Mélema Kake Telemomonga Pulumu Kinie Mélema Kalaro Molemomonga Pulumu-Tolonga Ungu Marea
Te: Pulu Yemonga Ungu-Manema Olandopa, Anda Kolepalimenga Ungu-Manema Maniendopa, Ungu Teb
15
(Kolomongo-kanga wane. Pulu Yemonga Ungumu.)
Kanu-kinie Parisi-ye mare kinie, Pulu Yemonga ungu-manemanga puluma pilku mane siringi ye mare kiniec ene Jerusalleme munduku kelko Yesusi molorumuna ongo yu walsiku pilkulie ningindu:
2 “Olionga anda-kolepalimene “Teai!” niringi ungu-manemo nu lombili andolimene nambemuna pulue tolemeleye? ˻Anda-kolepalimene “Teai!” niringi mele mimi-sipu pilipulie olione kíme kulumiye tolemolo mele˼ enenga kíme aku-siku kulumiye naa toko langi we nolemele kanumu.” niringi.
3 Yesusini pundu topa nimbendo: “Enene kepe enenga anda-kolepalimene “Teai!” niringi mele mindi pilku liku tengendo Pulu Yemonga ungu-manema nambemuna pulue tolemeleye?
4 Akumunge Pulu Yemone nimbendo:
“Aminieli-lanielinge unguma pilku liku,
liku ai-siku teai!”d Wendo Oringi 20:12, Ungu-Manema 5:16
nimbe
“Yambo tene yunge anumundu molo lapando
ungu te nimbe kenjipe iri tomu liemo
kanu yambomo toko konjengi!”e Wendo Oringi 21:17, LLipai 20:9
nirimu kanumu.
5 Nakolo ene yemane ningindu: “Yambo tene yunge anumu-lapatolondo nimbendo: “Nane elte méle mare lipu taponjipu silkema koronga ‘Pulu Yemo simbu.’ nimbu panjirindu kanumunge elte manda naa lipu taponjipu simbu.” nimbé kinie
6 ˻aku-sipe nimbemonga˼ yunge lapa imbi ambolopa ola linjimbe ungu te naa pemba.” nilimele. Aku-siku nilimele ungumuni ‘Anda-kolepalimene mane siringi unguma olandopa.’ ningu ‘Pulu Yemone nirimu ungumu uluri mólo! Manie pupili!’ nilimele.
7 “Ene ˻ungu-manema pilku mane silimele yema kinie Parisi-yema kinie˼ ene topele-mapele toli yema molemele.f Pulu Yemone ungu-umbu tonjirimuma pilipe yamboma nimbe sirimu ye Aisayane enendo nirimu mele papu nirimu. ˻Enene kinié telemele mele yuni ou nimbe Pulu Yemonga bokuna torumu molemo mele i-sipe:˼
8 ‘˻Pulu Yemone nimbendo:˼
“Kanu yamboma enenga keremane na kapi ningu
‘Ye aili olandopamo.
Nu lipu ai silimolo.’ ningu
na imbi ambolko ola linjilimele nakolo
enenga konopuma kinie nanga konopumu kinie
teluna naa pulimo. Lupe-lupe pelemo.
9 Enene ‘Nanga imbi
ambolopo ola linjemili!’ ningu
na we popo toko kapi nilimele.
Mana-yambomane mane-silimele unguma mindi
mane-sikulie
‘I ungu-manema Pulu Yemone
“Teai!” nilimo ungu-manema.’
ningu pilku liku telemele,
akumunge na sike popo tonge kinie
uluri naa temba.” nirimu.’g Aisaya 29:13
kanumu.” nimbe Yesusini nirimu.
Te: Ulu Marene Yamboma Tepa Kalaro Monjinjilimomanga Ungu Teh
15:10-20 (1-20 pali)
10 Aku nimbelie Yesusini máku toko moloringi yambomando “Na moliona wai!” nimbelie enendo nimbendo: “Nane ˻aku nikirumungei ungu te˼ nimbú tekero ungumu komu tenjiku ungumunge pulumu pilku konjiyo!
11 Yambomanga kangine ulsukundu lepalie kerena pupe olona suku pulimo méltene ˻Pulu Yemo manda popo tonge aulkemo pipi silimo˼ kalaro te manda naa monjilimo. Yambomanga konopuna sukundu pepalie wendo olemo ulumane mindi yamboma kalaro monjilimo.” nirimu.
12 Aku nirimu pilkulie niringimuni, yu lombili andolime yu molorumuna ongolie ningindu: “Nu aku-siku nikinu mele pilkulie Parisi-yemane paa pilku keri pilíngi mele nu pilkinuye?” niringi.
13 Nakolo Yesusini pundu topa ˻ungu-iku topa Parisime moloringi mele nimbelie˼ nimbendo: “Nanga mulú-koleana molemo Lapamone umbu naa panjirimuma pali pulu akumbe.j
14 I yemane nilimele mele konopu kimbu siku naa pilku molangi! Ene mongo keri lelimene ˻mongo keri lelime˼ aulke liku ora silimele yema molemele. Mongo keri leli ye tene mongo keri leli ye te aulke te lipe ora sipe ki ambolopa memba pumbe kinie elte peatolo muruna topa manie mundumbe.”k nirimu.
15 ˻Kalaro molemomonga ungu-ikumu aku-sipe torumu kinie pilipelie˼ Pitane yundu nimbendo: “Aku ungu-ikumunge pulumu nambolkanje? Ningu para si!” nirimu kinie
16 Yesusini enendo nimbendo: “Kinié kepe naa pilkimiliye?
17 Yambo tenga kangine ulsu lepalie kerena pulimo mélte olona suku pupe ulsu omba le-muruna kamu pulimo mele naa pilkimiliye?
18-19 Kerena sukundu pulimo mélemane uluri naa telemo kanumu. Ulu-kerime ou konopuni pilkulie pe kamu wendo olemomonga konopuna pepalie kerena wendo olemo kanu mélemane mindi ˻Pulu Yemo popo tomba aulkemo pipi silimo˼ kalaro te monjilimo. Kanu mélema i-sipe:
Konopuni ulu-kerime pilimele,
yamboma toko konjilimele,
ambo ye pulime molo ye ambo lílime yambo lupema kinie ulu-kerinele telemele,
wa-ulu-kerinele lupe-lupema andoko telemele,
wa nolemele,
kolo toko yamboma kote tenjilimele,
‘Yamboma pipili kolko molko kenjengi!’ ningu ungu-bulkundu ninjilimele,
ulu-pulu akuma pilku telemele.l
20 Aku telemele ulu akumane yamboma ˻Pulu Yemonga kumbikerena pungí aulkemo pipi silimo˼ kalaro te monjilimo. Nakolo ki ou naa kulumiye toko langi we sumbi-siku nolemele ulu-pulumuni ˻yambo tenga konopuna suku˼ kalaro te naa monjilimo.” nirimu.m
Kenane Ambo Tene ‘Yesusini Ulu-Tondolo Te Manda Temba.’ Nimbe Tondolo Mundupe Piliirimu Temanemon
21 Kanu-kinie Yesusi molorumu kolea ˻Geneserete˼o mundupe kelepa ˻Juda-yamboma moloringi kolea Gallilli disiriki ulsukundu˼ kolea-aili Taya kinie Saidono-tolo lerimu koleana sukundu purumu.
22 Akuna purumu kinie kolea Kenane ambo tep molorumu, yu wendo omba tondolo ru nimbelie nimbendo: “Ailimu, Ye-Nomi-Kingi Depisini Kalopa Lirimu Yemo,q nanga ambolamo kuru te konopuna sukundu molopa yu tondolo ambolemo kene nuni na kondo koloi!” nirimu.
23 Nakolo Yesusini yundu ungu te pundu topa naa nirimu.
Kanu-kinie yu lombili andolimene ongo yundu ningindu: “Ambomone nu walsilipe olio lombili okomomo ˻siye tekemo˼ kene ‘Anju pupili!’ ni!” niringi.
24 ˻Ambomo yu ambo-lupe, Juda-ambo te mólo, nimbe kanopalie˼ Yesusini ˻yundu˼ nimbendo: “Pulu Yemone na Isirele-yambo talapemonga kongi-sipisipi talopa lemele mele molemele yamboma molemelena mindi lipe mundurumu kanumu. Yambo talape lupema molemelena lipe naa mundurumu.” nirimu.r
25 Aku-sipe nirimu kinie pilipelie ambomo omba yunge kumbikerena koporongo langopa ma kanopalie nimbendo: “Ailimu, na liku taponji!” nirimu.
26 Aku nirimu kinie Yesusini pundu topa ˻ungu-iku te topalie˼ nimbendo: “Ambolangomanga langime lipu owama simulú kinie kapola naa temba.” nirimu.s
27 Ambomone nimbendo: “Ailimu, sike nikinu nakolo owamane kepe enenga pulu-yambomanga langi pundu manie pulimoma liku nolemele kanumu.” nirimu.
28 Kanu-kinie Yesusini yundu nimbendo: “Ambomo, nu manda tembo mele paa aili-tepa tondolo-munduku pilino kene mawa tekeno mele aku-sipe wendo opili!” nirimu kinie yuni aku-sipe nirimu mele aku enamonga ambomonga lemenu konde pupe kapola molorumu.
Langi Naa Lepa Kolea Ku Leli Tenga Yesusini Yambo Kuru Torumuma Tepa Konde Lipeliet
Ye Po-Tausini Kinie Ambo-Ambolangoma Kinie Langi Sirimu Temaneu-tolo
29 Kanu-kinie Yesusi kanu koleamo mundupe kelepa Nomú-Gallilli kélona ˻aulke te lerimuna˼ omba pupelie ma-pangi tenga ola pupe manie molorumu.
30 Kanu-kinie yu molorumuna yambo paa aisili oringi.
Kimbu keri lerimuna aulke mimi-siku naa andoringi yamboma kinie,
mongo keri lerimu yamboma kinie,
kimbu-ki karaye terimu yamboma kinie,
ungu manda naa niringi yamboma kinie,
aku-sipe kuru lupe-lupe torumu yambo aisili mengo ongo yu molorumuna nondoko nosiringi kinie yuni ene tepa konde lirimu.
31 Ungu naa niringi yamboma ungu niringi;
kimbu-ki karaye terimu yambomanga kimbu-kime kelepa sumbi-sipe angilirimu;
kimbu keri lerimuna aulke mimi-siku naa andoringi yamboma kapola andoringi;
mongo keri lerimu yamboma mongone mélema kanoringi;
aku-sipe ulu-tondoloma wendo orumu kinie kanokolie we máku toko moloringi yambomane paa konopu aisili liku munduku, Pulu Yemo ene Isirele-yamboma nokorumu popo toringi Pulu Yemo kapi ningu imbi ambolko ola linjiringi.
32 Kanu-kinie Yesusini yu lombili andolimendo “Na moliona wai!” nimbelie enendo nimbendo: “I yambo máku toko molemelema na kondo tekemo. Wale yepoko na-kinie molongi, pe kinié ga nonge te naa lemo. Ene langi naa nongo we pungí kinie aulkena kimbu-ki pange-mange tepa, topa ne-munde ya-munde temba kene ‘ene engele tepa pepili ulkendo pai!’ naa nimbú.” nirimu.
33 Aku nirimu kinie pilkulie yu lombili andolimene ningindu: “˻Sike nikinu nakolo˼ i kolea ku leline molemolo. I yambo paa aisili manda nonge mele pillawa-kaloli tena lembana lipu simulúye?” niringi.
34 Yesusini enendo “Pillawa-kaloli nambepa nosikimiliye?” nimbe walsirimu kinie
enene “Pillawa-kaloli yepoko-pakara kinie oma wallotolo kinie nosikimulu.” niringi.
35 Kanu-kinie yuni máku toko moloringi yambomando “Manie molai!” nimbelie,
36 pillawa-kaloli yepoko-pakara kinie omama kinie lipe Pulu Yemo-kinie “Ange.” nimbe, langi akuma pike lepa yu lombili andolime sirimu kinie enene yamboma moke teko siringi.
37 Yamboma pali nongo keri piliringi. Pe langi kakena lerimuma lombili andolimene liku wale-basiketemanga lakiliringi, wale aili yepoko-pakara peke lerimu.
38 Ye mindi po-tausinini aku langime noringi. We ambo-ambolangoma kinie pea langi noringi.
39 Kanu-kinie Yesusini máku toko moloringi yambomando “Ulkendo pai!” nimbelie nirimumuni, nona andoli sipi tenga suku pupe, ˻nomúna nekendo˼ kolea Makatanev purumu.