1-2 Ero yinhîrî on wara tak kekn̂e Kporin komo Moises ya, On wara marha kesî Kporin komo awya so, kasko Ixaw Yana komo ya, anarimaw on wara na natu anarî komo, Aporin komo mtapotarî yewetîra na nat okwe, apanatanmetopo komo yewetîra. Twen̂ekarî so makî tko ero wara natu.

3 Anarimaw Kaan ya tîmsom pokono me yîhkapexapu rma na nai kicicme okwe. Ero yanme tpoyino komo kiciciren̂e me nas okwe. Ero wa cexitaw noro tak n̂ekpe kicicme cehtoponhîrî yahrutopo. Bui n̂ekpe kar̂pamxan warai, tupunporem. Kporin komo ya tîmsom me n̂ekpe ha.

4 Kesentacho potaka n̂ekpe Aporin komo yaka. Iina ekîche yîhtîpîrî poko tak nahsîpe. Ero yinhîrî tak waihkape iina rma Aporin komo roron pona rma.

5 Ero yinhîrî on wara tak n̂irpe tîmsom pokono ero warai me yîhkapexapu ha, bui pen kamxukutho poyino narpe Kesentacho yaka.

6 Ero kwaka tak tamorî nukpape, iike tak roowo caramachome Aporin komo mîn mîtwono ha. Noro yamtakponî ro yahrutopo mîtwono caramape 7 ro. Ero wa n̂irpe.

7 Ero yinhîrî kotoporem yakn̂itopo pona tak n̂irpe hara. Kesentacho yaw nasî Aporin komo yaw xa, ero pona n̂irpe, meretîrî pona xa. Ero yinhîrî tak bui kamxukutho yakwenho nukmampe roowo pona tîmsom yakn̂itopo mîtkoso, Kesentacho potawno mîtkoso ha. Ero wa n̂irpe paaka kamxukutho.

8 Ero yinhîrî bui pen katîtho tak nowpe wexkiririnthîrî yahrun̂e, wethîrî pokono marha. Ero yipu nowpe kicicme cehtoponhîrî yahrutopo me tîmsom.

9 Par̂kakanthîrî marha nowpe, katî yakro rma, ehyatîthîrî mîtwo nasî ero ha. Erethîrî pokono marha nowpe par̂kakan yepoyino.

10 Aaxe xa wasî, kacho tîmyataw nowyatu paaka katîtho ero wa xa marha bui pen katîtho nowpe hara tîmsom pokono ha. Katîthîrî nowpe, tîmsom yakn̂itopo pona nakn̂ipe. Ero wa bui katîtho nowpe.

11-12 Yîhcîpîthîrî tak narpe miya awetarî komo yai mooxe, yupunthîrî, yîhtîpîthîrî, yîhreputhîrî, wethîrî, wexkiririnthîrî, ahnoro yupunthîrî narpe miya wemronho pahtopo me aiwaxapu pona. Iina tak nakn̂ipe, wehto kamehtope akn̂itome. Wemronho yar̂macho pona rma nakn̂ipe, kasko yîwya so, kekn̂e. Ero wa kekn̂e Kporin komo Moises ya.

13 Ero yinhîrî tak on wara kekn̂e hara yîwya, On wara marha kesî Kporin komo, kasko yîwya so, Anarimaw kicicme na matu Ixaw Yana komo ahnoro. Cow wara rma Aporin komo ya apanatanmetopo komo yewetîra na matu. Awen̂ekarî so mak na kicicme matu. Ero wa awexitaw so kicicme rma maxe okwe.

14 Kicicme awehtoponhîrî komo yîhtînopuche tak awya so on wara ehcoko, bui ehcoko, kar̂pamxan ha. Kicicme awehtoponhîrî komo yahrutopo me ehcoko Kesentacho potaka.

15 Iina xa marha mohcowpe aporitomon kom hara. Bui tîpîrî poko nahsîcowpe n̂examro Kporin komo wero ro rma. Ahsîche tak waihkacowpe iina rma.

16 Ero yinhîrî tak kamxukuthîrî poyino narpe tîmsom pokono me kapexapu Kesentacho yaka.

17 Iito tak tamorî nukpape tîmsom pokono ero kwaka. Iike tak roowo caramape Aporin komo wero ro rma, Noro yamtakponî ro yahruru mîtwono caramape 7 ro.

18 Kotoporem yakn̂itopo pona marha n̂irpe hara, meretîrî pona so ha. Kesentacho yaw nai, Aporin komo yamtakponî ro mîtwo ero meretîrî pona n̂irpe. Ero yinhîrî akwenhîrî tak nukmampe roowo pona, tîmsom yakn̂itopo mîtkoso, Kesentacho potawno mîtkoso ha. Ero wa cirpore nai bui.

19-20 Katîthîrî marha nowpe ahnoro, nakn̂ipe tak tîmsom yakn̂itopo pona. Cewn̂e mak exitaw kicicme cehsom, noro yehtoponho yahrutopo n̂iir̂a tîmsom pokono ero wa xa marha n̂irpe hara mer̂pono pîn komo yehtoponho yahrutopo me cehsom hara. Ero wa n̂irpe tîmsom pokono kicicme awehtoponhîrî komo yahrutopo me. Ero wa bui pen ciriche kicicme awehtoponhîrî komo tak wîhcamnoyasî.

21 Ero wa ciriche bui pun tak narpe tîmsom pokono mooxe awetarî komo yai. Iina tak nakn̂ipe, anarî pen nakn̂iyakn̂e ero wa xa marha. Ero wa n̂irpe ahnoro awehtoponhîrî komo yahrutopo me, kasko yîwya so, kekn̂e Kporin komo owya, kekn̂e Moises yîwya so.

22 On wara marha kekn̂e Kporin komo Moises ya, Anarimaw awantoman̂e komo na nai kicicme. Aporinî mtapotarî yewetîra na nai kica, ponaro cehtopo mtapotacho ha. Ero wa exihra ehcoko, kacho yewetîra na nai. Twen̂ekarî rma na ero wa nai. Wara rma kicicme nasî kica.

23 Ero wa cehtoponhîrî yîhtînopuche tak kabra xîkrî n̂ekpe kîîrî, tupunporem ha.

24 Ekîche tak yîhtîpîrî poko nahsîpe. Ero wa ahsîche tak waihkape Aporin komo wero ro. Takn̂itîkaxmu waihketu iina xa marha waihkape. Kicicme cehtoponhîrî yahrutopo me waihkape ha.

25 Ero yinhîrî tak tamorî nukpape tîmsom pokono kabra xîkîtho pen kamxukutho kwaka. Tîmsom yakn̂itopo meretîrî pona tak n̂irpe. Ero yinhîrî akwenhîrî tak nukmampe roowo pona tîmsom yakn̂itopo mîtkoso.

26 Ero yinhîrî katîthîrî tak nakn̂ipe tîmsom yakn̂itopo pona. Aaxe xa wasî, kacho me nakn̂iyatu, ero wa xa marha nakn̂ipe hara. Ero wa tîmsom pokono nahruyasî awantoman̂e komo yehtoponho ha. Ero wa ciriche wîhcamnoyasî tak ehtoponhîrî, kasko yîwya so, kekn̂e Moises ya.

27 On wara marha kekn̂e Kporin komo Moises ya, Anarimaw apoyino komo na nai kicicme, antomano rin̂e pînî rma. Aporin komo mtapotarî yewetîra na nai, Ero wa exihra ro mak ehcoko, kacho ha. Twen̂ekarî mak tko na nai ero wa. Wara rma kicicme nasî kica.

28 Kicicme cehtoponhîrî yîhtînopuche tak ero yahrutopo tak n̂ekpe kabra xîkrî, woosî, tupunporem ha.

29 Ekîche yîhtîpîrî poko nahsîpe. Ahsîche waihkape tak takn̂itîkaxmu waihkexe iina xa marha.

30 Waihkache tak tamorî nukpape tîmsom pokono noro pen kamxukutho kwaka. Tîmsom yakn̂itopo pona tak n̂irpe, meretîrî pona. Ero wa ciriche akwenhîrî nukmampe tîmsom yakn̂itopo mîtkoso.

31 Ero yinhîrî tak katîthîrî nowpe ahnoro. Aaxe xa wasî, kacho me tîmsom nowyaxe ero wa xa marha nowpe hara. Towîche Aporin komo ya tîmsom pokono tak nakn̂ipe akn̂itopo pona. Ero wa akn̂iyataw kotopore nasî yîsîn okre Aporin komo ya. Ero wa kicicme ehxapu yehtoponho nahruyasî tîmsom pokono. Ero wa ciriche wîhcamnoyasî tak kicicme ehtoponhîrî.

32 Anarimaw oper̂a xîkrî yekî xe na nai apoyino komo kicicme cehtoponhîrî yahrutopo me. Ero wa exitaw woosî n̂ekpe tupunporem.

33 Ekîche yîhtîpîrî poko nahsîpe. Ahsîche waihkape takn̂itîkaxmu komo waihketu iina xa marha.

34 Ero yinhîrî kamxukuthîrî kwaka tamorî nukpape tîmsom pokono. Tîmsom yakn̂itopo pona tak n̂irpe, meretîrî pona. Ero wa ciriche akwenhîrî tak nukmampe tîmsom yakn̂itopo mîtkoso.

35 Ero yinhîrî katîthîrî nowpe ahnoro. Oper̂a xîkrî katîtho nowyatu, Aaxe xa wasî, kacho me tîmsom ero wa xa marha katîthîrî nowpe tîmsom pokono. Towtîkache nakn̂ipe tak tîmsom yakn̂itopo pona. Takn̂itîkaxmu komo nakn̂iyaxe iina xa marha nakn̂ipe. Ero wa kicicme ehxapu yehtoponho nahruyasî tîmsom pokono. Ero wa ciriche wîhcamnoyasî tak kicicme ehtoponhîrî, kasko yîwya so, kekn̂e. Ero wa kekn̂e Kporin komo Moises ya.