2 Yesusini pundu topa nimbendo: “Ipupini ena pumbendo mulúmu konjili telemo kinie kanokolie ‘wale peangamo wendo ombá lémo.’ nilimele.

3 Ipulueli-ou kolea tangombando kolea kupe topa mulúmu sumbulu tolemo kinie kanokolie^f ‘Lo ombá lémo.’ ningu pilimele kanumu. Mulúmu kanokolie ‘koleamo i-sipe i-sipe temba.’ ningu kanolemele nakolo i walemanga uluma wendo olemoma kanokolie ulumanga pulumu manda naa pilimele.

4 Kinié mana molemele yamboma yambo kerime mindi molemele. Ene teko kenjiku Pulu Yemo munduku kelko, méle lupama konopu mondolemele kanu yambomane “Pulu Yemone mindi ulu-tondoloma manda telemo mele kanamili tei!” ningu na mawa telemele. Nakolo ˻Pulu Yemone na lipe mundurumu-na ya ombo molkoro. Yu-kinie tapu topo kongono telembolo mele˼ lipe ora simbe ulu-tondolo te wendo naa ombá. ˻Pulu Yemone ungu-umbu tonjirimuma pilipe yamboma nimbe sirimu ye˼ Jonane terimu^g ulumuni mindi lipe ora silimo mele manda kanonge. Te pea wendo naa ombá.” nimbelie ene mundupe kelepa purumu.

5 Ene ˻Nomú-Gallilli˼ nekendo pungíndu ˻Yesusi˼ lombili andoli yema pillawa-kaloli komu siku naa mengo puringi.

6 ˻Kanu-kinie˼ Yesusini enendo ˻lepi-lepi topa ungu-iku topalie˼ nimbendo: “Paa mimi-siku kanai! Parisi-yema kinie Sadusi yema kinieⁱ

7 Aku-sipe nirimu kinie pilkulie yu lombili andoli yemane eneno kere-pali ningulie ningindu: “Olio pillawa-kaloli ˻nomolo˼ mare naa lipu membo omulumunge aku-sipe nikimunje.” niringi.

8 Aku-siku niringi mele pilipelie Yesusini enendo nimbendo: “Ene ‘nane manda lipe taponjimbe.’ ningu wallo kolte mindi pilimele yema, “Pillawa-kaloli naa memulu.” ningu nambemuna kere-pali nikimiliye?

9 Kinié kepe ene naa pilku konjilimeleye? Pillawa-kaloli te-pakara ye pape-tausini moke teko siringi mele komu silimeleye? ˻Nongo pora siringi kinie˼ langi kakena lerimuma liku wale-basikete aisili toko peke siringi mele komu siku naa pilkimiliye?^k

10 “Molo pillawa-kaloli yepoko-pakara moke teko ye po-tausini siringi mele naa pilku, ˻nongo pora siringi kinie˼ wale-basikete aili mare langi kakena lerimuma toko peke siringi mele naa pilku molemeleye?

11 ‘Yuni sike pillawa-kalolimundu naa nikimu.’ ningu nambemuna naa pilíngiye?^l ‘Parisi-yema kinie Sadusi yema kinie pillawa-akoli méle isi nosilimelemo mimi-siku kanangi!’ nimbu nikiru.” nirimu.

12 Yuni aku nirimu kinie pilkulie enene ‘pillawa kalongendo yísi mundulimele akumundu naa nikimu. Parisi-yema kinie Sadusi-yema kinie enene ungu-mane siringi ungumando nikimu.’ ningu piliringi. ˻‘Parisi-yema kinie Sadusi-yema kinie enene ungu-mane mare kolo toko siringime yunge lombili andolimene paa naa piliengi!’ nimbe nirimu mele ningu piliringi.˼^m

13 Yesusi kolea-aili Sisaria-Pillipai lerimu koleana pupelie nirimumuni, yu lombili andolimendo walsipelie nimbendo: “Manie Omba Mana-Ye Au Lerimu Yemondo yambomane yu imbi lelko nae nilimeleye?” nirimu.

14 Enene yundu ningindu: “Marene “Nu No-Linjili Jono ˻kolorumu, kinié kelepa lomboropa ola molemo˼.” nilimele; marene “Nu ˻Pulu Yemone ou konde molopili olando lirimu ye˼ Illainja^o kelepa omba molemo.” nilimele; marene nu “Jeremaya^p molo Pulu Yemone ungu-umbu tonjirimuma pilipe yamboma nimbe sirimu ye ˻ou kolorumu kinié lomboropa ola molemo˼ te-lupe.” nilimele.” niringi.

15 Aku niringi pilipelie Yesusini enendo nimbendo: “˻We-yambomane aku-siku nilimele˼ nakolo ene-eneno na nae nilimeleye?” nirimu.

16 Saimono Pitane pundu topa nimbendo: “Nu Konde Molopa Mindi Puli Pulu Yemonga Malo,^q ˻Pulu Yemone ‘Olio nokopa konjimbe ye te lipu mundumbu.’ ou nimbe mako torumu ye-nomi˼ Kirasimu.”^r nirimu.

17 Yuni aku nirimu pilipelie Yesusini yundu nimbendo: “Jona Malo Saimono,^s nu malo. Nu Pulu Yemone “Konopu peanga pepili molko konjengi!” nilimo aulkena moleno.^t I nikinumu mana yambo tene nu naa nimbe simu. Tara mulú-koleana molemomone nimbe simu.

18 Ungu te pea nundu nikirula: Nunge imbi Pita, (kanu imbimunge ungu-pulumu ‘kou-mulú’ kanumu). Kanu kou-mulúmunge ola^u nanga yambo talapemo^v lipu máku topo monjimbu. Kanu-kinie kololi ulu-pulumunge tondolomone i nanga talapemo topa manie manda naa mundumbe, mólo!

19 Pulu Yemo ye-nomi-kingi molopa yamboma nokomba ulke-kimu nu simbú.^w Kanu-kinie nuni mana méltendo “Mólo!” niní mélemo mulú-koleana sukundu “Mólo!” nimbéla. Nu mana méltendo “Kapola.” nini mélemo mulú-koleana sukundu “Kapola.” nimbéla.” nirimu.^x

20 Kanu-kinie yu lombili andolimene Yesusindu “Pulu Yemone “Ene nokopa konjimbe yere lipu mundumbu.” ou nimbe mako torumu ye-nomi Kirasimu nu ongo moleno.” niringi kanu ungumundu yuni enendo tondolo-mundupe nimbendo: “Enene anju yambo telurindu kepe na kanu yemo molio mele ˻isili-ou˼ paa naa ningu siei!” nirimu.^y

21 Kanu-kinie Yesusi yu lombili andolimene yundu ˻“Pulu Yemone olio “Nokopa konjimbe ye te lipu mundumbu.” ou nimbe mako torumu ye-nomi Kirasimu nu.” ningu, ningu para siringi kinie pilipelie˼ yuni yu-kinie wendo ombá mele pulu monjipe^a ene sumbi-sipe nimbe sipelie nimbendo: “‘Na mindili aisili nombondo kolea-aili Jerusalleme paa pumbu.’ nimbu pilipu molio.^b Juda-yamboma nokolemele tapu-yema kinie, Pulu Yemo popo tonjili ye ailime kinie, Pulu Yemonga ungu-manemanga puluma pilku mane silimele yema kinie,^c enene na paa toko mindili konjingí. Na toko konjingí kolombo kinie wale talo omba pumbe kinie yepoko-sipemonga Pulu Yemone nando ‘Lomboroko ola moloi!’ nimbé.” nirimu.

22 ˻Aku nirimu kinie pilipelie˼ Pitane yu anju lipe memba pupelie yu pulu monjipe iri topalie nimbendo: “Ailimu, aku-siku paa naa ni! Nu nikinu mele aku-sipe paa wendo naa ombámo.” nirimu.

23 Nakolo ˻yuni kurumanga nomi Setenene ungu-umbu tonjirimu mele pilipelie nirimuna pilipelie˼ Yesusini topele topa Pitando nimbendo: “Setene,^d nu anju pa! Pulu Yemone nando “Tei!” nirimu kongono tembo tekeromo pipi sini tekeno kene nu anju pa! Nuni na teko embambo sini tekeno. Nu Pulu Yemone konopu lemo mele naa leno. Yambomane konopu lemele mele mindi leno.” nirimu.^e

24 Kanu-kinie Yesusini yu lombili andolimendo nimbendo: “Yambo tene ‘Yu lombili pambo!’ nimbelie yuni yunge konopumuni pilimo mélemanga ‘Topo manie mundembo!’ nimbe yamboma unju-perana angilku mindili nongo kolemele mele yuni unju-pera mele gomo lembando ‘Na yu lombili pumbundu mindili nondu liemo papula; kolondu liemo papula.’ nimbelie na lombili opili! We naa opili!^f

25 Yambo tene yunge mana konde molopa na kololi ulu-pulumu ambolomba temba kinie yu kolopalie sike molopa kenjipe mindi pumbe. Nakolo yambo tene na konopu monjipelie nanga kongonomo “Tenjembo!” nimbe temba kinie yu kolopalie yu konde molopa konjipe mindi puli ulu-pulumu sike kanopa limbe.^g

26 ˻Akumu nambemuna nikiruye?˼ Yambo tene mana mélema pali yu-yuyu lipe nosipelie yu mini-pali Pulu Yemo naa molomba koleana pupe mindili nomba molopa kenjilkenje kanu mélemane kanu yambomo nambe-tepa lipe taponjilkenje? Lipe naa taponjilkemo. Molo yambo tene ‘Na mini-pali konde molopo konjipu mindi pambo!’ nimbelie yu nambolka méltene mini-pali konde molopa konjipe mindi puli ulu-pulumu topo topa lilkeye? Méltene manda topo topa naa limbe.^h

27 “Manie Omba Mana-Ye Au Lerimu Yemo pe Lapanga tondolo pa telimu-kinieⁱ yunge ˻mulú-koleana˼ angelloma-kinie pea ombá. Ombalie yuni olio ya mana-yamboma yu-mele-mele telemolo ulumanga olio yu-mele-mele pundu tombamonga nane aku nikiru.

28 “Nane enendo paa sike nimbu sikirumu: “Ene ya angilkimilimenga mare ou kolou na kolangi Manie Omba Mana-Ye Au Lerimu Yemo ye-nomi-kingimu omba molopa mélema kinie yamboma kinie pali nokomba^j ombá kanonge.” nikiru.” nirimu.^k