Yemane Enenga Amboma “Kamu Paa!” Nilimelemonga Ungu Tea
19
(Kolomongo-kanga wane. Pulu Yemonga Ungumu.)
Yesusini aku-sipe unguma nimbe pora sipelie nirimumuni, kolea Gallilli disiriki mundupe kelepa kolea Judia-Disiriki pupe No-Jodane lumbilipe nekendo purumu.
2 Kanu-kinie yambo aisili yu lombili oringi kinie yuni kuru torumu yamboma tepa konde lirimu.
3 Parisi-ye mareb yu molorumuna ongo ‘Yu nambolka nimbénje? Nimbe kenjimbenje manda manjipu piliemili!’ ninguc yu walsiku pilkulie ningindu: “Ye tene yu-yuyu pilipelie yunge ambomo “Kamu pui!” nimbé kinie kapola temba molo aku temba kinie ungu-mane te pulue tombaye?” niringi.
4 Yuni anju pundu topa nimbendo: “Pulu Yemone ungu nirimu yunge bokuna molemo mele kanoko kambu naa tongiye?
Ou-pulu-pulu, Pulu Yemone mélema tepalie,
yuni yambo tembando
yemo kinie ambomo kinie tepalied Ou-Pulu-Pulu 1:27, 2:21-22
5 nimbendo:
“Aku-sipu tendumunge ye tene ambo te lipelie
yunge anumu lapatolo mundupe kelepa
yunge ambomo kinie eltelte teluna tapu toko peko
kangi telumu mele ˻molkolo
eltenga konopu teluna pupili˼ molongele.”e Ou-Pulu-Pulu 2:24
nirimu kanumu naa pilíngiye?
6 Pulu Yemone aku-sipe nirimu-na ye te ambo te limo kinie kangi telumu mele molembele-na elte altoko talo mele naa molembele, elte yambo telumu mele molembele. Yambo telumu molembele kene Pulu Yemone ambo ye talo ‘Telumu molangili!’ nilimo ambo yetolo yambo tene liku lupe-lupe naa mundengi! Aku tengi liemo kapola naa temba.” nirimu.
7 Aku-sipe nirimu kinie enene ningindu: “Aku liemo Mosisini ungu-mane te sirimu mele nambemuna sirimuye? Mosisini nimbendo:
“Ye tene yunge ambomondo
‘Kamu pupili!’ nimbe makorombando
ambomo “Kamu pui!” nimbé mele
pepá te topa ambomo sipelie
yundu “Kamu pui!” nimbe aku tepili!”
nirimu kanumu.”f niringi. Ungu-Manema 24:1-4
8 Yesusini nimbendo: “Mosisini sike aku-sipe nirimu nakolo ene kara puku Pulu Yemone ambo yetolo kapola-kapola molongele mele ungu-mane sirimumu liku su siku naa piliringi-ne yuni “Aku teangi!” nirimu. Nakolo ou-pulu-pulu, ˻Pulu Yemone mélema kokele tepa mimi terimu kinie˼, ungu-mane aku-sipe te naa perimu kene
9 nane ene i-sipu nimbu sikiru: “Ye tene yunge ou limo ambomo makoropa “Kamu pui!” nimbelie kelepa ambo te limo kinie aku yemone wa-ulu-kerinele telemo. Yemonga ambomone ye te-kinie wa ulu-kerinele temu liemo manda topa makoromba. We mólo! (“Pui!” nimbe makorolemo ambomo pe ye tene yu limo kinie kanu yemo kepe wa ulu-kerinele telemóla.)”g nikiru.” nirimu.
10 ˻Yuni aku nirimu kinie pilkulie˼ yu lombili andoli yemane yundu ningindu: “Ye tene ambo limo kinie nuni nikinu mele aku-siku molongele mele ungu-mane te pelemo liemo ye te ambo naa lilkenje papu.” niringi.
11 Nakolo Yesusini pundu topa nimbendo: “I ungu˻-mane sikirumu˼ yambomane pali manda naa pilku lingí. ˻Pulu Yemone˼ mako topa tondoloma simbe yamboma mindi manda ˻amboma ye naa puku yema ambo naa liku˼ tenge.
12 Ye mare anupilini melemele kinie amboma kinie teluna tapu toko peko ulu-kerime tenge enge te naa pelemo. Ye mare ‘Amboma kinie teluna naa peangi!’ ningu enenga láka tonjilimele.h Marene eneno ‘Ye-nomi-kingi Pulu Yemonga yema molopo yunge kongonoma manjipu tenjemili!’ ningu ene-eneno mi lelko ambo naa limele. I ungumu yambo pilku lingí yamboma piliengi!” nirimu.i
Yesusini Ambolangomando “Pulu Yemone Ene Sewe Anjipili!” Nirimu Temanemoj
13 Kanu-kinie yambomane enenga ambolangoma ‘Yesusi yunge kimuni ambolopa Pulu Yemo-kinie enenga popo topa mawa tenjipili!’ ningu yu molorumuna mengo oringi. Nakolo yu lombili andolimene iri toko ˻“Naa mengo wai!”˼ niringi.
14 ˻“Mólo!” niringi kinie˼ kanopalie Yesusini nimbendo: “Pulu Yemo ye-nomi-kingimu molopa nokolemo yambo-talapek akumu i ambolangoma mele molemele yamboma enenga yambo-talapemo kene enene i ambolangoma na moliona wangi pipi siku “Mólo!” naa niei!” nirimu.
15 Aku nimbelie yuni ambolangoma ˻kondo kolopa˼ yunge kimuni ene telu-telu nimbe ambolopalie kanu koleana mundupe kelepa purumu.
Ye Kamako Tenga Temane Tel
16 Walse ye te Yesusi molorumuna omba yundu walsipe pilipelie nimbendo: “Ungu Mane Sílimu, na nambolka ulu peangamo tembo kinie konde molopa konjipe mindi puli ulu-pulumu limbuye?” nirimu.m
17 Yesusini yundu nimbendo: “Nuni na nambemuna ulu-peangamondo walsiku pilkinuye? Yambo telu mindi peanga molemo. Nuni ‘konde molopo konjipu mindi puli ulu-pulumu limbu.’ konopu lenu liemo ˻Pulu Yemonga˼ ungu-mane ˻Mosisini yando nimbe sirimuma˼ tenge panjiku teko molani!” nirimu.
18 Yemone walsipelie nimbendo: “Aku ungu-manemanga témando nikinuye?” nimbe walsirimu kinie
Yesusini pundu topa nimbendo:
“ “Yambo toko naa konjengi!” nimbe,
“Ambo ye púlime molo ye ambo lílime
yambo lupema-kinie wa ulu-kerinele naa teangi!” nimbe,
“Mélema wa naa liengi!” nimbe,
“Yambomanga kote kolo toko naa tenjengi!” nimbe,
19 “Aminieli lanieli kinie teko konjiku,
ungu ningí mele pilku liku teko molangi!” nimbe,n Wendo Oringi 20:12-16
“Ene-eneno yu-mele-mele konopu monjiku
enenga kangimu eneno kondo kolko nokolemele mele
aku-sikula pulu lemo yamboma
konopu monjiku nokoko molangi!”
nimbe,o LLipai 19:18
ungu-mane akuma sirimu pelemo kanumu.” nirimu.
20 Aku nirimu kinie pilipelie kanu kango-yemone nimbendo: “Na kanu ungu-manema pali pilipu lipu tepo molio. Pe kinié nambolka uluri olandopa teamboye?” nimbe walsirimu.
21 Yesusini yundu pundu topa nimbendo: “Nu ‘kamu ye sumbi-nílimup molambo!’ konopu lenu liemo nu puku nunge méle nosilinoma pali kou-mone li-pukulie, kou-mone linime yambo-koropama moke teko sikulie na lombili oi!” nirimu. “Nunge ˻mana-˼ mélema aku teni kinie mulú-koleana nunge méle aisili lemba.” nirimu.q
22 Kanu kango-yemo méle paa aisili nosirimu-na Yesusini yundu aku nirimu kinie pilipelie yu konopu keri panjilipe anju purumu.
23 ˻Aku terimu-na kanopalie˼ Yesusini yu lombili andolimendo nimbendo: “Pulu Yemo ye-nomi-kingi molopa nokolemo koleana suku pungíndu yambo-kamakoma paa mindili siku suku pungí.
24 Enendo altopo nikiru: “Kongi-kemele ˻kongi paa aili ter nakolo˼ kalé suru-toline suku pumbendo mindili kanga-mele sipelie pumbe. Nakolo yambo kamakoma Pulu Yemo ye-nomi-kingi molopa nokolemo koleanas suku pungíndu mindili paa aili mele siku pungí.” nikiru.” nirimu.
25 Aku nirimu kinie pilkulie yu lombili andolime paa mini-wale munduku suru-ningulie anju-yando ungu-mele tekolie ningindu: “Aku liemo mindili nolemelka aulkena nae manda wendo pupe, molopo konjímulu aulkena pumbeye?t Te mólonje.” niringi.
26 Yesusini ene nemo-nemo nimbe kanopalie nimbendo: “Sike yamboma eneno manda mólo, nakolo Pulu Yemone manda tenjimbe. Pulu Yemo yuni uluma pali kapola telemo. Ulu te yuni manda naa temba te mólo!”u nirimu.
27 Yuni aku nirimu kinie pilipelie Pitane yundu nimbendo: “˻Pe olio-kinie nambolka uluri wendo ombáye?˼ Olio olionga mélema pali mundupu kelepo nu lombili purumulu kene méle nambolka mélema limulúye?” nirimu.
28 Yesusini nimbendo: “Nane enendo paa sike nimbu sikirumu: “Pe ˻Pulu Yemone˼ mélema pali ‘konde pupili!’ nimbé kinie Manie Omba Mana-Ye Au Lerimu Yemo yunge ye-nomi-kingi polo pa tondolo teline molopa yamboma nokomba kinie, ene na lombili-andolemele yema pea ye-nomi-kingi polo engaki-rureponga molkolie ningímuni, Isirele-yambo talape rurepov nokonge.w” nikiru.
29 Yambo na konopu monjiku nanga kongono tenjingindu enenga ulkema, angenupilime, kemulupilime, anupilime, lapalime, ambolangoma, koleama, akuma munduku keleringi ˻mele kelenge˼ yamboma pali, ya mana paa olandopa méle aisili likulie, konde molko konjiku mindi puli ulu-pulumu lingíla.x
30 Nakolo kinié aili molemele yambomanga aisili pe ˻Pulu Yemo ye-nomi-kingi molopa nokomba koleana˼ yambo koropama molonge; kinié koropa pupili molemele yamboma pe yambo ailime molonge.” ˻nimbe Yesusini nirimu.˼y