2 Enene walsiringi mele Yesusini pilipelie yu ambolango kanga te “Na moliona oi!” nimbe ene moloringine monjipelie

3 enendo nimbendo: “Nane ene paa sike nimbu sikirumu: “Ene konopu alowa teko ambolango kangama mele na molongi liemo Pulu Yemo ye-nomi-kingimu molopa yamboma nokolemo koleana^c suku paa manda naa pungí.” nikiru.

4 Akumunge, yambo tene ‘Na we-yambomo molambo! Nanga imbi te olandopa naa molopili!’ nimbe i ambolango kangamo mele molemo yambomo yu Pulu Yemo ye-nomi-kingimu molopa nokolemo koleana yambo imbi paa mololimu molemo.”^d ˻nirimu.˼

5 “˻I ambolangomondo ungu te pea niembo:˼ Yambo tene ‘Na Ailimunge yambomo molio.’ nimbe i ambolangomo mele lipe taponjimbe kinie kanu yambomone aku tembamonga na lipe taponjimbela.

6 Nakolo yambo tene i ˻ambolango˼ kangamonga ˻mele yambo˼ te ˻na ‘Sike’ nimbe˼ tondolo-mundupe pilimo ˻ambolango˼ kanga te^f ‘Ulu-kerime tepili!’ nimbe kondi tombamonga kanu ˻ambolango˼ kangamo tondolo-mundupe pilimo mele mundupe kelepa bulu simu liemo ˻ambolango˼ kangamo ou kondi naa topili kanu yambomo kou paa aili te^g moko toko nomine lenjiku ‘Yu kamu kolo-pupili!’ ningu paka toko nomúna paa maniekondo mundulimelkanje paa papu.^h

7 “˻Na˼ ‘Sike’ ningu tondolo-munduku pilimele yamboma kelko bulu-siku munduku kelenge uluma ya mana lemomonga na ene kondo tekemo. Sike aku-sipe uluma wendo ombá nakolo yambo tene nanga yambo te kondi tombamonga kanu yambomo na bulu-sipe anju pumu liemo kanu kondi tomba yambomo mindili nomba paa molopa kenjimbe.

8 “Nunge kitolone molo kimbutolone ulu-pulu-keri te temu liemo aku kitolo molo kimbutolo karu lelko ele-teani! Nu konde mololiku mindi puni koleanaⁱ kitolo molo kimbutolo naa angilipili puni kinie peangamo. Nunge kimbu-ki pali we angilipili tepe naa kumbulupe nomba pepa mindi pumbe koleana suku liku toko mundungí kinie kerimu.

9 Molo nunge mongotolone mélte kanokolie konopuni ‘liemboa!’ ningu pilku ulu-pulu-keri te tenu liemo aku mongotolo akuku ele-teani! Nu konde mololiku mindi puni koleana mongotolo naa angilipili puni kinie peangamo. Mongo talo we angilipili nu tepe-koleana suku liku toko mundungí kinie kerimu.”^j ˻nirimu.˼

10 “I ambolango kangama ˻mele yamboma˼nga te^k kanoko keri kanoko ‘Yu koropamo.’ ningu paa na teangi! Enenga nokolemele mulú-koleana angelloma^l alieli Tara mulú-koleana molemona pea molemele kene ˻aku naa teai˼!

11 (Manie Omba Mana-Ye Au Lerimu Yemone ‘Yambo aulke lou lelko molko kenjilimele yamboma koropo lipu taponjembo!’ nimbe orumu kanumu.)”^m ˻nirimu.˼

12 “Ene nambolka ningu pilkimiliye?

15 “˻Na lombili andolimenga˼ angenu tene nu^q tepa kenjimu liemo nu puku tepa kenjimbe yambomo pea eltelte molangili kanu ulu-pulu-kerimu yuni nu temba mele ningu sieni! Nuni nini ungumu tepa kenjimbe angena pilímu liemo angena kinie elte altoko kapola-kapola molongele.

16 Nakolo nuni nini ungumu yu naa pilímu liemo pe nuni ‘I ungumu pora nipili kene tembo mele yambo mare kanoko molangi altopo niembo!’ ningulie, kanonge yambo talo molo yepoko liku angena molombana mengo ongo ene kanoko molangi angenando ‘Teluna molambili!’ altoko nieni!^r Kanu-kinie nuni teni kinie angenane temba mele kanu yambomane kanokolie yambo lupemando manda temane toko singí.

17 Kanu-kinie yuni enenga ungumu kepe naa pilímu liemo Kirasinge yambo talapemondo^s puku ningu sieni! Pe Kirasinge yambo-talapemo kepe angenane naa pilímu liemo ‘Yu olionga angenu mólo! Yu ulsukundu molko konopu alowa naa teli yamboma mele^t molemo lémo.’ ningu kanayo!^u

18 ^v “Nane enendo paa sike nimbu sikirumu: “Ya mana enene ˻uluma kinie yamboma kinie˼ “Mólo!” ningí kinie Pulu Yemone mulú-koleana sukundu “Mólo!” nimbéla; enene mana “Kapola.” ningíme Pulu Yemone mulú-koleana sukundu “Kapola.” nimbéla.^w” nikiru.

19 “˻Akumunge˼ nane enendo ungu te pea nimbu sikirumu: “Enenga yambo talone ya mana “I-sipu mawa teambili!” ningu panjíngili liemo eltene mawa tengele mele mulú-koleana molemo Tarane eltenga mawa tengele mele aku-sipe tenjimbe.^x” nikiru.

20 Yambo ˻wallotolo,˼ talo molo yepoko, na enenga Ailimu imbi lelko walsiku, ‘Pea tapu topo molemolo.’ konopu lelko máku toko molemelemanga na ene kinie molemolona ˻mawa tenge mele Tara yuni aku-sipe tenjimbemo˼.” nirimu.

21 ˻Yesusini yambo teko kenjilimelemando ungu-mane aku-sipe sirimu˼ kinie yu molorumuna Pita nondopa omba yu walsipe pilipelie nimbendo: “Ailimu, nanga angenu tene na wale nambepa tepa kenjimbe kinie na we ‘Manie pupili!’ nimbu siye kolomboye? Wale sepene^y yuni temba mele siye kolopo we molopolie engaki-sipemonga ‘Pundu topili!’ nimbú kinie papuye?” nirimu.^z

22 Yesusini pundu topa nimbendo: “Nane “Wale sepene mindi yuni nu tepa kenjimbe kinie yuni tembama siye kolko altoko pilku naa moloi!” ni naa nikiru. “Wale sepene anderete sependi sepene yuni nu tepa kenjimbe walema pali yu tepili, siye kolko we moloi!” nikiru.

23 “Akumunge Pulu Yemo ye-nomi-kingimu molopa mélema nokolemo^a akumu i-sipe mele:

24 Aku-sipe nirimu kinie kingimuni kou tene-milliene kína mele^b ou pundu angilirimu ye te kumbi-lelko yu molorumuna mengo oringi.

25 Nakolo yu manda aku kou-pundumu tomba aulke te paa naa lerimu-na ailimuni nimbendo: “Kapola, i yemo kinie yunge ambo ambolangoma kinie yunge mélema pali kinie makete teko kou-mone likulie^c koumu mengo ongo pundu tonjengi!” nirimu.

26 Aku nirimuna pilipelie kendemandemo ye-nomimunge kumbikerena koporongo langopa tamalu pepa mawa tepalie nimbendo: “Nuni na kondo kolko we nokoko moloyo! Nane pundu pali tombo.” nirimu.

27 ˻Kanu-kinie˼ ye-nomimuni yunge kendemandemo paa kondo kolopa yu kendemandemo-kinie pundu angilirimuma pali “Yu tepili! Altoko pundu naa tani!” nimbe kamu siye kolopa yemo ka naa sipe “We pui!” nirimu.

28 Nakolo ˻ka singí teringi˼ kendemande kanumu yu pena pupe kendemande te yunge kou wane anderete kina mele sirimumu kanopalie, yu pupe yunge nomine ambolopa ‘Yu kolopili!’ nimbe ambolopa elkele lakurupelie “Nanga kou sirindumu pundu toi!” nirimu.

29 Aku terimu kinie yuni tomba terimu yemo yunge kumbikerena koporongo langopa tamalu pepa mawa tepalie nimbendo: “Nuni na kondo kolko we nokoko moloyo! Nane pundu pali tombo.” nirimu.

30 Nakolo kendemande lupemone “Mólo! Paa i-sili pundu tani!” nimbelie “Nu ka-ulkena pekolie pundu toko pora siku wendo wani!” nimbe yu ka sipe ka-ulkena panjirimu.

31 Yuni aku terimu mele kendemande wemane kanokolie ene konopu keri panjiku puku enenga ye-nomimundu kendemandetolo teringili kanoringi mele kondi toringi.

32 Kanu-kinie ye-nomimuni aku niringi pilipelie kendemande yunge pundu “Naa toko we pui!” nirimu kendemande kanumu “Yando oi!” nimbelie yundu nimbendo: “Kendemande kerimu, nuni na tondolo-munduku mawa tenu-na nu na-kinie pundu paa aili-tepa angilirimumu “Yu tepili, naa toi!” nimbulie we siye kolondu kanumu.

33 Pe nane nu we kondo kolondu mele nuni aku-siku kendemande te nambemuna kondo naa kolonuye?” nirimu.

34 Ye-nomimuni yu mumindili kolopalie ka-ulke nokoko ka-ulkena peringi yamboma teko mindili konjiringi yema yu lipe sirimu. Yuni nimbendo: “Nu mindili nongolie pundu tani! Ou pundu pali toko pora sikulie pe mindi wendo wani! Ou mólo!” nirimu.” ˻nimbe Yesusini nirimu.˼^d

35 ˻Yesusi yuni aku nimbelie ungu-ikumunge pulumu kamu nimbendo:˼ “Aku-sipela, angenalini ene aku-siku teko kenjingí kinie ene kerena mindi “Manie pupili! Siye kolkoro.” we ningu, sike munduku naa kelko, we konopuni pilku molongi liemo, ˻kendemandemonga ye-nomimuni kendemandemo tepa kenjirimu mele˼ mulú-koleana molemo Tarane siye na kolko we konopuni pilku molonge yambo kanuma enenga ulu-pulu-kerime ‘Manie naa pupili!’ nimbe, we siye naa kolopa kanu ulu-pulu-kerimenga “Mindili nangi!” nimbe aku tembala.” nirimu.^e