhîrî tak anarînhîrî nahsîpe hara. Noro marha waihkape, nakn̂itîkape marha omtapotacho yaw roro rma. Ero wa n̂irpe tîmsom pokono kicicme awehtopo komo yahrutome. Ero wa ciriche tak kicicme awehtoponhîrî komo tak wîhcamnoyasî.

11 Anarimaw potkuku warai exihra na nai ahyaw so, potwo warai marha na exihra. Ero wa awexitaw so puruma mak ehcoko aposokaxapu. Ero yipu cekpore nasî kicicme awehtopo komo yahrutopo me. 2 ritru wicakî ehcoko esmanî ro. Katî esmara, kotoporem marha esmara ehcoko yîcheka kicicme awehtopo komo yahrutopo me exirî ke.

12 Ero yipu tak ehcoko tîmsom pokono yaka. Ero poi tak namekpe noro tamorî yaw makî. Kaan ya tîmsom tan ahnoro, kacho cik mak namekpe. Tînamekîthîrî tak nakn̂ipe tîmsom yakn̂itopo pona. Owya tîmsom nakn̂iyaxe ero wara rma nakn̂ipe. Kicicme awehtopo komo yahrutopo rma mîn ero yipu.

13 Ero wa kicicme awehtoponhîrî komo nahrupesî tîmsom pokono. Wekatmo awya so ero wara awehtoponhîrî komo nahrupesî. Ero wa ahruche Aporin komo tak nîhcamnoyasî kicicme awehtoponhîrî komo. Puruma poyino yakn̂ipuche akwenhîrî tak nahsîpe tîmsom pokono tînahrî me. Owya tîmsomu rma nahsîyasî puruma, ero wa xa marha nahsîpe tînahrî me, kasko. Ero wa kesî Kporin komo, kasko Ixaw Yana komo ya, kekn̂e. Ero wa kekn̂e Kporin komo Moises ya.

14-15 On wara marha kekn̂e Kporin komo Moises ya, Anarimaw kicicme na matu omîn yawno poko. Apehnî ro mak onî komo, kacho na mapeyatu rma. Yikiciciretopo mîn kica apetopo awya so. Ero wa apetopo awya so kicicme nas Kaan ya. Ero ke kahn̂eru tak ehcoko omîn yaka, tupunporem xa. Puranta marha ehcoko ankuknomathîrî komo yecenarîno rma. Omîn yaw nasî sikru ero warai poko nukuknomape tîmsom pokono ero wicakî xa ehtome awya so. Ero warai ehcoko owya tîmsom me kicicme awehtoponhîrî komo yahrutopo me.

16 Ankicicirethîrî komo epemacoko omîn yawno ha, ecenarî xa epethîrî tîmcoko tîmsom pokono ya. Ero yînhîrî tak kinta wicakî xa hara epemacoko. Ero yinhîrî tak kahn̂eru waihkape kicicme awehtoponhîrî komo yahrutopo me. Ero wa ciriche tîmsom pokono ya wîhcamnoyasî tak kicicme awehtoponhîrî komo.

17 Anarîmaw omtapotarî yewetîra na matu ahce na pokono ewetîra. Awen̂ekarî so rma na ewetîra matu. Kicicme rma tko maxe ero wa ehxapu. Ero ke ero wa awehtoponhîrî komo tak nasî tahrupore.

18 Ero ke tak tîmsom pokono yaka ehcoko kahn̂eru, tupunporem xa. Yunkuknomathîrî yecenarîno marha ehcoko puranta ha. Ero yinhîrî tak kahn̂eru nakn̂ipe owya tîmsom me. Ero wa waihkarî ke awehtoponhîrî komo tak nahrupesî owya, twen̂ekarî awehtoponhîrî komo rma. Ero ke wîhcamnoyasî tak ero wa awehtoponhîrî komo.

19 Kicicme awehtoponhîrî komo yahrutopo me ero yipu ehcoko. Kporin komo mtapotarî yewetîra awexirî ke so kicicme maxe. Ero ke ahrutopo ehcoko, kasko yîwya so. Ero wa kasko Ixaw Yana komo ya, kekn̂e Kporin komo Moises ya. Ero wa kekn̂e.