2 Akuna puringi kinie ene kanoko molangi yunge kangimu alowa tepa, yunge kumbikeremo ena tondolo topa yambomanga mongo takele telemo mele pa aili-tepa tepa, yu pakorumu mulu-wambalema pa telemo mele aku-sipe kake terimu.

3 Yu aku-sipe molopili, ˻Juda-yambomanga koronga-ou moloringili ye aili talo,˼ Mosisi kinie Illainja-tolo ongolo Yesusi-kinie ungu ningulu mona angiliringili kanoringi.

4 Kanu-kinie Pitane Yesusindu nimbendo: “Ailimu, olio ya molo-pamolo peanga lepamo. Nuni “E.” ninu liemo, ulke-takaye yepoko takonjimbu. Te nunge, te Mosisinge, te Illainjanga takonjimbu.” nirimu.

5 Yuni aku-sipe nimbe molopili kupe tondolo pa teli te omba ene aki torumu kinie kupena suku ungu te wendo ombalie nimbendo: “I yemo nanga konopu monjilio Malomo.^d Yu kanopo paa peanga kanolio. Yuni ungu nimbéma pilku liengi!” nirimu.

6 Aku nirimu pilkulie yu lombili andoli ye ˻yepoko˼ paa mini-wale mundukulie mana manie molko tamalu peringi.

7 Ene tamalu peringine Yesusi omba ene ambolopalie nimbendo: “Mini-wale na munduku ola angiliei!” nirimu.

8 Pe olando siku kanoringi kinie Yesusi yuyu molorumu kanoringi.

9 Mulú polorumumunge manie onge oringi kinie Yesusini ene mane sipelie nimbendo: “Enene kinié kanongi mele isili-ou yambo teluri kepe ningu naa siengi! Pe mindi, Manie Omba Mana-Ye Au Lerimu Yemo kolopalie lomboropa ola molomba kinie temanemo toko anju siengi! Ou mólo!” nirimu.

10 Aku nirimu kinie pilkulie yu lombili andolimene ˻yu sike molorumu mele ningu kanokolie˼^e yundu walsiku pilkulie ningindu: “˻Pulu Yemone ‘Olio nokopa konjimbe ye te lipe mundumbu.’ ou nimbe makó torumu ye-nomi Kirasimu nu liemo˼ Pulu Yemonga ungu-manemanga puluma pilku mane silimele yemane “Illainja ˻kelepa˼ kumbi-lepa ombá. ˻Ye-nomi Kirasimu pe akilipe ombá.˼” nilimele mele^f nambemuna nilimeleye? ˻Illainja kelepa naa opili nu koronga orunu moleno kanumu.˼” niringi.

11 Yesusini pundu topa nimbendo: “ “Illainja ˻kelepa˼ kumbi-lepa ombalie mélema pali tepa mimi temba.” nilimele kanumu sike nilimele.

12 Nakolo ˻akumunge ungu te pea nimbu sikirula.˼ Pilieme! Illainja koronga orumu. Yu orumu kinie ˻kanu yemane˼ yu kanoko imbi naa siku ‘Yu we-yere.’ konopu lelkolie ‘Yu-kinie temolo.’ ningu piliringi uluma pali teringi.^g Aku-siku mele Manie Omba Mana-Ye Au Lerimu Yemo^h mindili liku singíla.”ⁱ nirimu.

13 Aku-sipe nirimu kinie pilkulie lombili andolimene ‘No-Linjili Jonondo nikimu.’ ningu piliringi.^j

14 ˻Yesusi kinie yu lombili andoli ye yepoko kinie˼ ene ˻mulúna manie˼ ongolie yamboma máku toko moloringine oringi kinie ye te Yesusi orumuna omba koporongo langopa

15 mawa tepalie nimbendo: “Ailimu, nanga kangomo kondo koloyo! Yu kuru-kopalli tolemona mindili aili tepa nolemo. Taki-taki yu tepena pupe nomanga pulimo.

16 Nu lombili andoli yema molongine kangomo membo ondu kinie enene yu manda teko konde naa língi.” nirimu.

17 Aku nirimu kinie pilipelie Yesusini ˻yamboma iri topalie˼ nimbendo: “Kinié molemele yamboma ene ˻‘Pulu Yemone uluma sike manda temba.’ ningu˼ tondolo-munduku naa pilimele. Ene konopu karaye tepa pepili molemele yamboma, na ene wale nambe-tepo mane sipu ulu mare lipu ora simbu kinie mimi-siku pilingíye? ˻Na ene-kinie siye tekemo.˼” nimbelie

18 Mengo oringi kinie Yesusini kanu kurumu iri torumu kinie yu kangomonga ˻konopuna˼ omba wendo purumu kinie kanu enamonga kangomo manda molorumu.

19 Aku terimu kinie kanokolie Yesusi lombili andoli yema Yesusi yuyu molorumuna ongo walsiku pilkulie ningindu: “Kuru akumu olione nambemuna manda naa makoromuluye?” niringi kinie

20 Yesusini pundu topa nimbendo: “˻‘Pulu Yemone sike olio lipe taponjimbe.’ ningu˼ paa wallo-kolte mindi pilimelemonga ulu-tondolo i-silime manda naa telemele. Nane ene paa sike nimbu sikirumu: “Unju tenga mongo akumu méle paa kanga nakolo kanu mongomo mana mundulimele kinie unju ola akopa angilimo mele, aku-sipe enene ‘Pulu Yemone olionga unguma pilimbe. Olio lipe taponjimbe.’ ningu wallo-kolte mindi pilkulie i polemo mulúmundu “Anju puku ne koleana angili!” ningí kinie sike aku-sipe pupe angilimbe. ‘Teamili!’ ningí ulumanga ulu manda naa tenge ulu te na pemba.^l

21 (Pulu Yemo mawa teko langi mi toko naa nongolie kuru i-silime yambomanga konopumanga manda makoronge. Ulu-tondolo i-silime we manda naa tenge.)” nikiru.” nirimu.^m

22 ˻Pe walse,˼ kolea Gallilli disiriki puku moloringi kinie Yesusini yu lombili andolimendo nimbendo: “Manie Omba Mana-Ye Au Lerimu Yemo ˻ka sikulie yu toko konjingí˼ yema anju singí kinie^o

23 enene yu toko konjingí. Kolopalie wale yepoko-sipemonga Pulu Yemone yundu ‘Lomboroko ola moloi!’ nimbé.” nirimu. Aku nirimu pilkulie enenga konopuna sukundu meme kulupi perimuna pilkulie paa kondo koloringi.^p

24 Pe Yesusi kinie yu lombili andolime kinie Kapeniame taonona oringi kinie Pulu Yemo popo toringi ulke-tembelemonga kou-takisi^q liringi yema ongo Pita walsikulie ningindu: “ ‘Nunge ungu-mane sili yemone ulke-tembelemonga kou-takisi tolemo.’ konopu lekemolomo. Sikeye?” niringi kinie

25 Pitane “Tolemo.” nirimu.

26 Pitane pundu topa nimbendo: “Yambo-lupemando “Takisi tai!” nilimele.” nirimu.

27 Nakolo takisi naa tombolo kinie ulke-tembele-takisi limele yemane olto kanoko keri kanonge kapola naa temba kene^s nomúna puku uku mundu-pani! Uku mundukulie oma te toni aku omamonga keremo aká tenjini kinie kou te^t pemba, aku koumu likulie mengo puku oltonga pea liku tere lelko takisi toi!” nirimu.