Kurumanga Nomi Setenene Yesusi Kondi Torumu Temanemoa Kinie
Yesusini Kolea Gallilli Disiriki Pulu Monjipe Yamboma Ungu Nimbe Sirimu Temanemob
4
(Pulu Yemonga Ungumu. Kolomongo-kanga wane.)
Yesusi ˻no lirimu kinie Pulu Yemonga Minimu yu-kinie omba molopalie nirimumuni,˼ Minimu yuni ‘˻Kurumanga nomi˼ depelemonec yu kondi topili!’d nimbe Yesusi kolea ku leline memba purumu.
2 Akuna Yesusi oli te koro talo melee langi naa noli we molopa perimu kinie yu engelene kolopa molorumu.
3 Kanu-kinie kondi toli ˻kuru Setene˼ ombalie yundu nimbendo: “Nu Pulu Yemonga Malof liemo i kouma ‘Pillawa-kaloli au lepili!’ ni!” nirimu.
4 Nakolo yuni pundu topa nimbendo: “Pulu Yemonga bokumuni nimbendo:
‘Langimene mindi yamboma konde mololi ulu-pulumu
naa silimo.
Pulu Yemone ungu nilimoma pali
pilku liku teko molonge kinie
konde mololi ulu-pulumu lingí.’ Ungu-Manema 8:3
nimbe molemo.”g nirimu.
5 Kanu-kinie depelemone Yesusi lipe kolea-aili Jerusalleme, akumundu ‘kolea-aili kake teli’ nilimu, akuna memba pupe Pulu Yemo popo toko kaloringi ulke-tembelena memba, paa ola imuna pupe anjipelie nirimumuni,
6 yundu nimbendo: “Nu Pulu Yemonga Malo liemo nu lipe taponjimbe kene pou ningu manie pui!” ˻nirimu.˼ “Pulu Yemonga bokumuni nimbendo:
‘Pulu Yemone yunge angellomane
‘Nu ongo nokangi!’ nimbé.
Enene nu ‘Kou tene kepe na topili!’ ningu
nu enenga kimene oko polko lingí.’h Konana 91:11-12
nimbe molemo kanumu. Aku-sipe nirimu kene pilkulie aku-siku tei!” nirimu.
7 Yesusini yundu nimbendo: “Pulu Yemonga yambomando ungu te pea nimbe molemola. Akumu i-sipe:
‘Pulu Yemo enenga Ailimuni “Tembo.” nilimo mele
‘Sike nilimonje molo kolo tolemonje kanamili!’ ningu
enene yu manda manjiku naa teangi!’i Ungu-Manema 6:16
nimbe molemola kanumu.” nirimu.
8 Altopa depelemone yu lipe mulú te paa olandopa lerimuna ola memba pupe anjipelie, yu ma-koleama pali kinie koleamanga méle peangama pea lipe ora sipelie
9 yundu nimbendo: “Nu nanga kumbikerena koporongo langoko manie molko na popo toko nanga imbi ambolko ola linjinu liemo i nu kanokono ma-koleana lemó mélema pali nu simbu.” nirimu.
10 Kanu-kinie Yesusini yundu nimbendo: “Setene,j nu anju pa! Pulu Yemonga bokumuni nimbendo:
‘Pulu Yemo enenga Ailimu manjiku popo toko
imbi ambolko ola linjiku,
yunge kongonoma manjiku tenjiku molangi!’k Ungu-Manema 6:13
nimbe molemo kanumu.” nirimu.l
11 Kanu-kinie depelemo Yesusi yu mundupe kelepa yu purumu. Purumu kinie mulú-koleana angelloma ongo Yesusi nokoringi.m
12 Kanu-kinie ˻No-Linjili˼ Jono ka siku ka-ulkena panjiringin kinie pilipelie Yesusi kelepa kolea Gallilli disirikindu yando omba
13 Nasarete taonona ombalie nirimumuni, pe aku taonomo mundupe kelepa Kapeniame taono, Nomú-Gallilli kélona lerimu, akuna pupe ‘Kinié i koleamo nanga kamu molombo koleamo lepili!’ nimbe akuna molorumu. Kapeniame taono ye Sepullano kinie Napatallai-tolone kalko liringili yamboma ou moloringi koleanao lerimu.
14 ˻Kapeniame taonona pupe molorumumunge˼ koronga-ou Pulu Yemone ungu-umbu tonjirimuma pilipe yamboma nimbe sirimu ye Aisayanep ulu te pe wendo ombá ou nirimu mele kamu wendo orumu. Aisayane nimbendo:
15 “Sepullanone kalopa lirimu yamboma
pelemele koleamo kinie,
Napatallaini kalopa lirimu yamboma
pelemele koleamo kinie,
nomúna pulimo aulkemo
No-Jodane nekendo lemo koleamo kinie,
kolea Gallilli wikindu yambo-lupe aisiliq
molemele koleamo kinie,
aku koleamanga molemele yamboma
˻paa sumbulu toline molemele˼.
16 Kanu yambo paa sumbulu toline molemelema
pa tondolo paa aili-tepa teli te kanoringi.
Kololi ulu-pulumu aki topa sumbulu tonjilimo koleana
pelemele yambomanga koleana
pa tenjikimu.” Aisaya 9:1-2
nirimu.r
YESUSINI PULU YEMO YE-NOMI-KINGIMU MOLOPA MÉLEMA NOKOMBAMONGA TEMANE PEANGAMO TOPA SIPE, KURU TORUMU YAMBOMA TEPA KONDE LIRIMU TEMANEMA
17 ˻Kapeniame omba molorumu˼ kanu walemonga Yesusini yamboma pulu monjipe unguma nimbe sipelie nimbendo: “Pulu Yemo ye-nomi-kingimu molopa nokomba walemos nondopa wendo ombá tekemo kene ˻‘Pulu Yemo yuni nokomba yambomanga talapena sukundu molamili!’ ningu˼ ulu-pulu-keri telemelema munduku kelko konopu alowa teai!” nirimu.t
Yesusini Ye Kisendo “Na Lombili Wai!” Nirimu Temanemou
18 Yesusi Nomú-Gallilli kélona andopalie angenungulu talo kanorumu, akutolo Saimono kinie angenu Enderutolo oma lili wale te nomúna toko suku munduku moloringili kanorumu. Pe Saimononga imbi te Pita niringila. Oma liringili akumu eltenga kou-kongono teringili kanumu.
19 Aku-siku teko moloringili kanopalie nimbendo: “Na lombili wangili! Oma lingilindu oma lili wale te liku nona suku mundulimbele kinie omama walena omba pelemo mele, pe ‘nanga kongonomo tengelendo nanga ungumu pilkulu ningu siliku andongele kinie yamboma nanga talapena sukundu ongo molangi!’ nimbu ‘Elte na lombili wale!’ nikiru.” nirimu.
20 Aku nirimu kinie pilkululie tamburembu eltenga oma lili walema munduku kelkololie Yesusi lombili puringili.
21 Kanu-kinie yu laye-kolte wilsu pupelie angenungulu talo lupe kanorumu, akutolo Seperi malo Jemisi kinie Jemisi angenu Jonotolo, lapa Seperi kinie enenga nona andoli sípine sukundu oma lili walema toko tambulku moloringi kanopalie elte walsipelie “Na lombili wale!” nirimu.
22 Aku nirimu kinie pilkululie eltenga lapa Seperi kinie nona andoli sípimu kinie tamburembu munduku kelkololie Yesusi lombili puringili.
Yesusini Kolea Gallilli Disiriki Ungumu Nimbe Silipe Andopa Yambo Aisili Tepa Konde Lirimu Temanemov
23 Kanu-kinie Yesusi kolea Gallilli disiriki sukundu koleamanga pali andopa, yamboma máku toko Pulu Yemonga ungumu piliringi ulkemanga yamboma ungu-mane sipe, Pulu Yemo nondopa ye-nomi-kingimu molopa nokomba melew temane peangamo topa sipe, yambo kuru lupe-lupe torumuma kinie kangine ulu aisili terimuma kinie tepa konde lirimu.
24 Yu terimu mele temanemo kolea Siria poropinji koleamanga pali anju-anju purumu pilkulie enenga yambo
kuru lupe-lupe torumu yamboma kinie,
mindili lupe-lupe nongo moloringi yamboma kinie,
yambomanga konopuna kuru molko amboloringi yamboma kinie,
kuru-kopalli torumu yamboma kinie,
kimbu-ki kukurumu yamboma kinie,
yu molorumuna mengo oringi kinie yuni ene tepa konde lirimu.
25 Yambo paa aisili yu lombili puringi. Kolea Gallilli disiriki yamboma kinie, ‘Kolea Aili Rureponga Talo’x niringi kolea yamboma kinie, kolea Judia-Disiriki lerimu kolea-aili Jerusalleme yamboma kinie, kolea Judia sukundu lerimu we-koleamanga moloringi yamboma kinie, No-Jodane nekendo koleamanga yamboma kinie, paa aisili yu lombili puringi.