2 “Kongono teangi!” nimbe lirimu yemando nimbendo: “Kinié tenge walemonga ene kou-mone tene-kina tene-kina nimbu^c méle kalombo.” nirimu kinie enene “Kapola.” niringi kinie yuni ene yunge unju-waene poniena “Kongono teangi pai!” nimbe ene lipe mundurumu.

3 Pe, ipulueli-ou nani-killoko mele terimu kinie, yu kelepa yamboma máku toringi koleana pupe ye mare akuna we angiliringi kanopalie

4 enendo nimbendo: “Ene kepe ˻nanga˼ unju-waene poniena kongono tenjengi payo! Pe nane ene kou kapola-mele kalombo.” nirimu

5 kinie ene puringi.

6 Ipupini pape-killoko mele terimu kinie ˻altopa˼ pupe ye mare we angiliringi kanopalie enendo nimbendo: “Enamanga pali kongono na teko ya inie nambemuna we angilimeleye?” nirimu.

7 Enene yundu ningindu: “Ye tene olio kongonona naa limu-na we angilimolo.” niringi.

8 Ena pora nirimu kinie unju-waene ponie pulu yemone yunge kongono nokoli yemondo nimbendo: “Kongono tekemele yema ‘sukundu wai!’ ningu ene kongono tengimunge méle kalonindu paa akilku ongi yema pulu-monjiku méle kaloliku puku kumbi-lelko ongi yema paa akilku mele kaloi!” nirimu.

9 ˻Aku nirimu kinie˼ ipupini pape-killoko mele terimu kinie “Kongono tenjengi!” nimbe lirimu yema ˻kumbi-lelko˼ ongo tene-kina tene-kina nimbe sirimu liringi.

10 Akilku ongo kongono tenjiringi yema kou aku-siku liringi kanokolie kumbi-lelko ongo kongono tenjiringi yema ongolie ‘Olio kou olandopa-mele limulú.’ konopu leringi nakolo ene tene-kina tene-kina nimbe sirimu liringila.

11 Likulie enene ponie pulu yemondo iri tokolie ningindu:

12 “Akilku ongi yema ena telu manjiku kongono tengi, olio ipulueli-ou ombo kongono aili-tepo temulu, ena aili tomumuni olio paa nomu kanumu, nakolo ene kinie olio kinie kou kapola-kapola teko sikinumu, kapola naa tekemo.” niringi.

13 Yuni enenga ye tendo pundu topa nimbendo: “Kangomo, nane nu tepo naa kenjikiru. “Tene-kina simbu.” nindu kinie “Kapola.” ninu kanumu.

14 Kou sikirumu liku mengo puyo! Nanga konopuni mindi pilipulie akilipe omu yemo nu sikiru mele yu aku-sipu sindu.

15 Nanga nosilio mélemanga konopuni pilipulie manda naa temboye? Molo pe ongi yema kou aili-tepo sindumunge nu konopu keri panjikinuye?” nirimu.” ˻nimbe Yesusini nirimu.˼

16 ˻Ungu-iku akumu topa pora sipelie ungu-ikumunge pulumu kamu nimbendo:˼ “Aku-sipela, akilku onge yamboma ˻Pulu Yemone nokolemo talapena sukundu˼ kumbi-lelko pungí; kumbi-lelko onge yamboma akilku pungí.” nirimu.^d

17 Kanu-kinie Yesusi kolea-aili Jerusalleme pumbe purumu kinie yu lombili andoli engaki-rurepo^f ‘na kinie ene kinie oliolio molamili!’ nimbe ene lipe anju memba pupelie enendo nimbendo:

18 “Pilieme! Olio Jerusalleme pumulú pukumulu.^g Akuna pumulú kinie Manie Omba Mana-Ye Au Lerimu Yemo ye tene ‘Tangi!’ nimbe Pulu Yemo popo tonjili ye-ailime kinie, Pulu Yemonga ungu-manemanga puluma pilku mane silimele yema kinie,^h lipe simbe. Kanu-kinie enene yu kote tenjiku ‘Yu kolopili tangi!’ ningulie

19 Juda-ye naa molemele yema liku singí.ⁱ Kanu-kinie kanu yemane yu ungu-taka tonjiku, ka-pulsene toko, ‘Yu kolopili!’ ningu unju-perana uku toko panjingí. Kolopalie wale yepoko-sipemonga Pulu Yemone yundu ‘Lomboroko ola moloi!’ nimbé.” nirimu.

20 Kanu-kinie Seperi malo Jemisi kinie Jonotolonga anumu Yesusi molorumuna omba koporongo langopa yundu “ ‘Nu ulu te teani!’ nimbu mawa tembo okoro.” nirimu kinie

21 yuni yundu nimbendo: “Nambolka uluri ‘nane tenjembo!’ ningu nikinuye?” nirimu.

22 Yesusini enendo nimbendo: “Mawa tekemele mele ene pilku naa konjikimili. Na no-mingine no nondopo nombomo elte manda nongeleye?”^l nirimu kinie

23 Yuni eltendo nimbendo: “Na no-mingine no nombomo pe elte paa sike nongele nakolo nane elte “Nanga wangutolonga ongo molangili!” nimbumu kapola naa temba. Tarane yuyu akuna molongeletolo koronga mako torumu.” nirimu.

24 Angenungulu ˻Jemisi kinie Jonotolone ‘Yesusinge wangutolonga molambili!’˼ ningu mawa teringili mele pilkulie lombili andoli ye rureponga talo^m ˻wemane˼ elte-kinie konopu keri panjiringi.

25 Kanu-kinie Yesusini ene “Wai!” nimbelie nirimumuni, enendo nimbendo: “Olio Juda-yambomanga ulsu molemele yambo talapemanga ye-nomime enenga yamboma tondolo-munduku nokoko kongono enge nilime alieli silimele. Ye imbi ola molemo yema enenga yamboma ‘Mindili nangi!’ ningu nokolemele. Yambomane enenga ye-nomimenga unguma liku su singí aulke te naa lemo. Aku-siku telemele mele enene pilimele kanumu.

26 Nakolo ˻we-yambomanga ye-nomimene enenga yamboma tondolo-munduku nokolemele mele na lombili andoli yema˼ ene-eneno aku-siku anju-yando naa teangi! Enenga ye te ‘Na imbi olandopa molopili! Na ye-ailimu molambo!’ nimbé yemo enenga kongono tenjili yemo molopili!

27 ‘Na enenga ye-nomimu molopo ene nokambo!’ nimbé yemo enenga kongono kendemande tenjili yemo molopili!ⁿ

28 Aku-sipela, Manie Omba Mana-Ye Au Lerimu Yemo^o kepe ‘Yambomanga ye-ailimu molopo ene nokambo. Enene nanga kongono tenjili kendemande yamboma molangi!’ nimbe naa orumu. ‘Yambomanga kongono tenjili kendemande-yemo molopo ene lipu taponjipu, ulu-pulu-kerimene ene ka sipe nokolemo mele naa tepili kapola molangi kene na yambo aisilinge nimbu pundu tonjipu nanga kangimu sipu, enenga kolo wangopo kolonjembo!’^p nimbe orumu.” nirimu.

29 Yesusi kinie yu lombili andolime kinie ene kolea-aili Jeriko munduku kelko pungí puringi kinie we-yambo aisili yu lombili puringi.

30 Kanu-kinie mongo keri lerimu ye talo aulke-alselsena molkolo Yesusi omba purumu mele pilkululie yundu tondolo ru ningu walsikulie ningilindu: “Ailimu, ˻Ye-Nomi-Kingi˼ Depisini Kalopa Lirimu Yemo,^r olto kondo koloi!” niringili.

31 Yambomane elte iri toko “Ungu naa nili taka-lelko molale!” niringi.

32 Yesusi we angilipelie “Elte wale!” nimbelie eltendo nimbendo: “Nane elte nambe-teambo konopu lekembeleye?” nirimu kinie

33 mongo keri lerimu yetolone ningilindu: “Ailimu, ‘oltonga mongotolo ‘Altopa umbu-mongo angilipili!’ nieni!’ konopu lekembolo.” niringili.

34 Kanu-kinie Yesusini elte kondo kolopa mongona ambolorumu kinie elte tamburembu mongoma peanga lerimu, mélema kanokololie, Yesusi lombili puringili.